Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Դեկտեմբերի 28-ին Արդարադատության ակադեմիայի ռեկտոր Սերգեյ Առաքելյանը ներկայացրեց ակադեմիայի գործունեության վերաբերյալ տարեվերջյան ամփոփ հաշվետվություն: Ելույթի ընթացքում ռեկտորն ամփոփեց աշխատանքային տարին՝ արձանագրելով արվածն ու ուրվագծելով անելիքները: Իսկ աշխատանքներ կատարվել են ակադեմիայի գործունեության նպատակների ու խնդիրների կենսագործման գրեթե բոլոր ուղղություններով: Աշխատանքներն ուղղված են եղել խթանելու ակադեմիայի առաջընթացը, ապահովելու ուսումնական գործընթացի բարելավումն ու զարգացումը և կրթության որակի բարձրացումը։

Ռեկտորի խոսքով՝ 2016 թվականին Արդարադատության ակադեմիայում շուրջ 2000 ունկնդիր անցել է մասնագիտական պատրաստում, վերապատրաստում կամ հատուկ ուսուցում: Շուրջ 400 դատավոր և դատախազ վերապատրաստվել է հեռաուսուցման դասընթացների շրջանակում: Ակադեմիայի գիտահետազոտական վարչության կողմից մշակվել են մի շարք նոր առարկայական ծրագրեր: Հաշվետու տարում ակադեմիան ձեռք է բերել նոր գործընկերներ, ստորագրել նոր համաձայնագրեր, հիմք դրել նոր համագործակցությանը:

Հատկանշական է, որ ռեկտոր Սերգեյ Առաքելյանի խոսքն ուղղված էր ոչ միայն կատարված աշխատանքներին, այլև զարգացման ուղղությամբ նախանշված անելիքներին: 2017-ի ծրագրերը հավակնոտ են, բայց և իրատեսական: Դրանք վերաբերում են ակադեմիայում կազմակերպվող վերապատրաստումներին (իրավակիրառ պրակտիկային ներկայացվող պահանջների միասնականությունն ապահովելու նպատակով), համագործակցության շրջանակներն ընդլայնելուն, համակարգչային լսարան ստեղծելուն, նոր դասընթացներ ներդնելուն, ինչպես նաև տարածքի բարեկարգմանը, վերանորոգման աշխատանքների իրականացմանը, անհրաժեշտ գույք, տեխնիկական միջոցներ, սարքավորումներ ձեռքբերելուն և այլն:

Գործունեության հաշվետվությունը ներկայացնելուց հետո ռեկտորը բազմամյա, բարեխիղճ աշխատանքի և ակադեմիայի զարգացման գործում նշանակալի ներդրման համար «Շնորհակալագրեր» հանձնեց դասընթացավարներ Դավիթ Ավետիսյանին, Հովհաննես Ղուկասյանին, Վարուժան Աբելյանին և ակադեմիայի տարբեր ստորաբաժանումների աշխատակիցներ Ռոբերտ Փոլադյանին, Գնունի Բալայանին, Ֆլորա Մելքոնյանին, Ալեքսանդր Փիլոսյանին: «Շնորհակալագրեր» ստացան նաև դասընթացավարներ Արա Ղազարյանն ու Վահե Ենգիբարյանը աշխատանքային արդյունավետ համագործակցության և ակադեմիայի զարգացման գործում նշանակալի ներդրման համար:

Դեկտեմբերի 22-ին ՀՀ քննչական կոմիտեում ավարտական դիպլոմներ ստացան և հրամաններով աշխատանքի նշանակվեցին Արդարադատության ակադեմիայի 2016 թվականի քննիչների թեկնածությունների ցուցակում ընդգրկված ունկնդիր-շրջանավարտները:

Հանդիսությանը մասնակցում էին ՀՀ քննչական կոմիտեի նախագահ Աղվան Հովսեփյանը, Արդարադատության ակադեմիայի ռեկտոր Սերգեյ Առաքելյանը, Քննչական կոմիտեի կոլեգիայի անդամներ, հյուրեր: Ակադեմիայի 19 շրջանավարտներից 17-ը, արդեն որպես նորանշանակ քննիչներ, նաև հանդիսավորությամբ երդվեցին:

Դիմելով ներկաներին՝ ՀՀ քննչական կոմիտեի նախագահը նշեց, որ լավ ավանդույթ է ձևավորվել Ակադեմիայի քննիչի թեկնածու շրջանավարտներին ավարտական դիպլոմների հետ միասին հանձնել նաև աշխատանքի նշանակման հրամանները:

Աղվան Հովսեփյանն իր խոսքում հատուկ շնորհակալություն հայտնեց Արդարադատության ակադեմիայի ռեկտորին և աշխատակազմին քննիչի թեկնածուների ուսումնական գործընթացը պատշաճ կազմակերպելու և անցկացնելու, իսկ փորձառու քննիչներին՝ ունկնդիրների պրակտիկան ղեկավարելու համար:

<<Ստանալով դիպլոմները՝ դուք այսօրվանից կրելու եք նաև քննիչի բարձր կոչումը: Ցանկանում եմ՝ ձեր գիտելիքները կարողանաք ներդնել պրակտիկայում և գործերի քննության նոր մշակույթ ձևավորել>>,-դիմելով շրջանավարտներին՝ ասաց ՀՀ քննչական կոմիտեի նախագահը:

Արդարադատության ակադեմիայի ռեկտոր Սերգեյ Առաքելյանը շնորհակալություն հայտնեց Աղվան Հովսեփյանին բարձր գնահատանքի համար և նշեց, որ ցանկացած կառույցի նշանակությունը և գործունեության արդյունավետությունը գնահատելու համար առաջին հերթին պիտի կարևորել նրա գործունեության արդյունքը: Տվյալ դեպքում ակադեմիայի գործունեության արդյունքը շրջանավարտներն են, և ակադեմիայի անձնակազմը լիահույս է, որ նրանք բարձր են պահելու նաև Ակադեմիայի պատիվը:

<<Իմ համոզմամբ՝ հենց քննչական գործունեությունն է այն հիմքը, որի վրա խարսխվում է արդարադատության ողջ համակարգը: Այդ առումով շատ պատասխանատու, բարդ մասնագիտություն եք ընտրել>>,-նշեց ռեկտորը՝ համոզմունք հայտնելով, որ Արդարադատության ակադեմիայում ձեռքբերած գիտելիքները կնպաստեն քննչական գործունեության որակի բարձրացմանը:

Տեղեկացնենք, որ Արդարադատության ակադեմիայում քննիչների թեկնածուների մասնագիտական պատրաստումը տևել է 8 ամիս՝ 2016 թվականի ապրիլի 18-ից դեկտեմբեր 16-ը՝ ներառյալ 20 շաբաթ տևողությամբ փորձաշրջանը: 

Դեկտեմբերի 5-ին Արդարադատության ակադեմիա այցելեցին Միջազգային իրավական համագործակցության գերմանական հիմնադրամի (IRZ) հարավկովկասյան բաժնի ղեկավար Թերեզա Թալհամերն ու հայաստանյան ծրագրերի համակարգող Նելլի Թումասյանը:

Հանդիպման սկզբում, ողջունելով հյուրերին, Արդարադատության ակադեմիայի ռեկտոր Սերգեյ Առաքելյանն ընդգծեց երկու կառույցների միջև համագործակցության անհրաժեշտությունը, նաև անդրադարձավ փոխգործակցության շրջանակներում առաջիկայում նախանշվող ծրագրերին: Մասնավորապես՝ ռեկտորն առաջարկեց իրականացնել համատեղ ծրագրեր, որոնք ուղղված կլինեն Ակադեմիայում վերապատրաստվող դատավորներին, դատախազներին և քննիչներին՝ այդ համատեքստում կարևորելով գերմանական փորձի ներկայացումը, ունկնդիրների մոտ պրակտիկ հմտությունների ամրապնդումը, նոր մեթոդական ուղեցույցերի հրատարակումը: Ռեկտորի առաջարկով՝ միջազգային խորհրդատվական աջակցությունն առավելապես ուղղված կլինի պատժի նշանակման առանձնահատկություններին, խոցելի խմբերի հետ տարվող աշխատանքում պրակտիկ հմտություններին, վիճելի նախադեպային որոշումներին և այլն:

Կարևորելով IRZ-ի հետ համագործակցության ամրապնդումը՝ Սերգեյ Առաքելյանն առաջարկեց նաև առկա համագործակցությունն ապագայում իրավական հիմքերի վրա դնել:

Հանդիպման ավարտին Միջազգային իրավական համագործակցության գերմանական հիմնադրամի (IRZ) հարավկովկասյան բաժնի ղեկավար Թերեզա Թալհամերը նշեց, որ ներկայացված ծրագրերը կքննարկվեն կառույցի կողմից, և հնարավորության սահմաններում աջակցություն կցուցաբերվի դրանց իրականացմանը:

Դեկտեմբերի 1-ին Արդարադատության ակադեմիա այցելեց և ռեկտոր Սերգեյ Առաքելյանի հետ հանդիպում ունեցավ Եվրոպայի խորհրդի երկարաժամկետ փորձագետ Մարտին Սեդոնը (Մեծ Բրիտանիա): Փորձագետը Հայաստանում է <<Աջակցություն Հայաստանում պրոբացիոն ծառայության ստեղծմանը>> ծրագրի շրջանակում՝ խորհրդատվական բնույթի քննարկումներ անցկացնելու նպատակով:

Մարտին Սեդոնը հանդիպման ընթացքում խոսեց պրոբացիոն ծառայության դերի և էլեկտրոնային մոնիթորինգի սարքավորումների գործածության մասին: «Էլեկտրոնային մոնիթորինգը» ժամանակակից տեխնիկայի և տեխնոլոգիաների միջոցով հսկողությունն է քրեական արդարադատության գործընթացում ներգրավված անձի գտնվելու վայրի, տեղաշարժի և վարքագծի նկատմամբ: Մոնիթորինգն իրականացվում է անձին ամրակցված հեռակառավարվող սարքավորման միջոցով: Փորձագետը ներկայացրեց էլեկտրոնային մոնիթորինգի ոլորտում դրական փորձը, դրա կիրառությունը եվրոպական երկրներում, մասնավորապես՝ Մեծ Բրիտանիայում:

Մ. Սեդոնին հետաքրքրում էր Հայաստանի դատավորների մոտեցումները պրոբացիոն ծառայության նպատակահարմարության վերաբերյալ:

Ռեկտորը ներկայացրեց Արդարադատության ակադեմիայում անցկացվող դատավորների վերապատրաստումներից հետաքրքրական մանրամասներ ու նաև ապագայում նախանշված ծրագրեր:

Փորձագետը ներկայացրեց հունվարից Հայաստանում պիլոտային ծրագրի շրջանակում կիրառվելիք տնային ռեժիմի պայմաններում էլեկտրոնային մոնթորինգի սարքավորումներից մեկը, դրա կիրառման ձևերն ու պայմանները, առավելություններն ու թերությունները:

<<Սարքավորումները թանկարժեք են, բայց հուսալի և լայնորեն կիրառվում են եվրոպական 21 երկրներում, նաև Միացյալ Նահանգներում>>,-նշեց ԵԽ փորձագետը՝ ավելացնելով, որ ազատազրկման վայրերը կբեռնաթափվեն, եթե դատավորներն իրենց ավանդական մոտեցումները փոխեն:

Ակադեմիայի ռեկտոր Սերգեյ Առաքելյանը շնորհակալություն հայտնեց հյուրին հետաքրքիր քննարկման և օգտակար տեղեկատվության համար:

Հանդիպման ավարտին փորձագետը ակադեմիայի գրադարանին նվիրեց <<Էլեկտրոնային մոնիթորինգի ստանդարտները և էթիկական հարցերը>> ձեռնարկը:

Արդեն ավանդույթ է դարձել Արդարադատության ակադեմիայում ԵՊՀ իրավագիտության ֆակուլտետի ուսանողներին հյուրընկալելը: Ֆակուլտետային ուսանողական գիտական ընկերության նախաձեռնությամբ բակալավրիատի և մագիստրատուրայի մի խումբ ուսանողներ այսօր այցելեցին Արդարադատության ակադեմիա, հանդիպեցին ռեկտոր, իրավաբանական գիտությունների դոկտոր, պրոֆեսոր Սերգեյ Առաքելյանին:

Ուսանողների առաջարկով հանդիպումն անցավ հարց ու պատասխանի ձևաչափով: Հանդիպման հենց սկզբում ապագա իրավաբաններից շատերը նշեցին, որ ցանկություն ունեն ապագայում դառնալ Արդարադատության ակադեմիայի ունկնդիր՝ ընդգրկվելով դատավորի, դատախազի կամ քննիչի թեկնածությունների ցուցակներում:

Ռեկտոր Սերգեյ Առաքելյանը ողջունեց համալսարանականներին և մանրամասն ներկայացրեց ակադեմիայի գործունեությունը: Ռեկտորը պատասխանեց ուսանողներին հետաքրքրող տարաբնույթ մի շարք հարցերի, որոնք վերաբերում էին ընդունելությանը, ուսումնառությանը, պրակտիկային, քննաշրջանի կազմակերպմանը և այլն:

Հանդիպման ավարտին ակադեմիայի ռեկտոր Սերգեյ Առաքելյանը հորդորեց ուսանողներին լավ սովորել, լինել ուժեղ և վստահ, ճիշտ կողմնորոշվել աշխատանքի ընտրության հարցում, որպեսզի հետագայում սիրով աշխատեն և չհիսաթափվեն բարդություններից:

Ուսանողներն այցի ավարտին ցանկություն հայտնեցին լուսանկարվել ակադեմիայի շենքում բոլորովին վերջերս տեղադրված արդարության ոլորտում կրթությունը խորհրդանշող արձանի մոտ:

Արդարադատության ակադեմիայում վերապատրաստում անցած ՀՀ հատուկ քննչական ծառայության քննիչների համար կազմակերպվել է լրացուցիչ դասընթաց <<Խոշտանգման և վատ վերաբերմունքի վերաբերյալ հայտարարությունների քննությունը և կյանքի իրավունքին առնչվող գործերը>> թեմայով: Առաջին դասընթացն անցկացվեց նոյեմբերի 26-ին՝ Հատուկ քննչական ծառայությունում: Երկրորդը՝ նախանշված է դեկտեմբերի 3-ին: Հատկանշական է, որ այս վերապատրաստումներն անցկացնում են Արդարադատության ակադեմիայի այն դասընթացավարները, որոնք ամիսներ առաջ հաջողությամբ ավարտել են Եվրոպական միության և Եվրոպայի խորհրդի համատեղ ծրագրի շրջանակում անցկացված վերապատրաստողների վերապատրաստումը:

Դասընթացի ընթացքում մասնակիցները քննարկել են մի շարք հարցեր, որոնք առնչվում են կյանքի իրավունքին, դրա բժշկական ասպեկտներին, պետության պարտավորություններին, խոշտանգման և անմարդկային կամ նվաստացուցիչ վերաբերմունքի արգելքին, վատ վերաբերմունքի այլ ձևերին, մարդու իրավունքների միջազգային համակարգին և Հայաստանի Հանրապետության համար դրա նշանակությանը, արդյունավետ քննությանը, հանրային վերահսկողությանը և այլն:

Վերապատրաստման ընթացքում մասնակիցներին է տրամադրվել Եվրոպայի Խորհրդի հայաստանյան և միջազգային փորձագետների կողմից մշակված նոր դասընթացի նյութերն ամփոփող ձեռնարկը, այն է՝ <<Կյանքի իրավունքին, խոշտանգումների և վատ վերաբերմունքի այլ ձևերի արգելքին առնչվող գործերի քննությունը>>: Ձեռնարկը հեղինակել են Սերգեյ Առաքելյանը և Ջուլիա Կոզման:

Տեղեկացնենք, որ վերոնշյալ վերապատրաստումներն իրականացվում են «Աջակցություն Հայաստանում քրեական արդարադատության համակարգի բարեփոխումներին և պայքար վատ վերաբերմունքի և անպատժելիության դեմ» Եվրոպական միության և Եվրոպայի խորհրդի համատեղ ծրագրի շրջանակում:

Նոյեմբերի 24-ին ՀՀ քննչական կոմիտեում տեղի ունեցավ քննիչների թեկնածությունների ցուցակում ընդգրկված՝ Արդարադատության ակադեմիայի 26 ունկնդիր-շրջանավարտների դիպլոմների հանձնման հանդիսավոր արարողությունը: Միջոցառմանը ներկա էին ՀՀ քննչական կոմիտեի նախագահ Աղվան Հովսեփյանը, Արդարադատության ակադեմիայի ռեկտոր Սերգեյ Առաքելյանը, Քննչական կոմիտեի կոլեգիայի անդամներ, հյուրեր:

Հանդիսությունը հատկանշական էր այն առումով, որ դիպլոմների հետ միասին քննիչների թեկնածուները ստացան ՀՀ քննչական կոմիտեի տարածքային ստորաբաժանումներում աշխատանքի ընդունվելու մասին ՀՀ ՔԿ նախագահի հրամանները: Ակադեմիայի շրջանավարտներից 24-ը, արդեն որպես քննիչ, այսօրվանից սկսեցին աշխատել: Նորանշանակ քննիչները նաև հանդիսավորությամբ երդվեցին:

Օրենքով սահմանված կարգով՝ քննիչի թեկնածուների մասնագիտական պատրաստումն իրականացվել է Արդարադատության ակադեմիայում: Ուսուցման ընդհանուր տևողությունը շուրջ ութ ամիս էր՝ 2016 թվականի մարտի 1-ից նոյեմբեր 4-ը՝ ներառյալ 20 շաբաթ տևողությամբ փորձաշրջանը: Ուսուցումն իրականացվել է ընդհանուր, հարակից և հատուկ մասնագիտական դասընթացների հիման վրա՝ նպատակ ունենալով ձևավորել ունկնդիրների մոտ քննիչի պաշտոնում գործելու համար անհրաժեշտ կարողություններ և հմտություններ, ինչպես նաև ընդլայնել մասնագիտական գիտելիքները:

Շնորհավորելով շրջանավարտներին՝ ՀՀ քննչական կոմիտեի նախագահ Աղվան Հովսեփյանն իր ելույթում հատուկ ընդգծեց քննիչի աշխատանքում տեսական և հատկապես գործնական գիտելիքների անփոխարինելի դերը:

<<Որևէ անմեղ մարդ չպետք է դատապարտվի, հանցանք գործած որևէ անձ չպետք է խուսափի քրեական պատասխանատվությունից, իսկ դրանց հնարավոր է հասնել միայն օբյեկտիվ քննությամբ, օրենքով սահմանված կարգով ձեռք բերված ապացույցների արդյունքում>>,-նշեց Ա. Հովսեփյանը՝ շեշտելով, որ քննիչը պետք է լինի հետազոտող, ոչ թե հետապնդող:

Արդարադատության ակադեմիայի ռեկտոր Սերգեյ Առաքելյանը նշեց, որ ունկնդիրների համար անցած ուղին բավական դժվար էր, թեպետ քննիչի աշխատանքն ինքնին բարդ ու պատասխանատու է: Այդուհանդերձ, ռեկտորը համոզմունք հայտնեց, որ ակադեմիայի շրջանավարտները ի վիճակի են պատվով իրականացնել իրենց առաքելությունը:

<<Վստահ եմ՝ այսօրվա շրջանավարտները նոր շունչ են հաղորդելու քննչական մարմիների գործունեությանը>>,-նշեց ռեկտորը՝ հավելելով, որ արդարադատության իրականացման հիմքում հենց քննիչի աշխատանքն է:

Հանդիսավոր նիստի ընթացքում ՀՀ քննչական կոմիտեի նախագահը շնորհակալություն հայտնեց Արդարադատության ակադեմիայի ղեկավարությանը՝ քննիչի թեկնածուների մասնագիտական պատրաստումը կազմակերպելու և անցկացնելու համար և ակադեմիայի ռեկտոր Սերգեյ Առաքելյանին պարգևատրեց <<Համագործակցության համար>> մեդալով:

Նոյեմբերի 23-ին <<Ծրագրային համագործակցության կառուցակարգի>> շրջանակներում անկախ փորձագետներ Հարալդ Հարդվինքն (Դանիա) ու Ջեմմա Բինյոլը (Իսպանիա) այցելեցին Արդարադատության ակադեմիա:

Ակադեմիայի ռեկտոր Սերգեյ Առաքելյանը հանդիպեց եվրոպացի փորձագետներին, ովքեր Հայաստանում են կարիքների գնահատում անցկացնելու նպատակով: Հանդիպման ընթացքում մանրամասն քննարկվեցին Եվրոպական Միության և Եվրոպայի խորհրդի հետ համատեղ իրականացվող ծրագրերն ու դրանց արդյունավետությունը:

Նոյեմբերի 16-ին Արդարադատության ակադեմիան հյուրընկալեց ԵՊՀ իրավագիտության ֆակուլտետի ուսանողներին: Նախաձեռնությունը Իրավագիտության ֆակուլտետի ուսանողական գիտական ընկերությանն էր: Ուսանողները ցանկություն էին հայտնել այցելել Արդարադատության ակադեմիա, հանդիպել ակադեմիայի ռեկտոր, իրավաբանական գիտությունների դոկտոր, պրոֆեսոր Սերգեյ Առաքելյանին:

Հանդիպումն անցավ անկաշկանդ մթնոլորտում՝ հարց ու պատասխանի ձևաչափով: Ուսանողները ռեկտորին դիմեցին ակադեմիայի գործունեությանն առնչվող իրենց հետաքրքրող բազմաթիվ հարցերով:

Ռեկտոր Սերգեյ Առաքելյանն ողջունեց ապագա իրավաբաններին և հույս հայտնեց, որ նրանց շարքերում են մեր երկրի ապագա դատավորները, դատախազները, քննիչները:

Ովքեր են Արդարադատության ակադեմիայի դասընթացավարները և ինչ սկզբունքով են նրանք ընտրվում, ինչ էական տարբերություններ կան բուհական և ակադեմիական կրթական համակարգերի միջև, ինչպես են մշակվում ուսուցման պլաններն ու առարկայական ծրագրերը, ինչպես է կազմակերպվում թեկնածուների պրակտիկան, ինչպիսին է շրջանավարտների նշանակման կարգը. այս և բազմաթիվ այլ հարցեր էին հետաքրքրում ուսանողներին:

Հարցերին ի պատասխան՝ ռեկտորը ներկայացրեց Արդարադատության ակադեմիա ընդունվելու կարգը՝ մասնավորապես դատավորների, դատախազների, քննիչների թեկնածությունների ցուցակներում ընդգրկվելու ընթացակարգերը: Ռեկտորը անդրադարձավ նաև ակադեմիայում մասնագիտական պատրաստմանն առնչվող մի շարք հարցերի:

Այցի ավարտին ԵՊՀ ուսանողները երախտագիտություն հայտնեցին հետաքրքիր հանդիպման համար:

Նոյեմբերի 12-ին Արդարադատության ակադեմիայի և ՀՀ կենտրոնական բանկի ֆինանսական դիտարկումների կենտրոնի միջև կնքվեց համագործակցության մասին փոխըմբռնման համաձայնագիր, որը ստորագրեցին Արդարադատության ակադեմիայի ռեկտոր Սերգեյ Առաքելյանը և ԿԲ ֆինանսական դիտարկումների կենտրոնի ղեկավար Դանիել Ազատյանը:

Համաձայնագիրն ամրագրեց փոխադարձ հետաքրքրություն ներկայացնող ոլորտներում համագործակցելու ցանկությունը: Մասնավորապես՝ փաստաթղթի նպատակն է փողերի լվացման և ահաբեկչության ֆինանսավորման դեմ պայքարում ընդգրկված՝ Արդարադատության ակադեմիայի ունկնդիրների մասնագիտական պատրաստվածության կատարելագործումը:

Համագործակցությունը ենթադրում է ակադեմիայի ուսումնական ծրագրերում փողերի լվացման և ահաբեկչության ֆինանսավորման դեմ պայքարի միջազգային-իրավական փաստաթղթերի և ներպետական օրենսդրության վերաբերյալ դասընթացների առարկայական ծրագրերի կազմում, համապատասխան նյութերի մշակում:
Ֆինանսական դիտարկումների կենտրոնի հետ համագործակցության արդյունքում նախատեսվում է նաև մշակել և կազմակերպել հեռաուսուցման դասընթացներ, իրականացնել հետազոտություններ ընդհանուր հետաքրքրություն ներկայացնող ոլորտներում:

Նոյեմբերի 12-ին ՀՀ կենտրոնական բանկի ֆինանսական դիտարկումների կենտրոնը Արդարադատության ակադեմիայի հետ համատեղ անցկացրեց <<Փողերի լվացման գործերի քննությունը>> թեմայով կոնֆերանս: Այն վարում էին Արդարադատության ակադեմիայի ռեկտոր Սերգեյ Առաքելյանը և ԿԲ ֆինանսական դիտարկումների կենտրոնի ղեկավար Դանիել Ազատյանը:
Կոնֆերանսին մասնակցում էին ներկայացուցիչներ ՀՀ դատական համակարգից, ՀՀ գլխավոր դատախազությունից, ՀՀ ազգային անվտանգության ծառայությունից, ՀՀ քննչական կոմիտեից, ՀՀ հատուկ քննչական ծառայությունից, ՀՀ ոստիկանությունից, ՀՀ-ում Ինտերպոլի ազգային կենտրոնական բյուրոյից, ՀՀ պետեկամուտների կոմիտեից, ՀՀ ԿԲ ֆինանսական դիտարկումների կենտրոնից, ՀՀ դատական դեպարտամենտից:
Կոնֆերանսի մեկնարկը տրվեց Արդարադատության ակադեմիայի և ՀՀ կենտրոնական բանկի ֆինանսական դիտարկումների կենտրոնի միջև համագործակցության մասին փոխըմբռնման համաձայնագրի ստորագրման արարողությամբ: 

Ողջունելով կոնֆերանսի մասնակիցներին՝ Դանիել Ազատյանը կարևորեց նման քննարկումներ անցկացնելու փաստը՝ միաժամանակ ընդգծելով, որ Արդարադատության ակադեմիայի և Ֆինանսական դիտարկումների կենտրոնի միջև ստորագրված համագործակցության հուշագիրը կարևոր քայլ է փողերի լվացման դեմ պայքարի արդյունավետության ուղղությամբ:

Արդարադատության ակադեմիայի ռեկտոր Սերգեյ Առաքելյանը նշեց, որ փողերի լվացման դեմ պայքարը լուրջ խնդիր է, և այդ պայքարի ուղղությամբ ցանկացած նախաձեռնություն, որը կնպաստի պայքարի արդյունավետության բարձրացմանը չափազանց կարևոր է և հրատապ: <<Լիահույս եմ, որ մեր այս համագործակցության շրջանակներում այսօր կազմակերպված և հետագայում կազմակերպվելիք տարբեր տեսակի միջոցառումները զգալի ավանդ կլինեն այդ գործում>>,-նշեց ռեկտորը՝ հավաստիացնելով, որ հաշվի առնելով այդ ոլորտում առկա մասնագիտական գիտելիքի պակասը՝ առաջիկայում նախատեսվում է ակադեմիայի ուսումնական ծրագրերում ներառել փողերի լվացման դեմ պայքարի վերաբերյալ դասընթացներ:

Կոնֆերանսի ընթացքում ներկաները քննարկեցին փողերի լվացման գործերի քննության վերաբերյալ մի շարք հարցեր: Մասնակիցները նաև մտքեր փոխանակեցին օրենսդրական և գործնական խոչընդոտների վերաբերյալ, վերլուծեցին փողերի լվացման գործերով կայացված որոշակի դատական ակտեր ինչպես հայաստանյան, այնպես էլ միջազգային փորձի օրինակներով: