Համագործակցության հեռանկարների քննարկում GIZ-ի հետ
Հուլիսի 6-ին Արդարադատության ակադեմիայի ռեկտոր Սերգեյ Առաքելյանն ընդունեց Գերմանիայի Քոբլենցի վարչական դատարանի փոխնախագահ Կլաուս Մայերին, Գերմանիայի Հեսսեն երկրամասի Գերագույն վարչական դատարանի պաշտոնաթող նախագահ Վոլֆգանգ Ռայմերսին, Գերմանական միջազգային համագործակցության ընկերության (GIZ) «Հարավային Կովկասում եվրոպական չափորոշիչներին իրավական համապատասխանեցում» ծրագրի իրավաբան Անի Չիլինգարյանին:
Հանդիպման նպատակը Արդարադատության ակադեմիայի և Գերմանական միջազգային համագործակցության ընկերության միջև վարչական իրավունքի և վարչական արդարադատության բնագավառում համագործակցության ուղղությունների քննարկումն էր: Համագործակցությունը ենթադրում է Ակադեմիայի կարիքների գնահատման հիման վրա համատեղ դասընթացների մշակում, դասընթացավարների վերապատրաստում՝ 2018 թվականի փետրվարից մեկնարկելիք «Հարավային Կովկասում եվրոպական չափորոշիչներին իրավական համապատասխանեցում» ծրագրի շրջանակում:
Ռեկտորը ողջունեց հյուրերի առաջարկը և պատրաստակամություն հայտնեց GIZ-ի գործընկերների հետ, զարգացած երկրների հաջողված փորձը հաշվի առնելով, վարչական իրավունքին և վարչական արդարադատությանն առնչվող համատեղ դասընթացներ մշակել, վերոնշյալ թեմայով հրավիրյալ փորձագետների դասախոսություններ անցկացնել, դասընթացավարների վերապատրաստումներ կազմակերպել: Կողմերը քննարկեցին հստակ ժամկետներ ծրագիրը կյանքի կոչելու համար:
Հանդիպման ավարտին Ակադեմիայի ռեկտոր Սերգեյ Առաքելյանը նշեց, որ պատրաստ է արդյունավետ համագործակցության և վստահ, որ արդյունքները շոշափելի կլինեն մոտ ապագայում:
