Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Հուլիսի 10-ին Արդարադատության ակադեմիայի ռեկտոր Տաթևիկ Սուջյանն ընդունել է Ռաուլ Վալլենբերգի անվան մարդու իրավունքների և մարդասիրական իրավունքի ինստիտուտի պատվիրակությանը, որի կազմում էին հայաստանյան գրասենյակի ղեկավար (ՌՎԻ) Լաուրա Միլնը և գրասենյակի ղեկավարի տեղակալ Արման Գասպարյանը:
Հանդիպման նպատակն էր քննարկել երկկողմ համագործակցության ընդլայնման հեռանկարները և համատեղ կրթական ծրագրերի իրականացման հնարավորությունները:

Հանդիպման ընթացքում կողմերը նախանշել են հետագա համագործակցության մի քանի առանցքային ուղղություններ, մասնավորապես՝ պայմանավորվածություն է ձեռք բերվել համատեղ մշակել էկոլոգիական իրավունքի և կլիմայական արդարադատության հիմնախնդիրներին նվիրված նոր ուսումնական մոդուլ, որը նախատեսվում է ներառել դատավորների վերապատրաստման ծրագրերում, ինչպես նաև ներդնել համապատասխան էլեկտրոնային ուսուցման (e-learning) հարթակ: Կողմերը պայմանավորվել են իրականացնել համատեղ հետազոտություն այլընտրանքային խափանման միջոցների կիրառման հիմնախնդիրների վերաբերյալ, որի շրջանակում կկազմակերպվեն գործնական աշխատաժողովներ դատաիրավական համակարգի և պրոբացիայի ծառայության մասնագետների մասնակցությամբ: Անդրադարձ է կատարվել նաև Ակադեմիայի գործող ուսումնական ծրագրերի կատարելագործմանը՝ դրանցում մարդու իրավունքների ու գենդերային զգայունության բաղադրիչների վերանայման և միջազգային չափանիշներին համապատասխանեցման նպատակով: Կողմերը քննարկել են նաև արդարադատության համակարգում արհեստական բանականության կիրառման իրավական հարցերի և արդի միտումների վերաբերյալ կրթական բաղադրիչների ներդրման հնարավորությունները: 
 Հանդիպման ավարտին պայմանավորվածություն է ձեռք բերվել մինչ տարեվերջ շարունակել աշխատանքային քննարկումները՝ նշված ուղղություններով հստակ գործողությունների ծրագիր և համատեղ օրակարգ ձևավորելու համար:

      Հարգելի΄ տիկին Թադևոսյան,

 Հայաստանի Հանրապետության արդարադատության ակադեմիայի և անձամբ իմ անունից պատիվ ունեմ շնորհավորելու Ձեզ, Վճռաբեկ դատարանի դատավորներին և ողջ դատական համակարգին՝ Հայաստանի Հանրապետության Վճռաբեկ դատարանի կազմավորման օրվա կապակցությամբ:

  Այս հիշարժան օրը բացառիկ առիթ է վերահաստատելու Վճռաբեկ դատարանի առանցքային դերակատարումը Հայաստանի Հանրապետությունում իրավունքի գերակայության երաշխավորման, օրենքի միատեսակ կիրառության ապահովման, արդար դատաքննության իրավունքի պաշտպանության և արդարադատության նկատմամբ հանրային վստահության ամրապնդման գործում։ Որպես բարձրագույն դատական ատյան՝ Վճռաբեկ դատարանը կարևորագույն դեր ունի իրավական համակարգի կայունության, իրավական որոշակիության ապահովման և սահմանադրական արժեքների պաշտպանության գործում՝ իր գործունեությամբ նպաստելով ժողովրդավարական և իրավական պետության շարունակական զարգացմանը։

  Ձեր բարձր մասնագիտական ղեկավարությամբ Հայաստանի Հանրապետության Վճռաբեկ դատարանը շարունակաբար իրականացնում է իր բացառիկ սահմանադրական առաքելությունը՝ անշեղորեն առաջնորդվելով իրավունքի գերակայության, օրինականության, անկախության և անաչառության սկզբունքներով՝ նպաստելով իրավական համակարգի կայուն զարգացմանը։

  Մեզ համար առանձնահատուկ արժեք ունի Հայաստանի Հանրապետության Վճռաբեկ դատարանի և Հայաստանի Հանրապետության արդարադատության ակադեմիայի միջև ձևավորված գործընկերային և արդյունավետ համագործակցությունը, որը հիմնված է փոխադարձ վստահության և մասնագիտական համերաշխության վրա։ Համոզված եմ, որ այդ համագործակցությունը հետագայում ևս կծառայի դատավորների և դատական համակարգի ներկայացուցիչների մասնագիտական կարողությունների զարգացմանը, իրավական մտքի առաջընթացին և արդարադատության որակի շարունակական կատարելագործմանը։

 Մաղթում եմ մասնագիտական նոր ձեռքբերումներ, հաստատուն առաջընթաց և արդյունավետ գործունեություն՝ ի շահ Հայաստանի Հանրապետության, իրավունքի գերակայության, արդարադատության և մեր պետության իրավական զարգացման։

    Ռեկտոր՝ Տաթևիկ Սուջյան

Հուլիսի 2-ին Արդարադատության ակադեմիայի ռեկտոր Տաթևիկ Սուջյանն ընդունել է Անվտանգության ոլորտի կառավարման Ժնևի կենտրոնի (DCAF) պատվիրակությանը՝ DCAF-ի Հայաստանի ծրագրի ղեկավար Անտյե Ֆրիցի գլխավորությամբ. պատվիրակության կազմում էին նաև «Պաշտպանության ոլորտի կառավարման և վերահսկողության խթանումը Հայաստանում» ծրագրի համակարգող Այնեիաս Էնգստրոմը, ազգային փորձագետ Արմեն Գրիգորյանը, Ծրագրի կրտսեր պատասխանատու Լարիսա Մկրտչյանը:

Հանդիպման ընթացքում կողմերը քննարկել են Ակադեմիայի և DCAF-ի միջև համագործակցության ընթացիկ և հեռանկարային ուղղությունները՝ առանձնահատուկ ուշադրություն դարձնելով զինվորական ծառայության ընթացքում կատարված հանցագործությունների քննության վերաբերյալ ուղեցույցի մշակմանը։
Ներկայացվել է ուղեցույցի մշակման ընթացքը՝ նշելով, որ այն հիմնված է Քրեական օրենսգրքի համապատասխան դրույթների մեկնաբանության, միջազգային իրավական չափանիշների և համեմատաիրավական վերլուծության վրա։

Կողմերը մանրամասն քննարկել են նաև ուղեցույցի մշակման ավարտից հետո նախատեսվող քայլերը՝ ուղղված դատավորների, դատախազների և քննիչների մասնագիտական կարողությունների զարգացմանը, ինչպես նաև փաստաթղթի գործնական կիրառման ապահովմանը։
Հանդիպման ավարտին կողմերը պայմանավորվածություն են ձեռք բերել համագործակցության հետագա քայլերի շուրջ՝ վերահաստատելով համատեղ աշխատանքի շարունակականության իրենց պատրաստակամությունը։

Հունիսի 30-ին Արդարադատության ակադեմիայի ռեկտոր Տաթևիկ Սուջյանն ընդունել է Ասիական զարգացման բանկի (ԱԶԲ) պատվիրակությանը, որի կազմում էին ԱԶԲ-ի գլխավոր խորհրդատուի օգնական Քրիստինա Պակը և մասնավոր հատվածի զարգացման գծով գլխավոր մասնագետ Նարինե Ավետիսյանը։ Հանդիպմանը մասնակցել է նաև ՀՀ արդարադատության նախարարության «Օրենսդրության զարգացման կենտրոն» հիմնադրամի տնօրեն Դավիթ Ղարիբյանը։

Հանդիպման ընթացքում քննարկվել են Արդարադատության ակադեմիայի և Ասիական զարգացման բանկի միջև համագործակցության և նոր կրթական նախաձեռնությունների իրականացման հեռանկարները՝ ընդգծելով նման գործընկերության կարևորությունը Ակադեմիայի ինստիտուցիոնալ զարգացման և մասնագիտական կարողությունների ամրապնդման տեսանկյունից։
Կողմերը համաձայնության են եկել համագործակցության երկու առաջնահերթ ուղղությունների շուրջ։ Առաջինը վերաբերում է սնանկության իրավունքի ոլորտում դատավորների մասնագիտական կարողությունների զարգացմանը, որի շրջանակում նախատեսվում է ԱԶԲ-ի աջակցությամբ իրականացնել մասնագիտացված վերապատրաստման դասընթացներ՝ հաշվի առնելով ոլորտի նոր իրավական կարգավորումներն ու դրանց կիրառման առանձնահատկությունները։ Երկրորդ ուղղությամբ պայմանավորվածություն է ձեռք բերվել համատեղ մշակել էկոլոգիական իրավունքի և կլիմայական արդարադատության հիմնախնդիրներին նվիրված նոր ուսումնական մոդուլ, որը նախատեսվում է ներառել դատավորների վերապատրաստման ծրագրերում։

Հանդիպման ընթացքում ռեկտորը կարևորել է նաև Արդարադատության ակադեմիայի թվայնացման գործընթացը։ Այդ համատեքստում քննարկվել են միջազգային գործընկերների աջակցությամբ Ակադեմիայի էլեկտրոնային կրթական հարթակի ներդրման հնարավորությունները։
Այցի շրջանակում պատվիրակության անդամները շրջայց են կատարել Ակադեմիայում, ծանոթացել ուսումնական միջավայրին, առկա կարողություններին և զարգացման հեռանկարներին։

   Հարգելի՛ տիկին Վարդապետյան,

 Հայաստանի Հանրապետության արդարադատության ակադեմիայի և անձամբ իմ անունից ընդունեք ջերմ շնորհավորանքներս Դատախազության աշխատողի օրվա ու Հայաստանի Հանրապետության դատախազության հիմնադրման տարեդարձի կապակցությամբ։
 Այս նշանակալի օրը ևս մեկ առիթ է արժևորելու դատախազության անցած ճանապարհը, ձևավորած ավանդույթներն ու այն կարևոր դերակատարությունը, որն այն ունի իրավական պետության կայացման, օրինականության պահպանության և հանրային շահերի պաշտպանության գործում։ Հասարակության և պետության առջև դատախազության ստանձնած կարևոր առաքելությունը պահանջում է բարձր պատասխանատվություն, անկոտրում կամք ու հավատարմություն կոչմանը:

 Վստահ եմ, որ Ձեր ղեկավարությամբ Հայաստանի Հանրապետության դատախազությունը շարունակելու է ամրապնդել իր ինստիտուցիոնալ ներուժը՝ հավատարիմ մնալով օրենքի գերակայության ու արդարության հաստատման իր կարևոր առաքելությանը։
 Բարձր եմ գնահատում Հայաստանի Հանրապետության դատախազության և Հայաստանի Հանրապետության արդարադատության ակադեմիայի միջև համագործակցությունը, որի շրջանակում համատեղ ջանքերով նպաստում ենք դատախազների մասնագիտական կարողությունների շարունակական զարգացմանը, ժամանակակից իրավական մարտահրավերներին համահունչ գիտելիքների ձեռքբերմանը: 

 Մաղթում եմ Ձեզ ուժ և եռանդ, իսկ Հայաստանի Հանրապետության դատախազության բոլոր աշխատակիցներին՝ մասնագիտական նոր ձեռքբերումներ ու հաջողություններ իրենց պատասխանատու ծառայության մեջ՝ ի նպաստ Հայաստանի Հանրապետության։

                                                                                                                                                                                                                              Ռեկտոր՝ Տաթևիկ Սուջյան

Հունիսի 22-ից 24-ը Արդարադատության ակադեմիան  ՀՀ ֆինանսների նախարարության և Համաշխարհային Բանկի հայաստանյան գրասենյակի հետ համատեղ իրականացրեց «Ֆինանսական գրագիտություն ՀՀ իրավական ոլորտի մասնակիցների համար» խորագրով եռօրյա վերապատրաստում:

Միջոցառման մեկնարկին ողջույնի խոսքով հանդես եկան Ակադեմիայի ռեկտոր Տաթևիկ Սուջյանը, ՀՀ ֆինանսների նախարարի տեղակալ Արման Պողոսյանը, Համաշխարհային Բանկի հայաստանյան գրասենյակի ղեկավար Ֆաբրիցիո Ձարկոնեն և Ավստրիական զարգացման գործակալության երևանյան գրասենյակի ղեկավարի տեղակալ Նորա Ալանակյանը: Նրանք ողջունեցին մասնակիցներին, ընդգծեցին իրավական ոլորտի ներկայացուցիչների ֆինանսական գրագիտության շարունակական զարգացման անհրաժեշտությունը՝ կարևորելով դրա նշանակությունը մասնագիտական գործունեության արդյունավետության բարձրացման և արդի մարտահրավերներին համարժեք արձագանքելու տեսանկյունից, ինչպես նաև շնորհակալություն հայտնեցին գործընկերներին համատեղ նախաձեռնության համար:

Վերապատրաստումն անցկացրել է Համաշխարհային Բանկի խորհրդատու Արփինե Ղևոնդյանը:

Հունիսի 22-ին Արդարադատության ակադեմիա են այցելել Եվրոպայի խորհրդի (ԵԽ) ներկայացուցիչները՝ ԵԽ Գենդերային հավասարության բաժնի ծրագրի ղեկավար, մարդու իրավունքների և Արևելյան Եվրոպայի հարցերով փորձագետ Դանկո Ռունիչը, ԵԽ երևանյան գրասենյակի «Կանանց նկատմամբ բռնության հաղթահարումը և գենդերային հավասարության ամրապնդումը Հայաստանում» ծրագրի ավագ պատասխանատու Լիանա Ամիրբեկյանը և Գենդերային հավասարության բաժնի ծրագրերի օգնական Ալլա Կրուտինսկայան:

Արդարադատության ակադեմիայի ռեկտոր Տաթևիկ Սուջյանը ողջունեց հյուրերին և բարձր գնահատեց Եվրոպայի խորհրդի հետ ձևավորված արդյունավետ, բովանդակալի և շարունակական համագործակցությունը՝ ընդգծելով դրա կարևորությունը Ակադեմիայի կարողությունների զարգացման և մասնագիտական կրթության շարունակական կատարելագործման գործում։
Հանդիպման ընթացքում կողմերը քննարկեցին փոխադարձ հետաքրքրություն ներկայացնող մի շարք հարցեր, անդրադարձան ընթացիկ համագործակցության արդյունքներին, ինչպես նաև նախանշեցին հետագա համատեղ նախաձեռնությունների և ծրագրերի իրականացման հնարավոր ուղղությունները։

Հունիսի 19-ին Արդարադատության ակադեմիայի ռեկտոր Տաթևիկ Սուջյանը հանդիպեց Ակադեմիայի ունկնդիրներին՝ դատավորների թեկնածուների հավակնորդների (քրեական մասնագիտացմամբ) ցուցակում ընդգրկված անձանց: Խմբում ընդգրկված է 5 ունկնդիր:

Մասնագիտական պատրաստումը տևելու է 7 ամիս՝ ներառյալ 4 ամիս տևողությամբ փորձաշրջանը:

Ռեկտորը ողջունեց ներկաներին և շնորհավորեց Ակադեմիայի ունկնդիր դառնալու կապակցությամբ՝ մաղթելով արդյունավետ ուսումնառություն:
Հանդիպման ընթացքում քննարկվեցին ուսումնական գործընթացին վերաբերող բովանդակային և կազմակերպական մի շարք հարցեր:

Հունիսի 10-ին Արդարադատության ակադեմիայի ռեկտոր Տաթևիկ Սուջյանն ընդունեց ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության (ԹՊԻՀ) գրասենյակի տնօրեն Զաքարի Բարթերին և ԹՊԻՀ «Քրեական արդարադատության բարեփոխումներ» ծրագրի ղեկավար Քրիստինա Աֆոյանին: Պատվիրակության կազմում էր նաև ԱՄՆ Հետաքննությունների դաշնային բյուրոյի (ՀԴԲ) գործակալ, ով Հայաստան է ժամանել կիբերհանցագործությունների դեմ պայքարի ոլորտում կարիքների գնահատում անցկացնելու նպատակով:
Ռեկտորը ողջունեց հյուրերին, բարձր գնահատեց ԹՊԻՀ գրասենյակի հետ ձևավորված համագործակցությունը և համոզմունք հայտնեց, որ այն կլինի շարունակական ու արդյունավետ:

Հյուրերը շնորհակալություն հայտնեցին ջերմ ընդունելության համար և շնորհավորեցին Տաթևիկ Սուջյանին ակադեմիայի ռեկտորի պաշտոնում ընտրվելու կապակցությամբ:

Հանդիպման ընթացքում ռեկտորը ներկայացրեց Ակադեմիայի զարգացման առաջիկա ծրագրերը, պատասխանեց հյուրերին հետաքրքրող հարցերին: Գործընկերները քննարկեցին համատեղ իրականացված և ընթացիկ ծրագրերը՝ կարևորելով փոխգործակցության ընդլայնումը:
Հանդիպման ավարտին հյուրերը շրջեցին ԱՄՆ դեսպանության աջակցությամբ ամբողջությամբ նորոգված, կահավորված և տեխնիկապես վերազինված «Հայ-ամերիկյան բարեկամության նախասրահում»:

Հունիսի 9-ին Արդարադատության ակադեմիայի ռեկտոր Տաթևիկ Սուջյանն ընդունեց Շվեդիայի ազգային դատարանների վարչության ներկայացուցիչներին՝ ծրագրի համակարգող, իրավախորհրդատու, նախագծի թիմի ղեկավար Ալիսիա Մոսեմանին, ծրագրի համակարգող, իրավախորհրդատու Լինա Վալենբերգին, նախագծի համակարգող, Շվեդիայի գլխավոր դատավոր Բյորն Լինդենին, նախագծի ավագ մասնագետ Լիանա Ղազինյանին, նախագծի կրտսեր մասնագետ Ինեսա Ռուբինյանին:

Ռեկտորը ողջունեց հյուրերին, ընդգծեց առկա համագործակցության կարևորությունը և այն խորացնելու անհրաժեշտությունը:
Հյուրերը շնորհավորեցին նորանշանակ ռեկտորին, երախտագիտություն հայտնեցին ջերմ ընդունելության համար՝ պատրաստակամություն հայտնելով համատեղ քայլերով շարունակել ընթացիկ ծրագրերը:
Հանդիպման ընթացքում կողմերը քննարկեցին նախանշված անելիքները, ուրվագծեցին երկկողմ համագործակցություն ձևավորելու հստակ ուղղություններ: