Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Մարտի 29-ին տեղի ունեցավ Արդարադատության ակադեմիայի կառավարման խորհրդի նիստը: Ներկա էին Խորհրդի նախագահ Արմեն Հարությունյանը, անդամներ՝ Երվանդ Խունդկարյանը, Համլետ Ասատրյանը, Հովսեփ Բեդևյանը, Գևորգ Բաղդասարյանը, Րաֆֆի Ասլանյանը, ինչպես նաև Ակադեմիայի ռեկտոր Սերգեյ Առաքելյանը:

Օրակարգի հաստատումից հետո ներկաները այլ հարցերի շարքում քննարկեցին և որոշում կայացրին Ակադեմիայի «Ներքին կարգապահական կանոններում» փոփոխությունների և լրացումների կատարման հարցի վերաբերյալ:

Մարտի 27-ին Արդարադատության ակադեմիա են այցելել Գերմանական միջազգային համագործակցության ընկերության (GIZ) ներկայացուցիչները՝ Գնահատման առաքելության իրավական հարցերով պատասխանատու Լոթար Յանը և «Հարավային Կովկասում եվրոպական չափորոշիչներին իրավական համապատասխանեցում» ծրագրի մոնիթորինգի և գնահատման պատասխանատու, Հարավային Կովկասում ծրագրի իրավաբան Հրաչիկ Յարմալոյանը:

Ակադեմիայի ռեկտոր Սերգեյ Առաքելյանը ողջունեց հյուրերին և կարևորեց GIZ-ի հետ արդյունավետ համագործակցությունը, համատեղ իրականացված ծրագրերը, նաև երախտագիտությամբ նշեց նախորդ տարեվերջին Ակադեմիային տրամադրված տեխնիկական միջոցների աջակցության մասին:

Հյուրերը Ակադեմիա էին եկել Գերմանական կառավարության աջակցությամբ իրականացվելիք նոր ծրագիրը քննարկելու առաքելությամբ, որն ուղղված է լինելու համայնքային կառույցների կարողությունների զարգացմանը: Նախատեսվում է ՀՀ վարչական դատարանների դատավորներին ներգրավել որպես փորձագետներ և կազմակերպել համապատասխան վերապատրաստումներ: Ծրագիրը կմեկնարկի 2020 թվականին և կտևի երեք տարի:

Ռեկտորը պատրաստակամություն հայտնեց օժանդակել նման վերապատրաստումների անցկացմանը, դասընթացավարների ընտրությանը, նյութերի մշակմանը: Ավելին՝ ռեկտորի խոսքով, քանի որ Հայաստանում չկա առանձին կառույց, որը զբաղվում է համայնքային մարմինների աշխատակիցների որակավորման բարձրացմամբ, ուստի ծրագրի շրջանակում անցկացվող միջոցառումները կարող են դրական փորձ լինել ապագայում ստեղծվելիք կառույցի գործունեության նախանշման ուղղությամբ:

Ռեկտորի ուղեկցությամբ հյուրերը շրջեցին Ակադեմիայում: Նրանք տպավորված էին շենքային պայմաններով, ուսումնական գործընթացը կազմակերպելու հնարավորություններով:

Մարտի 23-ին Արդարադատության ակադեմիայի աշխատակազմը՝ ռեկտոր Սերգեյ Առաքելյանի գլխավորությամբ վաղ առավոտից միացել է համապետական շաբաթօրյակ-ծառատունկին:

Լույս է տեսել Արդարադատության ակադեմիայի պրոռեկտոր, ԵՊՀ սահմանադրական իրավունքի ամբիոնի դոցենտ Անահիտ Մանասյանի «Սահմանադրական կայունությունը՝ որպես կայուն ժողովրդավարության կարևորագույն գրավական» մենագրությունը: Այդ առիթով ԵՊՀ-ում կազմակերպվել էր շնորհանդես-քննարկում, որին ներկա էին Արդարադատության ակադեմիայի ռեկտոր Սերգեյ Առաքելյանը, ՀՀ արդարադատության նախարար Արտակ Զեյնալյանը, ԵՊՀ իրավագիտության ֆակուլտետի դեկան Գագիկ Ղազինյանը, գրքի գրախոս, պրոֆեսոր Գևորգ Դանիելյանը, ԵՊՀ պրոֆեսորադասախոսական կազմի ներկայացուցիչներ, դատավորներ, հյուրեր:

Գիրքը նվիրված է սահմանադրական կայունության արժեբանական բնութագրին և կայուն ժողովրդավարության երաշխավորման գործում վերջինիս դերակատարությանը։ Գիրքը նախատեսված է սահմանադրական իրավունքի, իրավունքի տեսության ու փիլիսոփայության, սոցիոլոգիայի, քաղաքագիտության հարցերով հետաքրքրվող ընթերցողների լայն շրջանակի համար:

Մարտի 18-ին Արդարադատության ակադեմիա է այցելել Եվրոպայի խորհրդի (ԵԽ) համագործակցության ծրագրերի և կարողությունների զարգացման բաժնի ներկայացուցիչ, ծրագրի համակարգող Անկա Սանդեսկուն: Ակադեմիայի պրոռեկտոր Անահիտ Մանասյանը կարևորել է ԵԽ-ի հետ շարունակական համագործակցությունը և ընդգծել ԵԽ «Կանանց համար արդարադատության մատչելիություն» ծրագրի իրականացման կարևորությունը: Ծրագիրը նախանշված է Արևելյան գործընկերության երկրների դատաիրավական ուսուցում իրականացնող համապատասխան կառույցների համար՝ 2019-2021թթ.-ին:

Անկա Սանդեսկուն ներկայացրել է ծրագրի այն բաղադրիչը, որն առնչվում է Արդարադատության ակադեմիայի հետ իրականացվելիք համատեղ միջոցառումներին՝ ուղղված ուսումնական ծրագրերի՝ մասնավորապես դատավորների և դատախազների կարողությունների զարգացմանը: Կողմերը քննարկել են ծրագրով նախատեսված միջոցառումների իրականացմանն առնչվող բովանդակային և կազմակերպական մի շարք հարցեր:

Մարտի 18-ին Արդարադատության ակադեմիա են այցելել Իրավունքի զարգացման միջազգային կազմակերպության (IDLO) ներկայացուցիչները՝ Արևելյան Եվրոպայում և Կենտրոնական Ասիայում ծրագրի համակարգողներ Լյուբոմիր Պետրուլջեսկովը և Ռիմա Գրիշմանովսկայան: Ակադեմիայի պրոռեկտոր Անահիտ Մանասյանը հյուրերին ներկայացրել է Ակադեմիայի գործունեության առանձնահատկությունները, ուսումնական գործընթացին, ուսուցման ծրագրերին վերաբերող մանրամասներ, ինչպես նաև միջազգային գործընկերների հետ իրականացված և իրականացվող ծրագրերը:

Կողմերը քննարկել են առաջիկայում համատեղ կազմակերպել դասընթացավարների վերապատրաստումներ, ինչպես նաև դատավորների համար սեմինարներ՝ ՀՀ քաղաքացիական դատավարության օրենսգրքի շրջանակում: Ավելին՝ քննարկվել է նաև մոտ ապագայում Արդարադատության ակադեմիայի և Իրավունքի զարգացման միջազգային կազմակերպության միջև առկա համագործակցությունն իրավական հիմքերի վրա դնելու և դրա վերաբերյալ համատեղ փաստաթուղթ ստորագրելու հարցը:

Մարտի 15-ին Արդարադատության ակադեմիա են այցելել ԱՄՆ պետքարտուղարության՝ Եվրոպայի, Եվրասիայի և Կենտրոնական Ասիայի աջակցության ծրագրի և ՀՀ-ում ԱՄՆ դեսպանության թմրամիջոցների դեմ պայքարի և իրավապահ համագործակցության (ԹՊԻՀ) գրասենյակի ներկայացուցիչները: Այցի նպատակն էր ծանոթանալ Ակադեմիայի աշխատանքային պայմաններին, տեղեկանալ դատաիրավական ոլորտի ուսումնական գործընթացի առանձնահատկությունների և առկա խնդիրների մասին, ինչպես նաև դրանց լուծման նպատակով համատեղ ծրագրեր իրականացնել:

Ակադեմիայի ռեկտոր Սերգեյ Առաքելյանը ջերմորեն ողջունեց հյուրերին և կարևորեց ՀՀ-ում ԱՄՆ դեսպանության, մասնավորապես՝ ԹՊԻՀ գրասենյակի հետ արդյունավետ համագործակցությունը: Ռեկտորը ներկայացրեց ուսուցման ծրագրերի շարունակական զարգացմանը, դասընթացների որակի բարձրացմանը, հրավիրյալ փորձագետների ներգրավմամբ պրակտիկ նշանակություն ունեցող նոր դասընթացների մշակմանն և ներդրմանը, Ակադեմիայի աշխատակազմի և դասընթացավարների համապատասխան վերապատրաստումների կազմակերպման անհրաժեշտությանն առնչվող մի շարք հարցեր: Ռեկտորը նաև նշեց Ակադեմիայում հեռավար եղանակով անցկացվող դասընթացների, դրանց նորացման ուղղությամբ իրականացվող աշխատանքների ու զարգացման հնարավորությունների մասին:

Կողմերը քննարկեցին համագործակցության ընդլայնմանն ուղղված մի շարք հարցեր, ինչպես նաև երկկողմ օգտակար լինելու պատրաստակամություն հայտնեցին: Հյուրերը նաև հնարավորություն ունեցան շրջել Ակադեմիայում, ծանոթանալ պայմաններին, լինել լսարաններում, որոնցից մեկը ԱՄՆ դեսպանության ֆինանսական աջակցությամբ է նորոգվել, կահավորվել ու տեխնիկապես վերազինվել, նաև՝ գրադարանում, մարզերից վերապատրաստում անցնող ունկնդիրների համար նախատեսված հյուրանոցում:

Մեկնարկել է Եվրոպայի Խորհրդի (ԵԽ) «Աջակցություն քրեական արդարադատության բարեփոխումներին Հայաստանում. դատաիրավական բարեփոխումների քրեական բաղադրիչը և եվրոպական չափանիշների կիրառության պրակտիկայի ներդաշնակեցումը» նոր ծրագիրը, որը ֆինանսավորվում է Եվրոպական միության և ԵԽ «Գործընկերություն հանուն լավ կառավարման» կառուցակարգի շրջանակում: Ծրագրի իրականացման և նախատեսված արդյունքներին հասնելու համար կարիքների գնահատում անցկացնելու նպատակով Արդարադատության ակադեմիա են այցելել Եվրոպայի խորհրդի միջազգային և ազգային փորձագետները, հայաստանյան ծրագրի ղեկավարը:

Ակադեմիայի ռեկտոր Սերգեյ Առաքելյանը ողջունեց հյուրերին և շեշտեց ԵԽ-ի հետ համագործակցության կարևորությունը և արդյունավետությունը: Ռեկտորը գոհունակությամբ նշեց, որ քայլեր են ձեռնարկվում համատեղ նոր ծրագրերի մշակման և դրանց իրականացման ուղղությամբ:

Ծրագրի նպատակներից է նպաստել Հայաստանում քրեական արդարադատության ոլորտում լավագույն գործելակերպի կիրառմանը, ինչպես նաև աջակցել Արդարադատության ակադեմիային ինստիտուցիոնալ կարողությունները ամրապնդելուն՝ դատավորներին և դատական ծառայողներին վերապատրաստելու համար:

Հանդիպման ընթացքում փորձագետներին ներկայացվեց Ակադեմիայում ուսումնական գործընթացի՝ մասնավորապես ուսուցման ծրագրերի, դրանց մշակման, բովանդակության և դասավանդման մեթոդաբանության առանձնահատկությունները:

Մարտի 11-ին Արդարադատության ակադեմիայում մեկնարկել է ՀՀ քննչական կոմիտեի ծառայողների (քննիչների) թեկնածությունների 2019 թվականի ցուցակում ընդգրկված անձանց՝ առաջին խմբի ունկնդիրների մասնագիտական պատրաստումը: Ուսումնական գործընթացը սկսվեց «ՀՀ քրեական դատավարության արդի հարցեր» դասընթացով:

Քննիչի թեկնածուների մասնագիտական պատրաստումն անցկացվում է ՀՀ քննչական կոմիտեի նախագահի համապատասխան հրամանի հիման վրա մշակված ուսուցման ծրագրի համաձայն: Դասընթացների ընդհանուր ժամաքանակը 150 ակադեմիական ժամ է, ևս 6 ակադեմիական ժամ նախատեսված է քննաշրջանի համար, ինչպես նաև երեք ամիս տևողությամբ փորձաշրջան: Ըստ ուսուցման ծրագրի՝ առաջին խմբի ունկնդիրների մասնագիտական պատրաստումը նախատեսվում է ավարտել օգոստոսի 6-ին:

Արդարադատության ակադեմիայի ռեկտոր Սերգեյ Առաքելյանն այսօր հանդիպել է ՀՀ քննչական կոմիտեի ծառայողների (քննիչների) թեկնածությունների 2019 թվականի ցուցակում ընդգրկված անձանց, որոնք մասնագիտական պատրաստում են անցնելու առաջին խմբի կազմում: Խմբում ընդգրկված է 28 ունկնդիր, որոնց մասնագիտական պատրաստումը մեկնարկելու է մարտի 11-ին:

Ձևավորված ավանդույթի համաձայն՝ ռեկտորը մինչ մասնագիտական պատրաստման մեկնարկը հանդիպում է ունկնդիրների հետ, ծանոթանում նրանց և ծանոթացնում Ակադեմիայում ուսումնառության առանձնահատկություններին, պատասխանում հետաքրքրող հարցերի: «Բարո՛վ եք եկել Ակադեմիա»,- դիմելով ունկնդիրներին՝ ողջունեց ռեկտորը, շնորհավորեց նրանց և բարի երթ մաղթեց: Ռեկտորը նաև հույս հայտնեց, որ բոլոր ընդունվածները կավարտեն և կհամալրեն ՀՀ քննչական կոմիտեի քննիչների շարքերը: «Քննիչի աշխատանքը քրեական արդարադատության ոլորտում ամենաբարդն է, որովհետև ամեն ինչ խարսխված է քննիչի աշխատանքի վրա, ուստի կարծում եմ՝ դա գիտակցում եք և պատկերացնում, թե աշխատանքային ինչ բարդություններ են ձեզ սպասում»,- ասաց Սերգեյ Առաքելյանը:

Ռեկտորն ունկնդիրներին ներկայացրեց Ակադեմիայի պաշտոնական կայքում առանձնացված հատուկ բաժինը, որում առկա է ուսումնական գործընթացին առնչվող ամբողջական տեղեկատվություն: Քննիչի թեկնածուների ուսումնառությունն անցկացվելու է ուսուցման ծրագրի համաձայն, որը մշակվել է ՀՀ քննչական կոմիտեի նախագահի համապատասխան հրամանի հիման վրա: Դասընթացների ընդհանուր ժամաքանակը 150 ակադեմիական ժամ է, ևս 6 ակադեմիական ժամ նախատեսված է քննաշրջանի համար, ինչպես նաև երեք ամիս տևողությամբ փորձաշրջան: Ունկնդիրները նաև տեղեկացան, որ պարբերաբար հանդիպումներ են անցկացվելու, որի ընթացքում ռեկտորի հետ ուսումնառության ընթացքում առաջացած հարցերն ու խնդիրները քննարկելու և լուծումներ գտնելու հնարավորություն են ստանալու: