Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Մարտի 7-ին Արդարադատության ակադեմիա են այցելել Երևանի Վ. Բրյուսովի անվան պետական լեզվահասարակագիտական համալսարանի «Սոցիալական գիտությունների և սերվիսի» ֆակուլտետի «Հանրային կապեր (PR)» բաժնի մագիստրատուրայի երկրորդ կուրսի ուսանողները:

Նրանք համապատասխան դասընթացի և պրակտիկայի շրջանակում այցելում են պետական գերատեսչություններ և մասնավոր կազմակերպություններ՝ ծանոթանալու կառույցների գործունեությանը, հանրային կապերի ոլորտում տարվող աշխատանքներին, հաղորդակցության կառավարման և կորպորատիվ PR-ի առանձնահատկություններին: Հանրային կապերի ապագա մասնագետներն իրենք էին ցանկություն հայտնել այցելել Արդարադատության ակադեմիա, ծանոթանալ Ակադեմիայի հանրային կապերի բաժնի աշխատանքներին, տեղում ստանալ իրենց հետաքրքրող հարցերի պատասխանները:

Ուսանողներն իրենց դասախոսի հետ ծանոթացան Ակադեմիայի համագործակցության և հանրային կապերի բաժնի աշխատանքներին, քննարկեցին Ակադեմիայում հանրային կապերին վերաբերող մի շարք հարցեր: Հյուրերը նաև շրջեցին Ակադեմիայի շենքում, ծանոթացան ապագա և գործող դատավորների, դատախազների, քննիչների ուսումնառության պայմաններին: Նրանք նաև հնարավորություն ունենցան ներկա լինել Ակադեմիայի ռեկտորի և ՀՀ քննչական կոմիտեի ծառայողների (քննիչների) 2019 թվականի թեկնածուների՝ մասնագիտական պատրաստման մեկնարկից առաջ անցկացվող առաջին հանդիպմանը:

Մարտի 7-ը քննական էր Արդարադատության ակադեմիայում վերապատրաստում անցած դատական ծառայողների առաջին խմբի ունկնդիրների համար: Ուսուցման ծրագրի համաձայն՝ դատական ծառայողների վերապատրաստումն ավարտվում է արդյունքների գնահատմամբ՝ բանավոր եղանակով, միասնական քննությամբ: Դատական ծառայողը համարվում է վերապատրաստում անցած դրական գնահատման դեպքում:

Հիշեցնենք, որ օրենքով սահմանված կարգով՝ պարտադիր վերապատրաստում են անցնում երեք տարին մեկ անգամ: Մարտից մինչև մայիս վերապատրաստում կանցնեն դատական ծառայողների 13 խումբ՝ այդ թվում Արցախի Հանրապետությունից: Վերապատրաստման խմբերում ընդգրկված են իրավաբանական մասնագիտական գործառույթներ իրականացնող դատական ծառայողներ և Դատական դեպարտամենտում այլ դատական ծառայողներ:

Արդարադատության ակադեմիայի ռեկտոր Սերգեյ Առաքելյանը մարտի 5-ին մասնակցել է «Աջակցություն դատական բարեփոխումների իրականացմանը՝ Հայաստանում դատական իշխանության անկախության և արհեստավարժության ամրապնդումը» ծրագրի մեկնարկին նվիրված միջոցառմանը: Ծրագրի բացման արարողությանը մասնակցել է նաև Արդարադատության ակադեմիայի պրոռեկտոր Անահիտ Մանասյանը: Ծրագրի հիմնական նպատակն է նպաստել Հայաստանում դատարանների անկախության, թափանցիկության և հաշվետվողականության ամրապնդմանը, դատարանների ու արդարադատության նկատմամբ հանրային վստահության բարձրացմանը, դատարանների ծանրաբեռնվածության թեթևացմանը: Ծրագիրը ֆինանսավորվում է Եվրոպական Միության և Եվրոպայի Խորհրդի կողմից:

Բացման խոսքով հանդես է եկել Երևանում Եվրոպայի խորհրդի գրասենյակի ղեկավար Նատալիա Վուտովան: Ներկա էին ՀՀ արդարադատության նախարար Արտակ Զեյնալյանը, ՀՀ բարձրագույն դատական խորհրդի նախագահ Գագիկ Հարությունյանը, ՀՀ վճռաբեկ դատարանի նախագահ Երվանդ Խունդկարյանը, ՀՀ փաստաբանների պալատի նախագահ Արա Զոհրաբյանը, ինչպես նաև Եվրոպայի խորհրդի մարդու իրավունքների և իրավունքի գերակայության գլխավոր տնօրինության Մարդու իրավունքների հարցերով տնօրեն Քրիստոս Ջիակումոպուլոսը և ուրիշներ:

Մարտի 4-ին Արդարադատության ակադեմիայում մեկնարկել է դատական ծառայողների 2019 թվականի վերապատրաստումը: Օրենքով սահմանված կարգով՝ դատական ծառայողները պարտադիր վերապատրաստում են անցնում երեք տարին մեկ անգամ: Մարտից մինչև մայիս վերապատրաստում կանցնեն դատական ծառայողների 13 խումբ՝ այդ թվում Արցախի Հանրապետությունից: Վերապատրաստման խմբերում ընդգրկված են իրավաբանական մասնագիտական գործառույթներ իրականացնող դատական ծառայողներ, որոնց համար սահմանված է 32 և Դատական դեպարտամենտում այլ դատական ծառայողներ՝ 24 ակադեմիական ժամ ընդհանուր ժամաքանակով: Դատական ծառայողների վերապատրաստման առաջին խմբում ներառված է 29 ունկնդիր: Ուսուցման ծրագրի համաձայն՝ դատական ծառայողների վերապատրաստումն ավարտվելու է արդյունքների գնահատմամբ՝ բանավոր եղանակով, միասնական քննությամբ:

Հիմք ընդունելով ՀՀ բարձրագույն դատական խորհրդի 21.02.2019թ. ԲԴԽ-12-Ո-45 որոշումը՝ դատավորների թեկնածուների ցուցակի քաղաքացիական մասնագիտացմամբ բաժինը՝ քսաներեք (23), քրեական մասնագիտացմամբ բաժինը՝ տասնյոթ (17), վարչական մասնագիտացմամբ բաժինը՝ երկու (2) թեկնածուներով համալրելու անհրաժեշտության մասին՝ հայտարարվում է դատավորների թեկնածուների ցուցակի համապատասխան մասնագիտացմամբ բաժինների արտահերթ համալրման նպատակով որակավորման ստուգում անցկացնելու մասին:

«Հայաստանի Հանրապետության դատական օրենսգիրք» սահմանադրական օրենքի 97-րդ հոդվածի 1-ին մասի 1-3-րդ, 5-րդ և 6-րդ կետերով նախատեսված պահանջներին բավարարող անձիք կարող են հայտերը ներկայացնել ՀՀ դատական դեպարտամենտ /հասցեն՝ ք.Երևան, Վ.Սարգսյան 5, 5-րդ հարկ, 53 սենյակ, հեռ. 010 511 778, 010 511 768/՝ մինչև 2019 թվականի մարտի 28-ը ներառյալ:

Հավակնորդները պարտավոր են ներկայացնել «Հայաստանի Հանրապետության դատական օրենսգիրք» սահմանադրական օրենքի 98-րդ հոդվածի 1-ին մասով նախատեսված հայտը, ինչպես նաև նույն հոդվածի 2-րդ մասի 1-6-րդ և 8-14-րդ կետերով նախատեսված փաստաթղթերը: Օրենքով սահմանված դեպքերում անհրաժեշտ է ներկայացնել նաև «Հայաստանի Հանրապետության դատական օրենսգիրք» սահմանադրական օրենքի 106-րդ հոդվածի 3-րդ մասով նախատեսված փաստաթղթերը:

«Հայաստանի Հանրապետության դատական օրենսգիրք» սահմանադրական օրենքի 99-րդ հոդվածի 3-րդ մասի համաձայն՝ Դատական դեպարտամենտը որոշմամբ մերժում է հայտի ընդունումը, եթե այն ներկայացվել է սույն օրենսգրքով սահմանված ժամկետի խախտմամբ կամ չի բավարարում սույն օրենսգրքով նախատեսված պահանջները: Ներկայացված փաստաթղթերը վերադարձվում են հավակնորդին երեք աշխատանքային օրվա ընթացքում: Եթե հայտն ընդունելը մերժելու հիմքն իր մեջ պարունակում է հանցագործության հատկանիշներ, ապա Դատական դեպարտամենտը այդ մասին հաղորդում է ներկայացնում իրավասու մարմին: Հայտի ընդունումը մերժելու մասին որոշումը կարող է բողոքարկվել «Հայաստանի Հանրապետության դատական օրենսգիրք» սահմանադրական օրենքի 99-րդ հոդվածի 4-րդ մասով սահմանված կարգով:

Հիշեցում`

«Պետական տուրքի մասին» ՀՀ օրենքի 20-րդ հոդվածի 38.1-կետով սահմանված պետական տուրքի վճարումը կատարել հետևյալ հաշվեհամարին՝
Հ/Հ` 900005163671
Բանկ` ՀՀ ֆինանսների նախարարության գործառնական վարչություն.
Ստացող` ՀՀ պետական բյուջե.
Նպատակը` «Դատավորների թեկնածությունների ցուցակի համալրման որակավորման քննության համար»:

Փետրվարի 25-ին մեկնարկեց Արդարադատության ակադեմիայի 2019 թվականի ունկնդիրների՝ դատավորների թեկնածուների հավակնորդների և դատախազների թեկնածությունների ցուցակում ընդգրկված անձանց մասնագիտական պատրաստումը: Ուսումնական գործընթացը մեկնարկեց «ՀՀ սահմանադրական իրավունքի գիտության և սահմանադրական արդարադատության արդի միտումները» դասընթացով: Այս տարի ունկնդիրների թվում են դատավորների թեկնածուների 19 հավակնորդ (12-ը՝ քաղաքացիական, 5-ը՝ քրեական, 2-ը՝ վարչական մասնագիտացումներով) և դատախազի 15 թեկնածու: Ընդ որում՝ դատավորների թեկնածուների հավակնորդների թվում է գիտական աստիճան ունեցող 6 ունկնդիր, որոնք սահմանված կարգով ազատված են ուսումնառության առաջին հատվածում անցկացվող դասերից: Իրավաբան գիտնականների մասնագիտական պատրաստումը կմեկնարկի ապրիլի 15-ին՝ ուսուցման երկրորդ հատվածից սկսած:

Մասնագիտական պատրաստումը, համաձայն համապատասխան ուսուցման ծրագրերի, տևելու է 7 ամիս և 2 շաբաթ՝ մինչև 2019 թ. հոկտեմբերի 11-ը՝ ներառյալ 4 ամիս տևողությամբ փորձաշրջանը: Ուսումնառության ընդհանուր ժամաքանակը 1026 ակադեմիական ժամ է:

Հայաստանի դատաիրավական ոլորտի բարեփոխումների ռազմավարության ու համապատասխան գործողությունների ծրագրի մշակմանն աջակցելու նպատակով Եվրոպական Միությունը նախաձեռնել է տեխնիկական աջակցության ծրագիր՝ ոլորտում բարեփոխումների ֆինանսական գնահատում իրականացնելու համար: Փետրվարի 20-ին Արդարադատության ակադեմիա այցելեցին ծրագրի շրջանակում Հայաստանում նախնական ուսումնասիրություններ իրականացնող փորձագիտական խմբի անդամներ Թոմաս Թոմսենը (տնտեսագետ) և Մովսես Հակոբյանը (իրավաբան): Համապարփակ զեկույց պատրաստելու նպատակով այս օրերին փորձագետները հանդիպումներ են անցկացնում հայաստանյան տարբեր գերատեսչությունների ներկայացուցիչների հետ:

Փորձագետներին հանդիպեց պրոռեկտոր Անահիտ Մանասյանը: Պրոռեկտորը ներկայացրեց Ակադեմիայի գործունեության՝ մասնավորապես մասնագիտական պատրաստման ու վերապատրաստման առանձնահատկությունները: Փորձագետների խնդրանքով՝ պրոռեկտորը նաև ներկայացրեց միջազգային համագործակցությանն առնչվող մանրամասներ՝ միջազգային կառույցների հետ համատեղ իրականացված և իրականացվող ծրագրերը, մշակված դասընթացները, համատեղ այլ միջոցառումները:

Փետրվարի 18-ին Արդարադատության ակադեմիայում ռեկտոր Սերգեյ Առաքելյանը հանդիպեց Ակադեմիայի 2019 թվականի ունկնդիրներին՝ դատավորների թեկնածուների հավակնորդներին և դատախազների թեկնածությունների ցուցակում ընդգրկված անձանց: Այս տարի ունկնդիրների թվում են դատավորների թեկնածուների 19 հավակնորդներ (12-ը՝ քաղաքացիական, 5-ը՝ քրեական, 2-ը՝ վարչական մասնագիտացումներով) և դատախազի 15 թեկնածու: Նրանց մասնագիտական պատրաստումը մեկնարկելու է փետրվարի 25-ին և համաձայն համապատասխան ուսուցման ծրագրերի՝ տևելու է 7 ամիս և 2 շաբաթ՝ մինչև 2019 թ. հոկտեմբերի 11-ը՝ ներառյալ 4 ամիս տևողությամբ փորձաշրջանը:

Ռեկտորը ջերմորեն ողջունեց և շնորհավորեց ներկաներին՝ Ակադեմիայի ունկնդիրների շարքերը համալրելու կապակցությամբ: «Կարծում եմ՝ դուք ընտրել եք ձեր սիրած մասնագիտությունը և ցանկություն ունեք զբաղվելու ձեր սիրած գործով՝ այդ կերպ նպաստելով մեր երկրի արդարադատության համակարգի զարգացմանը և կատարելագործմանը»,-դիմելով ունկնդիրներին՝ նշեց ռեկտորը և պատրաստակամություն հայտնեց հնարավորության սահմաններում աջակցել: Սերգեյ Առաքելյանի խոսքով՝ Ակադեմիայի գլխավոր նպատակը ուսուցման պատշաճ կազմակերպումն է, որի արդյունքում որակյալ կադրեր կունենանք դատաիրավական համակարգում աշխատելու համար:

Ռեկտորն ունկնդիրներին մանրամասն ներկայացրեց Ակադեմիայում ուսումնական գործընթացի առանձնահատկությունները, անդրադարձավ ուսումնառությանը վերաբերող բովանդակային և տեխնիկական հարցերի: Ունկնդիրներին նաև ներկայացվեց Ակադեմիայի պաշտոնական կայքում առանձնացված հատուկ բաժինը, որում առկա է ուսումնական գործընթացին առնչվող ամբողջական տեղեկատվություն:

Ունկնդիրները նաև տեղեկացան, որ պարբերաբար հանդիպումներ են անցկացվելու, որի ընթացքում ռեկտորի հետ ուսումնառության ընթացքում առաջացած հարցերն ու խնդիրները քննարկելու և լուծումներ գտնելու հնարավորություն են ստանալու:

Հունվարի 31-ին Արդարադատության ակադեմիայում տեղի ունեցավ աշխատանքային խորհրդակցություն, որը վարեց ռեկտոր Սերգեյ Առաքելյանը: Համապատասխան ստորաբաժանումների ներկայացուցիչների հետ քննարկվեց Ակադեմիայում քննությունների կազմակերպման և անցկացման կարգը: Ռեկտորի խոսքով՝ Ակադեմիայի լսարաններից մեկը ամբողջությամբ նորոգվել, կահավորվել և տեխնիկապես վերազինվել է և այսուհետ ծառայելու է որպես քննասենյակ էլեկտրոնային եղանակով քննությունների անցկացման համար:

Հետևաբար անհրաժեշտություն է առաջացել փոփոխություններ և լրացումներ կատարել կարգում, որն առաջիկայում ռեկտորը կներկայացնի Ակադեմիայի կառավարման խորհրդի հաստատմանը: Կարգը սահմանում է Ակադեմիայում դատավորների և դատախազների թեկնածությունների ցուցակներում ընդգրկված անձանց, դատական ծառայողների և դատական կարգադրիչների, դատախազության աշխատակազմում պետական ծառայողների գիտելիքների ստուգման եղանակների, քննական հարցերի կառուցվածքի և բովանդակության նվազագույն պահանջները, քննությունների անցկացման կարգն ու պայմանները, գիտելիքների գնահատման և քննական միավորների հաշվարկման, քննության արդյունքների բողոքարկման հետ կապված հարաբերությունները՝ ապահովելով դրանց օբյեկտիվությունն ու հրապարակայնությունը:

Հունվարի 30-ին Արդարադատության ակադեմիա այցելեց Նիդեռլանդների Հելսինկյան կոմիտեի պատվիրակությունը, որի կազմում ընդգրկված էին նաև ներկայացուցիչներ Թբիլիսիում Նիդեռլանդների դեսպանությունից, Լեյդենի համալսարանից, Հաագայի տեղական կառավարման ակադեմիայից:

Հյուրերին ողջունեց Ակադեմիայի պրոռեկտոր Անահիտ Մանասյանը և կարևորեց գործընկերների այցը՝ նշելով, որ միջազգային համագործակցությունն Ակադեմիայի գործունեության առաջնահերթություններից է: Պրոռեկտորը ներկայացրեց մասնագիտական պատրաստման և վերապատրաստման, հեռաուսուցման կազմակերպման առանձնահատկությունները և Ակադեմիայի գործունեությանն առնչվող այլ մանրամասներ:

Հյուրերը շնորհակալություն հայտնեցին ջերմ ընդունելության համար և ներկայացրին իրենց գործունեությունը, առաջարկվող ծրագրերը, համագործակցության հնարավոր ուղղությունները: Նրանց խոսքով՝ իրենք հետևում են Հայաստանում ընթացող փոփոխություններին և մեծ հույսեր են կապում դատաիրավական համակարգում նախանշվող բարեփոխումներրի հետ:

Նիդեռլանդների Հելսինկյան կոմիտեի գործադիր տնօրեն Փեփին Գերիթսի խոսքով՝ Նիդեռլանդների Հելսինկյան կոմիտեի, Լեյդենի համալսարանի և Հաագայի տեղական կառավարման ակադեմիայի կողմից 2017-2020թթ. իրականացվում է իրավական ուսուցման ծրագիր՝ Նիդեռլանդների արտգործնախարարության ֆինանսավորմամբ: Ծրագրի շրջանակում կարողությունների զարգացման և ամրապնդման նպատակով քաղծառայողների, նաև դատաիրավական ոլորտի մասնագետների համար անցկացվում են վերապատրաստումներ: 2019 թվականից վերապատրաստումների մասնակից 11 երկրների ցանկում (Ալբանիա, Բոսնիա և Հերցեգովինա, Վրաստան, Կոսովո, Մակեդոնիա, Մոլդովա, Մոնտենեգրո, Սերբիա, Թուրքիա և Ուկրաինա) ընդգրկված է նաև Հայաստանը: Այդ նպատակով պատվիրակությունը ժամանել է Երևան՝ համապատասխան կառույցների ներկայացուցիչների հետ հանդիպումներ անցկացնելու, ծրագրին հնարավոր մասնակցության վերաբերյալ հարցեր քննարկելու նպատակով:

Հանդիպման ընթացքում կողմերը պայմանավորվեցին քննարկված հարցերի իրականացման ուղղությամբ համապատասխան քայլեր ձեռնարկել: