Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Ապրիլի 24-ի վաղ առավոտյան Արդարադատության ակադեմիայի աշխատակազմը՝ ռեկտոր Սերգեյ Առաքելյանի գլխավորությամբ այցելեց Ծիծեռնակաբերդի հուշահամալիր, անմար կրակի շուրջ ծաղիկներ խոնարհեց և հարգանքի տուրք մատուցեց Հայոց ցեղասպանության զոհերի հիշատակին։ Այսօր Հայոց ցեղասպանության 104-րդ տարելիցն է։

Ապրիլի 22-ին Արդարադատության ակադեմիայում մեկնարկեց ՀՀ քննչական կոմիտեի ծառայողների (քննիչների) թեկնածությունների 2019 թվականի ցուցակում ընդգրկված անձանց՝ երկրորդ խմբի ունկնդիրների մասնագիտական պատրաստումը: Խմբում ընդգրկված է 28 ունկնդիր: Ուսումնական գործընթացը սկսվեց «ՀՀ քրեական իրավունքի արդի հարցեր» դասընթացով:

Առաջին դասից առաջ Ակադեմիայի ռեկտոր Սերգեյ Առաքելյանը հանդիպեց ունկնդիրներին, ողջունեց և շնորհավորեց նրանց:
«Քրեական արդարադատության ոլորտում ամենաբարդ գործառույթը քննիչն է իրականացնում: Բարդ, պատասխանատու, բայց միևնույն ժամանակ պատվաբեր մասնագիտություն եք ընտրել, ինչի կապակցությամբ շնորհավորում եմ և մաղթում նորանոր ձեռքբերումներ»,-նշեց ռեկտորը և ներկայացրեց Ակադեմիայում ուսումնառության առանձնահատկությունները, պատասխանեց հետաքրքրող հարցերին:

Քննիչի թեկնածուների ուսումնառությունն անցկացվելու է ուսուցման ծրագրի համաձայն, որը մշակվել է ՀՀ քննչական կոմիտեի նախագահի համապատասխան հրամանի հիման վրա: Դասընթացների ընդհանուր ժամաքանակը 150 ակադեմիական ժամ է, ևս 6 ակադեմիական ժամ նախատեսված է քննաշրջանի համար, ինչպես նաև երեք ամիս տևողությամբ փորձաշրջան: Ուսուցման ծրագրի համաձայն՝ երկրորդ խմբի քննիչի թեկնածուների ուսումնառությունն ավարտվելու է սեպտեմբերի 17-ին:

Ապրիլի 16-ին Արդարադատության ակադեմիայի ռեկտոր Սերգեյ Առաքելյանը հանդիպեց Ակադեմիայում մասնագիտական պատրաստում անցնող ՀՀ քննչական կոմիտեի ծառայողների (քննիչների) թեկնածությունների 2019թ. ցուցակում ընդգրկված անձանց՝ 1-ին խմբի ունկնդիրներին: Ուսուցման առաջին հատվածն ավարտվել է, որին հաջորդում է քննաշրջանը՝ ապրիլի 22-ից մայիսի 3-ը: Այս քննաշրջանում նախատեսվում է անցկացնել երկու բանավոր քննություն:

Քննաշրջանից առաջ ռեկտորը հանդիպեց ունկնդիրներին, ծանոթացրեց քննությունների կազմակերպման և անցկացման կարգին, քննական հարցերի կառուցվածքի առանձնահատկություններին, գնահատման և քննական միավորների հաշվարկմանը, քննության արդյունքների բողոքարկման ընթացակարգին: Ռեկտորը պատասխանեց քննական գործընթացին առնչվող ունկնդիրներին հետաքրքրող հարցերին:

Սերգեյ Առաքելյանը հավաստիացրեց, որ ամեն ինչ արվել է քննությունները պատշաճ մակարդակով անցկացնելու համար՝ օբյեկտիվության և հրապարակայնության ապահովման նպատակով: Ռեկտորն ունկնդիրներին մաղթեց հաջող քննաշրջան և դրական արդյունքներ:

Ապրիլի 16-ին Արդարադատության ակադեմիա այցելեցին այս օրերին Հայաստանում գտնվող Իտալիայի Հանրապետության դատավորներից և Արդարադատության նախարարության պաշտոնյաներից կազմված պատվիրակությունը:

Ռեկտոր Սերգեյ Առաքելյանը, ողջունելով հյուրերին, շնորհակալություն հայտնեց այցի համար և հատուկ կարևորեց օտարերկրյա գործընկերների հետ շփումները, փորձի փոխանակման անհրաժեշտությունը: Ռեկտորը ներկայացրեց Ակադեմիայի գործունեության առանձնահատկությունները, պատասխանեց հետաքրքրող հարցերին: Ավելին՝ հենց հանդիպման ընթացքում ռեկտորը հյուրերին փոխանցեց Իտալիայի համանման կառույցի՝ Մագիստրատուրայի դպրոցի հետ համագործակցության հրավեր-առաջարկ: Հյուրերը խոստացան քայլեր ձեռնարկել հնարավոր համագործակցությունը կյանքի կոչելու համար: Ավելին՝ Սերգեյ Առաքելյանը առաջարկեց Իտալիայի լավագույն փորձագետներին հրավիրել Հայաստան և Ակադեմիայում դասախոսություններ անցկացնել ինչպես հակակոռուպցիոն պայքարի, այնպես էլ այլ թեմաների շրջանակում: Հյուրերը հաճույքով ընդունեցին առաջարկը:

Իտալիայից ժամանած պատվիրակության անդամները նաև ծանոթացան Ակադեմիայի շենքային պայմաններին, ռեկտորի ուղեկցությամբ եղան մարզերից ժամանող ունկնդիրների համար նախատեսված հյուրանոցային համալիրում, համակարգչայնացված քննասենյակում, դատական նիստերի դահլիճում: Սերգեյ Առաքելյանը նաև հյուրերի միջոցով երախտագիտություն հայտնեց Իտալիայի բարեկամ ժողովրդին օրեր առաջ ընդունած բանաձևի կապակցությամբ, որով Իտալիայի խորհրդարանը կոչ է անում երկրի կառավարությանը ճանաչել Հայոց ցեղասպանությունը: Հյուրերը տպավորված էին և շնորհակալություն հայտնեցին ջերմ ընդունելության համար և խոստացան առավելագույն ջանքեր գործադրել հնարավոր համագործակցությունն իրականություն դարձնելու ուղղությամբ:

Ապրիլի 12-ին Արդարադատության ակադեմիայում անցկացվեց Ակադեմիայում մասնագիտական պատրաստում անցնող ունկնդիրների՝ դատավորների թեկնածուների հավակնորդների և դատախազների թեկնածությունների ցուցակներում ընդգրկված անձանց առաջին քննությունը՝ առաջին անգամ ամբողջությամբ համակարգչայնացված եղանակով:

Մասնագիտական պատրաստման առաջին հատվածն ավարտվել է, որին հաջորդող այս քննաշրջանի համար նախատեսված է տարբեր առարկայական կուրսեր ընդգրկող մեկ միասնական քննություն՝ թեստային տարբերակով: Քննությունից առաջ ունկնդիրները դիտեցին Ակադեմիայում քննությունների անցկացման կարգի մասին հոլովակ:

Ռեկտոր Սերգեյ Առաքելյանն ունկնդիրներին հաջողություն մաղթեց և հավաստիացրեց՝ ամեն ինչ արվել է, որպեսզի քննություններն անցկացվենսահմանված կարգի շրջանակում՝ օբյեկտիվության և հրապարակայնության պահանջների առավելագույն պահպանմամբ: Սահմանված կարգով՝ քննության ամբողջ ընթացքը տեսաձայնագրվել է, ինչպես նաև քննասենյակից դուրս գտնվող տարածքում՝ ուղիղ հեռարձակվել:

Ապրիլի 12-ին Արդարադատության ակադեմիայում ռեկտոր Սերգեյ Առաքելյանը և «Արցախի Հանրապետության դատավորներ» հասարակական կազմակերպության նախագահ Հասմիկ Խաչատրյանը ստորագրեցին փոխըմբռնման հուշագիր:

«Այսօր իրավական հիմքերի վրա է դրվում արցախյան մեր գործընկերների հետ առկա համագործակցությունը: Ուրախությամբ ուզում եմ նշել, որ այսուհետ մեր բոլոր նվաճումները ծառայելու են ոչ միայն Հայաստանի, այլև Արցախի գործընկերների գործառույթների բարելավման նպատակին: Ցանկացած հարցով, եթե կարող ենք ձեզ օժանդակել, միշտ սիրով պատրաստ ենք»,-ասաց ռեկտորը: Ավելին՝ ռեկտորի հանձնարարությամբ՝ արցախյան գործընկերներին տրամադրվեց մասնագիտական որոշակի գրականություն: Սերգեյ Առաքելյանը հավաստիացրեց, որ այսուհետ ևս արդյունավետ համագործակցությանն ուղղված շարունակական քայլեր են ձեռնարկվելու:

Հասմիկ Խաչատրյանն իր հերթին շնորհակալություն հայտնեց համագործակցության և արդյունավետ աջակցության համար:

Ապրիլի 9-ին Արդարադատության ակադեմիայի ռեկտոր Սերգեյ Առաքելյանն ընդունել է ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության (ԹՊԻՀ) գրասենյակի ներկայացուցիչներին՝ ԹՊԻՀ Եվրոպայում, Եվրասիայում և Կենտրոնական Ասիայում ծրագրերի իրականացման խմբի ղեկավար (Վաշինգտոն) Ջուդիթ Քեմբլի գլխավորությամբ:

Ռեկտորը ողջունեց հյուրերին և կարևորեց համագործակցության ընդլայնմանն ուղղված նման այցերը և քննարկումները: «Մեր կառույցների միջև առկա համագործակցության լավագույն գնահատականն արդյունքն է՝ մասնավորապես առարկայական 9 կուրսերի համատեղ մշակումը և դրանց ներդրումը Ակադեմիայի ուսումնական ծրագիր, տրամադրված տեխնիկական աջակցությունը»,-նշեց ռեկտորը: Հյուրերը հետաքրքրված էին Ակադեմիայի գործունեության բարելավման ուղղությամբ նախատեսված անելիքներով, դրանց լուծման հնարավորություններով: Հյուրերի խնդրանքով՝ ռեկտորը ներկայացրեց մի շարք հարցեր, որոնք վերաբերում են ուսումնական գործընթացի շարունակական կատարելագործմանը, փորձագետների ներգրավմանը, Ակադեմիայի դասընթացավարների, նաև աշխատակազմի վերապատրաստմանը, տեսակոնֆերանսների կազմակերպմանը և այլն: Հանդիպման ընթացքում կողմերը քննարկեցին համագործակցության հեռանկարները:

Ռեկտորի ուղեկցությամբ հյուրերը շրջեցին Ակադեմիայում, եղան դատախաղերի անցկացման համար նախատեսված ամբողջությամբ նորացված դահլիճում, ՀՀ-ում ԱՄՆ դեսպանության աջակցությամբ նորոգված, կահավորված և տեխնիկապես վերազինված լսարանում, ծանոթացան տեխնիկական հնարավորություններին:

Արդարադատության ակադեմիան Դատական ոլորտի մասնագետների ուսուցման միջազգային կազմակերպության (IOJT) անդամ է:

Տարեսկզբին Ակադեմիայի ռեկտոր Սերգեյ Առաքելյանի նախաձեռնությամբ միջազգային այս հեղինակավոր կառույց անդամակցության հայտ էր ներկայացվել: Անհրաժեշտ փաստաթղթերի ներկայացման ընթացակարգից հետո կազմակերպության գործադիր մարմինը քննարկել և ընդունել էր Ակադեմիայի անդամակցության հայտը: Այժմ կազմակերպության պաշտոնական կայքի անդամ երկրների ցանկում՝ եվրոպական երկրների շարքում ներառված է նաև Հայաստանի Հանրապետության, մասնավորապես՝ Արդարադատության ակադեմիայի անունը:

Կազմակերպությունը հիմնադրվել է 2002 թվականին՝ նպատակ ունենալով աջակցել աշխարհի դատական ոլորտի մասնագետների համար ուսուցում իրականացնող հաստատությունների աշխատանքներին: IOJT-ը կազմակերպում է միջազգային և տարածաշրջանային գիտաժողովներ, փոխանակման ծրագրեր, որոնք հնարավորություն են տալիս համատեղ քննարկել դատական ոլորտի ուսումնական կենտրոնների ստեղծման և զարգացման ռազմավարությունները, մշակել արդյունավետ ուսումնական պլաններ, զարգացնել դասավանդման կարողությունները, կատարելագործել ուսուցման մեթոդաբանությունը:

Դատական ոլորտի մասնագետների ուսուցման միջազգային կազմակերպությունն ունի 100-ից ավելի անդամ-ինստիտուտներ՝ աշխարհի շուրջ 80 երկրներից:

Ապրիլի 1-ին Արդարադատության ակադեմիայում մեկնարկել է դատավորների 2019 թվականի վերապատրաստումը: Առաջին խմբում ընդգրկված է 29 դատավոր, որոնցից 2-ը՝ Արցախի Հանրապետությունից: Տարեկան վերապատրաստումն իրականացվում է Ակադեմիայի կողմից մշակված ուսուցման ծրագրի համապատասխան՝ յուրաքանչյուր դատավորի համար 80 ակադեմիական ժամ ընդհանուր ժամաքանակով:

Դատավորների վերապատրաստումն իրականացվում է ընդհանուր և հարակից, և հատուկ մասնագիտական դասընթացների մոդուլների հիման վրա: Յուրաքանչյուր դատավոր, իր մասնագիտացմանը համապատասխան (քաղաքացիաիրավական, քրեաիրավական, վարչաիրավական), վերապատրաստվում է 40 ակադեմիական ժամ՝ հատուկ և 40 ակադեմիական ժամ՝ ընդհանուր և հարակից մասնագիտական կամ հեռավար ուսուցման ձևով դասավանդվող դասընթացների շրջանակում: Առկա ուսուցման ձևով վերապատրաստման ժամանակացույց է սահմանված 2019թ. ապրիլ-մայիս և սեպտեմբեր-դեկտեմբեր ամիսները, իսկ հեռավար ուսուցման ձևով՝ սեպտեմբեր-դեկտեմբեր ամիսները:

Մարտի 30-ին Արդարադատության ակադեմիայում ռեկտոր Սերգեյ Առաքելյանը ավարտական վկայականներ հանձնեց ՀՀ հատուկ քննչական ծառայության քննիչների վերապատրաստման առաջին խմբում ընդգրկված 9 ունկնդրի: Ռեկտորը շնորհավորեց վերապատրաստում անցած ՀՔԾ քննիչներին և հաջողություն մաղթեց իրենց պատասխանատու ծառայության մեջ:

Համաձայն «Հատուկ քննչական ծառայության մասին» ՀՀ օրենքի՝ ՀՔԾ քննիչների պարտադիր վերապատրաստումն անցկացվում է առնվազն 3 տարին մեկ անգամ, ՀՀ հատուկ քննչական ծառայության ծառայողների ուսուցման ծրագրի համաձայն՝ 30 ակադեմիական ժամ ծավալով։ Ուսուցման ծրագիրը նպատակաուղղված է ՀՔԾ ծառայողների մասնագիտական գիտելիքների և հմտությունների շարունակական կատարելագործմանը քրեական իրավունքի, քրեական դատավարության, ՄԻԵԴ իրավական դիրքորոշումների, խոշտանգումների և կոռուպցիայի դեմ պայքարի ոլորտներում: Վերապատրաստումն իրականացվում է երկու խմբով: