Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Արդարադատության ակադեմիայի ռեկտոր Սերգեյ Առաքելյանը, Եվրոպայի Խորհրդի հրավերով, հունիսի 4-ին մասնակցել է Մոլդովայի մայրաքաղաք Քիշնևում անցկացված միջազգային համաժողովին՝ նվիրված Մարդու իրավունքների եվրոպական կոնվենցիայի 5-րդ հոդվածին՝ Ազատության և անձնական անձեռնմխելիության իրավունքին: Համաժողովին մասնակցում էին Երևան քաղաքի դատախազ Գևորգ Բաղդասարյանը, ՀՀ վերաքննիչ քրեական դատարանի դատավոր Սերգեյ Մարաբյանը: Համաժողովը կազմակերպել էին Եվրոպայի խորհուրդը և Մոլդովայի արդարադատության ազգային ինստիտուտը:

Ներկա էին մասնագիտական պատրաստում և վերապատրաստում իրականացնող կառույցների ներկայացուցիչներ Հայաստանից, Ադրբեջանից, Բելառուսից, Ռուսաստանից, Վրաստանից, Ռումինիայից, Մոլդովայից և Ուկրաինայից, նաև քաղաքացիական հասարակության, միջազգային կազմակերպությունների ներկայացուցիչներ:

Համաժողովին ելույթով հանդես եկավ Սերգեյ Առաքելյանը՝ ներկայացնելով Մարդու իրավունքների և հիմնարար ազատությունների պաշտպանության մասին եվրոպական կոնվենցիան և Արդարադատության ակադեմիայի ուսումնական գործընթացը: Ռեկտորը ներկայացրեց 5-րդ հոդվածին առնչվող Ակադեմիայի դասընթացները:

Որպես ԵԽ փորձագետ՝ զեկույցով հանդես եկավ նաև Արդարադատության ակադեմիայի դասընթացավար Արա Ղազարյանը: Համաժողովն անցկացվեց քննարկումների և աշխատաժողովների ձևաչափով:

Հունիսի 6-ին Արդարադատության ակադեմիայում անցկացվեց դատական կարգադրիչների առաջին խմբի ունկնդիրների վերապատրաստման արդյունքների գնահատում՝ միասնական բանավոր քննության եղանակով:

Դատական կարգադրիչների 2019 թվականի վերապատրաստումը մեկնարկել էր հունիսի 3-ին: Նախատեսվում է այս տարի վերապատրաստում անցկացնել 8 խմբի՝ ընդհանուր թվով 215 դատական կարգադրիչի համար:

Դատական կարգադրիչների վերապատրաստումն ու հատուկ ուսուցումը իրականացվում են ուսուցման ծրագրի համաձայն, որն ուղղված է դատական կարգադրիչների գիտելիքների և հմտությունների կատարելագործմանը, վարքաբանության, առաջին բուժական և հոգեբանական օգնության, հատուկ միջոցների և հրազենի գործադրման ոլորտներում:

Հունիսի 3-ին Արդարադատության ակադեմիայում մեկնարկեց դատական կարգադրիչների 2019 թվականի վերապատրաստումը: Այս տարի նախատեսված է վերապատրաստում անցկացնել 8 խմբի՝ ընդհանուր թվով 215 դատական կարգադրիչի համար: Առաջին խմբում ընդգրկված է 27 կարգադրիչ:

Դատական կարգադրիչների վերապատրաստումն ու հատուկ ուսուցումը իրականացվում են ուսուցման ծրագրի համաձայն, որը մշակվել է «Արդարադատության ակադեմիայի մասին» ՀՀ օրենքի հիման վրա: Ծրագիրն ուղղված է դատական կարգադրիչների գիտելիքների և հմտությունների կատարելագործմանը, վարքաբանության, առաջին բուժական և հոգեբանական օգնության, հատուկ միջոցների և հրազենի գործադրման ոլորտներում:

Դատական կարգադրիչների վերապատրաստման տեսական մասն անցկացվում է Արդարադատության ակադեմիայում, իսկ գործնականը՝ հրազենի և հատուկ միջոցների գործադրման հմտությունները՝ «Իրավական կրթության և վերականգնողական ծրագրերի իրականացման կենտրոն» ՊՈԱԿ-ում:

Յուրաքանչյուր խմբի վերապատրաստումն ու հատուկ ուսուցումն ավարտվում է վերապատրաստման արդյունքների գնահատմամբ՝ միասնական բանավոր քննությամբ:

Մայիսի 27-ին Արդարադատության ակադեմիայում մեկնարկել է ՀՀ քննչական կոմիտեի ծառայողների (քննիչների) 2019 թվականի վերապատրաստումը:

Առաջին խմբում ընդգրկված է 23 քննիչ: Այս տարի նախատեսվում է կազմակերպել վերապատրաստում 15 խմբի քննիչների համար: Վերապատրաստումն իրականացվում է համապատասխան ուսուցման ծրագրի համաձայն՝ 30 ակադեմիական ժամ:

Մայիսի 24-ին Արդարադատության ակադեմիայի ռեկտոր Սերգեյ Առաքելյանը հանդիպեց Ակադեմիայում մասնագիտական պատրաստում անցնող ՀՀ քննչական կոմիտեի ծառայողների (քննիչների) թեկնածությունների 2019թ. ցուցակում ընդգրկված անձանց՝ 2-րդ խմբի ունկնդիրներին: Խմբում ընդգրկված է 28 ունկնդիր: Այս քննաշրջանում նախատեսվում է անցկացնել երկու բանավոր քննություն:

Ձևավորված ավանդույթի համաձայն՝ քննաշրջանից առաջ ռեկտորը հանդիպեց ունկնդիրներին, ծանոթացրեց քննությունների կազմակերպման և անցկացման կարգին, պատասխանեց քննական գործընթացին առնչվող՝ ունկնդիրներին հետաքրքրող հարցերին:

Ռեկտորն ունկնդիրներին մաղթեց հաջողականություն և դրական արդյունքներ:

Մայիսի 24-ին Արդարադատության ակադեմիայում անցկացվեց սեմինար՝ «Սահմանադրական իրավունքի ազդեցությունը վարչական վարույթի և դատավարության վրա» թեմայով: Սեմինարին մասնակցում էին ՀՀ վճռաբեկ դատարանի քաղաքացիական և վարչական պալատի, ՀՀ վերաքննիչ վարչական, ՀՀ վարչական դատարանների դատավորներ: Սեմինարն իրականացվեց Գերմանական միջազգային համագործակցության ընկերության (GIZ) հետ համատեղ՝ GIZ «Հարավային Կովկասում եվրոպական չափորոշիչներին իրավական համապատասխանեցում» ծրագրի շրջանակում:

Ակադեմիայի պրոռեկտոր Անահիտ Մանասյանը ողջունեց հյուրերին և նշեց, որ Ակադեմիան մեծապես կարևորում է միջազգային կազմակերպությունների, այդ թվում Գերմանական միջազգային համագործակցության ընկերության (GIZ) հետ համագործակցությունը, որի շրջանակում կազմակերպվել է վերոնշյալ սեմինարը: Պրոռեկտորը ներկայացրեց փորձագետներին և արդյունավետ աշխատանք մաղթեց:

Սեմինարը վարում էին Գերմանիայի Վարչական դաշնային դատարանի դատավոր, պալատի նախագահ, դոկտոր, պրոֆեսոր Ռյուդիգեր Ռուբելը և Գերմանիայի Սահմանադրական դատարանի պաշտոնաթող դատավոր, Դաշնային Գերագույն վարչական դատարանի պաշտոնաթող դատավոր, դոկտոր, պրոֆեսոր Միխայիլ Այխբերգերը:

Մայիսի 14-ին Արդարադատության ակադեմիայի ռեկտոր Սերգեյ Առաքելյանը քննաշրջանին ընդառաջ աշխատանքային հանդիպում անցկացրեց մասնագիտական պատրաստում անցնող ունկնդիրների՝ դատավորների թեկնածուների հավակնորդների և դատախազների թեկնածությունների ցուցակում ընդգրկված անձանց հետ: Հանդիպման ընթացքում քննարկվեցին քննաշրջանին առնչվող բովանդակային և տեխնիկական մի շարք հարցեր, նաև գնահատման չափորոշիչները, կարգը և այլն: Ռեկտորը ներկայացրեց քննակարգին առնչվող մանրամասներ, պատասխանեց ունկնդիրներին հետաքրքրող հարցերին, նաև խոստացավ ընթացք տալ կազմակերպական հարց-առաջարկներին, որոնք հնչեցվեցին ունկնդիրների կողմից: Ռեկտորը հավաստիացրեց, որ ամեն ինչ արվել է քննությունները պատշաճ մակարդակով անցկացնելու համար՝ օբյեկտիվության և հրապարակայնության ապահովման նպատակով:

Ուսուցման երկրորդ հատվածին հաջորդելու է քննաշրջանը, որը մեկնարկելու է մայիսի 27-ին, անցկացվելու է 1-ական գրավոր քննություն՝ դատավորների թեկնածուների հավակնորդների և դատախազների թեկնածուների համար:

Մայիսի 6-ին Արդարադատության ակադեմիայում մեկնարկել է դատախազների 2019 թվականի վերապատրաստումը: «Դատախազության մասին» ՀՀ օրենքի համաձայն՝ դատախազները պարտավոր են ոչ պակաս, քան երկու տարին մեկ անցնել վերապատրաստում: Նախատեսվում է այս տարի ընդհանուր և հարակից մասնագիտական ոլորտի դասընթացներով վերապատրաստում անցկացնել երեք խմբի ունկնդիրների համար:

Ուսումնառությունը յուրաքանչյուր դատախազի համար 80 ակադեմիական ժամ է: Ուսումնառությունն իրականացվում է երկու փուլով՝ յուրաքանչյուրը 40 ակադեմիական ժամ (մեկ շաբաթ) տևողությամբ: Դատախազների վերապատրաստումն անցկացվում է Ակադեմիայի կողմից մշակված համապատասխան ուսուցման ծրագրի հիման վրա` մասնագիտական գիտելիքների և հմտությունների շարունակական կատարելագործման նպատակով:

Մայիսի 6-ին Արդարադատության ակադեմիայում մեծ հանդիսավորությամբ տեղի ունեցավ «Հայ-ամերիկյան բարեկամության նախասրահ»-ի պաշտոնական բացման արարողությունը: Կարմիր ժապավենը կտրեցին Արդարադատության ակադեմիայի ռեկտոր Սերգեյ Առաքելյանը, ՀՀ-ում ԱՄՆ դեսպան Լին Թրեյսին, ԱՄՆ փոխպետքարտուղարի տեղակալ, Թմրամիջոցների դեմ պայքարի և իրավապահ համագործակցության բյուրոյի (ԹՊԻՀ) ղեկավար Ջորգեն Կ. Էնդրյուսը: Միջոցառմանը ներկա էին ՀՀ-ում ԱՄՆ դեսպանության, մասնավորապես՝ ԹՊԻՀ երևանյան գրասենյակի ներկայացուցիչները, Ակադեմիայի դասընթացավարները, ունկնդիրները, աշխատակազմը:

Հանդիսավոր արարողությունից առաջ ռեկտորը հանդիպեց Ջորգեն Կ. Էնդրյուսին: Ռեկտորը ջերմորեն ողջունեց բարձրաստիճան հյուրին և նշեց Ակադեմիա-ԹՊԻՀ համագործակցության արձանագրած հաջողությունները՝ սկսած առարկայական նոր դասընթացների մշակումից մինչև դասընթացավարների վերապատրաստում, լսարան-քննասենյակի նորոգում, կահավորում և տեխնիկական վերազինում և այլն: Ջորգեն Կ. Էնդրյուսը շնորհակալություն հայտնեց հյուրընկալության համար և նշեց, որ ԹՊԻՀ-ն աշխարհի 5 մայրցամաքներում գործունեություն է ծավալում, որի երկարաժամկետ արդյունքները տեսանելի են: Նա նաև ընդգծեց համատեղ իրականացված և իրականացվելիք աշխատանքների կարևորությունը:

Հանդիպումից հետո և «Հայ-ամերիկյան բարեկամության նախասրահ»-ի հանդիսավոր բացումից առաջ ելույթով հանդես եկավ Սերգեյ Առաքելյանը: Ռեկտորը նշեց, որ միջազգային համագործակցությունը Ակադեմիայի գործունեության առաջնահերթություններից է, և այդ համատեքստում առանձնահատուկ ընդգծեց ՀՀ-ում ԱՄՆ դեսպանության հետ համագործակցության կարևորությունը. «Մեր համագործակցությունը երկխոսության մի հարթակ է՝ ևս մեկ անգամ ամրապնդելու հայ և ամերիկացի ժողովուրդների միջև առկա բարեկամությունը՝ հիմնված միասնական շահերի ու արժեքների վրա»,-ասաց ռեկտորը:

«Ուրախ եմ, որ այսօր կտրելու ենք Արդարադատության ակադեմիայի «Հայ-ամերիկյան բարեկամության նախասրահ»-ի ժապավենը, որը ներառում է ԹՊԻՀ կողմից ձևավորած լսարանը և քննասենյակը: Միացյալ Նահանգները պատրաստ է շարունակել աջակցությունը Ակադեմիային նմանօրինակ նախագծերի միջոցով, որոնք նպաստում են Հայաստանում քրեական արդարադատության թափանցիկ, արդյունավետ, արդարացի և անկախ համակարգի հետագա զարգացմանը»,-նշեց դեսպանը:

«Մեր երկու պետություններն ընդհանուր նպատակ ունեն, այն է՝ Հայաստանի քրեական արդարադատության համակարգի ամրապնդումը՝ իրավական ոլորտի մասնագետների կարողությունների զարգացման միջոցով: ԹՊԻՀ-ն ունի գլոբալ ցանց և ռեսուրսներ, որոնք կարող են օգտակար լինել նպատակներին հասնելու հարցում»,-նշեց Ջորգեն Կ. Էնդրյուսը՝ վերահաստատելով Հայաստանին և Ակադեմիային աջակցություն տրամադրելու պատրաստակամությունը՝ ուղղված ոլորտի բարեփոխումներին:

Պաշտոնական բացումից հետո հյուրերը ռեկտորի ուղեկցությամբ շրջեցին «Հայ-ամերիկյան բարեկամության նախասրահ»-ում, եղան ՀՀ-ում ԱՄՆ դեսպանության ֆինանսական աջակցությամբ ամբողջությամբ նորոգված, կահավորած և տեխնիկապես վերազինված լսարանում, որը ծառայելու է և՛ որպես քննասենյակ՝ համակարգչայնացված եղանակով քննություններն անցկացնելու համար, և՛ համաժողովների դահլիճ:
Նախասրահից բացվում են ևս երկու լսարաններ, որոնցից մեկը ձևավորված է ազգությամբ հայ ԱՄՆ ականավոր քաղաքացիների լուսանկարներով, մյուսը՝ աշխարահռչակ հայ կանանց լուսանկարներով, որոնք բեկումնային դեր են ունեցել համաշխարհային պատմության մեջ: Հյուրերը տպավորված էին իրականացված աշխատանքով:

Ապրիլի 27-ին Արդարադատության ակադեմիայում ռեկտոր Սերգեյ Առաքելյանը ավարտական վկայականներ հանձնեց ՀՀ հատուկ քննչական ծառայության քննիչների վերապատրաստման երկրորդ խմբում ընդգրկված 8 ունկնդրի և հաջողություն մաղթեց իրենց պատասխանատու ծառայության մեջ:

Համաձայն «Հատուկ քննչական ծառայության մասին» ՀՀ օրենքի՝ ՀՔԾ քննիչների պարտադիր վերապատրաստումն անցկացվում է առնվազն 3 տարին մեկ անգամ, ՀՀ հատուկ քննչական ծառայության ծառայողների տարեկան վերապատրաստման ուսուցման ծրագրի համաձայն՝ 30 ակադեմիական ժամ ծավալով։ ՀՔԾ քննիչների 2019թ. վերապատրաստումն իրականացվել է երկու խմբով, առաջին խմբի ունկնդիրներն ավարտական վկայականներ էին ստացել մարտի 30-ին: Վերապատրաստմանը հաջորդում է հատուկ ուսուցումը՝ ՀՔԾ ծառայողների մոտ հրազենի գործադրման հմտությունների ձևավորման և դրանց շարունակական կատարելագործման նպատակով: Հատուկ ուսուցումը նախատեսվում է անցկացնել մայիսին: