Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Ապրիլի 29-ին Արդարադատության ակադեմիայում ռեկտոր Սերգեյ Առաքելյանն ընդունեց ԱՄՆ միջազգային զարգացման գործակալության (USAID) ներկայացուցիչներին՝ գնահատման խմբի ղեկավար Սայմոն Քոնթեին և փորձագետ Պավել Թադևոսյանին:

Ռեկտորը ողջունեց հյուրերին և ներկայացրեց Ակադեմիայի գործունեության առանձնահատկությունները, ուսումնական գործընթացին, ուսուցման ծրագրերին և միջազգային համագործակցությանն առնչվող մանրամասներ:
Սայմոն Քոնթեն նշեց, որ իրավական բարեփոխումների և կոռուպցիայի դեմ պայքարի ծրագրի շրջանակում հետազոտություն է պատրաստում, որպեսզի հնարավոր լինի բացահայտել ոլորտում առկա խնդիրները և հստակեցնել USAID-ի աջակցության ձևաչափը: Նրա խոսքով՝ քանի որ Ակադեմիան շատ կարևոր դերակատարում ունի երկրում դատիրավական ոլորտի մասնագետների պատրաստման և վերապատրաստման գործում, ուստի չափազանց հետաքրքրված է Ակադեմիայի գործունեությամբ, համագործակցության հնարավորություններով:

Հանդիպման ավարտին հյուրերը հնարավորություն ունեցան ռեկտորի ուղեկցությամբ շրջել Ակադեմիայում, ծանոթանալ պայմաններին, լինել դատական նիստերի դահլիճում, ինչպես նաև ԱՄՆ դեսպանատան ֆինանսական աջակցությամբ ամբողջությամբ նորոգված, կահավորված և տեխնիկապես վերազինված լսարանում:

Ապրիլի 25-ին հանդիսավոր միջոցառման ընթացքում տրվեց «Աջակցություն դատական բարեփոխումներին քրեական արդարադատության ոլորտում» ծրագրի մեկնարկը: Ծրագիրն իրականացվում է Եվրոպական միության (ԵՄ) և Եվրոպայի խորհրդի (ԵԽ) «Գործընկերություն հանուն լավ կառավարման» 2019-2021 թվականների ծրագրի շրջանակում:

Ծրագրի բացման արարողությանը մասնակցում էր Արդարադատության ակադեմիայի պրոռեկտոր Անահիտ Մանասյանը: Ներկա էին Երևանում ԵԽ գրասենյակի ղեկավար Նատալյա Վուտովան, Հայաստանում ԵՄ պատվիրակության համագործակցության բաժնի ղեկավար Գոնզալո Սեռանո Դէ Լա Ռոսան, Մարդու իրավունքների եվրոպական դատարանում ՀՀ կառավարության լիազոր ներկայացուցիչ Եղիշե Կիրակոսյանը, ՀՀ արդարադատության նախարարի առաջին տեղակալ Արտակ Ասատրյանը, ՀՀ դատաիրավական համակարգի ներկայացուցիչներ, հյուրեր: Պրոռեկտորն իր ողջույնի խոսքում կարևորեց ԵԽ-ի հետ ինչպես այս, այնպես էլ համագործակցության շրջանակում արդյունավետորեն իրականացված այլ ծրագրերը, ներկայացրեց արդյունքները:

Արդարադատության ակադեմիան «Աջակցություն դատական բարեփոխումներին քրեական արդարադատության ոլորտում» ծրագրի ազգային գործընկերների թվում է: Ծրագրի համաձայն՝ նախատեսվում է հզորացնել Ակադեմիայի կարողությունները՝ քրեաիրավական մասնագիտացմամբ դատավորների, դատավորների թեկնածուների և դատական ծառայողների վերապատրաստման ուղղությամբ, ինչպես նաև մշակել համապատասխան դասընթացներ և նյութեր, կազմակերպել դասավանդողների համար վերապատրաստումներ:

Ապրիլի 26-ին մեկնարկել է Արդարադատության ակադեմիայում մասնագիտական պատրաստում անցնող ՀՀ քննչական կոմիտեի ծառայողների (քննիչների) թեկնածությունների ցուցակում ընդգրկված անձանց 1-ին խմբի ունկնդիրների քննաշրջանը: Այս քննաշրջանի ընթացքում նախատեսվում է անցկացնել երկու բանավոր քննություն:

Այսօր ունկնդիրները հանձնել են երկու առարկայական կուրսեր ընդգրկող մեկ միասնական քննություն՝ «ՀՀ քրեական դատավարության արդի հարցեր» և «ՀՀ քրեական իրավունքի արդի հարցեր» դասընթացներից:

Ուսուցման ծրագրի համապատասխան՝ քննաշրջանը կավարտվի մայիսի 3-ին, որին կհաջորդի փորձաշրջանը՝ 3 ամիս տևողությամբ:

Ապրիլի 24-ի վաղ առավոտյան Արդարադատության ակադեմիայի աշխատակազմը՝ ռեկտոր Սերգեյ Առաքելյանի գլխավորությամբ այցելեց Ծիծեռնակաբերդի հուշահամալիր, անմար կրակի շուրջ ծաղիկներ խոնարհեց և հարգանքի տուրք մատուցեց Հայոց ցեղասպանության զոհերի հիշատակին։ Այսօր Հայոց ցեղասպանության 104-րդ տարելիցն է։

Ապրիլի 22-ին Արդարադատության ակադեմիայում մեկնարկեց ՀՀ քննչական կոմիտեի ծառայողների (քննիչների) թեկնածությունների 2019 թվականի ցուցակում ընդգրկված անձանց՝ երկրորդ խմբի ունկնդիրների մասնագիտական պատրաստումը: Խմբում ընդգրկված է 28 ունկնդիր: Ուսումնական գործընթացը սկսվեց «ՀՀ քրեական իրավունքի արդի հարցեր» դասընթացով:

Առաջին դասից առաջ Ակադեմիայի ռեկտոր Սերգեյ Առաքելյանը հանդիպեց ունկնդիրներին, ողջունեց և շնորհավորեց նրանց:
«Քրեական արդարադատության ոլորտում ամենաբարդ գործառույթը քննիչն է իրականացնում: Բարդ, պատասխանատու, բայց միևնույն ժամանակ պատվաբեր մասնագիտություն եք ընտրել, ինչի կապակցությամբ շնորհավորում եմ և մաղթում նորանոր ձեռքբերումներ»,-նշեց ռեկտորը և ներկայացրեց Ակադեմիայում ուսումնառության առանձնահատկությունները, պատասխանեց հետաքրքրող հարցերին:

Քննիչի թեկնածուների ուսումնառությունն անցկացվելու է ուսուցման ծրագրի համաձայն, որը մշակվել է ՀՀ քննչական կոմիտեի նախագահի համապատասխան հրամանի հիման վրա: Դասընթացների ընդհանուր ժամաքանակը 150 ակադեմիական ժամ է, ևս 6 ակադեմիական ժամ նախատեսված է քննաշրջանի համար, ինչպես նաև երեք ամիս տևողությամբ փորձաշրջան: Ուսուցման ծրագրի համաձայն՝ երկրորդ խմբի քննիչի թեկնածուների ուսումնառությունն ավարտվելու է սեպտեմբերի 17-ին:

Ապրիլի 16-ին Արդարադատության ակադեմիայի ռեկտոր Սերգեյ Առաքելյանը հանդիպեց Ակադեմիայում մասնագիտական պատրաստում անցնող ՀՀ քննչական կոմիտեի ծառայողների (քննիչների) թեկնածությունների 2019թ. ցուցակում ընդգրկված անձանց՝ 1-ին խմբի ունկնդիրներին: Ուսուցման առաջին հատվածն ավարտվել է, որին հաջորդում է քննաշրջանը՝ ապրիլի 22-ից մայիսի 3-ը: Այս քննաշրջանում նախատեսվում է անցկացնել երկու բանավոր քննություն:

Քննաշրջանից առաջ ռեկտորը հանդիպեց ունկնդիրներին, ծանոթացրեց քննությունների կազմակերպման և անցկացման կարգին, քննական հարցերի կառուցվածքի առանձնահատկություններին, գնահատման և քննական միավորների հաշվարկմանը, քննության արդյունքների բողոքարկման ընթացակարգին: Ռեկտորը պատասխանեց քննական գործընթացին առնչվող ունկնդիրներին հետաքրքրող հարցերին:

Սերգեյ Առաքելյանը հավաստիացրեց, որ ամեն ինչ արվել է քննությունները պատշաճ մակարդակով անցկացնելու համար՝ օբյեկտիվության և հրապարակայնության ապահովման նպատակով: Ռեկտորն ունկնդիրներին մաղթեց հաջող քննաշրջան և դրական արդյունքներ:

Ապրիլի 16-ին Արդարադատության ակադեմիա այցելեցին այս օրերին Հայաստանում գտնվող Իտալիայի Հանրապետության դատավորներից և Արդարադատության նախարարության պաշտոնյաներից կազմված պատվիրակությունը:

Ռեկտոր Սերգեյ Առաքելյանը, ողջունելով հյուրերին, շնորհակալություն հայտնեց այցի համար և հատուկ կարևորեց օտարերկրյա գործընկերների հետ շփումները, փորձի փոխանակման անհրաժեշտությունը: Ռեկտորը ներկայացրեց Ակադեմիայի գործունեության առանձնահատկությունները, պատասխանեց հետաքրքրող հարցերին: Ավելին՝ հենց հանդիպման ընթացքում ռեկտորը հյուրերին փոխանցեց Իտալիայի համանման կառույցի՝ Մագիստրատուրայի դպրոցի հետ համագործակցության հրավեր-առաջարկ: Հյուրերը խոստացան քայլեր ձեռնարկել հնարավոր համագործակցությունը կյանքի կոչելու համար: Ավելին՝ Սերգեյ Առաքելյանը առաջարկեց Իտալիայի լավագույն փորձագետներին հրավիրել Հայաստան և Ակադեմիայում դասախոսություններ անցկացնել ինչպես հակակոռուպցիոն պայքարի, այնպես էլ այլ թեմաների շրջանակում: Հյուրերը հաճույքով ընդունեցին առաջարկը:

Իտալիայից ժամանած պատվիրակության անդամները նաև ծանոթացան Ակադեմիայի շենքային պայմաններին, ռեկտորի ուղեկցությամբ եղան մարզերից ժամանող ունկնդիրների համար նախատեսված հյուրանոցային համալիրում, համակարգչայնացված քննասենյակում, դատական նիստերի դահլիճում: Սերգեյ Առաքելյանը նաև հյուրերի միջոցով երախտագիտություն հայտնեց Իտալիայի բարեկամ ժողովրդին օրեր առաջ ընդունած բանաձևի կապակցությամբ, որով Իտալիայի խորհրդարանը կոչ է անում երկրի կառավարությանը ճանաչել Հայոց ցեղասպանությունը: Հյուրերը տպավորված էին և շնորհակալություն հայտնեցին ջերմ ընդունելության համար և խոստացան առավելագույն ջանքեր գործադրել հնարավոր համագործակցությունն իրականություն դարձնելու ուղղությամբ:

Ապրիլի 12-ին Արդարադատության ակադեմիայում անցկացվեց Ակադեմիայում մասնագիտական պատրաստում անցնող ունկնդիրների՝ դատավորների թեկնածուների հավակնորդների և դատախազների թեկնածությունների ցուցակներում ընդգրկված անձանց առաջին քննությունը՝ առաջին անգամ ամբողջությամբ համակարգչայնացված եղանակով:

Մասնագիտական պատրաստման առաջին հատվածն ավարտվել է, որին հաջորդող այս քննաշրջանի համար նախատեսված է տարբեր առարկայական կուրսեր ընդգրկող մեկ միասնական քննություն՝ թեստային տարբերակով: Քննությունից առաջ ունկնդիրները դիտեցին Ակադեմիայում քննությունների անցկացման կարգի մասին հոլովակ:

Ռեկտոր Սերգեյ Առաքելյանն ունկնդիրներին հաջողություն մաղթեց և հավաստիացրեց՝ ամեն ինչ արվել է, որպեսզի քննություններն անցկացվենսահմանված կարգի շրջանակում՝ օբյեկտիվության և հրապարակայնության պահանջների առավելագույն պահպանմամբ: Սահմանված կարգով՝ քննության ամբողջ ընթացքը տեսաձայնագրվել է, ինչպես նաև քննասենյակից դուրս գտնվող տարածքում՝ ուղիղ հեռարձակվել:

Ապրիլի 12-ին Արդարադատության ակադեմիայում ռեկտոր Սերգեյ Առաքելյանը և «Արցախի Հանրապետության դատավորներ» հասարակական կազմակերպության նախագահ Հասմիկ Խաչատրյանը ստորագրեցին փոխըմբռնման հուշագիր:

«Այսօր իրավական հիմքերի վրա է դրվում արցախյան մեր գործընկերների հետ առկա համագործակցությունը: Ուրախությամբ ուզում եմ նշել, որ այսուհետ մեր բոլոր նվաճումները ծառայելու են ոչ միայն Հայաստանի, այլև Արցախի գործընկերների գործառույթների բարելավման նպատակին: Ցանկացած հարցով, եթե կարող ենք ձեզ օժանդակել, միշտ սիրով պատրաստ ենք»,-ասաց ռեկտորը: Ավելին՝ ռեկտորի հանձնարարությամբ՝ արցախյան գործընկերներին տրամադրվեց մասնագիտական որոշակի գրականություն: Սերգեյ Առաքելյանը հավաստիացրեց, որ այսուհետ ևս արդյունավետ համագործակցությանն ուղղված շարունակական քայլեր են ձեռնարկվելու:

Հասմիկ Խաչատրյանն իր հերթին շնորհակալություն հայտնեց համագործակցության և արդյունավետ աջակցության համար:

Ապրիլի 9-ին Արդարադատության ակադեմիայի ռեկտոր Սերգեյ Առաքելյանն ընդունել է ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության (ԹՊԻՀ) գրասենյակի ներկայացուցիչներին՝ ԹՊԻՀ Եվրոպայում, Եվրասիայում և Կենտրոնական Ասիայում ծրագրերի իրականացման խմբի ղեկավար (Վաշինգտոն) Ջուդիթ Քեմբլի գլխավորությամբ:

Ռեկտորը ողջունեց հյուրերին և կարևորեց համագործակցության ընդլայնմանն ուղղված նման այցերը և քննարկումները: «Մեր կառույցների միջև առկա համագործակցության լավագույն գնահատականն արդյունքն է՝ մասնավորապես առարկայական 9 կուրսերի համատեղ մշակումը և դրանց ներդրումը Ակադեմիայի ուսումնական ծրագիր, տրամադրված տեխնիկական աջակցությունը»,-նշեց ռեկտորը: Հյուրերը հետաքրքրված էին Ակադեմիայի գործունեության բարելավման ուղղությամբ նախատեսված անելիքներով, դրանց լուծման հնարավորություններով: Հյուրերի խնդրանքով՝ ռեկտորը ներկայացրեց մի շարք հարցեր, որոնք վերաբերում են ուսումնական գործընթացի շարունակական կատարելագործմանը, փորձագետների ներգրավմանը, Ակադեմիայի դասընթացավարների, նաև աշխատակազմի վերապատրաստմանը, տեսակոնֆերանսների կազմակերպմանը և այլն: Հանդիպման ընթացքում կողմերը քննարկեցին համագործակցության հեռանկարները:

Ռեկտորի ուղեկցությամբ հյուրերը շրջեցին Ակադեմիայում, եղան դատախաղերի անցկացման համար նախատեսված ամբողջությամբ նորացված դահլիճում, ՀՀ-ում ԱՄՆ դեսպանության աջակցությամբ նորոգված, կահավորված և տեխնիկապես վերազինված լսարանում, ծանոթացան տեխնիկական հնարավորություններին: