Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Մայիսի 31-ին Արդարադատության ակադեմիա էին այցելել Հայաստանի հաշտարարների ինքակարգավորվող կազմակերպության (ԻԿԿ) նախագահ Հայկ Հովհաննիսյանը, ԻԿԿ վերահսկողական մարմնի անդամ, հաշտարար Լուսինե Թասալյանը:

Ողջունելով հյուրերի համագործակցության առաջարկը՝ Արդարադատության ակադեմիայի ռեկտոր Սերգեյ Առաքելյանը նշեց, որ Հայաստանում հաշտարարության ինստիտուտը նորություն է, և հաշտարարության կայացման համար անհրաժեշտ է այդ թեմայով դասընթացի մշակում և անցկացում:

«Փորձը ցույց է տալիս, որ Հայաստանում շատ դատավորներ լիարժեք պատկերացում չունեն հաշտարարության վերաբերյալ»,-նշեց Հայկ Հովհաննիսյանը: Ռեկտորը պատրաստակամություն հայտնեց առաջիկայում կազմակերպել հրավիրյալ դասախոսների դասախոսություններ և անցկացնել սեմինարներ ինչպես դատավորի թեկնածուների, այնպես էլ գործող դատավորների համար: Իսկ որպես առանձին դասընթաց՝ այն հնարավոր կլինի ներառել 2018 թվականի ուսումնական ծրագրում, Ակադեմիայի Կառավարման խորհրդի հաստատումից հետո:

Ակադեմիայի գիտական աշխատանքի գծով պրոռեկտոր Անահիտ Մանասյանը նշեց, որ Ակադեմիայում մեկ անգամ դատավորների համար հաշտարարության վերաբերյալ աշխատաժողով կազմակերպվել է, որն անցկացնում էին ԱՄՆ-ից ժամանած մասնագետները:

Նշենք, որ իրականացված օրենսդրական բարեփոխումների արդյունքում ՀՀ-ում ներդրված այս նոր ինստիտուտի հիմնական նպատակն է օրենսդրորեն ամրագրել վեճերի արտադատական լուծման մեխանիզմները՝ դրանով իսկ նպատակ հետապնդելով բեռնաթափել դատարանների ծանրաբեռնվածությունը, ինչպես նաև մասնագիտացված մեդիատորների (հաշտարարների) միջոցով առաջացած վեճերի հանդեպ ցուցաբերել ավելի արհեստավարժ մոտեցում:

Ուկրաինայի դատախազության ազգային ակադեմիայի հրավերով մայիսի 25-ին Ուկրաինայի մայրաքաղաք Կիև մեկնեց Արդարադատության ակադեմիայի պատվիրակությունը՝ ռեկտոր Սերգեյ Առաքելյանի գլխավորությամբ:

Պատվիրակության կազմում ընդգրկված էին գիտական աշխատանքի գծով պրոռեկտոր Անահիտ Մանասյանը, աշխատակազմի ղեկավար Ռոբերտ Շահինյանը, հեռաուսուցման և տեղեկատվական տեխնոլոգիաների դեպարտամենտի ղեկավար Արտաշես Խուրշուդյանը, համագործակցության և հանրային կապերի բաժնի ղեկավար Աննա Մկրտիչյանը:

Այցն աշխատանքային էր և նպատակ ուներ կողմերի միջև դեռևս այս տարվա մարտին Երևանում ստորագրված համագործակցության համաձայնագրում ամրագրված քայլերի իրականացմանն ուղղված հարցեր քննարկել:

Ավելին՝ երկկողմ հետաքրքրություն ներկայացնող հարցերը շատ են, փորձի փոխանակում և համատեղ ծրագրեր իրականացնելու ցանկությունը՝ մեծ:

Հայաստանի պատվիրակությունը ջերմ ընդունելության արժանացավ ուկրաինացի գործընկերների կողմից: Հանդիպումների շարքը սկսվեց Ուկրաինայի գլխավոր դատախազի առաջին տեղակալ Դմիտրի Ստորոժուկի և Ուկրաինայի դատախազության ազգային ակադեմիայի ռեկտոր Իվան Պրիսյաժնյուկի հետ: Քննարկվեցին բազմաթիվ հարցեր, միաժամանակ կողմերը հույս հայտնեցին, որ համագործակցության խորացմանն ուղղված քայլերը արդյունավետ կլինեն:

Ուկրաինայի դատախազության ազգային ակադեմիայի գործունեությանն առավել հանգամանալի ծանոթանալու նպատակով Արդարադատության ակադեմիայի պատվիրակության անդամները հանդիպեցին առաջին պրոռեկտոր Նիկոլայ Յակիմչուկի, պրոռեկտորներ Ալեքսանդր Տոլոչկոյի, Յուրի Սեվրուկի, Գեորգի Պոպովի հետ:

Զրույցի ընթացքում ներկայացվեցին երկու կառույցների գործունեության առանձնահատկությունները, նմանություններն ու տարբերությունները, նաև կողմերի դրական փորձը ներդնելու անհրաժեշտությունը: Նշենք, որ Ուկրաինայում շուրջ 15 հազար դատախազ կա, որոնք որակավորման բարձրացման համար սահմանված կարգով վերապատրաստում են անցնում: Մասնագիտական դասընթացներից բացի՝ մեծապես կարևորվում է նաև օտար լեզուների դասավանդումը: Ամենամտահոգիչը՝ Ակադեմիայի իրավական կարգավիճակի հարցն է, որը լուրջ խնդիրներ է առաջացնում գործունեության ընթացքում:

Հանդիպումներից հետո Հայաստանից ժամանած պատվիրակները հնարավորություն ունեցան ծանոթանալ շենքային պայմաններին, այցելել շենքի ներսում գործող թանգարան, որտեղ ներկայացված են Ուկրաինայի դատախազության, նաև Ակադեմիայի հիմնադրման պատմությունները:

Նշենք, որ Ուկրաինայի դատախազության ազգային ակադեմիան այս տարի տոնելու է գործունեության 70-ամյակը: Արդարադատության ակադեմիայի պատվիրակությունը հոբելյանական միջոցառումներին մասնակցության հրավեր ստացավ:

Շրջայցի ժամանակ պատվիրակության անդամներին ներկայացվեցին նաև համակարգչային լսարանները, դատախաղերի անցկացման համար նախատեսված դատական նիստերի դահլիճները, գրադարանը, տպարանը, որտեղ հրատարակվում է Ակադեմիայի գիտական հանդեսը, ունկնդիրների և աշխատակազմի համար նախատեսված հանրակացարանը:

Իսկ գործընկերների հետ արված բազմաթիվ լուսանկարների շարքում, որոնք ներկայացված են նախասրահում, նաև Արդարադատության ակադեմիան է՝ հիշեցնելով Ուկրաինայի պատվիրակության Երևան կատարած այցի մասին:

Այցի շրջանակում նախատեսված էր ունկնդիրների և դասախոսական կազմի հետ հանդիպում: Արդարադատության ակադեմիայի ռեկտոր Սերգեյ Առաքելյանը ելույթ ունեցավ մեծ լսարանի առաջ՝ ներկայացնելով Հայաստանում դատախազների մասնագիտական պատրաստմանը և վերապատրաստմանն առնչվող հետաքրքրական տվյալներ, Ակադեմիայում ուսումնական գործընթացի կազմակերպման առանձնահատկություններ, գիտահետազոտական աշխատանքներ, հեռաուսուցման անցկացում:

Ռեկտորի ելույթը չափազանց մեծ հետաքրքրություն առաջացրեց լսարանում, ինչի վկայությունն էին հնչած բազմաթիվ հարցերը: Իսկ հարցերը վերաբերում էին մեկ հարկի տակ դատավորների և դատախազների համատեղ ուսուցման կազմակերպման ռիսկերին, պրակտիկայի անցկացմանը, ուսուցման ծրագրերի կազմմանը, դասախոսների ընտրությանը, դասընթացների անցկացման մեթոդաբանությանը և այլն:

Լսարանը հետաքրքրված էր նաև Արդարադատության ակադեմիայում հեռաուսուցման կազմակերպմամբ: Հեռաուսուցման և տեղեկատվական տեխնոլոգիաների դեպարտամենտի ղեկավար Արտաշես Խուրշուդյանը ներկայացրեց հեռաուսուցման կազմակերպման ակադեմիայի փորձը, մշակված դասընթացների առավելությունները և առաջարկեց երկկողմ օգտակար փորձով կիսվել:

Շնորհակալություն հայտնելով ներկաներին ցուցաբերած հետաքրքրության համար՝ ռեկտոր Սերգեյ Առաքելյանը վստահություն հայտնեց, որ մոտ ապագայում հնարավորություն կլինի գնահատել համագործակցության արդյունքը:

Հանդիպումների ավարտին, ի նշանավորումն այցի, ռեկտոր Սերգեյ Առաքելյանը գրառում կատարեց Ուկրաինայի դատախազության ազգային ակադեմիայի պատվավոր հյուրերի մատյանում:

Եվրոպական Միության կողմից ֆինանսավորվող Հայաստանի Հանրապետությունում իրականացվող «Արդարադատության մոնիթորինգ» ծրագրի շրջանակում մայիսի 23-ին Արդարադատության ակադեմիա այցելեցին ծրագրի աշխատանքային խմբի ներկայացուցիչները՝ ավագ միջազգային փորձագետ Ապոստոլոս Անտիմոսը (Հունաստան), փորձագիտական խմբի ղեկավարի տեղակալ Լիանա Ղալթաղչյանը, ծրագրի փորձագետ Տաթևիկ Մատինյանը, ծրագրի օգնական Նազելի Թովմասյանը:

Արդարադատության ակադեմիայի ուսումնական աշխատանքի գծով պրոռեկտոր Ռուզաննա Ղևոնդյանը և գիտական աշխատանքի գծով պրոռեկտոր Անահիտ Մանասյանը ողջունեցին հյուրերին՝ նշելով, որ չափազանց կարևոր են նման ծրագրերը և դրանց արդյունքների ներդրումը Ակադեմիայի գործունեության հիմքում:

Տաթևիկ Մատինյանը ներկայացրեց ծրագրի նախորդ փուլերը, որոնք հաջողությամբ իրականացվել են, և խոսեց այս փուլի շրջանակում նախանշված անելիքների մասին, մասնավորապես՝ Ակադեմիայի կարիքների գնահատում, ուսումնական ծրագրերի դիտարկում, խնդիրների վերհանում և աջակցության տրամադրում՝ այդ թվում նոր դասընթացների մշակում, սեմինարների կազմակերպում, դասընթացավարների վերապատրաստում, գրադարանի՝ մասնագիտական նոր գրականությամբ համալրում և այլն:

Հանդիպումից առաջ Հունաստանից ժամանած փորձագետը հնարավորություն էր ունեցել ընդհանուր առմամբ ծանոթանալ Արդարադատության ակադեմիայի կողմից մշակված ծրագրերին, որոնք դրական գնահատեց: Փորձագետը հետաքրքրվեց ունկնդիրների ուսուցման ծրագրերի կազմման, դրանց առանձնահատկությունների, փորձաշրջանի կազմակերպման և այլ հարցերի մասին:

Հանդիպման ընթացքում կողմերը քննարկեցին նաև համագործակցությանն առնչվող մի շարք հարցեր: Փորձագետները պատրաստակամություն հայտնեցին ծրագրի շրջանակում աջակցություն տրամադրել բարձրացված խնդիրների լուծման համար:

Մայիսի 15-ից Արդարադատության ակադեմիայում սկսվել է դատական կարգադրիչների վերապատրաստումը: 2017 թվականի մայիս-հուլիս ամիսներին վերապատրաստում է անցնելու 9 խումբ՝ ընդհանուր թվով 232 կարգադրիչ: Այսօր մեկնարկել է 1-ին խմբի վերապատրաստումը, ընդգրկված է 25 կարգադրիչ՝ ՀՀ-ից, ևս 1-ը՝ ԼՂՀ-ից:

Դատական կարգադրիչների վերապատրաստումն ու հատուկ ուսուցումն իրականացվում է համաձայն ուսուցման ծրագրի, որը մշակվել է «Արդարադատության ակադեմիայի մասին» ՀՀ օրենքի 19-րդ հոդվածի հիման վրա: Ծրագիրը նպատակաուղղված է դատական կարգադրիչների գիտելիքների և հմտությունների կատարելագործմանը վարքաբանության, առաջին բուժական և հոգեբանական օգնության, հատուկ միջոցների և հրազենի գործադրման ոլորտներում:

Դատական կարգադրիչների վերապատրաստման տեսական մասն իրականացվում է Արդարադատության ակադեմիայում, իսկ գործնականը՝ հրազենի և հատուկ միջոցների գործադրման հմտությունները՝ «Իրավական կրթության և վերականգնողական ծրագրերի իրականացման կենտրոն» ՊՈԱԿ-ում:

Յուրաքանչյուր խմբի վերապատրաստումն ու հատուկ ուսուցումն ավարտվում է վերապատրաստման արդյունքների գնահատմամբ: Այն իրականացվում է բանավոր եղանակով՝ միասնական քննությամբ և հմտությունների գործնական ստուգման եղանակով:

Տեղեկացնենք նաև, որ դատական կարգադրիչների ծառայությունը գործում է ՀՀ դատական դեպարտամենտի կազմում և իր լիազորությունների շրջանակում ապահովում է արդարադատության իրականացման գործընթացը՝ դատարանի տարածքում հասարակական կարգի պահպանումն ու անվտանգությունը, դատական նիստերի դահլիճում դատավորի կարգադրությունների կատարումը, ինչպես նաև դատարանի գույքի և դատարանի շենքի սպասարկման տարածքների պահպանությունը:

Մայիսի 2-ին Արդարադատության ակադեմիայում մեկնարկել է երկօրյա սեմինար՝ նվիրված պատիժ նշանակելու հիմնախնդիրներին: Սեմինարը կազմակերպել է Ակադեմիայի գործընկեր կառույցը՝ Միջազգային իրավական համագործակցության գերմանական հիմնադրամը (IRZ): Սեմինարն անցկացնում են գերմանացի փորձագետներ Ալեքսանդր Ֆյուլինգը (Բոննի առաջին ատյանի դատարանի դատավոր) և Վոլֆ-Թիլման Բաումերթը (ավագ դատախազ, տնտեսական հանցագործությունների բաժնի պետ, Վուփերթալի դատախազության մամուլի խոսնակ): Մասնակցում են քրեական մասնագիտացմամբ դատավորի թեկնածուները և դատախազի թեկնածուները:

Ողջունելով Գերմանիայից ժամանած հյուրերին, գործընկեր կառույցի ներկայացուցիչներին ու սեմինարի մասնակից ունկնդիրներին՝ Արդարադատության ակադեմիայի ռեկտոր Սերգեյ Առաքելյանը կարևորեց Հիմնադրամի հետ համագործակցությունը և հույս հայտնեց, որ արդյունքները տեսանելի կլինեն մոտ ապագայում՝ առանձնահատուկ ընդգծելով գործընկերների դրական փորձը վերոնշյալ ոլորտում: Ռեկտորի խոսքով՝ քրեական արդարադատության ոլորտում անհերքելի է, որ կարևորագույն օղակներից կամ ինստիտուտներից մեկը պատիժ նշանակելն է և հենց դրանով է պայմանավորված, որ շատերը փորձում են գնահատական տալ արդարադատության որակին, բովանդակությանը:

«Սեմինարի բացման օրը զուգադիպել է Ակադեմիայի համար շատ նշանակալի մի օրվա հետ, մասնավորապես 2013 թվականի մայիսի 2-ին է ընդունվել «Արդարադատության ակադեմիայի մասին» ՀՀ օրենքը, որով ըստ էության սկիզբ է դրվել որևէ գերատեսչական ենթակայությունից անկախ մարմնի ձևավորմանը, որը զբաղվում է դատավորների, դատախազների, քննիչների մասնագիտական պատրաստմամբ, վերապատրաստմամբ և հատուկ ուսուցմամբ:

Այս կարճ տարիների ընթացքում շրջանավարտների մի քանի սերունդներ ունենք, և կարծում եմ՝ մեր գործունեության լավագույն գնահատականը շրջանավարտների հաջողություններն են, որոնց նրանք հասնում են իրենց մասնագիտական գործունեությունը իրականացնելիս»,-նշեց ռեկտորը:

IRZ-ի անունից ներկաներին ողջունեց և սեմինարի մասնակիցներին արդյունավետ աշխատանք մաղթեց նաև Հիմնադրամի հայաստանյան ծրագրերի մենեջեր Ամալյա Վուքերթը: Նա ներկայացրեց հիմնադրամի ստեղծման պատմությունը, գործունեության առանցքային ուղղությունները, 2011 թվականից Հայաստանում իրականացվող ծրագրերը:

«Մեր խնդիրն է օժանդակել գործընկեր երկրներին բարեփոխել արդարադատության համակարգը, այդ նպատակով արդեն 30 երկրների հետ ենք համագործակցում: Ուրախ եմ, որ սկսել ենք համագործակցել Արդարադատության ակադեմիայի հետ. սա մեր համատեղ առաջին միջոցառումն է»,-նշեց տիկին Վուքերթը:

Սեմինարի ընթացքում բանախոսները գերմանական փորձի օրինակով ներկայացնում են պատիժ նշանակելու հիմնախնդիրները, նաև ունկնդիրների հարցերին ի պատասխան՝ հետաքրքիր քննարկում ծավալում:

ԵԽ/ԵՄ Արևելյան գործընկերության 2015-2017 թվականների ծրագրային համագործակցության կառուցակարգի մաս կազմող <<Աջակցություն Հայաստանում քրեական արդարադատության համակարգի բարեփոխումների և պայքար վատ վերաբերմունքի և անպատժելիության դեմ>> ծրագրի շրջանակներում իրավական ոլորտի մասնագետների համար տեղական իրավական համակարգին է ադապտացվել Մարդու իրավունքների ուսուցման եվրոպական ծրագրի <<Ապացույցների թույլատրելիությունը քրեական դատավարությունում>> HELP հեռավար դասընթացը:

<<Այդ դասընթացի ընտրությունը պայմանավորված է նաև նրանով, որ այն անմիջականորեն կապված է նույն թեմայով պատրաստված ձեռնարկի հետ (հեղինակներ՝ Արտակ Հարությունյան, Տիգրան Պողոսյան), ինչն ապահովել է դասընթացի առավելագույն արդյունավետությունը: Արդարադատության ակադեմիայի դասընթացավար Տիգրան Պողոսյանը մասնակցել է հեռաուսուցման այս դասընթացի մշակման աշխատանքներին, որը փորձարկվել է 2017 թվականի փետրվար-մարտ ամիսներին 15 մասնակիցներից բաղկացած խմբի հետ, որի կազմում ընդգրկված էին քննիչներ, դատախազներ, փաստաբաններ:

Ապրիլի 27-ին Արդարադատության ակադեմիայում Երևանում Եվրոպայի խորհրդի գրասենյակի ղեկավարի տեղակալ Լորետա Վիոյուն և Ակադեմիայի գիտական աշխատանքի գծով պրոռեկտոր Անահիտ Մանասյանը հավաստագրեր հանձնեցին վերոնշյալ դասընթացը հաջողությամբ ավարտած իրավական ոլորտի մասնագետներին:

Ողջունելով ներկաներին՝ Ակադեմիայի գիտական աշխատանքի գծով պրոռեկտոր Անահիտ Մանասյանը նշեց, որ Ակադեմիան կարևորում է նման միջոցառումների կազմակերպումը և երախտապարտ է գործընկերներին ծրագրի իրականացմանն ուղղված աջակցության համար, որը չափազանց մեծ ներդրում է քրեական արդարադատության համակարգի զարգացմանը և բարեփոխումների պատշաճ իրականացմանը: <<Քրեական արդարադատության համակարգի բարեփոխումները և դրանց վերաբերյալ մեր ունկնդիրներին պատշաճ տեղեկատվություն և համապատասխան հմտություններ փոխանցելն ունի կարևորագույն նշանակություն>>,-ասաց Անահիտ Մանասյանը:

<<Մենք նպաստում ենք դատավորների, դատախազների, քննիչների կարողությունների բարելավմանը և կարևորում, որ մարդու իրավունքների վերաբերյալ գիտելիքների ձեռքբերումը շարունակական լինի>>,- իր խոսքում նշեց Երևանում Եվրոպայի խորհրդի գրասենյակի ղեկավարի տեղակալ Լորետա Վիոյուն և ուրախությամբ արձանագրեց առաջին դասընթացի գրեթե բոլոր մասնակիցների ցուցաբերած բացարձակ գերազանց արդյունքը:

Հավաստագրերի հանձնման արարողությանը մասնակցեցին նաև ՀՀ քննչական կոմիտեի, Փաստաբանների պալատի ներկայացուցիչները:

2017 թվականին Արդարադատության ակադեմիայում նախատեսվում է վերապատրաստում անցկացնել քննիչների 15 խմբի համար: Ապրիլի 25-ին մեկնարկել է քննիչների առաջին խմբի վերապատրաստումը: Խմբում ընդգրկված է ՀՀ քննչական կոմիտեի 21 քննիչ:

<<ՀՀ քննչական կոմիտեի մասին>> ՀՀ օրենքի համաձայն՝ քննիչների պարտադիր վերապատրաստում նախատեսվում է անցկացնել ոչ պակաս, քան 2 տարին մեկ անգամ: Վերապատրաստումն իրականացվում է <<Արդարադատության ակադեմիայի մասին>> ՀՀ օրենքով սահմանված կարգով:

Ուսումնառությունն իրականացվում է ուսուցման ծրագրի համաձայն, որը նպատակաուղղված է քննիչների մասնագիտական գիտելիքների և հմտությունների շարունակական կատարելագործմանը քրեական իրավունքի, քրեական դատավարության, քրեական գործերով ՄԻԵԴ նախադեպային իրավունքի, դատական փորձաքննությունների և այլ ոլորտներում: Ծրագիրն իրականացվում է առկա ուսուցման ձևով: Վերապատրաստվող յուրաքանչյուր քննիչի համար ուսումնառության ժամաքանակը 30 ակադեմիական ժամ է։

Բացի վերոնշյալ վերապատրաստումից՝ սահմանված կարգով նախատեսվում է անցկացնել նաև քննիչների հատուկ ուսուցում՝ 10 ակադեմիական ժամ ընդհանուր տևողությամբ: Հատուկ ուսուցման ծրագիրը նպատակաուղղված է քննիչների մոտ հրազենի գործադրման հմտությունների ձևավորմանը և դրանց շարունակական կատարելագործմանը: <<Հրազենի գործադրման հմտություններ>> դասընթացը ներառում է հրազեն գործադրելու, պահելու, տեղափոխելու անվտանգության կանոնները, հրազենային վնասվածքներ ստացած անձանց առաջին բժշկական օգնության հիմունքները, ինչպես նաև հրազենի կիրառման գործնական պարապմունքներ:

Արդարադատության ակադեմիայում ապրիլի 25-ից մեկնարկում է դատավորների 2017 թվականի տարեկան վերապատրաստումը: Առաջին խմբում ընդգրկված է 36 դատավոր: Վերապատրաստումն իրականացվում է ուսուցման ծրագրի համապատասխան, որը մշակվել է Ակադեմիայի կողմից: Ծրագրի նպատակն է ապահովել ունկնդիրների մասնագիտական գիտելիքների և հմտությունների շարունակական զարգացումն ու կատարելագործումը ընդհանուր, հարակից և հատուկ մասնագիտական դասընթացների մոդուլների հիման վրա։

Ուսումնառության ժամաքանակը յուրաքանչյուր դատավորի համար 80 ակադեմիական ժամ է։ Յուրաքանչյուր դատավոր իր մասնագիտացմանը (քաղաքացիաիրավական, քրեաիրավական, վարչաիրավական) համապատասխան վերապատրաստվում է 40 ակադեմիական ժամ՝ հատուկ և 40 ակադեմիական ժամ՝ կա՛մ ընդհանուր, կա՛մ հարակից մասնագիտական դասընթացների շրջանակներում։

Ապրիլի 24-ի վաղ առավոտյան Արդարադատության ակադեմիայի աշխատակազմը և ունկնդիրները՝ ռեկտոր Սերգեյ Առաքելյանի գլխավորությամբ այցելեցին Ծիծեռնակաբերդի հուշահամալիր, ծաղիկներ խոնարհեցին անմար կրակի շուրջ և իրենց հարգանքի տուրքը մատուցեցին Հայոց ցեղասպանության զոհերի հիշատակին: Այս տարի լրանում է Օսմանյան Կայսրության կողմից հայերի դեմ իրականացված ոճրագործության 102-րդ տարելիցը:

Ապրիլի 18-ից Արդարադատության ակադեմիայում մեկնարկում է դատախազների վերապատրաստման առաջին փուլը: Առաջին խմբում ընդգրկված է 20 դատախազ: Վերապատրաստումն իրականացվում է Արդարադատության ակադեմիայի կողմից մշակված և Կառավարման խորհրդի կողմից հաստատված դատախազների տարեկան վերապատրաստման ուսուցման ծրագրի համապատասխան:

Ծրագիրը նպատակաուղղված է դատախազների մասնագիտական գիտելիքների և հմտությունների շարունակական կատարելագործմանը ընդհանուր, հարակից և հատուկ մասնագիտական ոլորտներում: Ծրագիրն իրականացվում է առկա և հեռավար ուսուցման ձևերով: Հարակից մասնագիտական դասընթացների մոդուլում ընդգրկված դասընթացները կազմակերպվում են հեռավար, իսկ ընդհանուր և հատուկ մասնագիտական դասընթացների մոդուլում ընդգրկված դասընթացները՝ առկա ուսուցման ձևով:

Ուսումնառության ժամաքանակը յուրաքանչյուր դատախազի համար սահմանվում է 80 ակադեմիական ժամ։ Ուսումնառությունն իրականացվում է երկու փուլով: Յուրաքանչյուր դատախազ հատուկ մասնագիտական դասընթացների մոդուլում ընդգրկված դասընթացների շրջանակում վերապատրաստվում է 40 ակադեմիական ժամ, ինչպես նաև ընդհանուր կամ հարակից մասնագիտական դասընթացների մոդուլում ընդգրված դասընթացների շրջանակում՝ 40 ակադեմիական ժամ ծավալով։