Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Սեպտեմբերի 22-23-ը Աղվերանում անցկացվեց ԵՊՀ իրավագիտության ֆակուլտետի և Միջազգային իրավական համագործակցության գերմանական հիմնադրամի (IRZ) կողմից համատեղ կազմակերպված քրեական դատավարության հիմնախնդիրներին նվիրված միջբուհական դատախաղ-մրցույթի բանավոր փուլը:

Գրավոր փուլը հաղթահարած 6 թիմերը (ԵՊՀ-1, ԵՊՀ-2, Հայաստանում ֆրանսիական համալսարան, «Modus Vivendi»` Հայ-ռուսական (սլավոնական) համալսարան, Գավառի պետական համալսարան, Արցախի պետական համալսարան) իրենց ուժերը չափեցին կիսաեզրափակիչ փուլում՝ հանդես գալով որպես և՛ մեղադրանքի կողմ, և՛ պաշտպանական:

Ժյուրիի կազմում ընդգրկված էին ներկայացուցիչներ դատական, դատախազական, փաստաբանական համակարգերից՝ ՀՀ վճռաբեկ դատարանի քրեական պալատի նախագահ Սերժիկ Ավետիսյանի գլխավորությամբ: Ժյուրիի անդամ էր նաև գերմանացի փորձագետ Էրիխ Յոսթերը, ով Բրեմենի փաստաբանների պալատի նախկին նախագահն է, քրեական իրավունքի մասնագիտացված փաստաբան:

Դատախաղի վերջին օրը առավելագույն միավորներ հավաքած ԵՊՀ-2-ը և Հայ-ռուսական (սլավոնական) համալսարանի «Modus Vivendi» թիմերը մրցեցին եզրափակիչ փուլում: Լարված պայքարի արդյունքում հաղթող ճանաչվեց ԵՊՀ-2 թիմը: Դատախաղի բոլոր մասնակիցները IRZ-ի կողմից ստացան հավաստագրեր և հուշանվերներ: ՀՀ գլխավոր դատախազության, ՀՀ կրթության և գիտության նախարարության, ՀՀ մարդու իրավունքների պաշտպանի աշխատակազմի, ՀՀ դատավորների միության, ՀՀ փաստաբանների պալատի անունից մրցանակներ ստացան նաև «Լավագույն պաշտպանական ճառ», «Լավագույն մեղադրական ճառ», «Վճռաբեկ դատարանի նախադեպերի լավագույն կիրառում» և այլ անվանակարգերի հաղթողները:

Արդարադատության ակադեմիայի անունից Համագործակցության և հանրային կապերի բաժնի ղեկավար Աննա Մկրտչյանը պարգևատրեց Հայ-ռուսական (սլավոնական) համալսարանի «Modus Vivendi» թիմի անդամ Ռոզա Ամիրովային՝ որպես դատախաղի «Լավագույն հռետոր»: Իսկ ժյուրիի անդամները հուշանվերներ ստացան Երևանի պետական համալսարանի և IRZ-ի կողմից:

Միջբուհական այս դատախաղը երկրորդ տարին է անցկացվում, և կազմակերպիչների խոսքով՝ այն ավանդական դարձնելու նպատակ կա, քանի որ հաջողված է, ինչի մասին վկայում է ուսանողների ակտիվ ներգրավվածությունը, լավ պատրաստվածությունը, մեծ հետաքրքրությունն ու նաև աշխարհում նման դատախաղերի լայն տարածումն ու արդյունավետությունը:

Սեպտեմբերի 6-ին Արդարադատության ակադեմիայում ԱՄՆ Դենվեր շրջանի գլխավոր դատախազի ավագ տեղակալ Էլիսոն Ռոքերը դասախոսություն կարդաց «Առաջնային արձագանքը, քննությունը և դատախազական հսկողությունն ընտանեկան բռնության գործերով» թեմայով:

Ողջունելով հյուրին և ներկաներին՝ Արդարադատության ակադեմիայի գիտական աշխատանքի գծով պրոռեկտոր Անահիտ Մանասյանը տեղեկացրեց, որ Ակադեմիան, բացի ընթացիկ վերապատրաստումներից, նաև հրավիրյալ դասախոսների կողմից պարբերաբար դասախոսություններ է կազմակերպում, ընդ որում՝ ոչ միայն հայաստանյան, այլև արտասահմանյան մասնագետների ներգրավմամբ: Ավելին՝ պրոռեկտորի խոսքով, այսօրվա դասախոսությանը մասնակցում են ինչպես Ակադեմիայի ունկնդիրները՝ դատախազները և քննիչի թեկնածուները, այլև ՀՀ ոստիկանության ներկայացուցիչներ՝ թեմայի ընդգրկմամբ պայմանավորված:

«Ընտանեկան բռնությունների հետ կապված հարցերը ժամանակակից աշխարհում ամենահրատապ և կարևորագույն նշանակություն ունեցող թեմաներից են, և ողջունելի է, որ հնարավորություն ունենք նման թեմայով այսպիսի մասնագիտական լսարանում քննարկում կազմակերպել, ինչը, բնականաբար, մեծ նշանակություն կունենա պրակտիկ գործունեության ընթացքում համապատասխան գործառույթները իրականացնելիս»,-նշեց Անահիտ Մանասյանը և մասնակիցներին արդյունավետ ու հետաքրքիր քննարկում մաղթեց:

Դասախոսության ընթացքում մանրամասն ներկայացվեցին ընտանեկան բռնության դեպքերի դեմ հաջողությամբ պայքարելու արդյունավետ և հետազոտությունների վրա հիմնված մեթոդները՝ հաղորդվող հանցագործության առաջին պահից մինչև բռնության զոհերի հետ հարցազրույցների անցկացում, ապացույցների հավաքագրում, զոհերի պաշտպանություն և հետագա այլ գործողություններ: Էլիսոն Ռոքերը ներկայացրեց ամերիկյան փորձը, հետաքրքրվեց հայաստանյան պրակտիկայով և իրավիճակը բարելավելու ուղղությամբ մասնագիտական բավական հետաքրքիր քննարկում ծավալեց ներկաների հետ:

Նշենք նաև, որ ԱՄՆ-ից ժամանած դատախազ Էլիսոն Ռոքերը, ով զբաղվում է ընտանեկան բռնության գործերի քննության և հսկողության հարցերով, այս օրերին Հայաստանում է Միջազգային կրթության ամերիկյան խորհուրդների կողմից կազմակերպված Professional Fellows Program ծրագրի շրջանակում փոխադարձ այցով:

 1. 1-ին խմբի քննությունների արդյունքները.pdf

 2. 2-րդ խմբի քննությունների արդյունքները.pdf

Սեպտեմբերի 4-ից Արդարադատության ակադեմիայում մեկնարկում է դատախազների վերապատրաստման երկրորդ փուլը: Օրենքով սահմանված կարգով՝ դատախազների վերապատրաստումն իրականացվում է երկու փուլով` յուրաքանչյուրը 40 ակադեմիական ժամ (մեկ շաբաթ) տևողությամբ: Ընդհանուր ժամաքանակը յուրաքանչյուր դատախազի համար 80 ակադեմիական ժամ է։

Այս շաբաթ վերապատրաստում անցնող առաջին խմբում ընդգրկված է 13 դատախազ: Սահմանված 2017 թվականի ժամանակացույցի համաձայն՝ սեպտեմբեր-դեկտեմբեր ամիսներին դատախազները վերապատրաստում կանցնեն քրեական, քաղաքացիական, վարչական իրավունքի և դատավարության ոլորտում հատուկ մասնագիտական առարկաներով: Մասնավորապես՝ վերապատրաստման արդյունքում կատարելագործվում են քրեական դատավարության տարբեր փուլերում ծագող հարցերի, ինչպես նաև քրեական իրավունքի, քրեական գործերով ՄԻԵԴ նախադեպային իրավունքի, քաղաքացիական, վարչական իրավունքի և դատավարության, դատական փորձաքննության, խոցելի անձանց մասնակցությամբ վարույթի առանձնահատկությունների, զինվորական հանցագործությունների որակման ու արդի այլ հարցերի վերաբերյալ ունկնդիրների գիտելիքները և հմտությունները:

Վերապատրաստումն իրականացվում է Արդարադատության ակադեմիայի կողմից մշակված և Կառավարման խորհրդի կողմից հաստատված դատախազների տարեկան վերապատրաստման ուսուցման ծրագրի համապատասխան: Ծրագիրը նպատակաուղղված է դատախազների մասնագիտական գիտելիքների և հմտությունների շարունակական կատարելագործմանը ընդհանուր, հարակից և հատուկ մասնագիտական ոլորտներում: Ծրագիրն իրականացվում է ուսուցման առկա և հեռավար ձևերով: Հարակից մասնագիտական դասընթացների մոդուլում ընդգրկված դասընթացները կազմակերպվում են հեռավար, իսկ ընդհանուր և հատուկ մասնագիտական դասընթացների մոդուլում ընդգրկված դասընթացները՝ առկա ուսուցման ձևով:

Օգոստոսի 30-ին Արդարադատության ակադեմիա այցելեցին ՀՀ-ում ԱՄՆ դեսպանության ներկայացուցիչները՝ ԱՄՆ Պետքարտուղարության Թմրամիջոցների դեմ պայքարի և իրավապահ համագործակցության (ԹՊԻՀ/INL) բյուրոյի Վաշինգտոնյան գրասենյակի Հայաստանում և Վրաստանում ծրագրերի համակարգող Շարայա Հեյդենհայնը (Վաշինգտոն) և ԹՊԻՀ Երևանյան գրասենյակի իրավապահ հարցերով ավագ խորհրդատու Ադի Հոլովեյը:

Արդարադատության ակադեմիայի ռեկտոր Սերգեյ Առաքելյանը ողջունեց հյուրերին և ուրախությամբ նշեց, որ քայլ առ քայլ իրականանում են երկկողմ պայմանավորվածությունները, ինչը լավ նախանշան է, որ ՀՀ-ում ԱՄՆ դեսպանության հետ համագործակցությունը ամուր հիմքերի վրա է:

Հանդիպմանը ներկա էին Ակադեմիայի գիտական աշխատանքի գծով պրոռեկտոր Անահիտ Մանասյանը, Հեռաուսուցման և տեղեկատվական տեխնոլոգիաների դեպարտամենտի ղեկավար Արտաշես Խուրշուդյանը:

ՀՀ-ում ԱՄՆ դեսպանության ներկայացուցիչները շնորհակալություն հայտնեցին ռեկտոր Սերգեյ Առաքելյանին ջերմ ընդունելության համար: ԹՊԻՀ գրասենյակը մի քանի արկղ օրենսդրական գրքեր նվիրաբերեց Ակադեմիայի գրադարանին ԱՄՆ Կանզաս նահանգի ազգային գվարդիայի կողմից: Վերջինս 15 տարվա համագործակցության պատմություն ունի Հայաստանի Հանրապետության հետ և ԱՄՆ տարբեր գերատեսչություններից գրականություն է հավաքել Հայաստան բերելու նպատակով:

Հյուրերի խնդրանքով ռեկտոր Սերգեյ Առաքելյանը մանրամասն ներկայացրեց Ակադեմիայի գործունեության հիմնական ուղղությունները, մասնագիտական պատրաստում և վերապատրաստում անցկացնելուն, դասախոսական կազմի ընտրությանը, ուսուցման ծրագրեր կազմելուն առնչվող մի շարք հարցեր և այլն: Ավելին՝ ռեկտորը հյուրերին առաջարկեց ծանոթանալ Ակադեմիայի նորարարական ուսումնական մի նախաձեռնությանը, որը բոլորովին վերջերս է կյանքի կոչվել և առաջին անգամ է հանրայնացվում: Արտաշես Խուրշուդյանը ներկայացրեց ինտերակտիվ խաղաֆիկացված նորարարական ուսումնական տեսանյութեր «Դատավորի էթիկա» թեմայի շրջանակում, որը պատրաստվել է Ակադեմիայի ունկնդիրների համար:

Ներկաները տպավորված էին, իսկ Արտաշես Խուրշուդյանը պատասխանեց նրանց տարաբնույթ հարցերին, որոնք վերաբերում էին ինչպես նման նորարարական տեսանյութերի կարևորությանը և դերակատարությանը ուսումնական գործընթացում, այնպես էլ դրանց մշակման և մատուցման առանձնահատկություններին: 

Կողմերը պայմանավորվեցին համագործակցությունն շարունակելու և համատեղ ծրագրեր իրականացնելու մասին:

Օգոստոսի 2-ին Արդարադատության ակադեմիան հյուրընկալեց ՀՀ-ում ԱՄՆ դեսպանության ներկայացուցիչ՝ իրավապահ հարցերով ավագ խորհրդատու Ադի Հոլլովեյին: Առիթը հրավիրյալ փորձագետի դասախոսությունն էր, որն Ակադեմիայի ուսումնական գործընթացի բաղկացուցիչ մասն է կազմում: Ադի Հոլլովեյը «Քրեական գործերի քննության ժամանակակից սկզբունքներն ու լավագույն փորձը. սպանությունների քննություն» թեմայով դասախոսություն կարդաց Ակադեմիայի ունկնդիրների՝ քննիչի թեկնածուների երկրորդ խմբի ունկնդիրների համար:

Դասախոսությունից առաջ Արդարադատության ակադեմիայի գիտական աշխատանքի գծով պրոռեկտոր Անահիտ Մանասյանը ողջունեց ներկաներին, շնորհակալություն հայտնեց ՀՀ-ում ԱՄՆ դեսպանատանը ակտիվ և արդյունավետ համագործակցության համար և ունկնդիրներին ներկայացրեց Ադի Հոլլովեյին, ով ոլորտի լավագույն փորձագետներից է:

Հիշեցնենք, որ Արդարադատության ակադեմիայում վերոնշյալ թեմայով դասախոսություն Ադի Հոլլովեյը կարդացել էր նաև հունիսի 21-ին՝ քննիչի թեկնածուների առաջին խմբի ունկնդիրների համար: 

Արդարադատության ակադեմիայի հարակից տարածքը՝ հետնաբակը, հիմնովին բարեկարգվել է և ամբողջությամբ կանաչապատվել:

Ստեղծվել է պուրակ, որի երկայնքով անցնում են ճեմուղիներ, տնկվել են բարդիներ, եղևնիներ, տեղադրվել են նստարաններ, կառուցվել է նաև գեղեցիկ և ինքնատիպ լուծումներով ջրավազան՝ շատրվանով: Բարեկարգված տարածքի ընդհանուր մակերեսը կազմում է շուրջ 170 քմ:

Հուլիսի 28-ին տեղի ունեցավ Ակադեմիայի պուրակի և շատրվանի բացման արարողությունը, որին մասնակցում էին Արդարադատության ակադեմիայի կառավարման խորհրդի անդամները՝ խորհրդի նախագահ, ՀՀ գլխավոր դատախազի տեղակալ Արմեն Հարությունյանի գլխավորությամբ, ՀՀ ԱԺ փոխնագահ Արփինե Հովհաննիսյանը, ՀՀ արդարադատության փոխնախարար Արթուր Հովհաննիսյանը, ՀՀ քննչական կոմիտեի նախագահի տեղակալ Վահագն Հարությունյանը, ՀՀ դատական դեպարտամենտի ղեկավար Կարեն Փոլադյանը, ՀՀ դատական, դատախազական, քննչական համակարգերի ներկայացուցիչներ, հյուրեր:

Մինչ շատրվանի հանդիսավոր գործարկումը Արդարադատության ակադեմիայի ռեկտոր Սերգեյ Առաքելյանը ողջունեց ներկաներին՝ նորաստեղծ պուրակի բացման կապակցությամբ և նշեց, որ պուրակի ստեղծման գաղափարը երկար քննարկումների արդյունք է: «Յուրաքանչյուրիս պարտքը պիտի լինի քարը քարի վրա դնելը, շենացնելը: Համոզված եմ՝ պետք է առաջնորդվել այն նշանաբանով, որ որտեղ մենք ենք, այնտեղ լավ է, ոչ թե հակառակը: Կարծում եմ, որ այս համեստ քայլը կարելի է փոքր ներդրում համարել մեր շրջապատի, մեր քաղաքի շենացման գործում»,-ասաց ռեկտորը:

Սերգեյ Առաքելյանի խոսքով՝ Ակադեմիան իր ուժերով է ստեղծել պուրակը. որևէ այլ մարդ չի ներգրավվել բարեկարգման և կառուցապատման գործին: Ամիսներ տևած աշխատանքներն ավարտվել են, այժմ Երևանում ավելացել է ևս մի գողտրիկ անկյուն՝ կանաչապատ ու ջրառատ:

Սերգեյ Առաքելյանը հատուկ շնորհակալություն հայտնեց Ակադեմիայի այն աշխատակիցներին, որոնք ջանք ու եռանդ չեն խնայել տարածքը բարեկարգելու և կանաչապատելու գործում:

Ավելին՝ նրանք արժանացան խրախուսանքի, իսկ Ակադեմիայի բարեկարգման աշխատանքները պատշաճ մակարդակով կազմակերպելու և լավագույնս իրականացնելու համար Տեխնիկատնտեսական բաժնի ղեկավար-տնտեսվար Ալեքսանդր Փիլոսյանը ռեկտորի կողմից արժանացավ պատվոգրի:

Հուլիսի 27-ին Արդարադատության ակադեմիայում անցկացվեց սեմինար՝ «Հոգեֆիզիոլոգիական հետազոտություններ պոլիգրաֆի կիրառմամբ դատաիրավական համակարգում» թեմայով, որին մասնակցում էին Ակադեմիայի ունկնդիրները՝ դատավորի և դատախազի թեկնածուները: Սեմինարը վարում էին կենս. գիտ. թեկ., փորձագետ-խորհրդական Գարեգին Համբարձումյանը և կենս. գիտ. թեկ., փորձագետ-պոլիգրաֆոլոգ Կարեն Պանչուլազյանը:

Արդարադատության ակադեմիայի գիտական աշխատանքի գծով պրոռեկտոր Անահիտ Մանասյանը ողջունեց ներկաներին և շնորհակալություն հայտնեց փորձագետներին նման նախաձեռնությամբ հանդես գալու համար: «Թեմատիկան, որն այսօր քննարկելու ենք, սովորական չէ, այն հետաքրքրություն է ներկայացնում ամբողջ աշխարհում: Թե՛ արդյունավետության, թե՛ հեռանկար ունենալու տեսանկյունից այն չափազանց կարևոր է նաև հայաստանյան իրավակիրառ պրակտիկայի համար»,-իր խոսքում նշեց պրոռեկտորը:

Փորձագետները երախտագիտություն հայտնեցին Ակադեմիայի ռեկտոր, պրոֆեսոր Սերգեյ Առաքելյանին ընձեռնված հնարավորության համար և լսարանին ներկայացրին աշխարհում ընդունված դատաիրավական համակարգում տարբեր պետությունների հոգեֆիզիոլոգիական ուսումնասիրությունների և նրանց հիմքում ընկած փորձագիտական եզրակացությունների վերաբերյալ հետաքրքրական տեղեկություններ: Սեմինարի ընթացքում փորձագետները մանրամասն խոսեցին պոլիգրաֆ սարքերի ու դրանց կիրառման առանձնահատկությունների, իրականացվող լայնածավալ գիտական հետազոտությունների, տեխնոլոգիական զարգացումներով պայմանավորված սարքերի նոր մոդելների, դրանց առավելությունների և այլնի մասին: Պոլիգրաֆը (ստի դետեկտոր) բժշկական-կենսաբանական սարք է, որը նախատեսված է մի քանի ֆիզիոլոգիական ցուցանիշների միաժամանակյա արձանագրման համար: Այն օգտագործվում է անձի հոգեֆիզիոլոգիական հետազոտությունների նպատակով, միաժամանակ գրանցում է շնչառական, սրտանոթային ակտիվության տվյալները, մաշկի էլեկտրական դիմադրությունը և այլ ֆիզիոլոգիական տվյալներ, որոնք անհրաժեշտ են անձի հաղորդած տեղեկությունների հավաստիությունը պարզելու համար: Փորձագետները նաև խոսեցին պոլիգրաֆ սարքերի միջոցով անցկացվող թեստավորման, 99% ճշգրտության հասնող տվյալների` դատաիրավական պրակտիկայում օգտագործման մասին և այլն: 

Ակադեմիայի ունկնդիրները բավական հետաքրքրված էին, այդ էին վկայում թեմայի շրջանակում հնչեցված հարցերը:

Հաշվի առնելով լսարանի հետաքրքրվածությունը՝ փորձագետներն ունկնդիրներին հրավիրեցին Ֆիզիոլոգիայի ինստիտուտ, տեղում ծանոթանալու վերոնշյալ սարքի հնարավորություններին:

Հուլիսի 19-ին ՄԱԿ-ի մանկական հիմնադրամի՝ ՅՈւՆԻՍԵՖ-ի հայաստանյան գրասենյակում տեղի ունեցավ «Անչափահասի պաշտպանությունը քրեական գործերով վարույթի ընթացքում» հեռաուսուցման նոր դասընթացի շնորհանդեսը: Երեխայի իրավունքներին նվիրված հեռաուսուցման առաջին դասընթացը մշակվել է Արդարադատության ակադեմիայի հեռաուսուցման և տեղեկատվական տեխնոլոգիաների դեպարտամենտի կողմից՝ ՄԱԿ-ի մանկական հիմնադրամի աջակցությամբ:

Միջոցառմանը ներկա էին ՀՀ արդարադատության նախարար Դավիթ Հարությունյանը, ՀՀ արդարադատության նախարարի տեղակալ Սուրեն Քրմոյանը, Արդարադատության ակադեմիայի ռեկտոր Սերգեյ Առաքելյանը, Հայաստանում ՅՈւՆԻՍԵՖ-ի ներկայացուցիչ Տանյա Ռադոչայը, միջազգային գործընկեր կառույցների ներկայացուցիչներ, դատավորներ, դատախազներ, ՀԿ ներկայացուցիչներ, հյուրեր:

Տանյա Ռադոչայը ողջունեց ներկաներին, շնորհակալություն հայտնեց Արդարադատության ակադեմիային կառուցողական համագործակցության համար և նշեց, որ թեև Հայաստանը շարունակում է դասվել քիչ ազատազրկված անչափահասներ ունեցող երկրների թվին, սակայն կարևոր է, որ արդարադատության ոլորտում անչափահասների իրավունքների բարելավմանն ուղղված շարունակական քայլեր են կատարվում: «Արդարադատության հասանելիությունը երեխաների և ցանկացած հասարակության համար կարևոր նպատակ պետք է լինի: Արդարադատության հանդեպ մարդու վստահությունը սկիզբ է առնում մանուկ հասակից և այստեղ է, որ մենք կերտում ենք հասարակություն, որն ունենում է վստահություն առ արդարադատության համակարգ: Հուսով եմ, որ այս կերպ մեր համեստ լուման բերած կլինենք այդ գործին»,-նշեց Տ. Ռադոչայը:

ՀՀ արդարադատության նախարարն իր հերթին բարձր գնահատեց նման դասընթացի ստեղծման գաղափարը և ընդգծեց, որ ուսուցման այս նորարարությունն առաջիկայում կտա իր արդյունքը: «Շատ գովելի է, որ Արդարադատության ակադեմիան այս ուղղությամբ շարունակական ջանքեր է գործադրում, այս ծրագիրը էապես տարբերվում է հեռաուսուցման այլ ծրագրերից, և կարծում եմ՝ այն գիտելիքները, որոնք ձեռք են բերվել ծրագիրը մշակելուց, պետք է օգտագործվեն հեռաուսուցման այլ ծրագրերի մշակման ժամանակ ևս»-նշեց Դ. Հարությունյանը: Նախարարի խոսքով՝ մինչև 2022 թվականը կկատարելագործվի իրավախախտ երեխաներին առնչվող օրենսդրությունը, համապատասխան հայեցակարգի ընդունմամբ կստեղծվեն նաև հատուկ մեխանիզմներ իրավախախտ, վկա և հանցագործությունից տուժած երեխաների վերասոցիալականացման ու պաշտպանության համար:

Արդարադատության ակադեմիայի ռեկտոր Սերգեյ Առաքելյանը հիշեցրեց, որ Ակադեմիայի և ՄԱԿ-ի մանկական հիմնադրամի միջև համագործակցությունը իրավական հիմքերի վրա է դրվել ամիսներ առաջ՝ համագործակցության հուշագրի ստորագրմամբ: Դեռ այն ժամանակ ռեկտորը հույս էր հայտնել, որ դրական արդյունքները մոտ ապագայում տեսանելի կլինեն: «Այն հանգամանքը, որ արդեն ավելի քան 160 ունկնդիր՝ դատավորներ և դատախազներ ընտրել են հեռաուսուցման այս դասընթացը, ոչ միայն ուրախացնող է, այլ նաև պարտավորեցնող, որովհետև կարծում եմ՝ ծրագրի արդյունավետության մասին կարող ենք համապատասխան դատողություններ անել, երբ այդ դասընթացի շրջանակում նրանք կվերապատրաստվեն»,-նշեց ռեկտորը:

Արդարադատության ակադեմիայի հեռաուսուցման և տեղեկատվական տեխնոլոգիաների դեպարտամենտի ղեկավար Արտաշես Խուրշուդյանը մանրամասն ներկայացրեց նոր մշակված դասընթացը, նորարարական կրթական լուծումները, հեռաուսուցման պլատֆորմը, փաթեթը և Ակադեմիայի պաշտոնական կայքում ինքնաուսուցման համար նախատեսված էլեկտրոնային էջը: Այնտեղ տեղադրված են դասընթացի նյութերը՝ ազատ մուտքի հնարավորությամբ, և բոլոր հետաքրքրվողները ինքնաուսուցման նպատակով կարող են օգտվել:

Հեռաուսուցման փաթեթը ներառում է հեռաուսուցման ձեռնարկ, ուսուցանվողի հեռաուսուցման ուղեցույց, ինքնաստուգիչ հարցերի պատասխանների գրքույկ, բառարան, հեռաուսուցման փաթեթի կրիչ, ուսումնական ծրագիր: Ա. Խուրշուդյանը պատասխանեց ներկաներին հետաքրքրող հարցերին, խոսեց ապագայի ծրագրերից և հեռաուսուցման ձևաչափով դասընթացներ մշակելու և մատուցելու հարցերով հետաքրքրված տարբեր գործընկեր կառույցների հետ համագործակցության հեռանկարներից:

Հեռաուսուցման այս դասընթացի ստեղծմանն առնչվող մի շարք հարցերի անդրադարձան նաև դասընթացի բովանդակության մշակման փորձագետները:

https://www.youtube.com/watch?v=vlvT7cmjQsY

Արդարադատության ակադեմիայի ռեկտոր Սերգեյ Առաքելյանը մասնակցել է ՀՀ արդարադատության նախարարության նախաձեռնությամբ կազմակերպված հանդիպմանը, որի նպատակը Էլեկտրոնային կառավարման համակարգերի լայնածավալ գործարկմամբ պայմանավորված կրթական հաստատություններում ապագա իրավաբանների պրակտիկ հմտությունների կատարելագործումն է:

Հուլիսի 10-ին ՀՀ արդարադատության նախարար Դավիթ Հարությունյանը հայաստանյան մի շարք բարձրագույն ուսումնական հաստատությունների իրավաբանական ֆակուլտետների և իրավաբանական կրթություն իրականացնող կառույցների ղեկավարների հետ քննարկել է ԲՈՒՀ-երում իրավունքի բնագավառում էլեկտրոնային գործիքների և տեխնոլոգիաների վերաբերյալ դասընթաց ներդնելու հնարավորությունը:

Հանդիպման ընթացքում ներկայացվել են ՀՀ բարձրագույն ուսումնական հաստատություններում իրավական տեխնոլոգիաների վերաբերյալ դասընթացի ներդրման հայեցակարգային մոտեցումները, արտասահմանյան առաջատար համալսարաններում գործող ծրագրերը և Արդարադատության նախարարության առաջարկը՝ համալսարաններում դասավանդման ենթակա ծրագրերի վերաբերյալ: Մասնավորապես, առաջարկվել է պետական և մասնավոր հատվածում համապատասխան հմտություններ ունեցող իրավաբաններ պատրաստելու նպատակով բուհական ծրագրում ընդգրկել դասընթաց՝ ուղղված Mulberry էլեկտրոնային փաստաթղթաշրջանառության, Հայաստանի իրավական տեղեկատվական համակարգերի, իրավական ակտերի նախագծերի հրապարակման միասնական կայքի, դատական տեղեկատվական համակարգի, մարդու իրավունքների եվրոպական դատարանի և Վենետիկի հանձնաժողովի կայքէջերի օգտագործման համար հմտությունների ու գիտելիքների ձեռքբերմանը:

ՀՀ արդարադատության նախարարի խոսքով՝ ապագա իրավաբանները պետք է տեղյակ լինեն նշված համակարգերից օգտվելու հնարավորություններից ու դրանք դարձնեն իրենց ամենօրյա կիրառման գործիքը: Ներկաները ողջունել են ներկայացված առաջարկը և պայմանավորվել համատեղ ծրագիր մշակել՝ ուղղված իրավական տեխնոլոգիաների վերաբերյալ դասավանդման ենթակա ծրագրերի ներդրմանը:

Լուսանկարները՝ www.moj.am