Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Հուլիսի 24-ին մեկնարկեց Արդարադատության ակադեմիայում մասնագիտական պատրաստում անցնող ՀՀ քննչական կոմիտեի ծառայողների (քննիչների) թեկնածությունների ցուցակում ընդգրկված անձանց՝ երկրորդ խմբի ունկնդիրների առաջին քննաշրջանը: Ունկնդիրների մասնագիտական պատրաստման ուսուցման ծրագրի համաձայն՝ յուրաքանչյուր ուսուցման հատվածին հաջորդում է քննաշրջանը:

Ստեղծված իրավիճակով պայմանավորված` քննությունն անցկացվեց առցանց եղանակով: Այսօր բանավոր քննություն հանձնեց 19 ունկնդիր:

Ունկնդիրների հաջորդ քննությունը նախանշված է հուլիսի 31-ին:

Հուլիսի 20-ին մեկնարկեց ՀՀ քննչական կոմիտեի ծառայողների (քննիչների) վերապատրաստումը: Այս տարի նախատեսվում է կազմակերպել վերապատրաստում 14 խմբի քննիչների համար: Ստեղծված իրավիճակով պայմանավորված՝ վերապատրաստումն անցկացվում է առցանց եղանակով:

Քննիչների վերապատրաստումն անցկացվում է համապատասխան ուսուցման ծրագրով՝ յուրաքանչյուրը 30 ակադեմիական ժամ:

«Ռուսաստանի արդարադատության պետական համալսարան» բարձրագույն կրթության պետական բյուջետային ուսումնական հաստատությունը, Ռուսաստանի Դաշնության կառավարության որոշմամբ, անցկացնում է հավակնորդների մրցույթ՝ տեղ հատկացնելով օտարերկրյա քաղաքացիներին 2020-2021 ուսումնական տարվա համար։ Հիմք ընդունելով Հայաստանի Արդարադատության ակադեմիայի հետ 2018 թվականի հունիսի 21-ին Երևանում ստորագրված համագործակցության հուշագիրը՝ Ռուսաստանի արդարադատության պետական համալսարանը հայտարարում է ընդունելություն նաև ՀՀ քաղաքացիների համար՝ 40.03.01 Իրավագիտություն (բակալավրիատ) և 40.04.01 Իրավագիտություն (մագիստրատուրա) կրթական ծրագրերով:

Համալսարան ընդունվելու համար կազմակերպվող մրցույթին մասնակցելու համար հավակնորդներին անհրաժեշտ է գրանցվել Անկախ պետությունների Համագործակցության դաշնային գործակալության կայքում՝ future-in-russia.com։

Օտարեկրյա քաղաքացիների ուսուցման հարցերով կարելի է դիմել հետևյալ էլեկտրոնային հասցեով՝ parfenovasl@rsuj.ru կամ զանգահարել +7(495)332-54-82 հեռախոսահամարով (կոնտակտային անձ` Պարֆյոնովա Սվետլանա Լեոնիդի)։

Արդարադատության ակադեմիայի պրոռեկտոր Անահիտ Մանասյանը հեռավար եղանակով մասնակցել է հուլիսի 8-ից 9-ը Ստրասբուրգում անցկացվող Եվրոպայի Խորհրդի (ԵԽ) HELP (Մարդու իրավունքների կրթություն իրավական ոլորտի մասնագետների համար) ծրագրի տարեկան համաժողովին: Ստեղծված իրավիճակով պայմանավորված՝ ԵԽ անդամ երկրների համապատասխան կառույցների ներկայացուցիչները մասնակցել և ելույթ են ունեցել հեռավար եղանակով: Այս տարվա համաժողովը կրում էր «Տոնելով ՄԻԵԿ 70-ամյակը՝ ճգնաժամային իրավիճակում» խորագիրը:

Պրոռեկտորը համաժողովի մասնակիցներին ներկայացրել է հեռավար եղանակով անցկացվող մասնագիտական պատրաստման և վերապատրաստման առանձնահատկությունները, կիսվել Ակադեմիայի փորձով, մասնավորապես՝ HELP հեռավար դասընթացների ադապտացման և դասավանդման բնագավառում Հայաստանի Արդարադատության ակադեմիայի փորձն ու այդ ոլորտում ԵԽ-ի հետ մեր համագործակցությունը:

Համաժողովի ընթացքում քննարկվել են առաջիկա ծրագրերի իրականացման հնարավորությունները:

Հարգելի՛ Երվանդ Խունդկարյան,
Հարգելի՛ դատավորներ,

Արդարադատության ակադեմիայի անունից և անձամբ ջերմորեն շնորհավորում եմ ՀՀ վճռաբեկ դատարանի հիմնադրման 22-ամյակի կապակցությամբ:

Հանդես գալով որպես Հայաստանի Հանրապետության դատական եռաստիճան համակարգի բարձրագույն ատյան՝ Վճռաբեկ դատարանի դերը չափազանց կարևոր է, իրականացվող առաքելությունը՝ խիստ պատասխանատու և պատվաբեր:

Վճռաբեկ դատարանի գործունեությունն ուղղված է մարդու իրավունքների և ազատությունների հիմնարար խախտումները վերացնելուն՝ հանուն արդարադատության: Վճռաբեկ դատարանը կոչված է լինելու օրենքի միասնական կիրառման երաշխավորը, ինչպես նաև դատական նախադեպի ձևավորողը: Այդ առումով աներկբա է, որ Վճռաբեկ դատարանն իր գործունեությամբ և ամենօրյա աշխատանքով նպաստում է հանրային վստահության մակարդակի բարձրացմանը, դատավորների և դատական համակարգի իրական անկախության ձեռքբերմանը, ծառացած խնդիրների լուծմանը:

Կրկին շնորհավորում եմ Վճռաբեկ դատարանի հիմնադրման կապակցությամբ, մաղթում քաջառողջություն, հաջողություն և ամենայն բարիք:

Սերգեյ Առաքելյան
Արդարադատության ակադեմիայի ռեկտոր

Հուլիսի 6-ին Արդարադատության ակադեմիայում մեկնարկել է ապօրինի ծագում ունեցող գույքի բռնագանձմանն ուղղված գործառույթներ իրականացնող դատախազների թեկնածությունների 2020 թվականի ցուցակում ընդգրկված անձանց մասնագիտական պատրաստումը: Հաշվի առնելով ստեղծված իրավիճակը՝ ուսուցումն անցկացվում է առցանց:

Մասնագիտական պատրաստումն անցկացվում է համապատասխան ուսուցման ծրագրով, ըստ որի ուսումնառության ընդհանուր ժամաքանակը 244 ակադեմիական ժամ է: Ուսումնառության տևողությունը 8 շաբաթ է:

ՀՀ Նախագահի հրամանագրով՝ Արդարադատության ակադեմիայի ունկնդիր-շրջանավարտներից ևս մեկը նշանակվել է դատավորի պաշտոնում.

Սարգիս Արմենակյան – Տավուշի մարզի առաջին ատյանի ընդհանուր իրավասության դատարանի դատավոր

ՀՀ Նախագահի հրամանագիրը դատավոր նշանակելու մասին.

https://www.president.am/hy/decrees/item/5043//

2020 թվականի հունիսի 29-ից հուլիսի 1-ին տեղի են ունեցել «Ապօրինի ծագում ունեցող գույքի բռնագանձման մասին» օրենքով նախատեսված գործառույթներ իրականացնող դատախազների և ՀՀ գլխավոր դատախազի՝ ապօրինի ծագում ունեցող գույքի բռնագանձմանն ուղղված գործառույթների ոլորտը համակարգող տեղակալի թեկնածությունների ցուցակների համալրման նպատակով անցկացվող բաց մրցույթները։

«Ապօրինի ծագում ունեցող գույքի բռնագանձման մասին» օրենքով նախատեսված գործառույթներ իրականացնող դատախազների թեկնածությունների ցուցակի համալրման նպատակով անցկացված բաց մրցույթին մասնակցելու համար հայտ ներկայացրած 25 դիմորդներից ՀՀ գլխավոր դատախազին առընթեր որակավորման հանձնաժողովի կողմից դրական եզրակացություն է ստացել 7ը, իսկ ՀՀ գլխավոր դատախազի՝ ապօրինի ծագում ունեցող գույքի բռնագանձմանն ուղղված գործառույթների ոլորտը համակարգող տեղակալի թեկնածությունների ցուցակի համալրման նպատակով անցկացված բաց մրցույթին մասնակցելու հայտ ներկայացրած 3 դիմորդներից 1-ը (մյուս հայտատուները չէին ներկայացել)։

«Դատախազության մասին» ՀՀ օրենքով սահմանված ընթացակարգի պահպանմամբ հուլիսի 2-ին ՀՀ գլխավոր դատախազ Արթուր Դավթյանի հրամաններով որակավորման հանձնաժողովի դրական եզրակացությունն ստացած հայտատուներն ընդգրկվել են դատախազների և ՀՀ գլխավոր դատախազի տեղակալի թեկնածուների համապատասխան ցուցակներում։

Մրցութային ողջ գործընթացն անցել է hրապարակայնության և թափանցիկության պայմաններում։ Հիշեցնենք, որ այդ նպատակով, ի կատարումն օրենսդրության պահանջների, բաց մրցույթներն անցկացնող որակավորման հանձնաժողովը գլխավոր դատախազի հրամաններով նախապես համալրվել է միջազգային և տեղական ոլորտային մեկական փորձագետներով, որոնք գործընթացում ներգրավվել են հասարակական հիմունքներով:

Հուլիսի 6-ից դատախազների թեկնածուների ցուցակում ընդգրկված անձինք ՀՀ արդարադատության ակադեմիայում կանցնեն 8-շաբաթյա համապատասխան ուսումնառության ծրագիր, որն ավարտելուց հետո ցուցակում ընդգրկված անձինք ՀՀ գլխավոր դատախազի հրամաններով կհամալրեն ՀՀ գլխավոր դատախազության՝ ապօրինի ծագում ունեցող գույքի բռնագանձման գործառույթներով օժտված ստորաբաժանման դատախազների հաստիքները։

Օրենքով սահմանված կարգով ՀՀ Գլխավոր դատախազը նշանակում կկատարի նաև ՀՀ գլխավոր դատախազի՝ այդ ոլորտը համակարգող տեղակալի նորաստեղծ պաշտոնում։

Նյութի աղբյուրը՝

http://www.prosecutor.am/am/mn/7851/

2020 թվականի հունիսի 29-ին, 30-ին և հուլիսի 1-ին տեղի ունեցան «Ապօրինի ծագում ունեցող գույքի բռնագանձման մասին» օրենքով նախատեսված գործառույթներ իրականացնող դատախազների և ՀՀ գլխավոր դատախազի՝ ապօրինի ծագում ունեցող գույքի բռնագանձմանն ուղղված գործառույթների ոլորտը համակարգող տեղակալի թեկնածությունների ցուցակների համալրման նպատակով անցկացվող բաց մրցույթները։

Մրցույթների արդյունքներով ՀՀ գլխավոր դատախազին առընթեր որակավորման հանձնաժողովի կողմից դրական եզրակացություն են ստացել՝

 1. «Ապօրինի ծագում ունեցող գույքի բռնագանձման մասին» օրենքով նախատեսված գործառույթներ իրականացնող դատախազների թեկնածությունների ցուցակի համալրման նպատակով անցկացված բաց մրցույթի մասնակիցներից հետևյալ անձինք.
Ամիրխանյան Սիրո Հրաչի,
Բարսեղյան Վահագն Կարենի,
Դավթյան Տիգրան Սամվելի,
Ենոքյան Տիգրան Աղվանի,
Մադոյան Աղավնի Սերյոժայի,
Սարգսյան Անի Գևորգի,
Քոչարյան Գևորգ Արմենի:

2. ՀՀ գլխավոր դատախազի՝ ապօրինի ծագում ունեցող գույքի բռնագանձմանն ուղղված գործառույթների ոլորտը համակարգող տեղակալի թեկնածությունների ցուցակի համալրման նպատակով անցկացված բաց մրցույթի մասնակից` Սրբուհի Հովհաննեսի Գալյանը:

Նյութի աղբյուրը՝

http://www.prosecutor.am/am/mn/7849/

Արդարադատության ակադեմիայի ռեկտոր Սերգեյ Առաքելյանի շնորհավորական ուղերձը դատախազության աշխատողի օրվա և Հայաստանի դատախազության կազմավորման 102 ամյակի  առթիվ:

Հարգելի՛ պարոն Դավթյան,

Ջերմորեն շնորհավորում եմ Ձեզ և Հայաստանի Հանրապետության դատախազության աշխատակիցներին՝ մասնագիտական տոնի և դատախազության կազմավորման կապակցությամբ:

ՀՀ դատախազությունն օրենքի գերակայության ապահովման, օրինականության պահպանման և ամրապնդման, ինչպես նաև պետության և քաղաքացիների շահերի պաշտպանության ամբողջական համակարգ է, որն արդեն մեկ դարից ավելի կատարում է իր առաքելությունը՝ պատվով և պատասխանատվության զգացումով, հանուն մեր երկրում օրինականության և իրավակարգի ապահովման, մարդու իրավունքների և ազատությունների պաշտպանության, մեր պետականության ամրապնդման:

Արդարադատության ակադեմիան խիստ կարևորում է սերտ ու կառուցողական համագործակցությունը դատախազության հետ և իր կոչմանը հավատարիմ՝ ջանք չի խնայի իրավական բարեփոխումների պահանջներին համապատասխան դատախազի թեկնածուների պատրաստման, դատախազության համակարգի աշխատողների արդյունավետ վերապատրաստման գործում: Ուզում եմ վերահաստատել Ակադեմիայի պատրաստակամությունը փոխգործակցությունն ավելի խորացնելու ուղղությամբ:

Կրկին շնորհավորում եմ և մաղթում քաջառողջություն և հաջողություններ, արգասաբեր աշխատանք և ամենայն բարիք: