Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Հոկտեմբերի 1-ին Ադրբեջանի ԶՈՒ հրետանի է կիրառել Հայաստանի Հանրապետության Գեղարքունիքի մարզի Շատվան գյուղի ուղղությամբ, ինչպես նաև հարվածային ԱԹՍ-ից հրթիռ է արձակել Մեծ Մասրիկ բնակավայրի վրա, որի հետևանքով զոհվել է 1967 թ․ ծնված Գևորգ Վարդանյանը, երկու քաղաքացիական անձ ստացել է տարբեր աստիճանի վիրավորում։

Ավելի ուշ ՀՀ օդային տարածք են ներխուժել հակառակորդի ԱԹՍ-ները և հետախուզական թռիչքներ իրականացրել ՀՀ մայրաքաղաք Երևանի մոտակայքում: Բոլոր ԱԹՍ-ները ՀՕՊ կողմից ոչնչացվել են:
Հատկանշական է, որ Ադրբեջանը գնում է հետագա սրացման մարտական գործողություններն անհապաղ դադարեցման վերաբերյալ ԵԱՀԿ Մինսկի խմբի համանախագահ երկրների առաջնորդների հայտարարությունից ժամեր անց:

Հայաստանի Հանրապետությունը խստորեն դատապարտում է Ադրբեջանի այս գործողությունները և գնահատում դրանք՝ որպես հակամարտության հետագա սրացման քայլ։ Թուրքիայի հրահրմամբ և ուղղակի աջակցությամբ տարածաշրջանային անվտանգությունը խաթարելու այս փորձը դիտարկում ենք՝ որպես պատասխան միջազգային հանրության, մասնավորապես ԵԱՀԿ Մինսկի խմբի համանախագահության խաղաղություն հաստատելու կոչերին և ջանքերին:

Հակամարտության հետագա սրացման ողջ պատասխանատվությունը կրում է Ադրբեջանի և Թուրքիայի ռազմաքաղաքական ղեկավարությունը:

Սեպտեմբերի 29-ի առավոտյան, Ադրբեջանի «Գյանջա» օդանավակայանում տեղակայված Թուրքիայի Հանրապետության ռազմաօդային ուժերին պատկանող F-16 կործանիչներից մեկի կողմից խոցվել է ՀՀ տարածքում գտնվող ռազմական և քաղաքացիական օբյեկտների վրա ադրբեջանական հարձակումները հետ մղելու նպատակով ՀՀ օդային տարածքում՝ Վարդենիսի շրջանում, մարտական խնդիրները կատարող ՀՀ ԶՈւ ռազմաօդային ուժերի ՍՈւ-25 գրոհիչը: Զոհվել է ՀՀ ԶՈՒ օդաչու մայոր Վալերի Դանելինը:

Սա թուրքական օդուժի առաջին սադրանքը չէ: Ադրբեջանում հայտնվելուց ի վեր թուրքական օդուժը սադրիչ թռիչքներ է իրականացնում Արցախի և Ադրբեջանի միջև շփման գծի երկայնքով, իսկ Ադրբեջանի կողմից սանձազերծված ագրեսիայի ընթացքում փաստացիորեն Ադրբեջանի բանակի հարձակվող զինված ստորաբաժանումներին օդային աջակցություն է ցուցաբերում: Հարկ է նշել, որ թուրքական սադրիչ թռիչքներ են իրականացվում նաև հայ-թուրքական սահմանի երկայնքով՝ առանձին դեպքերում հատելով և խախտելով Հայաստանի օդային տարածքը: Հայ-ադրբեջանական սահմանի նույն հատվածում սեպտեմբերի 27-ին թուրքական F-16 ինքնաթիռը խախտել է Հայաստանի օդային սահմանը և հրթիռներ արձակել Վարդենիսի շրջանի ուղղությամբ:

Թուրքական օդուժը Ադրբեջանում հայտնվել է հուլիսի 29-ից օգոստոսի 13-ը տեղի ունեցած թուրք-ադրբեջանական լայնածավալ զորավարժությունների ժամանակ և մինչ օրս դուրս չի բերվել Ադրբեջանի տարածքից:

Թուրքական զինուժի այս սադրիչ գործողությունները լրջորեն վտանգում են տարածաշրջանային անվտանգությունը և խոչընդոտում են մարտական գործողությունները դադարեցնելու ուղղությամբ միջազգային հանրության ջանքերը:

Միջազգային հանրությունը կոչ է արել արտատարածաշրջանային ուժերին ձեռնպահ մնալ հակամարտությունը բորբոքելու քայլերից, և Թուրքիան պետք է անսա այս կոչերին:

Խստորեն դատապարտում ենք Թուրքիայի սադրիչ գործողությունները և պահանջում թուրքական զինուժի, ներառյալ՝ օդուժի անհապաղ դուրսբերումը հակամարտության գոտուց:

Սեպտեմբերի 28-ի դրությամբ շարունակում են Արցախի դեմ Ադրբեջանի կողմից սանձազերծված լայնածավալ ագրեսիան:

Արցախի և Ադրբեջանի միջև շփման գծի ողջ երկայնքով իրադրության սրման վերաբերյալ միջազգային հանրության, այդ թվում ԵԱՀԿ Մինսկի խմբի համանախագահների և նրանց երկրների հայտարարությունները, միանշանակորեն ի ցույց են դնում, որ միջազգային հանրությունը դատապարտում է ուժի կիրառումը և տարածաշրջանային խաղաղության և անվտանգության խաթարումը:

Բախվելով միջազգային հանրության այս դիրքորոշման միասնականությանը՝ ադրբեջանական կողմը դիմել է բացահայտ կեղծիքների տարածմանը՝ մեղադրելով հայկական կողմին մարտական գործողությունների սանձազերծման մեջ:

Մինչդեռ գոյություն ունեն անհերքելի փաստական հիմքեր առ այն, որ հենց Ադրբեջանն է նախաձեռնել ագրեսիան:

Տարիներ շարունակ Ադրբեջանը հետևողականորեն խախտել է 1994-1995թթ. անժամկետ եռակողմ համաձայնագրերով հաստատված հրադադարի ռեժիմը, մերժել է ԵԱՀԿ Մինսկի խմբի համանախագահության կողմից առաջարկվող հրադադարի ռեժիմի խախտումների հետաքննության մեխանիզմների ներդրման և հրադադարի մոնիտորինգի ամրապնդման առաջարկները՝ ուժի կիրառման հնարավորությունների պահպանման և «մեղադրանքների խաղ» տանելու համար։ Դրա վերջին վառ արտահայտումն է, որ սեպտեմբերի 25-ին Ադրբեջանը մերժել էր ԵԱՀԿ գործող նախագահի անձնական ներկայացուցչի շփման գծի մոնիտորինգ անցկացնելու խնդրանքը, ինչն ակնհայտորեն ցույց է տալիս, որ Ադրբեջանի նպատակն է եղել թաքցնել պատերազմ սկսելու իր ծրագրերը:

Ադրբեջանի ներկա ագրեսիան Արցախի դեմ բնութագրվում է երկու կարևոր առանձնահատկությամբ․
Ադրբեջանի նախագահ Ալիևի մակարդակով հրապարակավ hրաժարվել է խաղաղ գործընթացից և խնդիր է դրել ղարաբաղյան հիմնախնդիրը լուծել լայնածավալ պատերազմով,
Երկրորդ, այս նպատակի հետապնդման համար Ադրբեջանը ստանում է Թուրքիայի լայնածավալ ռազմաքաղաքական աջակցությունը։
Հատկանշական է, որ Թուրքիան սատարել է Ադրբեջանին ղարաբաղյան հակամարտության շրջանակներում դեռևս անցյալ դարի 90-ական թվականներից, երբ ցամաքային շրջափակման ենթարկեց Հայաստանի Հանրապետությանը։ Այնուհանդերձ, այս ագրեսիայի և դրան նախապատրաստվելու ընթացքում Թուրքիայի աջակցությունը կրել է որակական փոփոխություններ և բնութագրվում է ռազմական գործողությունների թատերաբեմում Թուրքիայի ուղղակի ներկայությամբ:

Ադրբեջանի հետ կողք կողքի մարտնչում են թուրքական ռազմական մասնագետները, որոնք օգտագործում են թուրքական արտադրության սպառազինություն, այդ թվում՝ անօդաչու թռչող սարքեր և ռազմական ինքնաթիռներ: Արժանահավատ աղբյուրներից ստացվող տեղեկությունների համաձայն՝ Թուրքիան հավաքագրում է օտարազգի ահաբեկիչ զինյալների և տեղափոխում վերջիններիս Ադրբեջան: Միաժամանակ Թուրքիան բարձրագույն ղեկավարության մակարդակով լիարժեք քաղաքական և քարոզչական աջակցություն է տրամադրվում Ադրբեջանին:

Փաստացիորեն ստեղծվել է մի իրավիճակ, երբ Արցախի ժողովուրդը մարտնչում է թուրք-ադրբեջանական դաշինքի դեմ։ Թուրքիան, որը մեկ դար առաջ բնաջնջել է իր պատմական հայրենիքում ապրող հայ ժողովրդին և մինչ օրս արդարացնում է այդ ոճիրը, ներկայումս հնարավոր բոլոր միջոցներով սատարում է Ադրբեջանին՝ այդ նույն ցեղասպան գործողությունները Հարավային Կովկասում իրականացնելու համար: Թուրք-ադրբեջանական այս ցեղասպան դաշինքը լուրջ սպառնալիք է տարածաշրջանի ժողովուրդների համար:

Հայաստանը և Արցախը վճռական են իրենց ողջ կարողություններով դիմակայելու և չեզոքացնելու այդ դաշինքի մտադրությունները: Հայկական կողմերի այդ վճռականությունն այլընտրանք չունի, քանի որ արտահայտում է հայ ժողովրդի՝ իր պատմական հայրենիքում ապրելու անկոտրում կամքը:
Հայաստանը ամբողջովին վստահ է, որ Ադրբեջանի ռազմական արկածախնդրությունը ձախողվելու է և Ադրբեջանը պարտադրված է լինելու հրաժարվել ռազմական ճանապարհով հիմնախնդրի կարգավորման իր մտադրությունից ու Արցախի ժողովրդի հետ խոսելու ոչ թե հրանոթների լեզվով, այլ խաղաղ բանակցային սեղանի շուրջ։

Այսօր վաղ առավոտյան, շփման գծի ողջ երկայնքով ադրբեջանական կողմը ակտիվ հրետակոծություն է սկսել՝ թիրախավորելով նաև խաղաղ բնակավայրերը, այդ թվում՝ մայրաքաղաք Ստեփանակերտը:

Խստագույնս դատապարտում ենք Ադրբեջանի ռազմաքաղաքական ղեկավարության ագրեսիան Արցախի Հանրապետության նկատմամբ։ Հայկական կողմերը վստահորեն գործելու են իրենց ողջ կարողությամբ՝ ապահովելու Արցախի բնակչության անվտանգությունը և տալու համարժեք քաղաքական և ռազմական պատասխան։ Իր կողմից սանձազերծված ագրեսիայի հետևանքների ողջ պատասխանատվությունը կրում է Ադրբեջանի ռազմաքաղաքական ղեկավարությունը:

Արդարադատության ակադեմիայի և Շվեդիայի ազգային դատարանների ադմինիստրացիայի կազմում գործող Դատական ուսուցման ակադեմիայի միջև հնարավոր համագործակցության և այդ շրջանակում իրականացվելիք գործողությունների քննարկման նպատակով սեպտեմբերի 22-ից 24-ը առցանց եղանակով անցկացվեց հանդիպում-քննարկումների շարք: Շվեդական կողմից քննարկումներին մասնակցում էին Շվեդիայի ազգային դատարանների ադմինիստրացիայի միջազգային բաժնի ղեկավար, Վերաքննիչ դատարանի նախկին դատավոր Յոնաս Հոգստրոմը, նույն բաժնի ծրագրերի ղեկավար, նախկին դատախազ Լիզա Քոլստեն, Ակադեմիայի նախկին ռեկտոր, Շրջանային դատարանի ավագ դատավոր Մարիտ Բերգենդալը, Շրջանային դատարանի ավագ դատավոր Էլիզաբեթ Վաս Լոֆսթեդը, Ակադեմիայի դասընթացավարներ Ռոբերտ Սանդելը և Իլին Վինբերգը:

Արդարադատության ակադեմիայի ռեկտոր Սերգեյ Առաքելյանը, ողջունելով շվեդ գործընկերների համագործակցության պատրաստակամությունը, ներկայացրել է Ակադեմիայի հիմնական գործառույթները, գործունեության առաջնահերթությունները, պատասխանել հետաքրքրող հարցերին:

Շվեդ գործընկերների ցանկությամբ քննարկումներ են կազմակերպվել և անցկացվել նաև հայաստանյան մի շարք պետական, միջազգային կառույցների, դատաիրավական համակարգի, հասարակական կազմակերպությունների ներկայացուցիչների հետ, որոնց ընթացքում ներկայացվել է հայաստանյան դատական համակարգի առանձնահատկությունները, խնդիրները:

Եռօրյա հանդիպումների ընթացքում ուրվագծվել են հստակ ուղղություններ, ինչի շուրջ առաջիկայում կձևավորվի երկկողմ համագործակցությունը:

Սեպտեմբերի 22-ին առցանց եղանակով անցկացվեց Եվրոպայի Խորհրդի (ԵԽ) «Մարդու իրավունքները կենսաբժշկության ոլորտում» ծրագրի միջոցառումները համակարգող հանձնաժողովի առաջին հանդիպումը:

Ողջույնի խոսքով հանդես եկան ԵԽ մարդու իրավունքների քաղաքականության և համագործակցության վարչության ղեկավար Միխայիլ Լոբովը, ՀՀ մարդու իրավունքների պաշտպան Արման Թաթոյանը, ՀՀ առողջապահության նախարարի տեղակալ Անահիտ Ավանեսյանը:

Արդարադատության ակադեմիայի անունից մասնակիցներին ողջունեց պրոռեկտոր Անահիտ Մանասյանը՝ նշելով, որ քննարկվող թեման և դրա շրջանակում մատնանշվող հարցերը խիստ արդիական են և բացառիկ կարևորություն ունեն: Անահիտ Մանասյանը շնորհակալություն հայտնեց ԵԽ-ին արդյունավետ համագործակցության համար և հակիրճ ներկայացրեց ԵԽ HELP ծրագրի շրջանակում Ակադեմիայում անցկացվող դասընթացները, մասնավորապես՝ այս պահին մշակման փուլում գտնվող «Կենսաբժշկությունը և մարդու իրավունքների հիմնարար սկզբունքները» դասընթացը և առաջիկայում նախանշված դասընթացավարների վերապատրաստման կազմակերպմանն ու դասընթացի դասավանդմանն առնչվող հարցեր: «Վստահ եմ՝ համատեղ ջանքերը հաջողված կլինեն և կկարողանանք շոշափելի արդյունքներ գրանցել»,-նշեց պրոռեկտորը:

«Մարդու իրավունքները կենսաբժշկության ոլորտում» ծրագիրն իրականացվում է Եվրոպայի Խորհրդի կողմից` Հայաստանի համար 2019-2022թթ. գործողությունների շրջանակում, որի նպատակն է Հայաստանի օրենսդրությունը, ինստիտուտները և պրակտիկան ավելի համապատասխանեցնել մարդու իրավունքների, օրենքի գերակայության և ժողովրդավարության բնագավառներում եվրոպական չափանիշներին:

Արդարադատության ակադեմիան հիմնադրվել է ՀՀ կառավարության 2013 թվականի սեպտեմբերի 13-ի N 990-Ա որոշմամբ: Այս տարի տոնում ենք Ակադեմիայի հիմնադրման 7-ամյակը, ինչի կապակցությամբ Ակադեմիան շնորհավորական ուղերձներ է ստանում գործընկեր կառույցների ղեկավարներից:

Սեպտեմբերի 15-ին Արդարադատության ակադեմիայում տեղի ունեցավ հանդիսավոր միջոցառում, որի ընթացքում Ակադեմիայի ռեկտոր Սերգեյ Առաքելյանը և ՀՀ ոստիկանության պետ, գնդապետ Վահե Ղազարյանը ստորագրեցին փոխըմբռնման հուշագիր:

«Այսօր որոշել ենք իրավական հիմքի վրա դնել Ակադեմիայի և ՀՀ ոստիկանության միջև համագործակցությունը: Հատկանշական է, որ այս գեղեցիկ միջոցառումը կազմակերպվում է Ակադեմիայի հիմնադրման 7-ամյակի շրջանակում: Ակադեմիայի հիմնադրման օրվանից մինչ օրս Ոստիկանության հետ համագործակցությունը եղել է բավական արդյունավետ, հետայսու ավելի կնպաստենք դրա զարգացմանը: Այսօր կան ուղղություններ, որոնց շուրջ համագործակցությունը երկկողմ կարևոր և օգտակար կարող է լինել, ինչը կնպաստի Ակադեմիայի, Ոստիկանության և վերջինիս կազմում գործող կառույցների գործունեության զարգացմանը»,-նշեց ռեկտորը:

ՀՀ ոստիկանության պետը ջերմորեն շնորհավորեց Ակադեմիայի 7-ամյակի կապակցությամբ և կարևորեց կառույցի գործունեությունը՝ մաղթելով տևական և արգասաբեր աշխատանք: Կարևորելով հուշագրի ստորագրումը՝ Վահե Ղազարյանը նշեց, որ այն հնարավորություն կտա ձևավորել գործնական շփումների միջավայր, հատկապես՝ կրթական ոլորտում, ինչը կնպաստի Ոստիկանության ծառայողների և Ակադեմիայի ունկնդիրների մասնագիտական գիտելիքների և հմտությունների շարունակական զարգացմանն ու կատարելագործմանը: «Վստահ եմ՝ այսօրվա միջոցառումն էլ ավելի կամրապնդի ընդհանուր նպատակին հասնելու ուղղությամբ մեր միասնական մոտեցումը»,- նշեց ՀՀ ոստիկանապետը:

Արդարադատության ակադեմիայի և ՀՀ ոստիկանության միջև համագործակցության արդյունավետ զարգացման գործում ներդրած ավանդի համար ռեկտոր Սերգեյ Առաքելյանը ՀՀ ոստիկանության պետ Վահե Ղազարյանին պարգևատրեց Արդարադատության ակադեմիայի հուշամեդալով:

Արդարադատության ակադեմիայի ռեկտորը, ՀՀ ոստիկանապետի համապատասխան հրամանով, արժանացավ «Համագործակցության ամրապնդման համար» մեդալի՝ ՀՀ ոստիկանության հետ սերտորեն համագործակցելու համար:

Միջոցառումն անցկացվեց հակահամաճարակային կանոնների պահպանմամբ:

Սեպտեմբերի 2-ին Արդարադատության ակադեմիայում տեղի ունեցավ ապօրինի ծագում ունեցող գույքի բռնագանձմանն ուղղված գործառույթներ իրականացնող դատախազների թեկնածությունների 2020 թվականի ցուցակում ընդգրկված անձանց դիպլոմների հանձնման արարողությունը: Մասնակցում էին ՀՀ գլխավոր դատախազ Արթուր Դավթյանը, Ակադեմիայի կառավարման խորհրդի անդամները, Ակադեմիայի աշխատակազմը, հյուրեր:

Ակադեմիայի ռեկտոր Սերգեյ Առաքելյանը, ողջունեց ներկաներին, նշելով, որ մեր պետական իրավական համակարգում մի նոր կառույց է ձևավորվում, որի շարքերը համալրում են այսօրվա շրջանավարտները: Այդ կապակցությամբ ռեկտորը շնորհավորեց Սրբուհի Գալյանին, որպես ոլորտը համակարգող ՀՀ գլխավոր դատախազի տեղակալ: «Ես մասնակցել եմ թեկնածուների թե՛ ընտրության, թե՛ մասնագիտական պատրաստման գործընթացին, ինչը հիմք է տալիս հույս հայտնելու, որ նրանք մասնագիտորեն և հոգեպես պատրաստ են ստանձնել այս բարդ ու պատասխանատու պաշտոնը»,-նշեց ռեկտորը:

ՀՀ գլխավոր դատախազ Արթուր Դավթյանը շնորհավորեց ներկաներին «Ապօրինի ծագում ունեցող գույքի բռնագանձման մասին» ՀՀ օրենքի գործնական մեկնարկը տալու համար: «Դժվար է գերագնահատել օրենքով ընձեռված պետական այս աննախադեպ գործիքակազմի պատմական նշանակությունը: Աներկբա է՝ ՀՀ-ում սոցիալական արդարության վերականգնման գեներացված օբյեկտիվ հանրային ակնկալիքները իրացնելու լուրջ և պատասխանատու հնարավորություն է ընձեռվել: Սոցիալական արդարության վերականգման ուղղությամբ լրջագույն քայլեր ենք ձեռնարկելու նշված օրենքի իրացմամբ»,-նշեց Արթուր Դավթյանը:

Ապօրինի ծագում ունեցող գույքի բռնագանձմանն ուղղված գործառույթներ իրականացնող դատախազների թեկնածությունների 2020 թվականի ցուցակում ընդգրկված անձանց մասնագիտական պատրաստումը տևել է 8 շաբաթ՝ համապատասխան ուսուցման ծրագրի համաձայն: Հաշվի առնելով ստեղծված իրավիճակը՝ ուսուցումն անցկացվել է առցանց:

Դիպլոմների հանձնմանը նվիրված միջոցառումն անցկացվեց հակահամաճարակային կանոնների պահպանմամբ:

ՀՀ Նախագահի հրամանագրով՝ Արդարադատության ակադեմիայի ունկնդիր-շրջանավարտներից ևս մեկը նշանակվել է դատավորի պաշտոնում.

Անի Դանիելյան - Գեղարքունիքի մարզի առաջին ատյանի ընդհանուր իրավասության դատարանի դատավոր

ՀՀ Նախագահի հրամանագիրը դատավոր նշանակելու մասին.

https://www.president.am/hy/decrees/item/5066/