Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

ՀՀ Նախագահի հրամանագրով՝ Արդարադատության ակադեմիայի 2020 թվականի ունկնդիր-շրջանավարտներից ևս մեկը նշանակվել է դատավորի պաշտոնում.

Լուսինե Ալավերդյան -Լոռու մարզի առաջին ատյանի ընդհանուր իրավասության դատարանի դատավոր

ՀՀ Նախագահի հրամանագիրը դատավոր նշանակելու մասին.

https://www.president.am/hy/decrees/item/5141/

Նոյեմբերի 9-ին մեկնարկել է ապօրինի ծագում ունեցող գույքի բռնագանձմանն ուղղված գործառույթներ իրականացնող դատախազների թեկնածությունների 2020թ. երկրորդ խմբի ցուցակում ընդգրկված անձանց մասնագիտական պատրաստումը՝ առցանց եղանակով:

Ուսուցումն անցկացվում է Արդարադատության ակադեմիայի կողմից մշակված և Ակադեմիայի կառավարման խորհրդի կողմից հաստատված համապատասխան ուսուցման ծրագրով, ըստ որի ուսումնառության ընդհանուր ժամաքանակը 122 ակադեմիական ժամ է:

Հոկտեմբերի 26-ին մեկնարկել է դատախազների թեկնածությունների 2020-2021թթ. ցուցակում ընդգրկված անձանց մասնագիտական պատրաստումը: Խմբում ընդգրկված է 32 ունկնդիր: Ուսումնառության տևողությունը 8 ամիս է՝ ներառյալ փորձաշրջանը:

Ուսուցումն անցկացվում է համապատասխան ուսուցման ծրագրով, որը նպատակաուղղված է ունկնդիրների մոտ դատախազի պաշտոնում գործելու համար անհրաժեշտ կարողությունների, հմտությունների ձևավորմանը, մասնագիտական գիտելիքների ծավալի ընդլայնմանը ընդհանուր և հատուկ մասնագիտական ոլորտներում:

Հաշվի առնելով ստեղծված իրավիճակը՝ ուսուցումն անցկացվում է առցանց:

Հոկտեմբերի 20-ին Արդարադատության ակադեմիայում տեղի ունեցավ ՀՀ քննչական կոմիտեի ծառայողների թեկնածությունների ցուցակում ընդգրկված անձանց 2020 թվականի առաջին խմբի ունկնդիրների դիպլոմների հանձնման արարողությունը:

Արդարադատության ակադեմիայի ռեկտոր Սերգեյ Առաքելյանի առաջարկով ներկաները մեկ րոպե լռությամբ հարգեցին այս օրերին հայ-ադրբեջանական սահմանագծին հերոսաբար նահատակված հայորդիների հիշատակը:

«Պայմանները, որոնցում մենք կազմակերպեցինք ձեր մասնագիտական պատրաստումը, աննախադեպ էին, բայց վստահեցնում եմ՝ ձեր մասնակցությամբ ցույց տվեցիք, որ միևնույն է՝ ուժեղ ենք և կարող ենք համավարակի, անգամ պատերազմի ծանր պայմաններում կազմակերպել և իրականացնել նման կարևոր գործընթաց»,-դիմելով քննիչի թեկնածուներին՝ նշեց ռեկտորը և շնորհավորեց շրջանավարտներին ուսումնառությունը հաջող ավարտելու կապակցությամբ:Ռեկտորի խոսքով՝ քննիչի աշխատանքը չափազանց բարդ ու պատասխանատու է և հիմնաքարային դեր ունի քրեական արդարադատությունում: «Լիահույս եմ՝ այստեղ ձեռքբերած գիտելիքները, կարողությունները, հմտությունները կնպաստեն, որ մեր երկրում քրեական արդարադատությունը զարգանա և կատարելագործվի»,-նշեց ռեկտորը և մասնագիտական աշխատանքում շրջանավարտներին կանաչ ճանապարհ մաղթեց, իսկ մեր երկրին՝ խաղաղություն:

Քննիչի թեկնածուների մասնագիտական պատրաստումն անցկացվել է համապատասխան ուսուցման ծրագրով՝ 2020 թվականի մայիսի 4-ից սեպտեմբերի 29-ը՝ ներառյալ փորձաշրջանը:

Այսօրվա միջոցառումն անցկացվեց հակահամաճարակային կանոնների պահպանմամբ:

Հոկտեմբերի 15-ին Արդարադատության ակադեմիայում տեղի ունեցավ դատավորների թեկնածուների հավակնորդների 2020 թվականի ցուցակում ընդգրկված անձանց դիպլոմների հանձնման արարողությունը: Պատերազմական իրավիճակով պայմանավորված՝ Ակադեմիայում տոնական հանդիսություն չէր կազմակերպվել:

Ռեկտոր Սերգեյ Առաքելյանը ներկաներին առաջարկեց մեկ րոպե լռությամբ հարգել այս օրերին հայ-ադրբեջանական սահմանագծին զոհված հայորդիների հիշատակը:

Ռեկտորը շնորհավորեց մասնագիտական պատրաստումը հաջող ավարտելու կապակցությամբ և շրջանավարտներին հանձնեց դիպլոմները: Ռեկտորի խոսքով՝ անգամ նման պայմաններում Ակադեմիայի գործունեությունը բնականոն ընթացքով ապահովելը ևս վկայում է մեր պետության ու ազգի ուժեղ լինելու և ոչ մի դեպքում չընկճվելու մասին: «Ուզում եմ հավատալ, որ այստեղ ձեռքբերած գիտելիքները, հմտություններն այնպես կկիրառեք, որ ձեզանով հպարտանալու շատ առիթներ կունենանք»,-նշեց ռեկտորը:

Շրջանավարտներն իրենց հերթին շնորհակալություն հայտնեցին Ակադեմիայի ռեկտորին և աշխատակազմին համավարակի պայմաններում մասնագիտական պատրաստումը պատշաճ կազմակերպելու և անցկացնելու համար:

Միջոցառումն անցկացվեց հակահամաճարակային կանոնների պահպանմամբ:

Հոկտեմբերի 12-ին Արդարադատության ակադեմիայում տեղի ունեցավ 2020 թվականի դատախազների թեկնածությունների ցուցակում ընդգրկված անձանց դիպլոմների հանձնման արարողությունը: Ներկա էին Ակադեմիայի կառավարման խորհրդի անդամներ Գևորգ Բաղդասարյանը (ՀՀ գլխավոր դատախազի տեղակալ), Եղիազար Ավագյանը (ՀՀ գլխավոր դատախազության միջազգային-իրավական համագործակցության վարչության պետ), Ակադեմիայի աշխատակիցները:

Ակադեմիայի ռեկտոր Սերգեյ Առաքելյանն առաջարկեց ներկաներին մեկ րոպե լռությամբ հարգել այս օրերին հայ-ադրբեջանական սահմանագծին զոհված քաջարի հայորդիների հիշատակը, ապա վստահություն հայտնեց, որ հայ ժողովուրդը միշտ հաղթել է և այսօր էլ վճռական է հաղթելու:

Հաշվի առնելով հայ-ադրբեջանական սահմանին տեղի ունեցող պատերազմը, ինչպես նաև Հայաստանի Հանրապետությունում և Արցախի Հանրապետությունում հայտարարված ռազմական դրությունը՝ առաջին անգամ դիպլոմների հանձնման կապակցությամբ տոնական հանդիսություն չէր կազմակերպվել: «Սա մեզ պարտադրված պատերազմ է, որը մենք հաղթելու ենք: Այս պայմաններում առավել քան կարևորվում է նման գործընթացների կազմակերպումը: Մեր բնականոն աշխատանքը ևս մեր հաղթանակի բաղկացուցիչներից է:Այսուհետ դուք շատ կարևոր գործ եք կատարելու մեր երկրում օրինականության, իրավակարգի ամրապնդման ուղղությամբ, ինչը ևս հաղթանակի ամրապնդման համար չափազանց կարևոր է: Միաժամանակ խնդրում և պահանջում եմ մեր շրջանավարտներին իրենց գործունեությամբ բարձր պահել նաև Ակադեմիայի պատիվը»,-նշեց ռեկտորը:

«Բարդ իրավիճակում եք անցել ուսումնառությունը՝ համավարակի պայմաններում, հիմա էլ պատերազմական իրավիճակում դիպլոմ եք ստանում, դրան հաջորդող պայմաններում էլ պետական ծառայություն եք ստանձնելու, ինչը պիտի անեք մեծ պատասխանատվությամբ ու հստակ գիտակցմամբ»,-նշեց Գևորգ Բաղդասարյանը և շնորհավորեց շրջանավարտներին ու հավաստիացրեց՝ հաղթելու ենք:

Խմբում ընդգրկված ունկնդիրներից Արա Դավթյանը ներկա չէր դիպլոմների հանձնմանը, քանի որ այս պահին սահմանագծին է: Ռեկտորը խաղաղություն մաղթեց մեր երկրին՝ հավաստիացնելով, որ պատերազմի ավարտից հետո նրան առանձնահատուկ պայմաններում կհանձնվի դիպլոմը:

Միջոցառումն անցկացվեց համակամաճարակային կանոնների պահպանմամբ:

9-րդ օրն է՝ շարունակվում է Ադրբեջանի կողմից Թուրքիայի աջակցությամբ և օտարերկրյա ահաբեկիչ զինյալների ներգրավմամբ Արցախի նկատմամբ սանձազերծված ագրեսիան։ Պատերազմական այս իրավիճակում՝ Հայաստանի Հանրապետությունում և Արցախի Հանրապետությունում հայտարարված ռազմական դրության այս պայմաններում Արդարադատության ակադեմիան շարունակում է լիարժեք գործել՝ իրականացնելով օրենքով սահմանված իր գործառույթները։

Հոկտեմբերի 5-ին մեկնարկեց դատավորների և դատախազների վերապատրաստումը: Ունկնդիրների թվում են քրեական մասնագիտացմամբ 15 դատավոր և 26 դատախազ : Վերապատրաստումն անցկացվում է Արդարադատության ակադեմիայի կողմից մշակված համապատասխան ուսուցման ծրագրով:

Հաշվի առնելով ստեղծված իրավիճակը՝ վերապատրաստումն անցկացվում է առցանց:

Մենք ողջունում ենք այն փաստը, որ ԵԱՀԿ Մինսկի խմբի համանախագահ երկրներն առաջնորդների մակարդակով խստորեն դատապարտել են Լեռնային Ղարաբաղի հակամարտության գոտում ուժի կիրառումը:

Հայաստանը շարունակաբար մերժել և դատապարտել Է Ադրբեջանի կողմից ուժի կիրառումը կամ ուժի կիրառման սպառնալիքը և Թուրքիայի անմիջական ներգրավումը Հայաստանի և Արցախի դեմ մարտական գործողություններում: Ադրբեջանի և Թուրքիայի միասնական ագրեսիվ գործողությունները և օտարերկրյա ահաբեկիչ զինյալների ներգրավումը խաթարում են տարածաշրջանային անվտանգությունը և խաղաղությունը՝ նշանակալիորեն բարձրացնելով լայնածավալ պատերազմի վտանգը: Արցախի դեմ այս ագրեսիան պետք է անմիջապես դադարեցվի:

Հայաստանը շարունակում է հանձնառու լինել Լեռնային Ղարաբաղի համակարտության խաղաղ կարգավորմանը: Մենք շարունակելու ենք վճռականորեն հակադարձել Արցախի դեմ այս ագրեսիային` միաժամանակ պատրաստ լինելով աշխատել ԵԱՀԿ Մինսկի խմբի համանախագահ երկրների հետ՝ 1994-1995թթ. համաձայնագրերի վրա հիմնված հրադադարի ռեժիմի վերականգնման ուղղությամբ:

Հոկտեմբերի 1-ին Ադրբեջանի ԶՈՒ հրետանի է կիրառել Հայաստանի Հանրապետության Գեղարքունիքի մարզի Շատվան գյուղի ուղղությամբ, ինչպես նաև հարվածային ԱԹՍ-ից հրթիռ է արձակել Մեծ Մասրիկ բնակավայրի վրա, որի հետևանքով զոհվել է 1967 թ․ ծնված Գևորգ Վարդանյանը, երկու քաղաքացիական անձ ստացել է տարբեր աստիճանի վիրավորում։

Ավելի ուշ ՀՀ օդային տարածք են ներխուժել հակառակորդի ԱԹՍ-ները և հետախուզական թռիչքներ իրականացրել ՀՀ մայրաքաղաք Երևանի մոտակայքում: Բոլոր ԱԹՍ-ները ՀՕՊ կողմից ոչնչացվել են:
Հատկանշական է, որ Ադրբեջանը գնում է հետագա սրացման մարտական գործողություններն անհապաղ դադարեցման վերաբերյալ ԵԱՀԿ Մինսկի խմբի համանախագահ երկրների առաջնորդների հայտարարությունից ժամեր անց:

Հայաստանի Հանրապետությունը խստորեն դատապարտում է Ադրբեջանի այս գործողությունները և գնահատում դրանք՝ որպես հակամարտության հետագա սրացման քայլ։ Թուրքիայի հրահրմամբ և ուղղակի աջակցությամբ տարածաշրջանային անվտանգությունը խաթարելու այս փորձը դիտարկում ենք՝ որպես պատասխան միջազգային հանրության, մասնավորապես ԵԱՀԿ Մինսկի խմբի համանախագահության խաղաղություն հաստատելու կոչերին և ջանքերին:

Հակամարտության հետագա սրացման ողջ պատասխանատվությունը կրում է Ադրբեջանի և Թուրքիայի ռազմաքաղաքական ղեկավարությունը:

Սեպտեմբերի 29-ի առավոտյան, Ադրբեջանի «Գյանջա» օդանավակայանում տեղակայված Թուրքիայի Հանրապետության ռազմաօդային ուժերին պատկանող F-16 կործանիչներից մեկի կողմից խոցվել է ՀՀ տարածքում գտնվող ռազմական և քաղաքացիական օբյեկտների վրա ադրբեջանական հարձակումները հետ մղելու նպատակով ՀՀ օդային տարածքում՝ Վարդենիսի շրջանում, մարտական խնդիրները կատարող ՀՀ ԶՈւ ռազմաօդային ուժերի ՍՈւ-25 գրոհիչը: Զոհվել է ՀՀ ԶՈՒ օդաչու մայոր Վալերի Դանելինը:

Սա թուրքական օդուժի առաջին սադրանքը չէ: Ադրբեջանում հայտնվելուց ի վեր թուրքական օդուժը սադրիչ թռիչքներ է իրականացնում Արցախի և Ադրբեջանի միջև շփման գծի երկայնքով, իսկ Ադրբեջանի կողմից սանձազերծված ագրեսիայի ընթացքում փաստացիորեն Ադրբեջանի բանակի հարձակվող զինված ստորաբաժանումներին օդային աջակցություն է ցուցաբերում: Հարկ է նշել, որ թուրքական սադրիչ թռիչքներ են իրականացվում նաև հայ-թուրքական սահմանի երկայնքով՝ առանձին դեպքերում հատելով և խախտելով Հայաստանի օդային տարածքը: Հայ-ադրբեջանական սահմանի նույն հատվածում սեպտեմբերի 27-ին թուրքական F-16 ինքնաթիռը խախտել է Հայաստանի օդային սահմանը և հրթիռներ արձակել Վարդենիսի շրջանի ուղղությամբ:

Թուրքական օդուժը Ադրբեջանում հայտնվել է հուլիսի 29-ից օգոստոսի 13-ը տեղի ունեցած թուրք-ադրբեջանական լայնածավալ զորավարժությունների ժամանակ և մինչ օրս դուրս չի բերվել Ադրբեջանի տարածքից:

Թուրքական զինուժի այս սադրիչ գործողությունները լրջորեն վտանգում են տարածաշրջանային անվտանգությունը և խոչընդոտում են մարտական գործողությունները դադարեցնելու ուղղությամբ միջազգային հանրության ջանքերը:

Միջազգային հանրությունը կոչ է արել արտատարածաշրջանային ուժերին ձեռնպահ մնալ հակամարտությունը բորբոքելու քայլերից, և Թուրքիան պետք է անսա այս կոչերին:

Խստորեն դատապարտում ենք Թուրքիայի սադրիչ գործողությունները և պահանջում թուրքական զինուժի, ներառյալ՝ օդուժի անհապաղ դուրսբերումը հակամարտության գոտուց: