Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

ՀՀ Նախագահի հրամանագրերով՝ Արդարադատության ակադեմիայի ունկնդիր-շրջանավարտներից ևս երկուսը նշանակվել են դատավորի պաշտոնում.

Անդրանիկ Սիմոնյան – Լոռու մարզի առաջին ատյանի ընդհանուր իրավասության դատարանի դատավոր

Ռոմեն Ահարոնյան – Սյունիքի մարզի առաջին ատյանի ընդհանուր իրավասության դատարանի դատավոր

ՀՀ Նախագահի հրամանագրերը դատավոր նշանակելու մասին.

https://www.president.am/hy/decrees/item/5032/

https://www.president.am/hy/decrees/item/5034/

ՀՀ Նախագահի հրամանագրերով՝ Արդարադատության ակադեմիայի 2020 թվականի ունկնդիր-շրջանավարտներից ևս երկուսը նշանակվել են դատավորի պաշտոնում.

Էմին Աբգարյան - Սյունիքի մարզի առաջին ատյանի ընդհանուր իրավասության դատարանի դատավոր

Վահե Ջիվանյան - Արմավիրի մարզի առաջին ատյանի ընդհանուր իրավասության դատարանի դատավոր

ՀՀ Նախագահի հրամանագրերը դատավոր նշանակելու մասին.

https://www.president.am/hy/decrees/item/5029/

https://www.president.am/hy/decrees/item/5031/

Հունիսի 23-ին տեղի ունեցավ Արդարադատության ակադեմիայի կառավարման խորհրդի նիստը: Խորհրդի անդամներից բացի ներկա էր նաև Արդարադատության ակադեմիայի ռեկտոր Սերգեյ Առաքելյանը:

Օրակարգի հաստատումից հետո Խորհուրդը քննարկեց ապօրինի ծագում ունեցող գույքի բռնագանձմանն ուղղված գործառույթներ իրականացնող դատախազների թեկնածությունների ցուցակում ընդգրկված անձանց մասնագիտական պատրաստման 2020 թվականի ուսուցման ծրագիրը: Ռեկտորը ներկայացրեց ուսուցման քննարկվող ծրագրի նախագծի առանձնահատկությունները և նշեց, որ նախագիծը պատրաստելիս հաշվի են առնվել ինչպես ներպետական, այնպես էլ օտարերկրյա ու միջազգային համապատասխան կառույցների ներկայացուցիչների առաջարկությունները:

Նախագծի վերաբերյալ Խորհրդի անդամները ևս առաջարկություններ ներկայացրին, ինչի քննարկումից և ընդունումից հետո Խորհուրդը հաստատեց վերոնշյալ ուսուցման ծրագիրը:

Հունիսի 22-ին անցկացվեց «Կանխավարկածները և ապացուցման բեռը քրեական դատավարությունում» խորագրով առցանց սեմինար-քննարկում: Սեմինարը կազմակերպել և անցկացնում էր Միջազգային իրավական համագործակցության գերմանական հիմնադրամը (IRZ)՝ Արդարադատության ակադեմիայի հետ համատեղ: Մասնակցում էին դատավորներ և դատախազներ:

IRZ-ի անունից ողջույնի խոսքով հանդես եկավ Հարավարևելյան Եվրոպայում և Հարավային Կովկասում իրականացվող ծրագրերի բաժնի ղեկավար Ֆրանկ Հուփֆելդը:

Գերմանական հիմնադրամի ներկայացուցիչներին և սեմինարի մասնակիցներին ողջունեց նաև Արդարադատության ակադեմիայի ռեկտոր Սերգեյ Առաքելյանը: Ռեկտորը գոհունակությամբ նշեց, որ սեմինարը հնարավոր եղավ կազմակերպել՝ անկախ համավարակային իրավիճակից, ինչը հերթական կարևոր քայլն է Ակադեմիայի և IRZ-ի միջև առկա գործընկերային հարաբերությունները խորացնելու և զարգացնելու ուղղությամբ: «Քրեական իրավունքի այսօրվա մեր պրակտիկայում անմեղության կանխավարկածը բավական վիճելի հարցերից է»,-նշեց ռեկտորը՝ հավելելով, որ փորձ է արվել համատեղ քննարկել և վեր հանել հարցերի այն շրջանակը, որն այսօր Հայաստանում չափազանց կարևոր նշանակություն ունի: Ռեկտորը հաջող ընթացք և արդյունավետ քննարկում մաղթեց մասնակիցներին:

Սեմինարը վարում էր փորձագետ, Դյուսելդորֆի գերագույն երկրամասային դատարանի դատավոր Արնդ Վայսհաուփթը:

Հունիսի 19-ին մեկնարկեց Արդարադատության ակադեմիայում մասնագիտական պատրաստում անցնող ՀՀ քննչական կոմիտեի ծառայողների (քննիչների) թեկնածությունների ցուցակում ընդգրկված անձանց՝ առաջին խմբի ունկնդիրների առաջին քննաշրջանը: Քննությունը բանավոր էր, որը, ստեղծված իրավիճակով պայմանավորված, անցկացվեց առցանց եղանակով՝ ZOOM ծրագրի միջոցով:

Հաջորդ քննությունը նախանշված է հունիսի 26-ին։

Արդարադատության ակադեմիայի գիտական խորհրդի երաշխավորությամբ լույս է տեսել Արդարադատության ակադեմիայի ռեկտոր, ԵՊՀ քրեական իրավունքի ամբիոնի պրոֆեսոր Սերգեյ Առաքելյանի և Արդարադատության ակադեմիայի գիտահետազոտական և ծրագրամեթոդական աշխատանքների կազմակերպման բաժնի ղեկավար Պետիկ Մկրտչյանի «Հանցագործությունների որակման հիմնախնդիրները» մենագրությունը:

Մենագրությունում տեսական աղբյուրների, ՀՀ Սահմանադրական և Վճռաբեկ դատարանների դատական ակտերի, ինչպես նաև ներպետական և արտասահմանյան երկրների դատական պրակտիկայի այլ նյութերի հիման վրա վերլուծվել են հանցագործությունների որակման հասկացությունը, նշանակությունը, սկզբունքները, փուլերը, կանոնները, հանցագործությունների որակման իրավաբանական հիմքը: Վեր են հանվել քրեական իրավունքի առանձին ինստիտուտների իրավադրույթների կիրառման որոշ հիմնախնդիրներ, ներկայացվել են քննարկվող ինստիտուտների հետագա կատարելագործմանն ուղղված առաջարկություններ:

Մենագրության բովանդակությունը, ներբեռնման հնարավորությամբ, հասանելի է Ակադեմիայի պաշտոնական կայքում հետևյալ հղմամբ՝

https://aoj.am/library/academy-publications

ՀՀ Նախագահի հրամանագրերով՝ Արդարադատության ակադեմիայի 2020 թվականի ունկնդիր-շրջանավարտներից երկուսը նշանակվել են դատավորի պաշտոնում.

Վահագն Թորոսյան- Շիրակի մարզի առաջին ատյանի ընդհանուր իրավասության դատարանի դատավոր

Բորիս Բախշիյան - Սյունիքի մարզի առաջին ատյանի ընդհանուր իրավասության դատարանի դատավոր

ՀՀ նախագահի հրամանագրերը դատավոր նշանակելու մասին.

https://www.president.am/hy/decrees/item/5024/

https://www.president.am/hy/decrees/item/5025/

Հունիսի 9-ին Արդարադատության ակադեմիայում ռեկտոր Սերգեյ Առաքելյանն ավարտական դիպլոմներ հանձնեց Ակադեմիայի դատավորների թեկնածուների հավակնորդների 2019-2020թթ. ցուցակում ընդգրկված անձանց՝ քրեական, քաղաքացիական, վարչական մասնագիտացումներով 17 ունկնդրի:

Ստեղծված իրավիճակով պայմանավորված և արտակարգ դրության պայմաններում՝ դիպլոմների հանձնման արարողության կազմակերպման և անցկացման համար ձեռնարկվել էին անհրաժեշտ բոլոր միջոցառումները: Ունկնդիրներին դիպլոմներ հանձնվեց երկու խմբով, տրամադրվել էին դիմակներ, ձեռնոցներ, ախտահանիչ միջոցներ, պահպանվում էր սոցիալական հեռավորությունը:

Ռեկտորը շնորհավորեց շրջանավարտներին մասնագիտական պատրաստումն ավարտելու կապակցությամբ և հույս հայտնեց, որ հետագայում ճանապարհը կշարունակեն՝ ի օգուտ արդարադատության ոլորտի զարգացման ու բարելավման, առաջնորդվելով ոչ միայն մասնագիտական, այլև մարդկային արժանիքներով: «Ցանկացած՝ հատկապես կրթական հաստատության գործունեության հիմնական գնահատականը նրա շրջանավարտների ձեռքբերումներն ու հաջողություններն են: Վստահ եմ՝ մեր պատիվը բարձր կպահեք, և մոտ ապագայում կհանդիպենք ոչ որպես թեկնածուների հավակնորդներ, այլ՝ Ակադեմիայում վերապատրաստում անցնող դատավորներ»,-նշեց ռեկտորը և բարի երթ ու քաջառողջություն մաղթեց շրջանավարտներին:

Դատավորի թեկնածուի հավակնորդների խմբի անունից Լիանա Հարությունյանը երախտագիտություն հայտնեց Արդարադատության ակադեմիայի ռեկտորին և աշխատակազմին՝ մասնագիտական պատրաստման անցկացման, ջանասեր աշխատանքի ու նվիրումի համար, որը կարևոր նշանակություն կունենա իրենց հետագա աշխատանքում:

Դատավորների թեկնածուների հավակնորդների մասնագիտական պատրաստումը մեկնարկել էր 2019թ. սեպտեմբերի 9-ին և տևել 7 ամիս և 3 շաբաթ՝ ներառյալ 4 ամիս տևողությամբ փորձաշրջանը:

Հայաստանի Արդարադատության ակադեմիայի ռեկտոր Սերգեյ Առաքելյանը շնորհավորական ուղերձ է հղել Ուզբեկստանի գլխավոր դատախազության ակադեմիայի ղեկավար Եվգենի Կոլենկոյին և աշխատակազմին՝ կառույցի 2-ամյակի կապակցությամբ՝ մաղթելով առողջություն, հաջողություն և բարեկեցություն: «Այսօր Ուզբեկստանի գլխավոր դատախազության ակադեմիան ժամանակակից նյութատեխնիկական և մեթոդական բազա ունեցող գիտակրթական համալիր է, որտեղ պատրաստվում են բարձր որակավորում ունեցող մասնագետներ: Լիահույս եմ՝ Ակադեմիան հետագայում ևս շարունակաբար կզարգանա՝ պրոֆեսորադասախոսական կազմի և արհեստավարժ կադրերի ջանքերի շնորհիվ»,- ուղերձում նշել է ռեկտորը և վստահություն հայտնել, որ երկու կառույցների համագործակցությունն արդյունավետ կզարգանա:

Ուզբեկստանի գլխավոր դատախազության ակադեմիայի 2-ամյակի առիթով նախաձեռնվել և այսօր անցկացվել է հեռավար տեսահամաժողով՝ «Կրթական կարողությունների զարգացումն իրավապահ գործունեության ոլորտում. ժամանակակից մարտահրավերներ և որոշումներ» խորագրով: Մասնակցում էին տարբեր երկրների համանման կառույցների ներկայացուցիչներ: Արդարադատության ակադեմիայի անունից համաժողովին մասնակցում էր պրոռեկտոր Անահիտ Մանասյանը: Պրոռեկտորը, նախ՝ շնորհավորել է Ուզբեկստանի գլխավոր դատախազության ակադեմիային՝ մաղթելով արդյունավետ աշխատանք և նորանոր ձեռքբերումներ, ապա՝ հանդես եկել ելույթով՝ «Հայաստանի Արդարադատության ակադեմիայի գործունեության առանձնահատկությունները» թեմայով: Ա. Մանասյանը ներկայացրել է նաև համաճարակի պայմաններում և արտակարգ դրության ժամանակ Ակադեմիայի փորձը՝ մասնագիտական պատրաստման և վերապատրաստման կազմակերպման, հեռավար դասընթացների անցկացման գործում:

Մայիսի 20-22-ը տեղի է ունեցել Եվրոպայի խորհրդի (ԵԽ) «Կանանց նկատմամբ բռնության և ընտանեկան բռնության կանխարգելման և դրա դեմ պայքարի մասին կոնվենցիայի վավերացման ուղին Հայաստանում» ծրագրի շրջանակում անցկացվող «Բռնություն կանանց նկատմամբ և ընտանեկան բռնություն» HELP (Մարդու իրավունքների թեմայով ուսուցում իրավական ոլորտի մասնագետների համար) առցանց դասընթացի մեկնարկային հանդիպումը, որին մասնակցում էին դատավորներ, դատախազներ, քննիչներ:

Հաշվի առնելով ստեղծված իրավիճակը՝ հանդիպումն անցկացվեց առցանց եղանակով, որին մասնակցում էր Ակադեմիայի պրոռեկտոր Անահիտ Մանասյանը: Պրոռեկտորի խոսքով՝ Ակադեմիայի և Եվրոպայի Խորհրդի, նաև HELP ծրագրի միջև առկա է արդյունավետ և օգտակար համագործակցություն: Ավելին, նման դասընթացների արդյունավետության լավագույն վկայությունն է մասնակիցների թվի շարունակական աճը: Անահիտ Մանասյանը նշեց, որ մասնակցությունն այս դասընթացներին համարվում է Ակադեմիայում անցկացվող պարտադիր վերապատրաստումների բաղկացուցիչ: Պրոռեկտորը նաև նշեց, որ ստեղծված իրավիճակով պայմանավորված առավել մեծ թափով են այս փուլում իրականացվում հեռավար դասընթացներ, մասնավորապես՝ HELP հարթակում:

«Բռնություն կանանց նկատմամբ և ընտանեկան բռնություն» դասընթացի տևողությունը երեք ամիս է, որը վարելու է HELP դասընթացավար Լուսինե Սարգսյանը: