Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Հունվարի 29-ին Արդարադատության ակադեմիայի ռեկտոր Սերգեյ Առաքելյանն ընդունեց ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության (ԹՊԻՀ) «Քրեական արդարադատության բարեփոխումների» ծրագրի ղեկավար Քրիստինա Աֆոյանին:
Հանդիպման ընթացքում Քրիստինա Աֆոյանը ներկայացրեց Վաշինգտոնի գրասենյակի կողմից հաստատված 2 նոր ծրագիր, որոնց շահառուն Արդարադատության ակադեմիան է: Համաձայն առաջին՝ «Արդարադատության ակադեմիայի ուսուցման ծրագրերի մշակում» ծրագրի՝ նախատեսվում է համապատասխան փորձագետների ներգրավմամբ մշակել 5 նոր դասընթաց Ակադեմիայի ունկնդիրների համար: Ծրագիրը նախատեսվում է ավարտել 2022 թվականի մարտին:

Երկրորդ ծրագիրը կոչվում է «Հեռավար ուսուցման ծրագրերի մշակում Հայաստանի Արդարադատության ակադեմիայի համար», ըստ որի նախատեսվում է համատեղ մշակել 9 դասընթաց: Սրանք այն դասընթացներն են, որոնք մշակվել էին ՀՀ-ում ԱՄՆ դեսպանության «Քրեական արդարադատության բարեփոխումների» ծրագրի շրջանակում և առկա ուսուցման եղանակով դասավանդվում են Ակադեմիայում՝ «Կոռուպցիոն դեպքերի քննությունը», «Պաշտոնական կոռուպցիայի դեպքերի քննությունը», «Ներքին ուսումնասիրություններ (քննություն)», «Կալանք և այլընտրանքային խափանման միջոցներ», «Գենդերի հիման վրա կատարվող բռնարարքների քննությունը», «Անչափահաս կամ փոքրամասնության խմբին պատկանող իրավախախտների իրավունքների պաշտպանությունը», «Ֆինանսական հանցագործություններ և եկամուտների հայտարարագրման խախտումներ՝ կապված կոռուպցիայի հետ», «Անդրազգային հանցավորության և մտավոր սեփականության դեմ ուղղված հանցագործությունների քննությունը և դրանց դեմ պայքարը», «Դատական իշխանության անկախություն և թափանցիկություն»: Ծրագրի վերջնաժամկետ է սահմանված 2022 թվականի հունիսը:

Հանդիպման ընթացքում քննարկվել են ինչպես վերոնշյալ ծրագրերի իրականացմանն առնչվող, այնպես էլ այլ հարցեր: Կողմերը պայմանավորվել են հետևողական լինել ծրագրերի իրականացման ընթացքին և անել առավելագույնը աշխատանքների արդյունավետ կազմակերպման ուղղությամբ:

Հունվարի 27-ին առցանց եղանակով անցկացվեց Միջազգային իրավական համագործակցության գերմանական հիմնադրամի (IRZ) ղեկավար կոմիտեի նիստը՝ «Արդարադատության համակարգի ամրապնդումը Հայաստանում» խորագրի ներքո: Մասնակցում էին գործընկեր կառույցների ներկայացուցիչները, այդ թվում՝ Արդարադատության ակադեմիայի ռեկտոր Սերգեյ Առաքելյանը:

Առցանց հանդիպմանը մասնակցում էին նաև ՀՀ արդարադատության նախարարությունից, ՀՀ բարձրագույն դատական խորհրդից, ՀՀ գլխավոր դատախազությունից, ՀՀ փաստաբանների պալատից և այլն:

Հանդիպման ընթացքում ներկայացվել է Միջազգային իրավական համագործակցության գերմանական հիմնադրամի գործունեության հաշվետվությունը, գործընկերների հետ համատեղ իրականացված աշխատանքների արդյունքները, քննարկվել են առաջիկա անելիքները:

Հունվարի 25-ին տեղի ունեցավ Ակադեմիայի կառավարման խորհրդի 2021 թվականի անդրանիկ նիստը։ Ներկա էին Խորհրդի անդամներ Համլետ Ասատրյանը, Հովսեփ Բեդևյանը, Գևորգ Բաղդասարյանը, Արմեն Մարուխյանը, Եղիազար Ավագյանը, Արմեն Հովհաննիսյանը: Նիստին մասնակցում էր նաև Ակադեմիայի ռեկտոր Սերգեյ Առաքելյանը: Ի թիվս այլ հարցերի՝ նիստի օրակարգում ընդգրկված էր Ակադեմիայի կառավարման խորհրդի նախագահի ընտրության հարցը:

Խորհրդի նախագահի պաշտոնում առաջադրվեց ՀՀ գլխավոր դատախազի տեղակալ Գևորգ Բաղդասարյանի թեկնածությունը, ով գաղտնի քվեարկությամբ ընտրվեց՝ մեկ տարի պաշտոնավարման ժամկետով: «Արդարադատության ակադեմիայի մասին» ՀՀ օրենքով` Ակադեմիայի կառավարումն իրականացնում է Կառավարման խորհուրդը: Օրենքի 5-րդ հոդվածի համաձայն՝ Խորհրդի նախագահն ընտրվում է Խորհրդի կազմից՝ նրա անդամների ձայների մեծամասնությամբ, դատախազ և դատավոր անդամների միջև ռոտացիոն սկզբունքով:

Ռեկտորը հակիրճ ներկայացրեց Ակադեմիայի 2020 թվականի գործունեության մասին հաշվետվությունը՝ անդրադառնալով իրականացված գործունեության հիմնական ուղղություններին: Խորհրդի անդամները հաշվետվությունը միաձայն ընդունեցին ի գիտություն: Խորհուրդը հաստատեց նաև «Արդարադատության ակադեմիա» պետական ոչ առևտրային կազմակերպության 2021թ. եկամուտների և ծախսերի նախահաշիվը:

Նիստի ընթացքում քննարկվեցին և հաստատվեցին Արդարադատության ակադեմիայի դատավորների թեկնածուների հավակնորդների ինչպես նաև դատախազների թեկնածությունների ցուցակներում ընդգրկված անձանց մասնագիտական պատրաստման 2021 թ. ուսուցման ծրագրերը:

Հունվարի 18-ին մեկնարկեց Եվրոպայի Խորհրդի (ԵԽ) «Մարդու իրավունքները կենսաբժշկության ոլորտում» ծրագրի շրջանակում կազմակերպված վերապատրաստողների վերապատրաստման դասընթացը:

Մասնակիցներին Արդարադատության ակադեմիայի անունից ողջունեց պրոռեկտոր Անահիտ Մանասյանը, ով նաև HELP-ի ազգային համակարգողն է: Ա. Մանասյանը նշեց, որ հիշյալ ծրագրի իրականացումը մեկնարկել է համավարակի և պատերազմի չափազանց բարդ պայմաններում և այսօր արդեն իրականացվում է վերապատրաստողների վերպատրաստումը: Պրոռեկտորը նաև շնորհակալություն հայտնեց ծրագրի մասնակիցներին և ԵԽ-ին համատեղ արդյունավետ աշխատանքի և համագործակցության համար: «Ոլորտը չափազանց կարևոր է և կարիք ունի լուրջ ուսումնասիրության և պատշաճ պրակտիկ կիրառության»,-նշեց պրոռեկտորը և մասնակիցներին հաջողություն մաղթեց: Վերապատրաստումը հաջողությամբ ավարտած մասնակիցները կստանան ԵԽ-ի կողմից համապատասխան հավաստագրեր, ինչը նրանց հնարավորություն կտա ԵԽ HELP հեռավար հարթակի շրջանակում հանդես գալու որպես դասընթացավարներ:

ԵԽ երևանյան գրասենյակի ղեկավարի տեղակալ, ղեկավարի պաշտոնակատար Մաքսիմ Լոնգանգը ևս ողջունեց մասնակիցներին և հաջողություն մաղթեց նրանց:

Մասնակիցները վերապատրաստման շրջանակում կծանոթանան ինչպես ծրագրի, այնպես էլ HELP հեռավար ուսուցման մեթոդոլոգիային, ՀՀ-ում կենսաբժշկության ոլորտում նոր զարգացումներին և մարտահրավերներին, «HELP-ը կենսաէթիկայի ոլորտում» դասընթացի

Լույս է տեսել «Բանբեր Արդարադատության ակադեմիայի» գիտագործնական եռալեզու հանդեսի հերթական համարը՝ Ակադեմիայի գիտական խորհրդի երաշխավորությամբ: Հանդեսում տեղ են գտել ինչպես հայ, այնպես էլ Ակադեմիայի՝ Ռուսաստանի Դաշնության, Ուկրաինայի, Խորվաթիայի, Հունգարիայի գործընկեր կառույցների ներկայացուցիչների գիտական հոդվածները՝ հայերեն, ռուսերեն, անգլերեն: Հեղինակները միջազգային իրավունքի, հանրային իրավունքի, քրեական իրավունքի, քրեական դատավարության և կրիմինալիստիկայի, նաև մասնագիտական պատրաստման և վերապատրաստման շրջանակում քննության են առել արդիական մի շարք խնդրահարույց հարցեր:

«Բանբեր Արդարադատության ակադեմիայի» գիտագործնական հանդեսը լույս է տեսնում տարին երկու անգամ՝ իր շուրջը համախմբելով մասնագիտական հիմնախնդիրներով զբաղվող գիտնականների Հայաստանից ու աշխարհի տարբեր երկրներից:

Դեկտեմբերի 11-ին Ակադեմիայում մեկնարկել է դատախազների թեկնածությունների 2020-2021թթ. ցուցակում ընդգրկված անձանց մասնագիտական պատրաստման առաջին հատվածին հաջորդող քննաշրջանը: Գրավոր քննություն է հանձնել դատախազի 32 թեկնածու:

Տեղեկացնենք, որ Արդարադատության ակադեմիայում մասնագիտական պատրաստում անցնող դատախազի թեկնածուների համար ուսումնառության տևողությունը 8 ամիս է՝ ներառյալ 4 ամիս տևողությամբ փորձաշրջանը:

Ուսումնառությունը բաղկացած է ուսուցման 3 հատվածներից, որոնցից յուրաքանչյուրի ավարտին ունկնդիրները քննություն են հանձնում համապատասխան առարկաներից: 

Քննությունն անցկացվել է հակահամաճարակային կանոնների պահպանմամբ:

Նոյեմբերի 19-ին Արդարադատության ակադեմիայում տեղի ունեցավ ՀՀ քննչական կոմիտեի ծառայողների թեկնածությունների ցուցակում ընդգրկված անձանց 2020 թվականի երկրորդ խմբի ունկնդիրների դիպլոմների հանձնման արարողությունը: Դիպլոմ ստացավ 17 ունկնդիր:

Քննիչի թեկնածուների մասնագիտական պատրաստումն անցկացվել է համապատասխան ուսուցման ծրագրով՝ 2020 թվականի հունիսի 8-ից նոյեմբերի 3-ը՝ ներառյալ փորձաշրջանը:

Միջոցառումն անցկացվել է հակահամաճարակային կանոնների պահպանմամբ:

ՀՀ Նախագահի հրամանագրով՝ Արդարադատության ակադեմիայի 2020 թվականի ունկնդիր-շրջանավարտներից ևս մեկը նշանակվել է դատավորի պաշտոնում.

Լուսինե Ալավերդյան -Լոռու մարզի առաջին ատյանի ընդհանուր իրավասության դատարանի դատավոր

ՀՀ Նախագահի հրամանագիրը դատավոր նշանակելու մասին.

https://www.president.am/hy/decrees/item/5141/

Նոյեմբերի 9-ին մեկնարկել է ապօրինի ծագում ունեցող գույքի բռնագանձմանն ուղղված գործառույթներ իրականացնող դատախազների թեկնածությունների 2020թ. երկրորդ խմբի ցուցակում ընդգրկված անձանց մասնագիտական պատրաստումը՝ առցանց եղանակով:

Ուսուցումն անցկացվում է Արդարադատության ակադեմիայի կողմից մշակված և Ակադեմիայի կառավարման խորհրդի կողմից հաստատված համապատասխան ուսուցման ծրագրով, ըստ որի ուսումնառության ընդհանուր ժամաքանակը 122 ակադեմիական ժամ է:

Հոկտեմբերի 26-ին մեկնարկել է դատախազների թեկնածությունների 2020-2021թթ. ցուցակում ընդգրկված անձանց մասնագիտական պատրաստումը: Խմբում ընդգրկված է 32 ունկնդիր: Ուսումնառության տևողությունը 8 ամիս է՝ ներառյալ փորձաշրջանը:

Ուսուցումն անցկացվում է համապատասխան ուսուցման ծրագրով, որը նպատակաուղղված է ունկնդիրների մոտ դատախազի պաշտոնում գործելու համար անհրաժեշտ կարողությունների, հմտությունների ձևավորմանը, մասնագիտական գիտելիքների ծավալի ընդլայնմանը ընդհանուր և հատուկ մասնագիտական ոլորտներում:

Հաշվի առնելով ստեղծված իրավիճակը՝ ուսուցումն անցկացվում է առցանց: