Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Դեկտեմբերի 26-ին Արդարադատության ակադեմիայում տեղի ունեցավ Ակադեմիայի կառավարման խորհրդի հերթական նիստը: Ներկա էին Խորհրդի նախագահ Արմեն Հարությունյանը, անդամներ՝ Երվանդ Խունդկարյանը, Համլետ Ասատրյանը, Հովսեփ Բեդևյանը, Գևորգ Բաղադասարյանը, Րաֆֆի Ասլանյանը, Ռաֆիկ Գրիգորյանը, ինչպես նաև Ակադեմիայի ռեկտոր Սերգեյ Առաքելյանը:

Խորհրդի նախագահը շնորհավորեց ՀՀ արդարադատության նախարարի առաջին տեղակալ Ռաֆիկ Գրիգորյանին Ակադեմիայի խորհրդի կազմում ընդգրկվելու կապակցությամբ և մաղթեց արդյունավետ ու արգասաբեր աշխատանք:

Օրակարգի հաստատումից հետո խորհուրդն անցավ հարցերի քննարկմանը:
Այլ հարցերի հետ մեկտեղ ներկայացվեց նաև Ակադեմիայի 2018 թվականի գործունեության վերստուգման (աուդիտի) արդյունքները: Խորհուրդը վերստուգման արդյունքներն ընդունեց ի գիտություն:

Դեկտեմբերի 26-ին Արդարադատության ակադեմիայի ռեկտոր Սերգեյ Առաքելյանն աշխատակազմին ներկայացրեց Ակադեմիայի գործունեության վերաբերյալ տարեվերջյան ամփոփ հաշվետվություն: Ռեկտորը երախտագիտություն հայտնեց աշխատակազմին համատեղ արդյունավետ աշխատանքի և տարվա ընթացքում արձանագրած հաջողությունների ու ձեռքբերումների համար ինչպես ուսումնական գործընթացում, այնպես էլ միջազգային համագործակցության և նոր գործընկերներ ձեռքբերելու առումներով: Ռեկտորը հաջողությունների կողքին ներկայացրեց նաև այն խնդիրները, որոնց լուծումը կարևոր և հնարավոր է ամենօրյա աշխատանքում:

Ռեկտորի համապատասխան հրամաններով՝ Ակադեմիայի մի խումբ աշխատակիցներ պարգևատրվեցին Ակադեմիայի հուշամեդալով և պատվոգրերով՝ Ակադեմիայի զարգացման գործում առանձնակի նվիրումի, գործունեության ընթացքում անբասիր, բարեխիղճ, արդյունավետ աշխատանքի և նվիրումի համար:

Ռեկտորը շնորհավորեց բոլորին գալիք Ամանորի և Սուրբ Ծննդյան տոների կապակցությամբ՝ մաղթելով առողջություն, ընտանեկան ջերմություն, ուրախ տրամադրություն և երջանկություն:

ՀՀ Նախագահի հրամանագրերով՝ Արդարադատության ակադեմիայի 2019 թվականի ունկնդիր-շրջանավարտներից ևս երկուսը նշանակվել են դատավորի պաշտոնում.

Ելենա Առաքելյան - Լոռու մարզի առաջին ատյանի ընդհանուր իրավասության դատարանի դատավոր
Հասմիկ Ջալալյան - Շիրակի մարզի առաջին ատյանի ընդհանուր իրավասության դատարանի դատավոր
ՀՀ նախագահի հրամանագրերը դատավոր նշանակելու մասին.

https://www.president.am/hy/decrees/item/4948/

https://www.president.am/hy/decrees/item/4949/

Դեկտեմբերի 25-ին Արդարադատության ակադեմիայում անցկացվեց Ակադեմիայի գիտական խորհրդի հերթական նիստը, որը վարում էր Արդարադատության ակադեմիայի ռեկտոր, գիտխորհրդի նախագահ, իրավաբանական գիտությունների դոկտոր, պրոֆեսոր Սերգեյ Առաքելյանը: Ներկա էին Խորհրդի կազմում ընդգրկված իրավաբան-գիտնականներ, ՀՀ դատական, դատախազական և քննչական համակարգերի, նաև Ակադեմիայի աշխատակազմից ներկայացուցիչներ:

Օրակարգի հաստատումից հետո Խորհրդի անդամ Վահե Ենգիբարյանը ներկայացրեց «Օպերատիվ-հետախուզական միջոցառումների նկատմամբ նախնական դատական վերահսկողության ինստիտուտի կատարելագործման հայեցակարգային դրույթները» վերտառությամբ գիտական հաղորդում, որի շուրջ ակտիվ քննարկում ծավալվեց, վեր հանվեցին խնդրահարույց մի շարք հարցեր, նաև մատնանշվեցին որոշ թեմաներ, որոնց շուրջ, ռեկտորի խոսքով, նախատեսվում է առաջիկայում կազմակերպել համալիր քննարկում՝ շահագրգիռ կառույցների ներգրավմամբ:

Խորհրդի հաստատմանը ներկայացվեց «Բանբեր Արդարադատության ակադեմիայի» գիտագործնական հանդեսի երկրորդ համարի տպագրության երաշխավորության հարցը: Եռալեզու հանդեսում տեղ են գտել ինչպես հայ, այնպես էլ Ակադեմիայի օտարերկրյա գործընկեր կառույցների իրավաբան-գիտնականների գիտական հոդվածները: Խորհուրդը տպագրության երաշխավորեց գիտագործնական հանդեսի հերթական համարը:

Օրակարգում ընդգրկված էր նաև Վահե Ենգիբարյանի և Արգամ Հովսեփյանի «Դատական փորձաքննությունների տեսական և գործնական արդի հիմնախնդիրները» գիտագործնական ձեռնարկի տպագրության երաշխավորության հարցը: Ձեռնարկը Արդարադատության ակադեմիայի և ՀՀ ԳԱԱ «Փորձաքննությունների ազգային բյուրոյի» միջև համագործակցության արդյունք է: Խորհուրդը տպագրության երաշխավորեց գիտագործնական ձեռնարկը:

Ակադեմիայի գիտական խորհրդի տարեվերջյան նիստին Սերգեյ Առաքելյանը շնորհակալություն հայտնեց Խորհրդի անդամներին համատեղ արդյունավետ աշխատանքի համար և մաղթեց խաղաղություն, քաջառողջություն և նորանոր ձեռքբերումներ գալիք տարում:

Դեկտեմբերի 24-ին Արդարադատության ակադեմիայի ռեկտոր Սերգեյ Առաքելյանն ընդունեց ՄԱԿ զարգացման ծրագրի փորձագետ Միոդրագ Պերիսիչին և հայաստանյան գրասենյակի մարդու իրավունքների և արդարադատության ծրագրի պատասխանատու Մարինա Մալխասյանին:

Ռեկտորը ողջունեց հյուրերին և շնորհակալություն հայտնեց Ակադեմիայի գործունեության հանդեպ դրսևորած հետաքրքրության և դրական վերաբերմունքի համար, ինչպես նաև համատեղ արդյունավետ և օգտակար ծրագրեր իրականացնելու պատրաստակամություն հայտնեց: Սերգեյ Առաքելյանն ընդգծեց միջազգային կառույցների հետ համագործակցության կարևորությունը՝ այդ առումով շեշտելով համապատասխան գործընթացների արդյունավետ կազմակերպման գործում դրական փորձի ուսումնասիրությունն ու ներդնումը:

Հյուրերը երախտագիտություն հայտնեցին ջերմ ընդունելության համար և նշեցին, որ այս օրերին Հայաստանում է ՄԱԿ զարգացման ծրագրի փորձագետների խումբը, որոնք պատրաստ են մասնագիտական խորհրդատվություն տրամադրել դատավորների և թեկնածուների գնահատման ընթացակարգերի հիման վրա էլեկտրոնային հարթակի ձևավորման վերաբերյալ, նաև Ակադեմիայի ուսուցման ծրագրում ՏՏ ոլորտին առնչվող դասընթացի մշակման և ներդրման գործում:

Հյուրերի հարցերին ի պատասխան՝ ռեկտորը ներկայացրեց Ակադեմիայում հեռաուսուցմանը, ՏՏ ոլորտի կիրառման հմտություններին վերաբերող դասընթացին, նաև Ակադեմիայի կողմից մշակման փուլում գտնվող խաղաֆիկացման դասընթացին առնչվող մանրամասներ:

Ռեկտորն առաջարկեց նոր դասընթաց մշակելուց առաջ ընտրել դասընթացավարների, անցկացնել վերապատրաստողների վերապատրաստում՝ որակյալ փորձագետների ներգրավմամբ:

Նախատեսվում է քննարկումների արդյունքում ձեռքբերված պայմանավորվածությունները կյանքի կոչել 2020 թվականին:

Հանդիպման ավարտին հյուրերը նաև շրջեցին Ակադեմիայում, ծանոթացան շենքային և աշխատանքային պայմաններին:

Մոլդովայի արդարադատության ազգային ինստիտուտի հրավերով՝ դեկտեմբերի 16-18-ը Արդարադատության ակադեմիայի ռեկտոր Սերգեյ Առաքելյանն աշխատանքային այցով Քիշնևում էր: Այցի ընթացքում ռեկտորը ծանոթացել է ուսուցման գործընթացում սիմուլյացիոն մեթոդների կիրառմանը, առանձնահատկություններին, փորձի փոխանակման հնարավորություններին: «Մոլդովայի արդարադատության ազգային ինստիտուտի փորձը՝ ուսուցման գործընթացում կրթական նոր ու արդյունավետ մեթոդների՝ մասնավորապես սիմուլյացիայի կիրառման առումով, բավական հետաքրքրական է և կարող է օգտակար լինել նաև Հայաստանի Արդարադատության ակադեմիայի համար»,-նշել է ռեկտորը:

Այցի շրջանակում Սերգեյ Առաքելյանը հանդիպումներ է ունեցել Մոլդովայի Հանրապետության գլխավոր դատախազի, Բարձրագույն դատախազական խորհրդի նախագահի և անդամների, Արդարադատության նախարարի հետ: Հանդիպումների ընթացքում քննարկվել են Հայաստանում և Մոլդովայում դատաիրավական բարեփոխումների ընթացքին և ոլորտին վերաբերող բազմաթիվ հարցեր:

Մոլդովայի պետական համալսարանի ռեկտորի հետ հանդիպմանը քննարկվել են բարձրագույն իրավաբանական կրթությանը, նաև գործընկերային հարաբերությունների հաստատմանն առնչվող հարցեր:

Հանդիպումների ընթացքում ձեռք են բերվել մի շարք գործնական պայմանավորվածություններ՝ առաջիկայում դրանք համատեղ իրականացնելու հեռանկարով:

Դեկտեմբերի 18-ին Արդարադատության ակադեմիա այցելեցին ՄԱԿ զարգացման ծրագրի փորձագետներ Ժան Ժակ Գայը և Սրբուհի Հովհաննիսյանը: Ակադեմիայի պրոռեկտոր Անահիտ Մանասյանը ողջունեց հյուրերին և ներկայացրեց Ակադեմիայի գործունեության հիմնական ուղղությունները, ուսուցման գործընթացին առնչվող մանրամասներ:

ՄԱԿ զարգացման ծրագիրը Հայաստանում արդարադատության, մասնավորապես՝ դատաիրավական բարեփոխումների իրականացման գործընթացում տրամադրում է անհրաժեշտ օժանդակություն: Այդ նպատակով այս օրերին Հայաստանում է փորձագետների խումբ, որն աջակցություն ու մասնագիտական խորհրդատվություն է տրամադրում 2019-2023 թթ. դատական ու իրավական բարեփոխումների ռազմավարությամբ նախատեսված դատավորների ու թեկնածուների գնահատման ընթացակարգերի, գործիքակազմի ու բարեվարքության նորմերի վրա հիմնված հոգեբանական թեստավորման էլեկտրոնային հարթակի ձևավորման վերաբերյալ:
Պրոռեկտորը պատասխանեց հյուրերի հարցերին, որոնք վերաբերում էին ուսուցման գործընթացին, ուսուցման ծրագրերին, դասընթացավարների ընտրությանը, միջազգային համագործակցությանը և այլն:

Դեկտեմբերի 17-ին Արդարադատության ակադեմիայում անցկացվեց աշխատաժողով՝ «Ատելության հողի վրա կատարվող հանցագործությունները» թեմայով: Աշխատաժողովը կազմակերպել էր Ակադեմիան՝ ԵԱՀԿ ժողովրդավարական հաստատությունների և մարդու իրավունքների գրասենյակի (ԺՀՄԻԳ) հետ համատեղ: Մասնակցում էին ներկայացուցիչներ ՀՀ դատական իշխանությունից, դատախազությունից, ՀՀ արդարադատության նախարարությունից, ՀՀ քննչական կոմիտեից, ՀՀ հատուկ քննչական ծառայությունից, ՀՀ մարդու իրավունքների պաշտպանի գրասենյակից, ՀՀ ոստիկանությունից, հասարակական կազմակերպություններից: Աշխատաժողովը վարում էին ԵԱՀԿ/ԺՀՄԻԳ ներկայացուցիչ Վիկտոր Կունդրակը, Ակադեմիայի դասընթացավար Նունե Հայրապետյանը:

Արդարադատության ակադեմիայի անունից փորձագետներին և մասնակիցներին ողջունեց պրոռեկտոր Անահիտ Մանասյանը և հույս հայտնեց, որ եռակողմ համագործակցությունը՝ Ակադեմիայի, ՀՀ գլխավոր դատախազության և ԵԱՀԿ-ի միջև կլինի շարունակական: Այդ առումով պրոռեկտորը կարևորեց վերոնշյալ թեմատիկայով դասընթացի անհրաժեշտությունը: «Ատելության հողի վրա կատարվող հանցագործությունները ժամակակակից աշխարհի կարևորագույն խնդիրներից են և դրա դեմ պայքարն ունի չափազանց կարևոր նշանակություն: Այդ առումով կարևորում ենք համատեղ ջանքերը»,-նշեց Անահիտ Մանասյանը:

ԵԱՀԿ/ԺՀՄԻԳ գրասենյակը մշակել է ատելության հողի վրա կատարված հանցագործությունների մասին երկու դասընթաց: Աշխատաժողովի ընթացքում քննարկվեցին վերոնշյալ դասընթացի ծրագրերը, նպատակը, ձևաչափը, մեթոդաբանությունը, իմպլեմենտացման քայլերը, միջազգային չափանիշները, օրենսդրությունը, ատելության հողի վրա կատարված հանացագործությունների մասին ԵԱՀԿ հայեցակարգը, ինչպես նաև ԺՀՄԻԳ գործունեությունն ատելության հողի վրա կատարված հանցագործությունների ոլորտում:

Դեկտեմբերի 14-15-ին Ծաղկաձորում անցկացվեց դատավորների, դատախազների, քննիչների վերապատրաստում՝ «Հայաստանում ընտանեկան բռնության և կանանց դեմ բռնության կանխարգելում և դրա դեմ պայքար» թեմայով: Այն կազմակերպվել էր Արդարադատության ակադեմիայի և Եվրոպայի խորհրդի (ԵԽ) համագործակցության շրջանակում:

Ակադեմիայի պրոռեկտոր Անահիտ Մանասյանը, ողջունելով ներկաներին և կարևորելով Ակադեմիա-ԵԽ համագործակցությունը, նշեց, որ քննարկման թեման չափազանց արդիական է, և պատահական չէ, որ այդ թեմայով Արդարադատության ակադեմիայի և Եվրոպայի խորհրդի կողմից համատեղ բազմաթիվ ծրագրեր են իրականացվում: Պրոռեկտորն առանձնահատուկ ընդգծեց նշված թեմայով համատեղ մշակված առկա դասընթացի և ՀՀ օրենսդրությանն ադապտացված HELP առցանց դասընթացի կարևորությունը:

Վերապատրաստումն անցկացնում էին ԵԽ փորձագետ Լորի Մանը, Ակադեմիայի դասընթացավար Լուսինե Սարգսյանը, ովքեր մշակել են վերոնշյալ դասընթացը, ինչպես նաև Սիրանուշ Դավթյանը, ով ներկայացնում էր քննարկվող թեմայի հոգեբանական ասպեկտները:

Դեկտեմբերի 9-10-ը Կիևում անցկացվեց «Մարդու իրավունքների պաշտպանություն դատական ուսուցման միջոցով. լավագույն փորձը և չափորոշիչների բարելավում» խորագրով միջազգային համաժողով, որին մասնակցում էր Արդարադատության ակադեմիայի պրոռեկտոր Անահիտ Մանասյանը: Միջոցառումը կազմակերպել էր Եվրոպայի Խորհրդի մարդու իրավունքների եվրոպական դատարանի վճիռների կատարման վարչությունը՝ Ուկրաինայի դատավորների ազգային դպրոցի հետ համատեղ:

Մասնակցում էին մեկ տասնյակից ավելի երկրների համանման կառույցների ներկայացուցիչներ, որոնք ներկայացնում էին իրենց երկրում իրավական ոլորտի ուսուցման՝ մասնավորապես դատավորների մասնագիտական պատրաստման և վերապատրաստման առանձնահատկությունները:

Անահիտ Մանասյանը համաժողովին ներկայացրել է Հայաստանի Արդարադատության ակադեմիայի գործունեությունը մարդու իրավունքների պաշտպանության առնչությամբ դատավորների մասնագիտական պատրաստման և վերապատրաստման բնագավառում:

Համաժողովի ավարտին ընդունվել են ՄԻԵԿ իրացման, ՄԻԵԴ վճիռների կատարման առնչությամբ դատավորների ուսուցման բովանդակության և մեթոդաբանության վերաբերյալ Կիևի հանձնարարականները: