Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Փետրվարի 28-ին, մարտի 7-ին և մարտի 14-ին Արդարադատության ակադեմիայում կազմակերպվել են «Մարդկանց թրաֆիքինգի կամ շահագործման վերաբերյալ քրեական վարույթներով զոհակենտրոն մոտեցումների և զոհակենտրոն քննության ապահովմանն ուղղված» մոդուլով վերապատրաստման դասընթացներ:

Միջոցառումը կազմակերպվել է Ակադեմիայի կողմից՝ ԱՄՆ պետդեպարտամենտի ֆինանսավորմամբ՝ «Վորլդ Վիժն Ինթերնեյշընլ» միջազգային բարեգործական կազմակերպության հայաստանյան մասնաճյուղի կողմից իրականացվող «Միասին ընդդեմ մարդկանց թարֆիքինգի» ծրագրի շրջանակում: Վերապատրաստվել են ՀՀ ՆԳՆ ոստիկանության թվով 60 աշխատակիցներ:

Վերապատրաստումը վարում էին ՀՀ գլխավոր դատախազության մարդու դեմ ուղղված հանցագործությունների գործերով վարչության պետի տեղակալ Շուշանիկ Իսրայելյանը և ՀՀ գլխավոր դատախազության մարդու դեմ ուղղված հանցագործությունների գործերով վարչության ավագ դատախազ Տիգրան Պողոսյանը:

Մարտի 13-ին Արդարադատության Ակադեմիա այցելեցին Նյուրնբերգյան սկզբունքների միջազգային ակադեմիայի տնօրեն պրոֆեսոր դոկտոր Քրիստոֆ Զաֆերլինգը, Նյուրնբերգյան սկզբունքների միջազգային ակադեմիայի վերապատրաստման և կարողությունների զարգացման գծով ավագ աշխատակից Դառլին Սեդան և Նյուրնբերգյան սկզբունքների միջազգային ակադեմիայի ավագ սպա Կիրան Մոհանդաս Մենոնը:

Ռեկտոր Սերգեյ Առաքելյանը ողջունեց հյուրերին, ներկայացրեց Ակադեմիայի գործունեության հիմնական ուղղությունները, պատասխանեց հետաքրքրող հարցերին, անդրադարձավ միջազգային համագործակցությանը: Հանդիպման ընթացքում քննարկվեցին երկկողմ համագործակցությանն առնչվող հարցեր: Հյուրերը կարևորեցին երկկողմ արդյունավետ համագործակցությունը և անդրադարձան  այցի հիմնական նպատակին, այն է՝ «Միջազգային քրեական իրավունքի զարգացումը Հայաստանի Հանրապետությունում» խորագրով եռօրյա դասընթացներին, որը նախատեսված է  քննիչների, դատախազների և այլ իրավաբան մասնագետների համար:

Հյուրերը ծանոթացան նաև Ակադեմիայի շենքային պայմաններին, շրջեցին լսարաններով, եղան դատական նիստերի դահլիճում, գրադարանում,մարզասենյակում և հյուրանոցում:

Մարտի 4-ին Արդարադատության ակադեմիայի պրոռեկտոր Մարգարիտ Ամյանն ընդունեց Ռաուլ Վալլենբերգի անվան մարդու իրավունքների և մարդասիրական իրավունքի ինստիտուտի հայաստանյան գրասենյակի տնօրեն Հաննա Ջոնսոնին: Հանդիպմանը քննարկվեցին համատեղ իրականացվող ծրագրերի ընթացքը և հետագա քայլերը: Տիկին Ջոնսոնը ներկայացրեց Արդարադատության ակադեմիայի համար միջազգային և ներպետական փորձագետների  կողմից համատեղ մշակված «Մինչդատական քրեական վարույթի ընթացքում մարդու իրավունքների պաշտպանություն» խորագրով ուսումնական ձեռնարկի նախնական տարբերակը,որի հիման վրա առաջիկայում նախատեսվում է կազմակերպել  դասընթացավարների  վերապատրաստում: (TOT)

Հանդիպման ընթացքում քննարկվեցին նաև կազմակերպչական բնույթի մի շարք հարցեր:

Այսօր՝ փետրվարի 19-ին, Արդարադատության ակադեմիայի պրոռեկտոր Մարգարիտ Ամյանը գրքի տոնի կապակցությամբ խորհրդանշական գրքեր նվիրեց Ակադեմիայի ունկնդիրներին՝ հույս հայտնելով, որ գրականությունը կհետաքրքրի ընթերցողներին և  օգտակար կլինի մասնագիտական գործունեության համար, իսկ ներկայիս իրականության մեջ կշարունակվի բարձր գնահատվել գրքի դերն ու նշանակությունը:

Փետրվարի 14-ին և 15-ին Արդարադատության ակադեմիայում անցկացվեցին վերապատրաստման դասընթացներ՝ նվիրված դատական արհեստին և դատավորի դերին: Այն իրականացվեց Ակադեմիայի և Շվեդիայի ազգային դատարանների վարչության հետ համատեղ՝ «Հայաստանի դատավորների կարողությունների զարգացում` դատական համակարգի նկատմամբ նոր ակնկալիքներին համապատասխանելու և հանրային վստահությունն ամրապնդելու նպատակով» ծրագրի շրջանակում:

Ողջույնի խոսքով հանդես եկավ Ակադեմիայի պրոռեկտոր Մարգարիտ Ամյանը և ընդգծեց դատավորի դերի, արհեստի, հմտությունների և պատշաճ վարքագծի կարևորությունը ժամանակակից հասարակության մեջ:

Վերապատրաստման դասընթացները, որոնք նախատեսված էին քաղաքացիական մասնագիտացմամբ  դատավորների թեկնածուների հավակնորդների համար, վարում էին Շվեդիայից ժամանած քրեական և քաղաքացիական դատարանների դատավորներ էլիզաբեթ Վասս Լոֆսթեդը և Էրիկ Հավելիուսը, ինչպես նաև ՀՀ Վճռաբեկ դատարանի հակակոռուպցիոն պալատի դատավոր Սերգեյ Մարաբյանը: 

Հունվարի 31-ին Արդարադատության ակադեմիա այցելեցին ՀՀ-ում Ռուսաստանի Դաշնության արտակարգ և լիազոր դեսպան Սերգեյ Կոպիրկինը, դեսպանության առաջին քարտուղար Մարիա Կորոտինան, Երևանում Գիտության և մշակույթի ռուսական կենտրոնի տնօրենի տեղակալ Վիկտորյա Դերիպասկոն:

Ռեկտոր Սերգեյ Առաքելյանը ողջունեց հյուրերին, կարևորեց հայ-ռուսական բարեկամությունն ու արդունավետ համագործակցությունը տարբեր ոլորտներում: Ռեկտորը ափսոսանք հայտնեց և դատապարտեց Երևանում նախօրեին տեղի ունեցած միջադեպի՝ Պաշարված Լենինգրադի երեխաների հուշարձանը պղծելու առնչությամբ: 

Ռեկտորը ներկայացրեց Ակադեմիայի գործունեության հիմնական ուղղությունները, անդրադարձավ մասնագիտական պատրաստմանն ու վերապատրաստմանը, միջազգային համագործակցությանը, նաև կարևորեց Ակադեմիայի՝ ՌԴ արդարադատության պետական համալսարանի և ՌԴ դատախազության համալսարանի հետ առկա համագործակցությունը՝ ստորագրված հուշագրերի հիմքով: Ռեկտորն առաջարկներ ներկայացրեց համագործակցությունը զարգացնելու ուղղությամբ՝ դասընթացավարների և ունկնդիրների փոխանակման ծրագրերի կազմակերպում, անվանի գիտնականների և փորձագետների ներգրավում, հեռաուսուցման համատեղ դասընթացի մշակում և այլն:

Դեսպան Կոպիրկինը պատրաստակամություն հայտնեց խորացնել և արդիականացնել առկա համագործակցությունը՝ հաշվի առնելով ժամանակակից միտումները:

Հյուրերը ծանոթացան նաև Ակադեմիայի շենքային պայմաններին, շրջեցին լսարաններով, եղան դատական նիստերի դահլիճում, գրադարանում, հյուրանոցում:

Հունվարի 31-ին Արդարադատության ակադեմիայի ռեկտոր Սերգեյ Առաքելյանն ընդունեց ՀՀ-ում Ֆրանսիայի դեսպանության առաջին խորհրդական Քրիստոֆ Քացախյանին:

Ռեկտորը ողջունեց հյուրին և ներկայացրեց Ակադեմիայի գործունեության հիմնական ուղղությունները, ուսումնական գործընթացին առնչվող մանրամասներ, նաև խոսեց 2022թ.-ին Ֆրանսիայի ազգային դատական դպրոց կատարած այցի և հնարավոր համագործակցությունը խորացնելու հնարավորության մասին:

Հանդիպման ընթացքում քննարկվեցին երկկողմ համագործակցությանն  առնչվող հարցեր, այդ թվում՝ Ակադեմիայի ունկնդիրների համար դասախոսությունների կազմակերպում Ֆրանսիայից համապատասխան փորձագետների կողմից:

Ք. Քացախյանը նաև շրջեց Ակադեմիայում, ծանոթացավ շենքային պայմաններին և ուրախությամբ նշեց, որ առաջին անգամ է Ակադեմիայում և չափազանց տպավորված է:

Հաշվի առնելով դիմորդների բազմաթիվ խնդրանքները՝ դատավորների թեկնածուների ցուցակի համապատասխան մասնագիտացման բաժինների համալրման նպատակով որակավորման ստուգմանը, դատախազների և քննիչների թեկնածությունների ցուցակը համալրելու նպատակով անցկացվող մրցույթներին մասնակցելու ցանկություն ունեցող անձանց համար կազմակերպվող նախապատրաստական դասընթացների դիմումների ընդունման վերջնաժամկետը երկարաձգվում է մինչև փետրվարի 15-ը, ժամը՝ 17:00-ն ներառյալ: Դասընթացները կմեկնարկեն փետրվարի 19-ին:

Դիմումի, ուսուցման ծրագրի և այլնի վերաբերյալ մանրամասները՝ հետևյալ հղումով https://aoj.am/news/1523

ՀՀ հակակոռուպցիոն կոմիտեի նախագահի տեղակալ, Արդարադատության ակադեմիայի խորհրդի անդամ Մուշեղ Բաբայանը Ակադեմիայի խորհրդի տարեսկզբյան նիստում ընտրվել է Խորհրդի նախագահ՝ 1 տարի ժամկետով:

Նիստը տեղի է ունեցել հունվարի 24-ին: Ակադեմիայի խորհրդի անդամները գաղտնի քվեարկությամբ ռոտացիոն կարգով ընտրել են նոր նախագահին: Մուշեղ Բաբայանը նախկինում եղել է ՀՀ ոստիկանության կրթահամալիրի պետը:

Խորհրդի ուշադրությանն է ներկայացվել Ակադեմիայի 10-ամյա գործունեությանը նվիրված տեսաֆիլմը կառույցի ձեռքբերումների մասին:

Ակադեմիայի ռեկտոր Սերգեյ Առաքելյանի ներկայացմամբ՝ խորհուրդը քննարկել եւ միաձայն ընդունել է 2023 թ.-ի գործունեության հաշվետվությունը, հաստատել 2024 թ-ի եկամուտների եւ ծախսերի նախահաշիվը:

Հակակոռուպցիոն կոմիտեում ինքնավար պաշտոնների թեկնածուների ցուցակում ընդգրկված անձանց մասնագիտական պատրաստման 2024թ. ուսուցման ծրագիրը նույնպես հաստատվել է:  

Հունվարի 15-ին մեկնարկեց Հակակոռուպցիոն դատարանի դատավորների թեկնածուների հավակնորդների  ցուցակում ընդգրկված անձանց  մասնագիտական պատրաստումը:

Ուսումնառությունն անցկացվում է համապատասխան ուսուցման ծրագրով և ըստ մասնագիտացումների՝ քաղաքացիաիրավական և քրեաիրավական: Ծրագիրն իրականացվում է լսարանային ուսուցման և փորձաշրջանի եղանակներով: Ուսումնառությունը նախատեսվում է ավարտել մարտի 1-ին: