Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Ապրիլի 19-ից 20-ը Ծաղկաձորում անցկացվեց վերապատրաստում դատավորների համար՝ նվիրված դատական արհեստին և դատավորի դերին: Մասնակցում էին նաև Ակադեմիայի աշխատակազմի ներկայացուցիչները: Երկօրյա վերապատրաստումը կազմակերպել էր Արդարադատության ակադեմիան Շվեդիայի Ազգային դատարանների ադմինիստրացիայի հետ համատեղ՝ «Հայաստանի դատավորների կարողությունների զարգացում՝ դատական համակարգի նկատմամբ նոր ակնկալիքներին համապատասխանելու և հանրային վստահությունն ամրապնդելու նպատակով» Շվեդիայի կառավարության կողմից ֆինանսավորող հայ-շվեդական բազմամյա ծրագրի շրջանակում:

Վերապատրաստումն անցկացնում էին դատավորներ Աննա Բիլինգը, Էմիլ Լինդմարկը, ազգային փորձագետ Սերգեյ Մարաբյանը:

Արդարադատության ակադեմիան հայտարարում է թվով 6 առարկայական ծրագրերով դատավորների թեկնածուների ցուցակի համապատասխան մասնագիտացման բաժինների համալրման նպատակով որակավորման ստուգմանը, դատախազների և քննիչների թեկնածությունների ցուցակը համալրելու նպատակով անցկացվող մրցույթներին մասնակցելու ցանկություն ունեցող անձանց համար նախապատրաստական դասընթացների մեկնարկի մասին: 

•  Դասընթացի տևողությունը՝ 3 ամիս

•  Ժամաքանակը՝ 3 ակադեմիական ժամ (ամսական՝ 10 դասընթաց)

•  Ձևաչափը՝ առկա (հեռավար եղանակով միանալու հնարավորությամբ) 

•  Անցկացման վայրը՝ Արդարադատության ակադեմիա 

•  Մեկնարկը՝ մայիսի 6-ին

•  Ընդհանուր արժեքը՝ 450.000 ՀՀ դրամ 

 Ունկնդիր դառնալու համար անհրաժեշտ է մինչև մայիսի 2-ը ներառյալ Արդարադատության ակադեմիայի անձնակազմի և փաստաթղթաշրջանառության բաժին ներկայացնել.

1. դիմում՝ դասընթացին մասնակցելու ցանկության մասին, 

2. անձը հաստատող փաստաթղթի պատճենը՝ ներկայացնելով բնօրինակը, 

3. դասընթացի մեկ ամսվա վարձի վճարման անդորրագիրը (150.000 ՀՀ դրամ, որը ենթակա է վճարման «ԱյԴի Բանկ» ՓԲԸ-ի թիվ 11811009845606 հաշվեհամարին):

Դասընթացն ավարտելուց հետո ունկնդիրները, ցանկության դեպքում դասընթացի շրջանակներում ձեռքբերված գիտելիքների ստուգման և նախատեսված որակավորման ստուգմանը պատշաճ ներկայանալու նկատառումներից ելնելով, Արդարադատության ակադեմիայում կհանձնեն համապատասխան ձևաչափով քննություն:

Դասընթացն անցած ունկնդիրներին կտրամադրվեն ավարտական վկայականներ:

Առավել մանրամասն՝ կից Ուսուցման ծրագրում: 

Կոնտակտային անձ՝ Անձնակազմի և փաստաթղթաշրջանառության բաժնի ղեկավար Էմմա Խուբլարյան, 098 00 05 50, 060 46 00 79, emma.khublaryan@justiceacademy.am

Ապրիլի 12-ին Արդարադատության ակադեմիայում պրոռեկտոր Մարգարիտ Ամյանը դիպլոմներ հանձնեց Վերաքննիչ դատարաններում դատավոր (հակակոռուպցիոն) նշանակվելու համար առաջխաղացման ենթակա դատավորների թեկնածուների ցուցակում ընդգրկված անձանց: 

Պրոռեկտորը շնորհավորեց ունկնդիրներին՝ մաղթելով առանց խոչընդոտների և արդյունավետ աշխատանք նոր բնագավառում:

Շրջանավարտները շնորհակալություն հայտնեցին Ակադեմիայի աշխատակազմին՝ ուսուցման գործընթացը բարձր մակարդակով կազմակերպելու համար:

Մարտի 28-ին Արդարադատության ակադեմիայում ռեկտոր Սերգեյ Առաքելյանը դիպլոմներ հանձնեց ՀՀ քննչական կոմիտեում ինքնավար պաշտոն զբաղեցնող անձանց (քննիչների) թեկնածությունների 2024 թվականի ցուցակում ընդգրկված 1-ին խմբի ունկնդիրներին:

Ակադեմիայի ռեկտոր Սերգեյ Առաքելյանը շնորհավորեց շրջանավարտներին մասնագիտական պատրաստումն ավարտելու կապակցությամբ. «Հարգելի ունկնդիրներ, քրեական արդարադատության հիմքում հենց քննիչի գործունեությունն է՝ամենաբարդ, պատասխանատու, խոչընդոտներով լի, և կախված նրանից, թե ինչքանով կկարողանաք ձեր հմտությունները կիրառել, մենք կկարողանանք արձանագրել մարդու իրավունքների պաշտպանության որոշակի մակարդակ մեր երկրում», -նշեց ռեկտորը՝ բարի երթ մաղթելով շրջանավարտներին:

Քննիչի թեկնածուների այս խմբում ընդգրկված է 23 ունկնդիր, որոնք մասնագիտական պատրաստում են անցել սույն թվականի հունվարի 15-ից մարտի 22-ը՝ համապատասխան ուսուցման ծրագրով:

Տեսանյութ - https://youtu.be/7q6wpViDKlw

Հայաստանի Հանրապետության Արդարադատության ակադեմիան խստորեն դատապարտում է 2024 թվականի մարտի 22-ին «Crocus City Hall»-ում տեղի ունեցած բարբարոսական ահաբեկչությունը։

Խաղաղ բնակչության դեմ ուղղված  ահաբեկչական գործողությունը որևէ արդարացում չունի և չի կարող ունենալ։

Սգում ենք եղբայրական ռուս ժողովրդի հետ և մեր անկեղծ ցավակցությունն ենք հայտնում ահաբեկչության հետևանքով զոհվածների ընտանիքներին և ընկերներին, իսկ վիրավորներին մաղթում շուտափույթ ապաքինում։

Մարտի 21-ին Արդարադատության ակադեմիա այցելեցին ԱՄՆ Միջազգային զարգացման գործակալության (ՄԶԳ) «Հայաստանի Արդարադատության ոլորտի աջակցության» ծրագրի ղեկավար Հասմիկ Հակոբյանը, ղեկավարի տեղակալ Մերեդիթ Քլեր Բամբրիկը, ծրագրի ընդհանուր ղեկավար «Դիվելոպմենթ պրոֆեշընըլս» կազմակերպության նախագահի տեղակալ Պատրիկ Վուջիկը:

Ռեկտոր Սերգեյ Առաքելյանը ողջունեց հյուրերին, ներկայացրեց Ակադեմիայի գործունեության հիմնական ուղղությունները, անդրադարձավ մինչ այս համատեղ իրականացված և ընթացքի մեջ գտնվող ծրագրերին՝ կարևորելով համագործակցության շարունակական լինելը, խոսեց հեռավար ուսուցման ժամանակակից մոտեցումներից:

Հյուրերը շնորհակալություն հայտնեցին ջերմ ընդունելության համար, ծրագրի ղեկավար Հասմիկ Հակոբյանը ներկայացրեց Ակադեմիայի հետ համատեղ մշակված և ընթացքի մեջ գտնվող ծրագրերը:

Հյուրերը նաև շրջեցին Ակադեմիայում, եղան լսարաններում, այցելեցին դատական նիստերի դահլիճ, գրադարան, մարզասրահ, հյուրանոց, ինչպես նաև «Հայ-ամերիկյան բարեկամության նախասրահ», որն ամբողջությամբ նորոգվել, կահավորվել և տեխնիկապես վերազինվել է ՀՀ-ում ԱՄՆ դեսպանության ֆինանսական աջակցությամբ:

Մարտի 19-ին Արդարադատության ակադեմիայում ռեկտոր Սերգեյ Առաքելյանը դիպլոմներ հանձնեց Հակակոռուպցիոն դատարանի դատավորների թեկնածուների հավակնորդների և Հակակոռուպցիոն կոմիտեում ինքնավար պաշտոն զբաղեցնող անձանց (քննիչների) թեկնածությունների 2024 թ. ցուցակում ընդգրկված անձանց: Դիպլոմներ ստացան Ակադեմիայի 6 ունկնդիրներ: 

Ակադեմիայի ռեկտոր Սերգեյ Առաքելյանը շնորհավորեց շրջանավարտներին մասնագիտական պատրաստումն ավարտելու կապակցությամբ. «Հարգելի ունկնդիրներ, խնդրում և միաժամանակ պահանջում եմ ձեր մասնագիտական գործառույթներն իրականացնելիս բարձր պահել Ակադեմիայի պատիվը», - նշեց պարոն Առաքելյանը՝ անդրադառնալով ևս մեկ կարևոր հանգամանքի, այն է՝ սիրած մասնագիտությամբ, սիրած գործով սիրով զբաղվելը երջանկության բաղադրիչներից է և այդ առումով շատ կարևոր է որևէ պարագայում հիասթափություն չունենալ կատարած ընտրությունից:

Տեսանյութ - https://youtu.be/Hf2lRtKVY0U

Մարտի 18-ին Արդարադատության ակադեմիա այցելեցին ՀՀ-ում ԱՄՆ պետքարտուղարության ԹՊԻՀ Եվրասիական թիմի ղեկավար Մարի Քուրթը, ԱՄՆ դեսպանատան ԹՊԻՀ հայաստանյան գրասենյակի տնօրեն Ալեքսիս Հաֆթվանին, ԹՊԻՀ «Քրեական արդարադատության բարեփոխումների» ծրագրի ղեկավար Քրիստինա Աֆոյանը, Արևելք-Արևմուտք Կառավարման Ինստիտուտի փոխնախագահ Նիկոլաս Մենսֆիլդը, Արևելք-Արևմուտք Կառավարման Ինստիտուտի երկրի կոորդինատոր Սերգո Կավտարաձեն:

Հանդիպման ընթացքում ռեկտոր Սերգեյ Առաքելյանը ներկայացրեց Ակադեմիայի գործունեության հիմնական ուղղությունները, բարձր գնահատեց ՀՀ-ում ԱՄՆ դեսպանության մեծ աջակցությունը, որը հետագայում ևս հնարավորություն կտա գտնելու համագործակցության փոխշահավետ նոր ուղիներ: 

Ռեկտորը նաև անդրադարձավ մինչ այս համատեղ իրականացված ծրագրերին, պատասխանեց հյուրերին հետաքրքրող մի շարք հարցերի:

Հյուրերն իրենց հերթին շնորհակալություն հայտնեցին ջերմ ընդունելության համար՝ հույս հայտնելով, որ նոր մեկնարկող ծրագրի շրջանակներում համագործակցությունը ևս կլինի արգասաբեր:

 Հյուրերը նաև շրջեցին Ակադեմիայում, եղան լսարաններում, այցելեցին դատական նիստերի դահլիճ, գրադարան, մարզասրահ, հյուրանոց, ինչպես նաև «Հայ-ամերիկյան բարեկամության նախասրահ», որն ամբողջությամբ նորոգվել, կահավորվել և տեխնիկապես վերազինվել է ՀՀ-ում ԱՄՆ դեսպանության ֆինանսական աջակցությամբ:

Մարտի 13-15-ը Արդարադատության ակադեմիայում մեկնարկեցին Նյուրնբերգյան սկզբունքների միջազգային ակադեմիայի ներկայացուցիչների կողմից կազմակերպված «Միջազգային իրավունքի զարգացումը Հայաստանի Հանրապետությունում» խորագրով եռօրյա դասընթացները՝ նախատեսված դատախազների, քննիչների և այլ իրավաբան մասնագետների համար:

Դասընթացները վարում էին Նյուրնբերգյան սկզբունքների միջազգային ակադեմիայի տնօրեն պրոֆեսոր դոկտոր Քրիստոֆ Զաֆերլինգը, Նյուրնբերգյան սկզբունքների միջազգային ակադեմիայի վերապատրաստման և կարողությունների զարգացման գծով ավագ աշխատակից Դառլին Սեդան, Նյուրնբերգյան սկզբունքների միջազգային ակադեմիայի ավագ սպա Կիրան Մոհանդաս Մենոնը, ինչպես նաև Միջազգային քրեական հետաքննությունների ինստիտուտի գործադիր տնօրեն Ֆիլիպ Թրյուհիթը և Միջազգային քրեական դատարանի դատախազության դատախազ Ալեքսիս Դեմիրճյանը:

Դասընթացների ավարտին ունկնդիրները ստացան մասնակցության վկայականներ:

Մարտի 14-ին Արդարադատության ակադեմիայի ռեկտոր Սերգեյ Առաքելյանը հանդիպեց ՀՀ քննչական կոմիտեում ինքնավար պաշտոն զբաղեցնող անձանց (քննիչների) թեկնածությունների 2024 թվականի ցուցակում ընդգրկված ունկնդիրների երկրորդ խմբին: Խմբում ընդգրկված է 28 ունկնդիր:

Ռեկտորը շնորհավորեց քննիչի թեկնածուներին Ակադեմիայի ունկնդիր դառնալու կապակցությամբ, ներկայացրեց ուսուցման գործընթացի մանրամասները և պատասխանեց հուզող հարցերին:

Մասնագիտական պատրաստումը, որ անցկացվելու է համապատասխան ուսուցման ծրագրով, մեկնարկելու է մարտի 18-ին և նախատեսվում է ավարտել մայիսի 29-ին: