Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Հունիսի 21-ից 22-ը Ստրասբուգում անցկացվել է Եվրոպայի խորհրդի (ԵԽ) իրավական ոլորտի մասնագետների համար մարդու իրավունքների կրթություն՝ HELP (Human Rights Education for Legal Professionals) ծրագրի տարեկան համաժողովը՝ «Որակյալ ուսուցում որակյալ վճիռների նպատակով» խորագրով: Համաժողովին մասնակցում էր Արդարադատության ակադեմիայի հեռաուսուցման և տեղեկատվական տեխնոլոգիաների դեպարտամենտի ղեկավար Արտաշես Խուրշուդյանը, ով նաև ԵԽ հեռավար ուսուցման ծրագրերի մշակման մեթոդոլոգիական խմբի փորձագետ է:

Համաժողովի մասնակից Եվրոպայի խորհրդի 47 անդամ երկրների ներկայացուցիչները քննարկել են HELP-ի շրջանակներում մշակվող հեռաուսուցման դասընթացների ներդման հնարավորությունները մասնակից երկրների բարձրագույն կրթության համակարգերում:

Աշխատանքներն ավելի արդյունավետ կազմակերպելու նպատակով համաժողովի մասնակիցները քննարկումներ են ծավալել աշխատանքային առանձին խմբերով՝ վերհանելով իրավական ոլորտի մասնագետների համար մարդու իրավունքների ուսուցման առանձնահատկությունները՝ մեթոդաբանական մոտեցումներ, գնահատման գործիքների ազդեցություն, հեռաուսուցման կազմակերպման մեթոդաբանության կատարելագործում ու HELP-ի էլեկտրոնային ուսուցման նոր պլատֆորմի գործառնական և նորարարական լուծումներ:

Համաժողովի շրջանակում Արտաշես Խուրշուդյանը հանդիպում է ունեցել HELP ծրագրի ղեկավար Էվա Պաստրանայի հետ: Քննարկվել են նոր դասընթացների ներդրմանն առնչվող հարցեր, ինչպես նաև ներկայացվել են HELP-ի 2018 թվականի նոր մշակված դասընթացները, որոնք ներդրվելու են մինչև տարեվերջ:

Գործընկերների հետ առանձնազրույցների ընթացքում քննարկվել են նաև հեռաուսուցման համատեղ նոր ծրագրեր մշակելու հնարավորությունները, ձեռք են բերվել որոշակի պայմանավորվածություններ:

Արդարադատության ակադեմիայի ռեկտոր Սերգեյ Առաքելյանի հրավերով հունիսի 20-ից 23-ը Երևանում էր Ռուսաստանի արդարադատության պետական համալսարանի պատվիրակությունը՝ ռեկտոր, իրավագիտության դոկտոր, պրոֆեսոր Վալենտին Երշովի գլխավորությամբ: Պատվիրակության կազմում էին Համալսարանի աշխատանքային իրավունքի և սոցիալական ապահովության իրավունքի ամբիոնի վարիչ Ելենա Երշովան և Հյուսիս-արևմտյան մասնաճյուղի (Սանկտ-Պետերբուրգ) տնօրեն Յարոսլավ Ժոլոբովը: Պատվիրակության բոլոր անդամները պաշտոնաթող դատավորներ էին:

Այցի գլխավոր նպատակը երկու կառույցների միջև համագործակցության հուշագրի ստորագրումն էր և այդ շրջանակում համատեղ ծրագրերի իրականացմանն ուղղված հարցերի քննարկումը:

Հունիսի 21-ին Արդարադատության ակադեմիայում տեղի ունեցավ համագործակցության հուշագրի ստորագրման հանդիսավոր արարողությունը: Միջոցառմանը ներկա էին Ակադեմիայի կառավարման խորհրդի անդամները, ունկնդիրները, աշխատակազմը: Փաստաթուղթը ստորագրեցին Սերգեյ Առաքելյանը և Վալենտին Երշովը: Հուշագիրն ամրագրեց փոխադարձ հետաքրքրություն ներկայացնող ոլորտներում համագործակցելու ցանկությունը:

Սերգեյ Առաքելյանը ջերմորեն ողջունեց հյուրերին և երախտագիտություն հայտնեց հրավերն ընդունելու և հուշագիրը ստորագրելու նպատակով Երևան ժամանելու համար:
«Այսօր ևս մեկ նշանակալի օր է Ակադեմիայի համար, քանի որ իրավական հիմքի վրա ենք դնում ռուսաստանյան կարևորագույն կառույցներից մեկի՝ Ռուսաստանի արդարադատության պետական համալսարանի հետ մեր համագործակցությունը: Կառույցը որոշակի տարբերություններ ունի Ակադեմիայի հետ, բայց այն հիմնական գործառույթները, որոնք կապված են դատավորի թեկնածուների մասնագիտական պատրաստման, գործող դատավորների վերապատրաստման, որակավորման բարձրացման հետ, այնքան ընդհանրություններ ունեն, որ կարծում եմ՝ մեր համագործակցությունն իր դրական պտուղները մոտ ապագայում կտա»,- նշեց Սերգեյ Առաքելյանը:

Իր հերթին Վալենտին Երշովը փաստեց, որ մեծ ուրախությամբ են ընդունել հրավերը և ընդգծեց Հայաստան-Ռուսաստան բարեկամական հարաբերությունների առանձնահատուկ դերը: Ռեկտորը հակիրճ ներկայացրեց Ռուսաստանի արդարադատության պետական համալսարանի 20-ամյա գործունեության հիմնական ուղղությունները:

«Համալսարանում տարեկան վերապատրաստվում է 35 հազարից ավելի դատավոր, դատական համակարգի 100 հազարից ավելի ներկայացուցիչ, ինչպես նաև ուսումնառություն է անցնում 23 հազար ուսանող: Ավելին՝ Համալսարանը երկրի 11 քաղաքներում մասնաճյուղեր ունի, ընդհանուր առմամբ՝ 2000-ից ավելի աշխատակից, շուրջ 1500 դասախոս»,-ասաց Վ. Երշովը:

Հանդիսավոր միջոցառումից հետո Վալենտին Երշովը Արդարադատության ակադեմիայի ունկնդիրների առաջ հանդես եկավ դասախոսությամբ, նաև ներկայացրեց իր հեղինակած «Հասարակական հարաբերությունների իրավական և անհատական կարգավորումը» վերտառությամբ մենագրությունը: Հեղինակը լսարանին ներկայացրեց գրքի ընդհանուր դրույթները, դասախոսությունը վերածվեց քննարկման՝ հարց ու պատասխանի ձևաչափով: Վ. Երշովը գրքի մի քանի օրինակ նվիրեց Ակադեմիային և մասնագիտական ոլորտում համագործակցելու պատրաստակամություն հայտնեց:

Այցի շրջանակում պատվիրակության անդամների համար հնարավորություն էր ստեղծվել նաև ծանոթանալ Հայաստանի պատմությանը, մշակութային ժառանգությանը: Հյուրերը չափազանց տպավորված էին Ծիծեռնակաբերդի հուշահամալիր, Մատենադարան, Սևանավանք կատարած այցերից:

Հունիսի 12-ին ՀՀ արտաքին գործերի նախարարությունում տեղի է ունեցել Հայաստան-Եվրոպայի խորհուրդ (ԵԽ) Գործողությունների ծրագրի Միջգերատեսչական կոմիտեի նիստ, որին մասնակցել է նաև Արդարադատության ակադեմիայի ռեկտոր Սերգեյ Առաքելյանը:

Միջոցառմանը ներկա էին ՀՀ արտաքին գործերի նախարարի տեղակալ Կարեն Նազարյանը, ԵԽ Գլխավոր տնօրինության ծրագրերի գրասենյակի տնօրեն Վերենա Թեյլորը, Մարդու իրավունքների ազգային իրականացման վարչության Արևելյան գործընկերության բաժնի ղեկավար Տիգրան Կարապետյանը , ԵԽ-ում ՀՀ ներկայացուցիչ Պարույր Հովհաննիսյանը, Հայաստանում ԵԽ գրասենյակի ղեկավար Նատալյա Վուտովան, գործողությունների ծրագրում ներառված նախագծերին մասնակցող ՀՀ գերատեսչությունների բարձրաստիճան պաշտոնյաներ:

Հանդիպման նպատակն էր ամփոփել և գնահատել մարդու իրավունքների պաշտպանության, արդարադատության ապահովման, իրավունքի գերակայության և ժողովրդավարական կառավարման ոլորտների բարեփոխումներին ուղղված 2015-2018թթ. գործողությունների ծրագրի արդյունքները, ինչպես նաև անդրադառնալ հաջորդ փուլի՝ ուրվագծվող 2019-2022թթ. Գործողությունների ծրագրի առաջնահերթ ուղղություններին։

Արդարադատության ակադեմիայի ռեկտոր Սերգեյ Առաքելյանը, բարձր գնահատելով և կարևորելով Ակադեմիայի և ԵԽ-ի միջև համագործակցությունը, անդրադարձել է «Աջակցություն Հայաստանում քրեական արդարադատության համակարգի բարեփոխումներին և պայքար վատ վերաբերմունքի և անպատժելիության դեմ» Եվրոպական միության և Եվրոպայի խորհրդի համատեղ ծրագրի շրջանակում հայաստանյան և միջազգային փորձագետների կողմից մշակված 5 նոր դասընթացներին: Այդ դասընթացները ներդրվել են Ակադեմիայի ուսուցման ծրագրերում, որի արդյունքում մասնագիտական պատրաստում և վերապատրաստում են անցել ինչպես դատավորի, դատախազի և քննիչի թեկնածուները, այնպես էլ գործող դատավորները, դատախազները և քննիչները: Սերգեյ Առաքելյանը իր խոսքում նաև կարևորել է «Կանանց նկատմամբ բռնության և ընտանեկան բռնության» վերաբերյալ ԵԽ HELP առցանց դասընթացը, որը համապատասխանեցվել է ՀՀ օրենսդրությանը: Առաջիկահում նախատեսվում է այդ դասընթացի 2-րդ փուլի մեկնարկը:

ՀՀ-ում ԱՄՆ դեսպանության «Քրեական արդարադատության բարեփոխումների» ծրագրի շրջանակում Արդարադատության ակադեմիայում դասավանդելու համար մշակվել են առարկայական նոր դասընթացներ հետևյալ թեմաներով՝ «Կոռուպցիոն դեպքերի քննությունը», «Պաշտոնական կոռուպցիայի դեպքերի քննությունը», «Ներքին ուսումնասիրություններ (քննություն)», «Կալանք և այլընտրանքային խափանման միջոցներ», «Գենդերի հիման վրա կատարվող բռնարարքների քննությունը», «Անչափահաս կամ փոքրամասնության խմբին պատկանող իրավախախտների իրավունքների պաշտպանությունը», «Ֆինանսական հանցագործություններ և եկամուտների հայտարարագրման խախտումներ՝ կապված կոռուպցիայի հետ», «Անդրազգային հանցավորության և մտավոր սեփականության դեմ ուղղված հանցագործությունների քննությունը և դրանց դեմ պայքարը», «Դատական իշխանության անկախություն և թափանցիկություն»:

Ակադեմիայում այդ դասընթացների դասավանդումը կազմակերպելու նպատակով մի քանի փուլով իրականացվելու են վերապատրաստողների վերապատրաստման դասընթացներ: Այսօր մեկնարկել է դատավոր-դասընթացավարների վերապատրաստումը:

Վերապատրաստման մեկնարկից առաջ Ակադեմիայի գիտական աշխատանքի գծով պրոռեկտոր Անահիտ Մանասյանը ողջունեց ներկաներին և նշեց, որ ՀՀ-ում ԱՄՆ դեսպանության հետ ունեցած համագործակցության շրջանակում և Երևանի պետական համալսարանի թիմի հետ մշակվել է 9 դասընթաց, որոնք պետք է ներդրվեն Ակադեմիայի ուսումնական ծրագրում: Պրոռեկտորն ավելացրեց նաև, որ վերապատրաստումը հաջողությամբ ավարտած մասնակիցները ԱՄՆ պետքարտուղարության կողմից կստանան համապատասխան վկայականներ, ինչի արդյունքում հնարավորություն կստանան նոր մշակված առարկայական կուրսերը դասավանդել Արդարադատության ակադեմիայում:

Միջոցառմանը ողջույնի խոսքով հանդես եկան ՀՀ-ում ԱՄՆ դեսպանության «Քրեական արդարադատության բարեփոխումների» ծրագրի ղեկավար Քրիստինա Աֆոյանը և ԵՊՀ իրավագիտության ֆակուլտետի դեկան, ՀՀ ԳԱԱ ակադեմիկոս, իրավ. գիտ. դոկտոր, պրոֆ. Գագիկ Ղազինյանը: Բանախոսները կարևորեցին նմանատիպ ծրագրերի իրականացման և միջոցառումների կազմակերպման անհրաժեշտությունը:

Սեմինարի շրջանակում ներկաները հնարավորություն ունեցան ոչ միայն լսել դասընթացավարներին, այլև գործնական առաջադրանքների և հարց ու պատասխանի միջոցով թեմային առնչվող խնդիրների վերաբերյալ հետաքրքրական և օգտակար քննարկում ծավալել:

Հունիսի 9-ից 10-ը Դիլիջանում անցկացվեց հերթական կլոր սեղան-քննարկումը՝ նվիրված ՀՀ քաղաքացիական դատավարության նոր օրենսգրքին: Միջոցառումը կազմակերպվել էր «Աջակցություն Հայաստանում դատական բարեփոխումների իրականացմանը» Եվրոպայի Խորհրդի ծրագրի կողմից՝ Արդարադատության ակադեմիայի հետ համատեղ: Մասնակցում էին ՀՀ վերաքննիչ քաղաքացիական դատարանի և ՀՀ առաջին ատյանի ընդհանուր իրավասության դատարանների քաղաքացիական գործեր քննող դատավորներ:

Քննարկմանը ներկա էին Արդարադատության ակադեմիայի գիտական աշխատանքի գծով պրոռեկտոր Անահիտ Մանասյանը, ՀՀ ԱՆ «Օրենսդրության զարգացման և իրավական հետազոտությունների կենտրոն» հիմնադրամի տնօրեն Տիգրան Մարկոսյանը, «Աջակցություն Հայաստանում դատական բարեփոխումների իրականացմանը» Եվրոպայի Խորհրդի ծրագրի ղեկավար Նարինե Գասպարյանը: Բանախոսներն էին՝ ԵԽ փորձագետներ Սերգեյ Մեղրյանը (ՀՀ Բարձրագույն դատական խորհրդի անդամ), Գոռ Հակոբյանը (ՀՀ Վճռաբեկ դատարանի քաղաքացիական և վարչական պալատի դատավոր), Տարոն Նազարյանը (ՀՀ վերաքննիչ քաղաքացիական դատարանի դատավոր):

Հիշեցնենք, որ վերոնշյալ ծրագրի շրջանակում դատավորների համար նման քննարկումներ անցկացվել էին նաև ապրիլին և մայիսին:

Հունիսի 6-ին Արմենիա Մարիոթ հյուրանոցում տեղի ունեցավ «Կանանց նկատմամբ բռնության և ընտանեկան բռնության դեմ պայքարը և կանխարգելումը ՀՀ-ում» թեմայով ծրագրի մեկնարկային միջոցառումը:

Ծրագիրն իրականացվում է Եվրոպայի խորհրդի կողմից` Արդարադատության ակադեմիայի և ՀՀ ոստիկանության հետ համագործակցության շրջանակներում: Ծրագրի նպատակն է զարգացնել հիմնական շահառուների՝ իրավական ոլորտի մասնագետների կարողությունները կանանց նկատմամբ բռնության և ընտանեկան բռնության դեմ պայքարի և կանխարգելման գործընթացում:

Միջոցառմանը ողջույնի խոսքով հանդես եկան ՀՀ արդարադատության նախարար Արտակ Զեյնալյանը, Մարդու իրավունքների պաշտպան Արման Թաթոյանը, Երևանում Եվրոպայի խորհրդի գրասենյակի ղեկավար Նատալյա Վուտովան, ՀՀ ոստիկանության քրեական հետախուզության գլխավոր վարչության անչափահասների իրավունքների պաշտպանության և ընտանեկան բռնության դեմ պայքարի վարչության պետ Նելլի Դուրյանը, Արդարադատության ակադեմիայի գիտական աշխատանքի գծով պրոռեկտոր Անահիտ Մանասյանը: Բանախոսները կարևորեցին նմանատիպ միջոցառումների կազմակերպման անհրաժեշտությունը:

Ակադեմիայի գիտական աշխատանքի գծով պրոռեկտոր Անահիտ Մանասյանը ողջունեց ներկաներին և նշեց, որ օրենսդրության և իրավակիրառ պրակտիկայի զարգացման հետ կապված բոլոր գործընթացները Արդարադատության ակադեմիայի համար ունեն չափազանց կարևոր նշանակություն, քանի որ անմիջականորեն առնչվում են վերջինիս ունկնդիրների գործունեությանը: Դա, մասնավորապես, վերաբերում է կանանց նկատմամբ բռնության և ընտանեկան բռնության դեմ պայքարի և կանխարգելման հարցերին: Այս ամենը նկատի ունենալով` պրոռեկտորը կարևորեց նմանատիպ ծրագրի իրականացումը, շնորհակալություն հայտնեց ԵԽ երևանյան գրասենյակին, փորձագետներին և մասնակիցներին՝ մաղթելով հաջող ու արդյունավետ աշխատանք:

Միջոցառմանը ներկա էին դատավորներ, դատախազներ, քննիչներ, փաստաբաններ, ինչպես նաև տարբեր գերատեսչություններից հրավիրված բազմաթիվ այլ հյուրեր, որոնց մասնակցությամբ տեղի ունեցավ քննարկում՝ «Բազմագերատեսչական արդյունավետ համագործակցությունը կանանց նկատմամբ բռնության և ընտանեկան բռնության դեմ պայքարի և կանխարգելման ուղղությամբ, ի՞նչ է այն և ինչու՞ է անհրաժեշտ» թեմայով:

Միջոցառման ավարտին տեղի ունեցավ «Կանանց նկատմամբ բռնության և ընտանեկան բռնության» վերաբերյալ Եվրոպայի խորհրդի HELP առցանց ուսուցման դասընթացը հաջողությամբ ավարտած իրավական ոլորտի մասնագետների հավաստագրերի հանձնման արարողությունը:

ՌԴ դատախազության համալսարանի ռեկտոր Օքսանա Կապինուսի հրավերով Արդարադատության ակադեմիայի ռեկտոր Սերգեյ Առաքելյանը աշխատանքային այցով Մոսկվայում էր: Ռեկտորը մասնակցում էր ՌԴ դատախազության համալսարանի գիտահետազոտական ինստիտուտի 55-ամյակին նվիրված հանդիսությանը: Հոբելյանական միջոցառման շրջանակում անցկացված գիտագործնական համաժողովին Սերգեյ Առաքելյանը հանդես է եկել ողջույնի խոսքով: Ռեկտորը շնորհավորել է Համալսարանի աշխատակազմին, ունկնդիրներին և շրջանավարտներին հիշարժան հոբելյանի առթիվ և կարևորել Գիտահետազոտական ինստիտուտի դերը՝ որպես բազմաֆունկցիոնալ հաստատություն՝ համալրված բարձր որակավորում ունեցող կադրերով և ժամանակակից ուսումնամեթոդական բազայով: Ռեկտորը նաև հույս է հայտնել, որ Արդարադատության ակադեմիայի հետ համագործակցությունը կզարգանա՝ նպաստելով կրթական, գիտական և նորարարական ներուժի արդյունավետ կիրառմանը:

Ռեկտորի այցը նշանավորվել է կրթական և գիտահետազոտական գործունեության ոլորտում համագործակցության համաձայնագրի ստորագրմամբ: Մայիսի 30-ին Սերգեյ Առաքելյանը և Օքսանա Կապինուսը ստորագրել են համագործակցության համաձայնագիր՝ իրավական հիմքերի վրա դնելով Արդարադատության ակադեմիայի և ՌԴ դատախազության համալսարանի միջև համագործակցությունը:

Հունիսի 1-ին Արդարադատության ակադեմիայում անցկացվեց սեմինար-քննարկում՝ նվիրված ՀՀ քաղաքացիական դատավարության նոր օրենսգրքին: Քննարկումը կազմակերպվել էր ԵԽ «Աջակցություն Հայաստանում դատաիրավական բարեփոխումների իրականացմանը» ծրագրի կողմից՝ Արդարադատության ակադեմիայի հետ համատեղ: Ծրագրի այս մասը ֆինանսավորվում է Եվրոպական Միության կողմից՝ ԵՄ և ԵԽ «Գործընկերություն հանուն լավ կառավարման» ծրագրային ձևաչափի շրջանակում: Մասնակցում էր 30 դատական ծառայող՝ ՀՀ առաջին ատյանի ընդհանուր իրավասության դատարանների քաղաքացիական գործեր քննող դատավորների օգնականները: Բանախոսներն էին՝ Եվրոպայի Խորհրդի (ԵԽ) փորձագետներ Սերգեյ Մեղրյանը (ՀՀ Բարձրագույն դատական խորհրդի անդամ), Տարոն Նազարյանը (ՀՀ վերաքննիչ քաղաքացիական դատարանի դատավոր): Քննարկմանը ներկա էր նաև «Օրենսդրության զարգացման և իրավական հետազոտությունների կենտրոն» հիմնադրամի տնօրեն Տիգրան Մարկոսյանը:

Ակադեմիայի գիտական աշխատանքի գծով պրոռեկտոր Անահիտ Մանասյանը ողջունեց ներկաներին և նշեց, որ օրենսդրության զարգացման հետ կապված բոլոր գործընթացները Ակադեմիայի համար չափազանց կարևոր նշանակություն ունեն, որովհետև անմիջականորեն առնչվում են Ակադեմիայի ունկնդիրների գործունեությանը: Պրոռեկտորը կարևորեց նման միջոցառումների կազմակերպումը, շնորհակալություն հայտնեց ԵԽ երևանյան գրասենյակին, փորձագետներին և մասնակիցներին և հաջող ու արդյունավետ աշխատանք մաղթեց:

ԵԽ «Աջակցություն Հայաստանում դատաիրավական բարեփոխումների իրականացմանը» ծրագրի ղեկավար Նարինե Գասպարյանի խոսքով՝ ծրագրի շրջանակում կազմակերպվող այս դասընթացները նպատակ ունեն վերհանել և քննարկել ՀՀ քաղաքացիական դատավարության նոր օրենսգրքի կիրառման ընթացքում առաջացած գործնական հարցերը:

Վերոնշյալ ծրագրի շրջանակում ապրիլին և մայիսին անցկացված նման քննարկումներին մասնակցել է ՀՀ ընդհանուր իրավասության առաջին ատյանի դատարանի քաղաքացիական գործեր քննող շուրջ 60 դատավոր, իսկ այս դասընթացը դատավորների օգնականների համար էր:

Մայիսի 25-ին Արդարադատության ակադեմիա այցելեց ԵՄ առաքելության դատաիրավական բարեփոխումների խմբի ղեկավար Իվան Պանևը: Հանդիպմանը ներկա էին Ակադեմիայի գիտական աշխատանքի գծով պրոռեկտոր Անահիտ Մանասյանը, Հեռաուսուցման և ՏՏ դեպարտամենտի ղեկավար Արտաշես Խուրշուդյանը, Գիտահետազոտական և ծրագրամեթոդական աշխատանքների կազմակերպման բաժնի ղեկավար Գոհար Գևորգյանը:

Ակադեմիայի անունից Անահիտ Մանասյանը ողջունեց Իվան Պանևին և ընդգծեց ՀՀ-ում դատաիրավական բարեփոխումների ռազմավարության և գործողությունների ծրագրի շրջանակում համագործակցության կարևորությունը: Հանդիպման ընթացքում կողմերը քննարկեցին նշյալ ծրագրի շրջանակում իրականացվող առաքելության հիմնական ուղղությունները, ինչպես նաև երկկողմ հետաքրքրություն ներկայացնող հարցեր: Իվան Պանևի հարցերին ի պատասխան՝ մանրամասն ներկայացվեցին Ակադեմիայում ուսումնական գործընթացին առնչվող մի շարք հարցեր, այդ թվում՝ ուսուցման ծրագրերը, դասընթացների մշակման մեթոդաբանությունը, առարկայացանկը, ուսուցման տևողությունը և ժամանաքանակը՝ մասնագիտական պատրաստում և վերապատրաստում անցնող ունկնդիրների համար, նաև հեռաուսուցմանը վերաբերող հարցեր:

Հանդիպման ավարտին կողմերը քննարկված բոլոր հարցերի ուղղությամբ շարունակաբար համագործակցելու պատրաստակամություն հայտնեցին:

ՀՀ-ում ԱՄՆ դեսպանության «Քրեական արդարադատության բարեփոխումների» ծրագրի շրջանակում Արդարադատության ակադեմիայում դասավանդելու համար մշակվել են առարկայական նոր դասընթացներ հետևյալ թեմաներով՝ «Կոռուպցիոն դեպքերի քննությունը», «Պաշտոնական կոռուպցիայի դեպքերի քննությունը», «Ներքին ուսումնասիրություններ (քննություն)», «Կալանք և այլընտրանքային խափանման միջոցներ», «Գենդերի հիման վրա կատարվող բռնարարքների քննությունը», «Անչափահաս կամ փոքրամասնության խմբին պատկանող իրավախախտների իրավունքների պաշտպանությունը», «Ֆինանսական հանցագործություններ և եկամուտների հայտարարագրման խախտումներ՝ կապված կոռուպցիայի հետ», «Անդրազգային հանցավորության և մտավոր սեփականության դեմ ուղղված հանցագործությունների քննությունը և դրանց դեմ պայքարը», «Դատական իշխանության անկախություն և թափանցիկություն»:

Ակադեմիայում այդ դասընթացների դասավանդումը կազմակերպելու նպատակով մի քանի փուլով իրականացվելու են վերապատրաստողների վերապատրաստման դասընթացներ: Այսօր մեկնարկել է դատախազության և քննչական համակարգերից ընտրված դասավանդողների վերապատրաստումը: Առաջիկայում նախատեսվում է նաև նմանատիպ դասընթացների կազմակերպում դատավոր-դասընթացավարների համար:

Վերապատրաստման մեկնարկից առաջ Ակադեմիայի գիտական աշխատանքի գծով պրոռեկտոր Անահիտ Մանասյանը ողջունեց ներկաներին և նշեց, որ ՀՀ-ում ԱՄՆ դեսպանության հետ ունեցած համագործակցության շրջանակում և Երևանի պետական համալսարանի թիմի հետ մշակվել է 9 դասընթաց, որոնք պետք է ներդրվեն Ակադեմիայի ուսումնական ծրագրում: Դասընթացները նախատեսված են ինչպես գործող դատավորների, դատախազների, քննիչների, այնպես էլ՝ թեկնածուների համար:

ՀՀ-ում ԱՄՆ դեսպանության «Քրեական արդարադատության բարեփոխումների» ծրագրի ղեկավար Քրիստինա Աֆոյանի խոսքով՝ այս ծրագիրն իրականացվում է Թմրամիջոցների դեմ պայքարի և իրավապահ համագործակցության գրասենյակի ֆինանսավորմամբ՝ Միացյալ Նահանգների հանրային կառավարման ազգային ակադեմիայի և ԵՊՀ-ի միջև համագործակցության արդյունքում:

Վերապատրաստումը հաջողությամբ ավարտած մասնակիցները ԱՄՆ պետքարտուղարության կողմից կստանան համապատասխան վկայականներ, ինչի արդյունքում հնարավորություն կստանան նոր մշակված առարկայական կուրսերը դասավանդել Արդարադատության ակադեմիայում: