Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Սեպտեմբերի 11-ին Արդարադատության ակադեմիայում մեկնարկեց դատախազների տարեկան վերապատրաստումը:

Վերապատրաստումն անցկացվում է Ակադեմիայի կողմից մշակված համապատասխան ուսուցման ծրագրով, որն ուղղված է դատախազների մասնագիտական գիտելիքների և հմտությունների շարունակական կատարելագործմանը հատուկ մասնագիտական ոլորտում:

Նախատեսվում է վերապատրաստում անցկացնել 11 խմբի ունկնդիրների համար:

Սեպտեմբերի 8-ին Արդարադատության ակադեմիայում ռեկտոր Սերգեյ Առաքելյանը դիպլոմներ հանձնեց ՀՀ քննչական կոմիտեում ինքնավար պաշտոն զբաղեցնող անձանց (քննիչների) թեկնածությունների ցուցակում ընդգրկված 2023 թվականի 2-րդ խմբի ունկնդիրներին:

 Ռեկտորը շնորհավորեց ունկնդիրներին և շեշտեց, որ թեկնածուներն ընտրել են բարդ և պատասխանատու ուղի: «Քննիչի աշխատանքը քրեական արդարադատության հիմքն է»,-նշեց ռեկտորը՝ անփորձանք ծառայություն մաղթելով շրջանավարտներին:

Քննիչի թեկնածուների այս խմբում ընդգրկված է 19 ունկնդիր, որոնք մասնագիտական պատրաստում են անցել հունիսի 19-ից օգոստոսի 31-ը՝ համապատասխան ուսուցման ծրագրով:

Տեսանյութ - https://www.youtube.com/watch?v=qWtW_9Z3UIU

Սեպտեմբերի 7-ին Արդարադատության ակադեմիայում դատավորների համար անցկացվեց քննարկում՝ նվիրված միջազգային առևտրային արբիտրաժին:

Ակադեմիայի ռեկտոր Սերգեյ Առաքելյանը ողջունեց ներկաներին և ընդգծեց վերոնշյալ թեմայով քննարկում անցկացնելու կարևորությունը: «Մեր պետությունը զարգացած արիբրատաժային համակարգ ունենալու ավանդույթներ ձևավորելու ճանապարհին է: Արբիտրների գործունեության արդյունավետությունն անհնար է առանց դատական համակարգի հետ համագործակցության»,-նշեց ռեկտորը:

Ասիական զարգացման բանկի «Դատական համակարգի հզորացում» ծրագրի ղեկավար Ֆիոնա Կոնելը ողջունեց մասնակիցներին և շեշտեց դատավորների բացառիկ կարևոր դերը արբիտրաժային համակարգում: 

Քննարկումը վարում էին Սինգապուրից և Հոնկոնգից ժամանած դատական համակարգի ներկայացուցիչները:

Սեպտեմբերի 4-ին Արդարադատության ակադեմիայում մեկնարկեց դատավորների վերապատրաստումը: Ուսումնառության ընդհանուր ժամաքանակը յուրաքանչյուր դատավորի համար տարեկան 80 ակադեմիական ժամ է: 

Վերապատրաստումն իրականացվում է համապատասխան ուսուցման ծրագրով՝ մասնագիտական գիտելիքների և հմտությունների շարունակական զարգացման և կատարելագործման ապահովման նպատակով:

Օգոստոսի 30-ին Արդարադատության ակադեմիայի ռեկտոր Սերգեյ Առաքելյանն ընդունեց Եվրասիական տնտեսական միության (ԵԱՏՄ) դատարանի նախագահ Էռնա Հայրիյանին:

Ռեկտորը ողջունեց հյուրին և երախտագիտություն հայտնեց Ակադեմիա այցելելու, երկկողմ հետաքրքրություն ներկայացնող հարցեր քննարկելու, նաև ԵԱՏՄ դատարանի գործունեության մասին ունկնդիրների համար դասախոսությամբ հանդես գալու առաջարկն ընդունելու համար: 

Էռնա Հայրիյանը շնորհակալություն հայտնեց հրավերի համար՝ ընդգծելով նման հանդիպումների կարևորությունը: 

Ռեկտորը հրավիրեց ԵԱՏՄ դատարանի նախագահին մասնակցելու սեպտեմբերի 13-ին կայանալիք Արդարադատության ակադեմիայի 10-ամյակին նվիրված հանդիսավոր արարողությանը: Է. Հայրիյանը սիրով ընդունեց հրավերը և հավաստիացրեց, որ ԵԱՏՄ դատարանի պատվիրակությունը կմասնակցի տոնական միջոցառմանը:

Օգոստոսի 28-ին Արդարադատության ակադեմիայի պրոռեկտոր Մարգարիտ Ամյանը մասնակցության վկայականներ հանձնեց «Քրեական իրավունքի արդի հարցեր» և «Քրեական դատավարության արդի հարցեր» խորագրերով եռամսյա նախապատրաստական դասընթացներին ընդգրկված ունկնդիրներին: Վկայական ստացավ 12 ունկնդիր: 

Պրոռեկտորը շնորհավորեց ունկնդիրներին և հույս հայտնեց, որ ձեռք բերված գիտելիքները կօգնեն մասնակիցներին իրականացնել իրենց մասնագիտական նպատակները: 

Դասընթացները կազմակերպվել էին դատավորների թեկնածուների ցուցակի համապատասխան մասնագիտացման բաժինների համալրման նպատակով որակավորման ստուգման, դատախազների և քննիչների թեկնածությունների ցուցակը համալրելու նպատակով անցկացվող մրցույթներին մասնակցելու ցանկություն ունեցող անձանց համար:

 
Նշենք, որ այս պահին ընդունվում են նախապատրաստական դասընթացների հաջորդ խմբի համար ներկայացվող դիմումները: 

Օգոստոսի 24-ին Արդարադատության ակադեմիայի ռեկտոր Սերգեյ Առաքելյանը հանդիպեց ՀՀ քննչական կոմիտեում ինքնավար պաշտոն զբաղեցնող անձանց (քննիչների) թեկնածությունների 2023 թվականի ցուցակում ընդգրկված երրորդ խմբի ունկնդիրներին: 

Քննաշրջանից առաջ ռեկտորը ծանոթացրեց ունկնդիրներին քննությունների կազմակերպման և անցկացման կարգին, այդ թվում՝ արդյունքների բողոքարկման ընթացակարգին, պատասխանեց հետաքրքրող հարցերին: Ունկնդիրներից մեկն Արցախից է, ով հանդիպմանը հետևում էր տեսակապով:

Առաջին քննությունը, որն անցկացվելու է բանավոր եղանակով, սեպտեմբերի 8-ին է:

Հաշվի առնելով արձակուրդային շրջանը և դիմորդների բազմաթիվ խնդրանքները՝ դատավորների թեկնածուների ցուցակի համապատասխան մասնագիտացման բաժինների համալրման նպատակով որակավորման ստուգմանը, դատախազների և քննիչների թեկնածությունների ցուցակը համալրելու նպատակով անցկացվող մրցույթներին մասնակցելու ցանկություն ունեցող անձանց համար կազմակերպվող նախապատրաստական դասընթացների դիմումների ընդունման վերջնաժամկետը երկարաձգվում է մինչև օգոստոսի 31-ը, ժամը՝ 16:00-ն ներառյալ: Դասընթացները կմեկնարկեն սեպտեմբերի 18-ին:

Դիմումի, ուսուցման ծրագրի և այլնի վերաբերյալ մանրամասները՝ հետևյալ հղումով https://aoj.am/news/1483 

Օգոստոսի 7-ին Արդարադատության ակադեմիայում մեկնարկել է ՀՀ քննչական կոմիտեում ինքնավար պաշտոն զբաղեցնող անձանց (քննիչների) թեկնածությունների 2023 թվականի ցուցակում ընդգրկված երրորդ խմբի ունկնդիրների մասնագիտական պատրաստումը: Խմբում ընդգրկված է 23 ունկնդիր:

Ըստ ուսուցման ծրագրի՝ ունկնդիրների մասնագիտական պատրաստումը նախատեսվում է ավարտել հոկտեմբերի 18-ին:

Օգոստոսի 4-ին Արդարադատության ակադեմիայի ռեկտոր Սերգեյ Առաքելյանը հանդիպեց ՀՀ քննչական կոմիտեում ինքնավար պաշտոն զբաղեցնող անձանց (քննիչների) թեկնածությունների 2023 թվականի ցուցակում ընդգրկված երրորդ խմբի ունկնդիրներին: Խմբում ընդգրկված է 23 ունկնդիր: Նրանցից մեկը Արցախից է, ով միացել էր հանդիպմանը տեսակապի միջոցով: Ուսուցումը կազմակերպվելու է համապատասխան ուսուցման ծրագրով՝ օգոստոսի 7-ից հոկտեմբերի 18-ը:

Ռեկտորը շնորհավորեց քննիչի թեկնածուներին Ակադեմիայի ունկնդիր դառնալու կապակցությամբ և ներկայացրեց ուսումնական գործընթացի մանրամասները, պատասխանեց հետաքրքրող հարցերին: