Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Նոյեմբերի 29-ին Արդարադատության ակադեմիա այցելեցին ՀՀ-ում Նիդերլանդների Թագավորության փոխդեսպան Տիմեն Կաուվենարը և Լեյդենի համալսարանի պրոֆեսոր Նիլս Բլոքերը:

Ակադեմիայի ռեկտոր Սերգեյ Առաքելյանը ողջունեց հյուրերին, ներկայացրեց Նիդերլանդների հետ առկա համագործակցությունը և դրական արդյունքները, նաև այս տարվա հուլիսին Ակադեմիայի պատվիրակության այցը Ուտրեխտ՝ Նիդերլանդների դատական և դատախազական ուսուցման կենտրոն:

Հանդիպմանը ներկա էր Ակադեմիայի կառավարման խորհրդի անդամ, ՀՀ արդարադատության նախարարի տեղակալ Արա Մկրտչյանը, ով իր խոսքում նշեց, որ Ակադեմիան բարձր հեղինակություն և կարգավիճակ ունեցող իրավաբանական լավագույն կրթական հաստատություն է, որտեղ բազային իրավական գիտելիք ստացած մարդիկ, ովքեր ընտրում են դատավորի, դատախազի, քննիչի ճանապարհը, մասնագիտանում են, ապա կարիերայի ընթացքում ծանոթանում իրավունքի զարգացմանն ու մասնագիտական մարտահրավերներին:
Հյուրերը երախտագիտություն հայտնեցին ջերմ ընդունելության համար և քննարկեցին հնարավոր համագործակցությանն ուղղված քայլերը:

Լեյդենի համալսարանի պրոֆեսոր Նիլս Բլոքերը Ակադեմիայի ունկնդիրների և աշխատակազմի ներկայացուցիչների համար հանդես եկավ դասախոսությամբ՝ «Ագրեսիայի հանցագործություններին առնչվող նոր միջազգային տրիբունալը» թեմայով:

Հյուրերը հնարավորություն ունեցան նաև ծանոթանալ Ակադեմիայի շենքային պայմաններին:

Նոյեմբերի 27-ին Արդարադատության ակադեմիայում մեկնարկեց երկօրյա սեմինար դատավորների համար՝ «Պետական գնումների գործերի դատական վերանայում» թեմայով:

Ակադեմիայի պրոռեկտոր Մարգարիտ Ամյանը ողջունեց ներկաներին, երախտագիտություն հայտնեց միջազգային փորձագետներին արդիական թեմայով նման սեմինար անցկացնելու նախաձեռնության համար, որին ներգրավված են տարբեր ատյանների դատավորներ: Պրոռեկտորի խոսքով՝ Հայաստանում պետական գնումների բողոքների վերանայման համակարգի վերջին բարեփոխումների լույսի ներքո չափազանց կարևոր է ԵՄ անդամ երկրներում պետական գնումների բողոքների քննարկման փորձի ուսումնասիրությունը:

Սեմինարը վարում են Տնտեսական համագործակցության և զարգացման կազմակերպության (OECD) «Սիգմա» (SIGMA) ծրագրի փորձագետներ Ալեքսանդրա Մելեշկոն, Փիթեր Գյորթլերը, Սիլվիու Պոպան և Բորուտ Սմրդելը (հեռավար):

Նոյեմբերի 9-ին և 16-ին Արդարադատության ակադեմիան Եվրոպայի խորհրդի գործընկերների հետ համատեղ՝ ԵԽ «Աջակցություն Հայաստանում Մարդու իրավունքների եվրոպական դատարանի վճիռների արդյունավետ կատարմանը» ծրագրի շրջանակում անցկացրեց վերապատրաստման դասընթացներ դատավորների համար՝ նվիրված ՀՀ քրեական դատավարության նոր օրենսգրքի կիրառման գործնական խնդիրներին:

Վերապատրաստումները վարում էր Արդարադատության ակադեմիայի դասընթացավար, ԵԽ ազգային փորձագետ, ի.գ.թ., դոցենտ Հրայր Ղուկասյանը:

Վերոնշյալ ծրագիրն անցկացվում է ԵԽ Հայաստանի համար իրականացվող 2023-2026 թթ. գործողությունների ծրագրի շրջանակում:

Նոյեմբերի 8-ին Արդարադատության ակադեմիայում ռեկտոր Սերգեյ Առաքելյանը դիպլոմներ հանձնեց Վերաքննիչ դատարաններում դատավոր նշանակվելու համար առաջխաղացման ենթակա դատավորների թեկնածուների հակակոռուպցիոն մասնագիտացման բաժնի հակակոռուպցիոն քաղաքացիական գործերի քննության ենթաբաժնի ցուցակում ընդգրկված անձնանց:

Ռեկտորը շնորհավորեց ունկնդիրներին և հաջողություն մաղթեց: Շրջանավարտներն իրենց հերթին շնորհակալություն հայտնեցին Ակադեմիայի ռեկտորին և աշխատակազմին ուսումնառությունը պատշաճ կազմակերպելու և ջերմ վերաբերմունքի համար:  

Նոյեմբերի 8-ին Արդարադատության ակադեմիա այցելեցին Վանաձորի Հովհ. Թումանյանի անվան պետական համալսարանի Իրավագիտության բաժնի ուսանողները:

Ռեկտոր Սերգեյ Առաքելյանը ողջունեց ուսանողներին և նրանց նախաձեռնությունը ծանոթանալ Ակադեմիայի գործունեությանը: Ռեկտորը ներկայացրեց Ակադեմիայի գործունեության հիմնական ուղղությունները, պատասխանեց ուսանողների հարցերին, որոնք վերաբերում էին ընդունելությանը, ուսումնառության, փորձաշրջանի կազմակերպման ընթացակարգին և այլն:

Ճանաչողական այցի շրջանակում ուսանողները ծանոթացան Ակադեմիայի շենքային պայմաններին, եղան լսարաններում, դատական նիստերի դահլիճում, գրադարանում, հյուրանոցում, մարզասրահում: 

Նոյեմբերի 7-ին Արդարադատության ակադեմիայում ցուցադրվեց «Ադմիրալ Իսակով» ֆիլմը՝ նվիրված Խորհրդային Միության ռազմածովային նավատորմի ադմիրալ, ԽՍՀՄ հերոս, գիտնական, գրող Հովհաննես (Իվան) Իսակովին:

Նախքան ֆիլմի ցուցադրությունը ռեկտորն ընդունեց հյուրերին՝ ֆիլմի հեղինակ, բարերար Արթուր Սողոմոնյանին, ֆիլմի պրոդյուսեր Տիգրան Մանասյանին, Երևանում Գիտության և մշակույթի ռուսական կենտրոնի տնօրենի տեղակալ Վիկտորյա Դերիպասկոյին:

Ռեկտորը կարևորեց նման ֆիլմերի ստեղծման և հանրահռչակման անհրաժեշտությունը՝ հատկապես հայ ժողովրդի համար այս բարդ ու դժվարին օրերին: Նրա խոսքով՝ պատմության ու հերոսների արժևորումը կարևոր է՝ հանուն նոր հաղթանակների ու վերածննդի:

Արթուր Սողոմոնյանի խոսքով՝ Խորհրդային Միության հայազգի մարշալներին և ադմիրալներին նվիրված ֆիլմերի շարք են պատրաստել և շարունակաբար ցուցադրում են, քանի որ դրանք կենսագրական ֆիլմեր չեն, այլ հաջողությունների հասնելու մասին պատմություններ են, խիզախության, հայրենասիրության հրաշալի օրինակներ: Ավելին՝ դա կարևոր է վերածնվել ցանկացող ազգերի և պետությունների համար:

Նախատեսվում է դեկտեմբերի 2-ին՝ մարշալ Հովհաննես Բաղրամյանի ծննդյան օրը, Ակադեմիայում կազմակերպել նաև «Մարշալ Բաղրամյան. հաղթանակի արվեստը» ֆիլմի ցուցադրությունը:

Հյուրերը ծանոթացան նաև Ակադեմիայի շենքային պայմաններին:

Տեսանյութ - https://youtu.be/fUnCTsQ_Cm0

Նոյեմբերի 7-ին Արդարադատության ակադեմիայում անցկացվեց հիշատակի միջոցառում՝ նվիրված արցախյան 44-օրյա պատերազմում անմահացած Գևորգ Արշակյանին: Նախքան մեկնարկը, ներկաները մեկ րոպե լռությամբ հարգեցին Գևորգի և Հայրենիքի պաշտպանության համար նահատակված մեր հերոսների հիշատակը:

Ռեկտոր Սերգեյ Առաքելյանն իր խոսքում նշեց, որ Գևորգը իմացյալ մահով անմահացավ 3 տարի առաջ ճիշտ այս օրը՝ նոյեմբերի 7-ին, և այսօր ներկաների պարտքն է իրենց ամենօրյա կյանքում և գործունեության ընթացքում հիշել Գևորգին և մեր բոլոր հերոսներին ու շնորհակալ լինել նրանց ծնողներին: Ռեկտորի խոսքով՝ թեև այսօր մեր պետությունն ու հասարակությունը հեշտ ժամանակներ չի ապրում, սակայն պետք է ուժ գտնել և առաջ շարժվել՝ մեր հերոսների երազած Հայրենիքը կերտելու համար:

Գևորգի մայրը՝ դատավոր Նաիրա Հովսեփյանը, երախտագիտություն հայտնեց ռեկտորին Ակադեմիայում Գևորգի հիշատակը վառ պահելու ու նման միջոցառումներ իրականացնելու համար: Ակադեմիայում գործում է Գևորգ Արշակյանի անվան լսարան, անցկացվել է դատախաղ-մրցույթ՝ նվիրված Գևորգ Արշակյանի հիշատակին, բակում տեղադրվել է Հայրենիքի պաշտպանության համար նահատակվածների հիշատակը հավերժացնող խաչքար:

Միջոցառմանը ներկա էին Ակադեմիայի ունկնդիրները, դասընթացավարները, աշխատակազմը, հյուրեր:

Տեսանյութ - https://www.youtube.com/watch?v=JnmKTkpU5-4

Նոյեմբերի 3-ից 4-ը Ծաղկաձորում անցկացվեց վերապատրաստում դատավորների համար՝ նվիրված դատական արհեստին և դատավորի դերին: Մասնակցում էին նաև Ակադեմիայի աշխատակազմի ներկայացուցիչները: Երկօրյա վերապատրաստումը կազմակերպել էր Արդարադատության ակադեմիան Շվեդիայի Ազգային դատարանների ադմինիստրացիայի հետ համատեղ՝ «Հայաստանի դատավորների կարողությունների զարգացում՝ դատական համակարգի նկատմամբ նոր ակնկալիքներին համապատասխանելու և հանրային վստահությունն ամրապնդելու նպատակով» Շվեդիայի կառավարության կողմից ֆինանսավորող հայ-շվեդական բազմամյա ծրագրի շրջանակում:

Վերապատրաստումն անցկացնում էին դատավորներ Սուսան Ալգորդը, Մերիթ Բերյենդահլը և Սերգեյ Մարաբյանը:

Հոկտեմբերի 30-ին Արդարադատության ակադեմիայի ռեկտոր Սերգեյ Առաքելյանը մասնագիտական պատրաստումից առաջ հանդիպեց դատավորների թեկնածուների հավակնորդների (քաղաքացիական մասնագիտացմամբ) ցուցակում ընդգրկված անձանց: Խմբում ընդգրկված է 18 ունկնդիր: Մասնագիտական պատրաստումն անցկացվելու է 2023 թ. նոյեմբերի 1-ից 2024 թ. հունիսի 14-ը՝ ներառյալ փորձաշրջանը:

Ռեկտորը ողջունեց ներկաներին և շնորհավորեց Ակադեմիայի ունկնդիր դառնալու կապակցությամբ՝ մաղթելով արդյունավետ ուսումնառություն: Ռեկտորը ներկայացրեց Ակադեմիայի կառավարման խորհրդի կողմից հաստատված ուսուցման ծրագիրը, ըստ որի անցկացվելու է ունկնդիրների մասնագիտական պատրաստումը, պատասխանեց ունկնդիրներին հետաքրքրող հարցերին: 

Հոկտեմբերի 27-ին Արդարադատության ակադեմիայում ռեկտոր Սերգեյ Առաքելյանը դիպլոմներ հանձնեց վարչական մասնագիտացմամբ դատավորների թեկնածուների հավակնորդներին, ՀՀ քննչական կոմիտեում ինքնավար պաշտոն զբաղեցնող անձանց (քննիչների) թեկնածությունների և Հակակոռուպցիոն կոմիտեում ինքնավար պաշտոնների թեկնածուների ցուցակներում ընդգրկված անձանց:

Ռեկտորի առաջարկով ներկաները մեկ րոպե լռությամբ հարգեցին 1999թ. հոկտեմբերի 27-ին տեղի ունեցած ոճրագործության զոհերի հիշատակը: 

Շնորհավորելով ունկնդիրներին մասնագիտական պատրաստումը հաջողությամբ ավարտելու կապակցությամբ՝ ռեկտորն ունկնդիրներին մաղթեց խաղաղություն և արդյունավետ ծառայություն:

«Քանի դեռ դուք սովորում էիք, ձեր ստորագրությամբ մարդկային ճակատագրեր չէիք որոշում, այսուհետ դուք անմիջականորն ներգրավված եք լինելու այդ գործընթացում: Ձեր բեռն ու պատասխանատվությունը ոչ թե կրկնապատկվելու, այլ բազմապատկվելու է: Այդ ճանապարհին երբեք չմոռանաք ձեր մարդ լինելու մասին»,- նշեց Ակադեմիայի ռեկտորը:

Դատավորի թեկնածուի հավակնորդ Հովհաննես Մալխասյանը խմբի անունից երախտագիտություն հայտնեց Ակադեմիայի աշխատակազմին գործադրած ջանքերի համար և վստահեցրեց, որ ստացած գիտելիքներն ու փորձը հիմք են հանդիսանալու արդյունավետ և բեղուն գործունեություն ծավալելու համար: 

Տեսանյութ - https://youtu.be/QndTwAC7f7Q