Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Հունվարի 31-ին Արդարադատության ակադեմիա այցելեցին ՀՀ-ում Ռուսաստանի Դաշնության արտակարգ և լիազոր դեսպան Սերգեյ Կոպիրկինը, դեսպանության առաջին քարտուղար Մարիա Կորոտինան, Երևանում Գիտության և մշակույթի ռուսական կենտրոնի տնօրենի տեղակալ Վիկտորյա Դերիպասկոն:

Ռեկտոր Սերգեյ Առաքելյանը ողջունեց հյուրերին, կարևորեց հայ-ռուսական բարեկամությունն ու արդունավետ համագործակցությունը տարբեր ոլորտներում: Ռեկտորը ափսոսանք հայտնեց և դատապարտեց Երևանում նախօրեին տեղի ունեցած միջադեպի՝ Պաշարված Լենինգրադի երեխաների հուշարձանը պղծելու առնչությամբ: 

Ռեկտորը ներկայացրեց Ակադեմիայի գործունեության հիմնական ուղղությունները, անդրադարձավ մասնագիտական պատրաստմանն ու վերապատրաստմանը, միջազգային համագործակցությանը, նաև կարևորեց Ակադեմիայի՝ ՌԴ արդարադատության պետական համալսարանի և ՌԴ դատախազության համալսարանի հետ առկա համագործակցությունը՝ ստորագրված հուշագրերի հիմքով: Ռեկտորն առաջարկներ ներկայացրեց համագործակցությունը զարգացնելու ուղղությամբ՝ դասընթացավարների և ունկնդիրների փոխանակման ծրագրերի կազմակերպում, անվանի գիտնականների և փորձագետների ներգրավում, հեռաուսուցման համատեղ դասընթացի մշակում և այլն:

Դեսպան Կոպիրկինը պատրաստակամություն հայտնեց խորացնել և արդիականացնել առկա համագործակցությունը՝ հաշվի առնելով ժամանակակից միտումները:

Հյուրերը ծանոթացան նաև Ակադեմիայի շենքային պայմաններին, շրջեցին լսարաններով, եղան դատական նիստերի դահլիճում, գրադարանում, հյուրանոցում:

Հունվարի 31-ին Արդարադատության ակադեմիայի ռեկտոր Սերգեյ Առաքելյանն ընդունեց ՀՀ-ում Ֆրանսիայի դեսպանության առաջին խորհրդական Քրիստոֆ Քացախյանին:

Ռեկտորը ողջունեց հյուրին և ներկայացրեց Ակադեմիայի գործունեության հիմնական ուղղությունները, ուսումնական գործընթացին առնչվող մանրամասներ, նաև խոսեց 2022թ.-ին Ֆրանսիայի ազգային դատական դպրոց կատարած այցի և հնարավոր համագործակցությունը խորացնելու հնարավորության մասին:

Հանդիպման ընթացքում քննարկվեցին երկկողմ համագործակցությանն  առնչվող հարցեր, այդ թվում՝ Ակադեմիայի ունկնդիրների համար դասախոսությունների կազմակերպում Ֆրանսիայից համապատասխան փորձագետների կողմից:

Ք. Քացախյանը նաև շրջեց Ակադեմիայում, ծանոթացավ շենքային պայմաններին և ուրախությամբ նշեց, որ առաջին անգամ է Ակադեմիայում և չափազանց տպավորված է:

Հաշվի առնելով դիմորդների բազմաթիվ խնդրանքները՝ դատավորների թեկնածուների ցուցակի համապատասխան մասնագիտացման բաժինների համալրման նպատակով որակավորման ստուգմանը, դատախազների և քննիչների թեկնածությունների ցուցակը համալրելու նպատակով անցկացվող մրցույթներին մասնակցելու ցանկություն ունեցող անձանց համար կազմակերպվող նախապատրաստական դասընթացների դիմումների ընդունման վերջնաժամկետը երկարաձգվում է մինչև փետրվարի 15-ը, ժամը՝ 17:00-ն ներառյալ: Դասընթացները կմեկնարկեն փետրվարի 19-ին:

Դիմումի, ուսուցման ծրագրի և այլնի վերաբերյալ մանրամասները՝ հետևյալ հղումով https://aoj.am/news/1523

ՀՀ հակակոռուպցիոն կոմիտեի նախագահի տեղակալ, Արդարադատության ակադեմիայի խորհրդի անդամ Մուշեղ Բաբայանը Ակադեմիայի խորհրդի տարեսկզբյան նիստում ընտրվել է Խորհրդի նախագահ՝ 1 տարի ժամկետով:

Նիստը տեղի է ունեցել հունվարի 24-ին: Ակադեմիայի խորհրդի անդամները գաղտնի քվեարկությամբ ռոտացիոն կարգով ընտրել են նոր նախագահին: Մուշեղ Բաբայանը նախկինում եղել է ՀՀ ոստիկանության կրթահամալիրի պետը:

Խորհրդի ուշադրությանն է ներկայացվել Ակադեմիայի 10-ամյա գործունեությանը նվիրված տեսաֆիլմը կառույցի ձեռքբերումների մասին:

Ակադեմիայի ռեկտոր Սերգեյ Առաքելյանի ներկայացմամբ՝ խորհուրդը քննարկել եւ միաձայն ընդունել է 2023 թ.-ի գործունեության հաշվետվությունը, հաստատել 2024 թ-ի եկամուտների եւ ծախսերի նախահաշիվը:

Հակակոռուպցիոն կոմիտեում ինքնավար պաշտոնների թեկնածուների ցուցակում ընդգրկված անձանց մասնագիտական պատրաստման 2024թ. ուսուցման ծրագիրը նույնպես հաստատվել է:  

Հունվարի 15-ին մեկնարկեց Հակակոռուպցիոն դատարանի դատավորների թեկնածուների հավակնորդների  ցուցակում ընդգրկված անձանց  մասնագիտական պատրաստումը:

Ուսումնառությունն անցկացվում է համապատասխան ուսուցման ծրագրով և ըստ մասնագիտացումների՝ քաղաքացիաիրավական և քրեաիրավական: Ծրագիրն իրականացվում է լսարանային ուսուցման և փորձաշրջանի եղանակներով: Ուսումնառությունը նախատեսվում է ավարտել մարտի 1-ին:

Հունվարի 15-ին Արդարադատության ակադեմիայում մեկնարկեց ՀՀ հակակոռուպցիոն կոմիտեում ինքնավար պաշտոն զբաղեցնող անձանց վերապատրաստումը:

Ուսուցման ծրագրի համաձայն՝ ունկնդիրների վերապատրաստումն իրականացվում է երկու խմբով՝ 60 ակադեմիական ժամ ծավալով։ Ուսումնառության տևողությունը 2 շաբաթ է:

Հունվարի 15-ին Արդարադատության ակադեմիայում մեկնարկեց ՀՀ քննչական կոմիտեում ինքնավար պաշտոն զբաղեցնող անձանց (քննիչների) թեկնածությունների 2024 թվականի ցուցակում ընդգրկված ունկնդիրների մասնագիտական պատրաստումը: Խմբում ընդգրկված է 23 ունկնդիր:

Ուսումնառության ընդհանուր տևողությունը 104 ակադեմիական ժամ է, ևս 6 ակադեմիական ժամ նախատեսված է քննաշրջանի համար, ինչպես նաև մեկ ամիս տևողությամբ փորձաշրջան: Ըստ ուսուցման ծրագրի՝ քննիչի թեկնածուների մասնագիտական պատրաստումը նախատեսվում է ավարտել մարտի 22-ին:

Հունվարի 12-ին Արդարադատության ակադեմիայի ռեկտոր Սերգեյ Առաքելյանը հանդիպեց ՀՀ քննչական կոմիտեում ինքնավար պաշտոն զբաղեցնող անձանց (քննիչների) թեկնածությունների 2024 թվականի ցուցակում ընդգրկված ունկնդիրներին: Խմբում ընդգրկված է 23 ունկնդիր:

Ռեկտորը շնորհավորեց քննիչի թեկնածուներին Ակադեմիայի ունկնդիր դառնալու կապակցությամբ, հաջող ուսումնառություն մաղթեց և ներկայացրեց ուսուցման գործընթացին առնչվող մանրամասներ, պատասխանեց հուզող հարցերին:

Մասնագիտական պատրաստումը, որ անցկացվելու է համապատասխան ուսուցման ծրագրով, մեկնարկելու է հունվարի 15-ին և նախատեսվում է ավարտել մարտի 22-ին:

Հունվարի 8-ին Արդարադատության ակադեմիայի պրոռեկտոր Մարգարիտ Ամյանը մասնակցության վկայականներ հանձնեց «Քրեական իրավունքի արդի հարցեր» և «Քրեական դատավարության արդի հարցեր» խորագրերով եռամսյա նախապատրաստական դասընթացներին ընդգրկված ունկնդիրներին:

Պրոռեկտորը շնորհավորեց ունկնդիրներին և հույս հայտնեց, որ ձեռք բերված գիտելիքները կօգնեն մասնակիցներին իրագործել իրենց մասնագիտական նպատակները: 

Դասընթացները կազմակերպվել էին դատավորների թեկնածուների ցուցակի համապատասխան մասնագիտացման բաժինների համալրման նպատակով որակավորման ստուգման, դատախազների և քննիչների թեկնածությունների ցուցակը համալրելու նպատակով անցկացվող մրցույթներին մասնակցելու ցանկություն ունեցող անձանց համար:

Նշենք նաև, որ այս պահին ընդունվում են նախապատրաստական դասընթացների հաջորդ խմբի համար ներկայացվող դիմումները: Դասընթացները կմեկնարկեն փետրվարի 1-ին:

Դեկտեմբերի 28-ին Արդարադատության ակադեմիայում անցկացվեց Ակադեմիայի կառավարման խորհրդի տարեվերջյան նիստը՝ Խորհրդի նախագահ Արսեն Այվազյանի գլխավորությամբ: Նիստին ներկա էր Ակադեմիայի ռեկտոր Սերգեյ Առաքելյանը:

Օրակարգի հաստատումից հետո Խորհուրդն անցավ հարցերի քննարկմանը: Ի թիվս այլ հարցերի՝ ներկայացվեցին Ակադեմիայի 2022 թվականի ֆինանսական հաշվետվությունների արժանահավատության անկախ վերստուգման (աուդիտի) արդյունքները, ինչը Խորհուրդն ընդունեց ի գիտություն:

Խորհուրդը հաստատեց Հակակոռուպցիոն դատարանի դատավորների թեկնածուների հավակնորդների 2023 թվականի ցուցակում ընդգրկված անձնանց մասնագիտական պատրաստման ուսուցման ծրագիրը: