Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Մարտի 19-ին Արդարադատության ակադեմիայում ռեկտոր Սերգեյ Առաքելյանը դիպլոմներ հանձնեց Հակակոռուպցիոն դատարանի դատավորների թեկնածուների հավակնորդների և Հակակոռուպցիոն կոմիտեում ինքնավար պաշտոն զբաղեցնող անձանց (քննիչների) թեկնածությունների 2024 թ. ցուցակում ընդգրկված անձանց: Դիպլոմներ ստացան Ակադեմիայի 6 ունկնդիրներ: 

Ակադեմիայի ռեկտոր Սերգեյ Առաքելյանը շնորհավորեց շրջանավարտներին մասնագիտական պատրաստումն ավարտելու կապակցությամբ. «Հարգելի ունկնդիրներ, խնդրում և միաժամանակ պահանջում եմ ձեր մասնագիտական գործառույթներն իրականացնելիս բարձր պահել Ակադեմիայի պատիվը», - նշեց պարոն Առաքելյանը՝ անդրադառնալով ևս մեկ կարևոր հանգամանքի, այն է՝ սիրած մասնագիտությամբ, սիրած գործով սիրով զբաղվելը երջանկության բաղադրիչներից է և այդ առումով շատ կարևոր է որևէ պարագայում հիասթափություն չունենալ կատարած ընտրությունից:

Տեսանյութ - https://youtu.be/Hf2lRtKVY0U

Մարտի 18-ին Արդարադատության ակադեմիա այցելեցին ՀՀ-ում ԱՄՆ պետքարտուղարության ԹՊԻՀ Եվրասիական թիմի ղեկավար Մարի Քուրթը, ԱՄՆ դեսպանատան ԹՊԻՀ հայաստանյան գրասենյակի տնօրեն Ալեքսիս Հաֆթվանին, ԹՊԻՀ «Քրեական արդարադատության բարեփոխումների» ծրագրի ղեկավար Քրիստինա Աֆոյանը, Արևելք-Արևմուտք Կառավարման Ինստիտուտի փոխնախագահ Նիկոլաս Մենսֆիլդը, Արևելք-Արևմուտք Կառավարման Ինստիտուտի երկրի կոորդինատոր Սերգո Կավտարաձեն:

Հանդիպման ընթացքում ռեկտոր Սերգեյ Առաքելյանը ներկայացրեց Ակադեմիայի գործունեության հիմնական ուղղությունները, բարձր գնահատեց ՀՀ-ում ԱՄՆ դեսպանության մեծ աջակցությունը, որը հետագայում ևս հնարավորություն կտա գտնելու համագործակցության փոխշահավետ նոր ուղիներ: 

Ռեկտորը նաև անդրադարձավ մինչ այս համատեղ իրականացված ծրագրերին, պատասխանեց հյուրերին հետաքրքրող մի շարք հարցերի:

Հյուրերն իրենց հերթին շնորհակալություն հայտնեցին ջերմ ընդունելության համար՝ հույս հայտնելով, որ նոր մեկնարկող ծրագրի շրջանակներում համագործակցությունը ևս կլինի արգասաբեր:

 Հյուրերը նաև շրջեցին Ակադեմիայում, եղան լսարաններում, այցելեցին դատական նիստերի դահլիճ, գրադարան, մարզասրահ, հյուրանոց, ինչպես նաև «Հայ-ամերիկյան բարեկամության նախասրահ», որն ամբողջությամբ նորոգվել, կահավորվել և տեխնիկապես վերազինվել է ՀՀ-ում ԱՄՆ դեսպանության ֆինանսական աջակցությամբ:

Մարտի 13-15-ը Արդարադատության ակադեմիայում մեկնարկեցին Նյուրնբերգյան սկզբունքների միջազգային ակադեմիայի ներկայացուցիչների կողմից կազմակերպված «Միջազգային իրավունքի զարգացումը Հայաստանի Հանրապետությունում» խորագրով եռօրյա դասընթացները՝ նախատեսված դատախազների, քննիչների և այլ իրավաբան մասնագետների համար:

Դասընթացները վարում էին Նյուրնբերգյան սկզբունքների միջազգային ակադեմիայի տնօրեն պրոֆեսոր դոկտոր Քրիստոֆ Զաֆերլինգը, Նյուրնբերգյան սկզբունքների միջազգային ակադեմիայի վերապատրաստման և կարողությունների զարգացման գծով ավագ աշխատակից Դառլին Սեդան, Նյուրնբերգյան սկզբունքների միջազգային ակադեմիայի ավագ սպա Կիրան Մոհանդաս Մենոնը, ինչպես նաև Միջազգային քրեական հետաքննությունների ինստիտուտի գործադիր տնօրեն Ֆիլիպ Թրյուհիթը և Միջազգային քրեական դատարանի դատախազության դատախազ Ալեքսիս Դեմիրճյանը:

Դասընթացների ավարտին ունկնդիրները ստացան մասնակցության վկայականներ:

Մարտի 14-ին Արդարադատության ակադեմիայի ռեկտոր Սերգեյ Առաքելյանը հանդիպեց ՀՀ քննչական կոմիտեում ինքնավար պաշտոն զբաղեցնող անձանց (քննիչների) թեկնածությունների 2024 թվականի ցուցակում ընդգրկված ունկնդիրների երկրորդ խմբին: Խմբում ընդգրկված է 28 ունկնդիր:

Ռեկտորը շնորհավորեց քննիչի թեկնածուներին Ակադեմիայի ունկնդիր դառնալու կապակցությամբ, ներկայացրեց ուսուցման գործընթացի մանրամասները և պատասխանեց հուզող հարցերին:

Մասնագիտական պատրաստումը, որ անցկացվելու է համապատասխան ուսուցման ծրագրով, մեկնարկելու է մարտի 18-ին և նախատեսվում է ավարտել մայիսի 29-ին:

Փետրվարի 28-ին, մարտի 7-ին և մարտի 14-ին Արդարադատության ակադեմիայում կազմակերպվել են «Մարդկանց թրաֆիքինգի կամ շահագործման վերաբերյալ քրեական վարույթներով զոհակենտրոն մոտեցումների և զոհակենտրոն քննության ապահովմանն ուղղված» մոդուլով վերապատրաստման դասընթացներ:

Միջոցառումը կազմակերպվել է Ակադեմիայի կողմից՝ ԱՄՆ պետդեպարտամենտի ֆինանսավորմամբ՝ «Վորլդ Վիժն Ինթերնեյշընլ» միջազգային բարեգործական կազմակերպության հայաստանյան մասնաճյուղի կողմից իրականացվող «Միասին ընդդեմ մարդկանց թրաֆիքինգի» ծրագրի շրջանակում: Վերապատրաստվել են ՀՀ ՆԳՆ ոստիկանության թվով 60 աշխատակիցներ:

Վերապատրաստումը վարում էին ՀՀ գլխավոր դատախազության մարդու դեմ ուղղված հանցագործությունների գործերով վարչության պետի տեղակալ Շուշանիկ Իսրայելյանը և ՀՀ գլխավոր դատախազության մարդու դեմ ուղղված հանցագործությունների գործերով վարչության ավագ դատախազ Տիգրան Պողոսյանը:

Մարտի 13-ին Արդարադատության Ակադեմիա այցելեցին Նյուրնբերգյան սկզբունքների միջազգային ակադեմիայի տնօրեն պրոֆեսոր դոկտոր Քրիստոֆ Զաֆերլինգը, Նյուրնբերգյան սկզբունքների միջազգային ակադեմիայի վերապատրաստման և կարողությունների զարգացման գծով ավագ աշխատակից Դառլին Սեդան և Նյուրնբերգյան սկզբունքների միջազգային ակադեմիայի ավագ սպա Կիրան Մոհանդաս Մենոնը:

Ռեկտոր Սերգեյ Առաքելյանը ողջունեց հյուրերին, ներկայացրեց Ակադեմիայի գործունեության հիմնական ուղղությունները, պատասխանեց հետաքրքրող հարցերին, անդրադարձավ միջազգային համագործակցությանը: Հանդիպման ընթացքում քննարկվեցին երկկողմ համագործակցությանն առնչվող հարցեր: Հյուրերը կարևորեցին երկկողմ արդյունավետ համագործակցությունը և անդրադարձան  այցի հիմնական նպատակին, այն է՝ «Միջազգային քրեական իրավունքի զարգացումը Հայաստանի Հանրապետությունում» խորագրով եռօրյա դասընթացներին, որը նախատեսված է  քննիչների, դատախազների և այլ իրավաբան մասնագետների համար:

Հյուրերը ծանոթացան նաև Ակադեմիայի շենքային պայմաններին, շրջեցին լսարաններով, եղան դատական նիստերի դահլիճում, գրադարանում,մարզասենյակում և հյուրանոցում:

Մարտի 4-ին Արդարադատության ակադեմիայի պրոռեկտոր Մարգարիտ Ամյանն ընդունեց Ռաուլ Վալլենբերգի անվան մարդու իրավունքների և մարդասիրական իրավունքի ինստիտուտի հայաստանյան գրասենյակի տնօրեն Հաննա Ջոնսոնին: Հանդիպմանը քննարկվեցին համատեղ իրականացվող ծրագրերի ընթացքը և հետագա քայլերը: Տիկին Ջոնսոնը ներկայացրեց Արդարադատության ակադեմիայի համար միջազգային և ներպետական փորձագետների  կողմից համատեղ մշակված «Մինչդատական քրեական վարույթի ընթացքում մարդու իրավունքների պաշտպանություն» խորագրով ուսումնական ձեռնարկի նախնական տարբերակը,որի հիման վրա առաջիկայում նախատեսվում է կազմակերպել  դասընթացավարների  վերապատրաստում: (TOT)

Հանդիպման ընթացքում քննարկվեցին նաև կազմակերպչական բնույթի մի շարք հարցեր:

Այսօր՝ փետրվարի 19-ին, Արդարադատության ակադեմիայի պրոռեկտոր Մարգարիտ Ամյանը գրքի տոնի կապակցությամբ խորհրդանշական գրքեր նվիրեց Ակադեմիայի ունկնդիրներին՝ հույս հայտնելով, որ գրականությունը կհետաքրքրի ընթերցողներին և  օգտակար կլինի մասնագիտական գործունեության համար, իսկ ներկայիս իրականության մեջ կշարունակվի բարձր գնահատվել գրքի դերն ու նշանակությունը:

Փետրվարի 14-ին և 15-ին Արդարադատության ակադեմիայում անցկացվեցին վերապատրաստման դասընթացներ՝ նվիրված դատական արհեստին և դատավորի դերին: Այն իրականացվեց Ակադեմիայի և Շվեդիայի ազգային դատարանների վարչության հետ համատեղ՝ «Հայաստանի դատավորների կարողությունների զարգացում` դատական համակարգի նկատմամբ նոր ակնկալիքներին համապատասխանելու և հանրային վստահությունն ամրապնդելու նպատակով» ծրագրի շրջանակում:

Ողջույնի խոսքով հանդես եկավ Ակադեմիայի պրոռեկտոր Մարգարիտ Ամյանը և ընդգծեց դատավորի դերի, արհեստի, հմտությունների և պատշաճ վարքագծի կարևորությունը ժամանակակից հասարակության մեջ:

Վերապատրաստման դասընթացները, որոնք նախատեսված էին քաղաքացիական մասնագիտացմամբ  դատավորների թեկնածուների հավակնորդների համար, վարում էին Շվեդիայից ժամանած քրեական և քաղաքացիական դատարանների դատավորներ Էլիզաբեթ Վասս Լոֆսթեդը և Էրիկ Հավելիուսը, ինչպես նաև ՀՀ Վճռաբեկ դատարանի հակակոռուպցիոն պալատի դատավոր Սերգեյ Մարաբյանը: 

Հունվարի 31-ին Արդարադատության ակադեմիա այցելեցին ՀՀ-ում Ռուսաստանի Դաշնության արտակարգ և լիազոր դեսպան Սերգեյ Կոպիրկինը, դեսպանության առաջին քարտուղար Մարիա Կորոտինան, Երևանում Գիտության և մշակույթի ռուսական կենտրոնի տնօրենի տեղակալ Վիկտորյա Դերիպասկոն:

Ռեկտոր Սերգեյ Առաքելյանը ողջունեց հյուրերին, կարևորեց հայ-ռուսական բարեկամությունն ու արդունավետ համագործակցությունը տարբեր ոլորտներում: Ռեկտորը ափսոսանք հայտնեց և դատապարտեց Երևանում նախօրեին տեղի ունեցած միջադեպի՝ Պաշարված Լենինգրադի երեխաների հուշարձանը պղծելու առնչությամբ: 

Ռեկտորը ներկայացրեց Ակադեմիայի գործունեության հիմնական ուղղությունները, անդրադարձավ մասնագիտական պատրաստմանն ու վերապատրաստմանը, միջազգային համագործակցությանը, նաև կարևորեց Ակադեմիայի՝ ՌԴ արդարադատության պետական համալսարանի և ՌԴ դատախազության համալսարանի հետ առկա համագործակցությունը՝ ստորագրված հուշագրերի հիմքով: Ռեկտորն առաջարկներ ներկայացրեց համագործակցությունը զարգացնելու ուղղությամբ՝ դասընթացավարների և ունկնդիրների փոխանակման ծրագրերի կազմակերպում, անվանի գիտնականների և փորձագետների ներգրավում, հեռաուսուցման համատեղ դասընթացի մշակում և այլն:

Դեսպան Կոպիրկինը պատրաստակամություն հայտնեց խորացնել և արդիականացնել առկա համագործակցությունը՝ հաշվի առնելով ժամանակակից միտումները:

Հյուրերը ծանոթացան նաև Ակադեմիայի շենքային պայմաններին, շրջեցին լսարաններով, եղան դատական նիստերի դահլիճում, գրադարանում, հյուրանոցում: