Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Նոյեմբերի 16-ին Արդարադատության ակադեմիան հյուրընկալեց ԵՊՀ իրավագիտության ֆակուլտետի ուսանողներին: Նախաձեռնությունը Իրավագիտության ֆակուլտետի ուսանողական գիտական ընկերությանն էր: Ուսանողները ցանկություն էին հայտնել այցելել Արդարադատության ակադեմիա, հանդիպել ակադեմիայի ռեկտոր, իրավաբանական գիտությունների դոկտոր, պրոֆեսոր Սերգեյ Առաքելյանին:

Հանդիպումն անցավ անկաշկանդ մթնոլորտում՝ հարց ու պատասխանի ձևաչափով: Ուսանողները ռեկտորին դիմեցին ակադեմիայի գործունեությանն առնչվող իրենց հետաքրքրող բազմաթիվ հարցերով:

Ռեկտոր Սերգեյ Առաքելյանն ողջունեց ապագա իրավաբաններին և հույս հայտնեց, որ նրանց շարքերում են մեր երկրի ապագա դատավորները, դատախազները, քննիչները:

Ովքեր են Արդարադատության ակադեմիայի դասընթացավարները և ինչ սկզբունքով են նրանք ընտրվում, ինչ էական տարբերություններ կան բուհական և ակադեմիական կրթական համակարգերի միջև, ինչպես են մշակվում ուսուցման պլաններն ու առարկայական ծրագրերը, ինչպես է կազմակերպվում թեկնածուների պրակտիկան, ինչպիսին է շրջանավարտների նշանակման կարգը. այս և բազմաթիվ այլ հարցեր էին հետաքրքրում ուսանողներին:

Հարցերին ի պատասխան՝ ռեկտորը ներկայացրեց Արդարադատության ակադեմիա ընդունվելու կարգը՝ մասնավորապես դատավորների, դատախազների, քննիչների թեկնածությունների ցուցակներում ընդգրկվելու ընթացակարգերը: Ռեկտորը անդրադարձավ նաև ակադեմիայում մասնագիտական պատրաստմանն առնչվող մի շարք հարցերի:

Այցի ավարտին ԵՊՀ ուսանողները երախտագիտություն հայտնեցին հետաքրքիր հանդիպման համար:

Նոյեմբերի 12-ին Արդարադատության ակադեմիայի և ՀՀ կենտրոնական բանկի ֆինանսական դիտարկումների կենտրոնի միջև կնքվեց համագործակցության մասին փոխըմբռնման համաձայնագիր, որը ստորագրեցին Արդարադատության ակադեմիայի ռեկտոր Սերգեյ Առաքելյանը և ԿԲ ֆինանսական դիտարկումների կենտրոնի ղեկավար Դանիել Ազատյանը:

Համաձայնագիրն ամրագրեց փոխադարձ հետաքրքրություն ներկայացնող ոլորտներում համագործակցելու ցանկությունը: Մասնավորապես՝ փաստաթղթի նպատակն է փողերի լվացման և ահաբեկչության ֆինանսավորման դեմ պայքարում ընդգրկված՝ Արդարադատության ակադեմիայի ունկնդիրների մասնագիտական պատրաստվածության կատարելագործումը:

Համագործակցությունը ենթադրում է ակադեմիայի ուսումնական ծրագրերում փողերի լվացման և ահաբեկչության ֆինանսավորման դեմ պայքարի միջազգային-իրավական փաստաթղթերի և ներպետական օրենսդրության վերաբերյալ դասընթացների առարկայական ծրագրերի կազմում, համապատասխան նյութերի մշակում:
Ֆինանսական դիտարկումների կենտրոնի հետ համագործակցության արդյունքում նախատեսվում է նաև մշակել և կազմակերպել հեռաուսուցման դասընթացներ, իրականացնել հետազոտություններ ընդհանուր հետաքրքրություն ներկայացնող ոլորտներում:

Նոյեմբերի 12-ին ՀՀ կենտրոնական բանկի ֆինանսական դիտարկումների կենտրոնը Արդարադատության ակադեմիայի հետ համատեղ անցկացրեց <<Փողերի լվացման գործերի քննությունը>> թեմայով կոնֆերանս: Այն վարում էին Արդարադատության ակադեմիայի ռեկտոր Սերգեյ Առաքելյանը և ԿԲ ֆինանսական դիտարկումների կենտրոնի ղեկավար Դանիել Ազատյանը:
Կոնֆերանսին մասնակցում էին ներկայացուցիչներ ՀՀ դատական համակարգից, ՀՀ գլխավոր դատախազությունից, ՀՀ ազգային անվտանգության ծառայությունից, ՀՀ քննչական կոմիտեից, ՀՀ հատուկ քննչական ծառայությունից, ՀՀ ոստիկանությունից, ՀՀ-ում Ինտերպոլի ազգային կենտրոնական բյուրոյից, ՀՀ պետեկամուտների կոմիտեից, ՀՀ ԿԲ ֆինանսական դիտարկումների կենտրոնից, ՀՀ դատական դեպարտամենտից:
Կոնֆերանսի մեկնարկը տրվեց Արդարադատության ակադեմիայի և ՀՀ կենտրոնական բանկի ֆինանսական դիտարկումների կենտրոնի միջև համագործակցության մասին փոխըմբռնման համաձայնագրի ստորագրման արարողությամբ: 

Ողջունելով կոնֆերանսի մասնակիցներին՝ Դանիել Ազատյանը կարևորեց նման քննարկումներ անցկացնելու փաստը՝ միաժամանակ ընդգծելով, որ Արդարադատության ակադեմիայի և Ֆինանսական դիտարկումների կենտրոնի միջև ստորագրված համագործակցության հուշագիրը կարևոր քայլ է փողերի լվացման դեմ պայքարի արդյունավետության ուղղությամբ:

Արդարադատության ակադեմիայի ռեկտոր Սերգեյ Առաքելյանը նշեց, որ փողերի լվացման դեմ պայքարը լուրջ խնդիր է, և այդ պայքարի ուղղությամբ ցանկացած նախաձեռնություն, որը կնպաստի պայքարի արդյունավետության բարձրացմանը չափազանց կարևոր է և հրատապ: <<Լիահույս եմ, որ մեր այս համագործակցության շրջանակներում այսօր կազմակերպված և հետագայում կազմակերպվելիք տարբեր տեսակի միջոցառումները զգալի ավանդ կլինեն այդ գործում>>,-նշեց ռեկտորը՝ հավաստիացնելով, որ հաշվի առնելով այդ ոլորտում առկա մասնագիտական գիտելիքի պակասը՝ առաջիկայում նախատեսվում է ակադեմիայի ուսումնական ծրագրերում ներառել փողերի լվացման դեմ պայքարի վերաբերյալ դասընթացներ:

Կոնֆերանսի ընթացքում ներկաները քննարկեցին փողերի լվացման գործերի քննության վերաբերյալ մի շարք հարցեր: Մասնակիցները նաև մտքեր փոխանակեցին օրենսդրական և գործնական խոչընդոտների վերաբերյալ, վերլուծեցին փողերի լվացման գործերով կայացված որոշակի դատական ակտեր ինչպես հայաստանյան, այնպես էլ միջազգային փորձի օրինակներով:

Հոկտեմբերի 27-28-ը Արդարադատության ակադեմիայի պատվիրակությունն այցելեց Պորտուգալիայի դատական ուսումնառության կենտրոն: Պատվիրակության կազմում ընդգրկված էին Ակադեմիայի կառավարման խորհրդի նախագահ Երվանդ Խունդկարյանը, խորհրդի անդամ Րաֆֆի Ասլանյանը, ռեկտոր Սերգեյ Առաքելյանը, պրոռեկտոր Էմիլ Ամիրխանյանը, Հեռաուսուցման վարչության պետ Արտաշես Խուրշուդյանը, Գիտահետազոտական վարչության առաջատար մասնագետ Արմիդա Ոսկանյանը:

Երկօրյա այցի ընթացքում ակադեմիայի պատվիրակության անդամները հանդիպել են Պորտուգալիայի դատական ուսումնառության կենտրոնի տնօրեն, Պորտուգալիայի Գերագույն դատարանի դատավոր Ժուաու Մանուել դա Սիլվա Միգելի, Կենտրոնի միջազգային հարաբերությունների բաժնի համակարգող, ավագ դատախազ Հելենա Լեյտաուի, Շարունակական ուսուցման տարածքային համակարգող, ավագ դատախազ Ժորժ Դիաս Դուարտեի, Վերապատրաստման բաժնի համակարգող, ավագ դատավոր Էդգար Լոպեզի հետ: Հանդիպումների ընթացքում քննարկվել են երկու կառույցների գործունեությանն առնչվող մի շարք հարցեր, մասնավորապես՝ ներկայացվել է դատավորների և դատախազների թեկնածությունների ցուցակներ կազմելու Պորտուգալիայի փորձը՝ հրապարակային մրցույթի անցկացումից մինչև ընդունելության ընթացակարգը, ինչպես նաև կազմակերպվող դասընթացները, փորձաշրջանի անցկացումը:

Արդարադատության ակադեմիայի պատվիրակության անդամները ծանոթացել են նաև Պորտուգալիայի դատավորների և դատախազների վերապատրաստման համակարգի առանձնահատկություններին՝ ուսուցման մեթոդաբանությանը, ուսումնամեթոդական նյութերին, հեռաուսուցման հնարավորություններին և այլն:

Հանդիպման մասնակիցները քննարկել են համագործակցությանն առնչվող հարցեր, առավելապես՝ ինչպես կարող է Պորտուգալիայի դատական ուսումնառության կենտրոնի փորձն օգտակար լինել Արդարադատության ակադեմիայի համար:

Աշխատանքային երկօրյա այցն իրականացվել է Եվրոպական միության և Եվրոպայի խորհրդի <<Հայաստանի արդարադատության համակարգի անկախության, պրոֆեսիոնալիզմի և հաշվետվողականության ամրապնդումը>> համատեղ ծրագրի շրջանակում:

Հոկտեմբերի 24-ից 25-ը Մոլդովայի մայրաքաղաք Քիշնևում անցկացվեց <<Դատական համակարգի կարողություների զարգացման շրջանակում կանանց մատչելիությունն արդարադատության ոլորտում>> տարածաշրջանային համաժողովը, որին մասնակցում էին Արևելյան գործընկերության 5 երկրների՝ Հայաստանի, Վրաստանի, Ադրբեջանի, Ուկրաինայի և Մոլդովայի պատվիրակությունները, որոնց կազմում ընդգրկված էին արդարադատության ոլորտում կրթական գործունեություն իրականացնող կառույցների, դատական և դատախազական համակարգերի ներկայացուցիչներ: Համաժողովին հրավիրված էին նաև Եվրոպայի խորհրդի անդամ երկրների փորձագետներ: 

Հայաստանի Հանրապետությունից երկօրյա համաժողովին մասնակցում էր նաև Արդարադատության ակադեմիայի պատվիրակությունը՝ ռեկտոր Սերգեյ Առաքելյանի գլխավորությամբ: Համաժողովի ընթացքում փորձագետների հետ քննարկվեցին կանանց՝ դատական իշխանությունում ներգրավվածությանն առնչվող մի շարք հարցեր:

Եվրոպայի խորհրդի տեղական փորձագետները, որոնք ներկայացնում էին Արևելյան գործընկերության երկրները, համաժողովի մասնակիցներին ներկայացրին թեմայի առնչությամբ իրականացված ազգային հետազոտությունների արդյունքները՝ հետաքրիքր վիճակագրական տվյալներ փոխանցելով լսարանին: <<Առկա են դրական ցուցանիշներ, բայց դեռևս անելիքները քիչ չեն>>,-ընդգծեցին փորձագետները:

Համաժողովը կազմակեպել էր Եվրոպայի խորհուրդը՝ Մոլդովայի Արդարադատության ազգային ինստիտուտի հետ գործակցության արդյունքում:

Հանդիպում Մոլդովայի Արդարադատության ազգային ինստիտուտի տնօրենի հետ

Հոկտեմբերի 24-ից 25-ը Քիշնևում անցկացված <<Դատական համակարգի կարողություների զարգացման շրջանակում կանանց մատչելիությունն արդարադատության ոլորտում>> տարածաշրջանային համաժողովի շրջանակներում Մոլդովայի Արդարադատության ազգային ինստիտուտի տնօրեն Դիանա Սկոբիոլայի նախաձեռնությամբ տեղի ունեցավ հանդիպում Արդարադատության ակադեմիայի ռեկտոր Սերգեյ Առաքելյանի հետ: Հանդիպման ընթացքում կողմերը քննարկեցին երկու կառույցների գործունեությանն առնչվող մի շարք հարցեր, համագործակցության հնարավոր տարբերակներ: Ռեկտոր Սերգեյ Առաքելյանը հրավիրեց գործընկերոջը Հայաստան՝ տեղում ծանոթանալու Ակադեմիայի գործունեությանը և փորձի փոխանակման արդյունավետ ուղիներ գտնելու:

Հոկտեմբերի 22-ին Արդարադատության ակադեմիայում ավարտվեց Հատուկ քննչական ծառայության քննիչների վերջին՝ երրորդ խմբի վերապատրաստման դասընթացը: Այդ կապակցությամբ քննիչներին ավարտական վկայագրեր հանձնեց ՀՀ Հատուկ քննչական ծառայության պետ Վահրամ Շահինյանը:

Արդարադատության ակադեմիայի ռեկտոր Սերգեյ Առաքելյանը շնորհավորեց վերապատրաստում անցած ՀՔԾ քննիչներին և հաջողություն մաղթեց իրենց պատասխանատու ծառայության մեջ:

Համաձայն <<Հատուկ քննչական ծառայության մասին>> ՀՀ օրենքի՝ առնվազն 3 տարին մեկ անգամ պարտադիր վերապատրաստում են անցնում Հատուկ քննչական ծառայության գլխավոր և առաջատար խմբերի պաշտոններ զբաղեցնող ծառայողները: Այս տարի Արդարադատության ակադեմիայում վերապատրաստում է անցել ՀՀ հատուկ քննչական ծառայության 21 քննիչ՝ 40 ակադեմիական ժամ ծավալով:

Հատուկ քննչական ծառայության քննիչների ուսուցման ծրագիրը նպատակաուղղված է քննիչների մասնագիտական գիտելիքների և հմտությունների շարունակական կատարելագործմանը քրեական իրավունքի, քրեական դատավարության, Եվրոպական դատարանի նախադեպային իրավունքի և կոռուպցիայի դեմ պայքարի ոլորտներում:

Հոկտեմբերի 19-ին Արդարադատության ակադեմիա այցելեց և ռեկտոր Սերգեյ Առաքելյանի հետ հանդիպում ունեցավ Եվրոպայի խորհրդի Մարդու իրավունքների և օրենքի գերակայության գլխավոր տնօրինության ղեկավար Ֆիլիպ Բուայան:

Ռեկտորը ողջունեց բարձրաստիճան հյուրին և երախտագիտություն հայտնեց արդյունավետ համագործակցության, Եվրոպայի խորհրդի հետ համատեղ իրականացվող ծրագրերի և արդեն տեսանելի արդյունքների համար:

Ֆիլիպ Բուայան իր հերթին գոհունակություն հայտնեց ջերմ ընդունելության համար և նշեց, որ Արդարադատության ակադեմիան, ի թիվս Եվրոպայում գործող նմանատիպ այլ կառույցների, Եվրոպայի խորհրդի կարևոր գործընկերներից է:

<<Մեզ համար չափազանց կարևոր նշանակություն ունի դատական համակարգի անկախությունն ու արդյունավետությունը ԵԽ անդամ 47 երկրներում, հետևաբար այդ ուղղությամբ իրականացվող ջանքերը պետք է շարունակական լինեն>>,-ընդգծեց Ֆ. Բուայան՝ հատուկ կարևորելով Արդարադատության ակադեմիայի և Եվրոպայի խորհրդի համագործակցությունը և մարդու իրավունքների եվրոպական չափանիշների ներդրման համար իրականացվող ծրագրերում Ակադեմիայի դերակատարությունը: Այդ առումով ռեկտոր Սերգեյ Առաքելյանն իր խոսքում նշեց, որ ակադեմիայի ուսուցման ծրագրերում ներառված են և շարունակաբար լրամշակվում են դասընթացներ, որոնք վերաբերում են եվրոպական չափանիշների կիրառմանը և այդ չափանիշներին մեր երկրի օրենսդրության համապատասխանեցմանը:

Հանդիպման ավարտին կողմերը պայմանավորվեցին զարգացնել երկկողմ համագործակցությունը:

Հոկտեմբերի 14-ին Արդարադատության ակադեմիայում տեղի ունեցավ ակադեմիայի խորհրդանշան-արձանի օրհնման արարողությունը:

Հանդիսությանը ներկա էին Արդարադատության ակադեմիայի կառավարման խորհրդի անդամներ, ՀՀ դատական, դատախազական, քննչական համակարգերի ներկայացուցիչներ, ակադեմիայի աշխատակազմը, հյուրեր:

Ողջունելով ներկաներին՝ Արդարադատության ակադեմիայի ռեկտոր Սերգեյ Առաքելյանը ներկայացրեց արձանի ստեղծման գաղափարը և հատուկ շնորհակալություն հայտնեց արձանի քանդակագործ Սևակ Նալբանդյանին, ակադեմիայի տարբերանշանի հեղինակ Արմեն Քյուրքչյանին: Ռեկտորի խոսքով՝ արդարության ոլորտում կրթությունը խորհրդանշող արձանի ստեղծման հիմքում նաև ակադեմիայի տարբերանշանն է, այդ առումով քանդակագործը կարճ ժամանակում մեծ ու ինքնատիպ աշխատանք է կատարել:

Արձանի բարձրությունը 2, 5 մետր է, կշռում է շուրջ 500 կգ: Այն քանդակված է տուֆից՝ մեկ կտորից:

Արձանի և ակադեմիայի շենքի օրհնումը կատարեց Հայր Կոմիտաս վարդապետ Հովնանյանը, ով իր ոգևորիչ խոսքով դիմեց ներկաներին. <<Արդարությունը սրտերին և հոգիներին ամրագրված հավատամք պիտի լինի, որովհետև ամբողջ արձանը և մասնավորապես հավասար կշեռքները նշանակում են արդարադատության կատարյալ մոտեցում>>:

Սեպտեմբերի 27-ին Արդարադատության ակադեմիա այցելեցին Հռոմում Ինտերպոլի ազգային կենտրոնական բյուրոյի (ԱԿԲ) ներկայացուցիչներ Սանդրո Չիամարոնեն և Ստեֆանո Դիլզոտին:

Ակադեմիայում վերապատրաստում անցնող ՀՀ ընդհանուր իրավասության առաջին ատյանի և Վերաքննիչ դատարանների քրեական մասնագիտացմամբ դատավորների և դատախազների համար դասախոսությամբ հանդես եկավ Սանդրո Չիամարոնեն: Դասախոսությունը նվիրված էր թղթադրամների և մետաղադրամների կեղծմանն ու ապօրինի շրջանառությանը, ինչպես նաև փողերի կեղծման հետ կապված գործերի բացահայտմանը: 

Բանախոսը հետաքրքիր մանրամասներ ներկայացրեց Իտալիայում թղթադրամների կեղծման դեպքերի, դրանց բացահայտման և այդ առնչությամբ վերջին տարիների վիճակագրության վերաբերյալ: Ըստ բանախոսի՝ եվրոյի կեղծման դեպքերի շուրջ 80%-ը կատարվում է հենց Իտալիայի տարածքում, մասնավորապես՝ Նեապոլ քաղաքում են ամենամեծ թվով կեղծ թղթադրամներ առգրավում: Ավելին՝ այսօր ամենաշատը կեղծվում են 20 և 50 եվրո արժողությամբ թղթադրամները: Հազվադեպ չեն նաև ամերիկյան դոլարի կեղծման դեպքերը:

Հռոմում Ինտերպոլի ԱԿԲ ներկայացուցիչ Սանդրո Չիամարոնեն դատավորներին և դատախազներին ներկայացրեց նաև Իտալիայի ոստիկանության իրականացրած մի քանի հայտնի գործողությունների մանրամասներ, որոնց արդյունքում բացահայտվել են միլիոնավոր կեղծ դրամներ, ձերբակալվել են բազմաթիվ մարդիկ, առգրավվել տպագրական սարքեր, թուղթ, թանաք և այլն: Նրա խոսքով՝ տեխնոլոգիաների զարգացմանը զուգընթաց կատարելագործվում է նաև կեղծ թղթադրամների արտադրությունն ու իրացումը:

Խոսելով թղթադրամի և մետաղադրամի կեղծման դեպքերի մասին՝ Ս. Չիամարոնեն ներկայացրեց ոլորտի կարգավորմանն ուղղված Իտալիայի օրենսդրությունը, որն այս տարի է բարեփոխվել: Փոփոխությունները միտված են նման հանցագործությունները բացահայտելու միջոցների արդյունավետության բարձրացմանը, դրամ կեղծողների դեմ պայքարի համակարգված մոտեցումների մշակմանը, ոստիկանության և մյուս շահագրգիռ կառույցների համագործակցության ակտիվացմանը:

ԱՄՆ պետական դեպարտամենտի Առևտրային իրավունքի զարգացման ծրագրի (CLDP) հրավերով սեպտեմբերի 19-23-ը Արդարադատության ակադեմիայի ռեկտոր Սերգեյ Առաքելյանը Վաշինգտոնում մասնակցել է <<Սնանկության հարցերի կարգավորման շուրջ>> խորհրդակցությունների:

Հայաստանյան պատվիրակության կազմում ընդգրկված են եղել սնանկության գործեր քննող դատավորներ՝ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի նախագահ Արմեն Դանիելյանը, Մալաթիա-Սեբաստիա վարչական շրջանի ընդհանուր իրավասության դատարանի նախագահ Գարիկ Ավագյանը, Աջափնյակ և Դավթաշեն վարչական շրջանների ընդհանուր իրավասության դատարանի դատավոր Անի Մխիթարյանը, Արագածոտնի մարզի ընդհանուր իրավասության դատարանի դատավոր Գևորգ Նարինյանը:

Պատվիրակության անդամները Միացյալ Նահանգների իրենց գործընկերների հետ Մերիլենդ նահանգի Բալթիմոր քաղաքի սնանկության գործերով դատարանում մասնակցել են դատական լսումների, ծանոթացել գործերի վարման էլեկտրոնային գործընթացին, այնուհետև <<Փիլսբըրի և Վինթրոփ>> իրավախորհրդատվական ընկերությունում քննարկում ծավալել սնանկության վեճերի և դրանց լուծման եղանակների մասին: Ներկայացվել է սնանկության վերաբերյալ ԱՄՆ օրենսդրության ընդհանուր նկարագիրը, քննարկվել են մի շարք այլ հարցեր:

Մեր երկրի պատվիրակությունն իր հերթին գործընկերներին է ներկայացրել սնանկության հարցերի կարգավորման վերաբերյալ հայաստանյան փորձը, օրենսդրության բարեփոխումները, Հայաստանում ոլորտի կարգավորման առավել արդյունավետ համակարգ ստեղծելու ուղիները:

Այցի շրջանակում ԱՄՆ-Հայաստան խորհրդակցությունների մասնակիցները հանդիպում են ունեցել նաև ԱՄՆ կառավարիչների գործակալության ղեկավար կազմի հետ, քննարկվել են սնանկության գործընթացում նրանց դերին ու նշանակությանն առնչվող մի շարք հարցեր:

ԱՄՆ կատարած աշխատանքային այցի ընթացքում քննարկվել են նաև երկկողմ համագործակցությունը շարունակելու և ընդլայնելու հնարավոր ուղղությունները:

Սեպտեմբերի 20-ից 22-ը Հայաստանի Հանրապետության պատվիրակությունը, որի կազմում ընդգրկված էր Արդարադատության ակադեմիայի ներկայացուցիչը, Ղազախստանի Ալմաթի քաղաքում մասնակցել է ՄԱԿ-ի Թմրամիջոցների և հանցավորության դեմ պայքարի գրասենյակի կողմից կազմակերպված միջտարածաշրջանային աշխատանքային սեմինարին, որը կրում էր <<Տեղեկատվական տեխնոլոգիաների ոլորտում կատարվող հանցագործությունների վերհանումն ու դրանցով քննություն կատարելը>> խորագիրը:

Սեմինարը նախատեսված էր իրավապահ մարմինների աշխատակիցների և դատախազների համար, որին մասնակցում էին պատվիրակություններ Ղազախստանի, Ղրղզստանի, Թուրքմենստանի, Տաջիկստանի, Ուզբեկստանի, Վրաստանի և Ադրբեջանի Հանրապետություններից, ինպես նաև Իրանի Իսլամական Հանրապետությունից, Պակիստանից և Աֆղանստանից:

Հայաստանյան պատվիրակության կազմում ընդգրկված էին Արդարադատության ակադեմիայի գիտահետազոտական վարչության մասնագետ, դասընթացավար Տիգրան Պողոսյանը, ՀՀ գլխավոր դատախազության Ազգային անվտանգության մարմիններում քննվող, թմրամիջոցների ապօրինի շրջանառության հետ կապված և կիբերհանցագործությունների գործերով վարչության պետի տեղակալ Հայկ Հակոբյանը, ՀՀ ոստիկանության կազմակերպված հանցավորության դեմ պայքարի գլխավոր վարչության բարձր տեխնոլոգիաների ոլորտում կատարվող հանցագործությունների դեմ պայքարի բաժնի պետի տեղակալ Վահագն Հարությունյանը, ՀՀ քննչական կոմիտեի Հատկապես կարևոր գործերի քննության գլխավոր վարչության պետի տեղակալ Սամվել Ավետիսյանը:

Աշխատանքային սեմինարը վարում էին ՄԱԿ-ի Թմրամիջոցների և հանցավորության դեմ պայքարի գրասենյակի կողմից հրավիրված փորձագետները, որոնք Նիդերլանդների, Բելգիայի, Նորվեգիայի և Ռուսաստանի Դաշնության տվյալ բնագավառում մեծ փորձառություն ունեցող մասնագետներ են:

Արդարադատության ակադեմիան ներկայացնող Տիգրան Պողոսյանը սեմինարի մասնակից երկրների ներկայացուցիչներին է ներկայացրել կիբերհանցագործությունների դեմ պայքարի ոլորտում Ակադեմիայում դասավանդվող առարկայական կուրսերը և դրանց բովանդակությունը: Ուշադրության է արժանացել հենց Տ. Պողոսյանի կողմից մշակված <<Կիբերհանցագործությունների դեմ պայքարի արդի հարցերը>> թեմայով առարկայական ծրագրի ներկայացումը, որն արդեն 2-րդ տարին է՝ դասավանդվում է Ակադեմիայում: Վերոնշյալ առարկայական ծրագիրն իր մեջ ներառում է այդ ոլորտում ներպետական և միջազգային իրավական կարգավորման և պրակտիկայի արդի խնդիրները, կիբերհանագործությունների կատարման եղանակներն ու դրանց դեմ տարվող պայքարը, ինչպես նաև միջազգային համագործակցության առանձնահատկությունները: