Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Սույն թվականի դեկտեմբերի 17-ին տեղի ունեցավ իրավաբանական գիտությունների դոկտոր, պրոֆեսոր, Արդարադատության ակադեմիայի ռեկտոր, ԵՊՀ քրեական իրավունքի ամբիոնի պրոֆեսոր Սերգեյ Առաքելյանի, իրավաբանական գիտությունների թեկնածու, Արդարադատության ակադեմիայի դասախոս, ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության վարչության պետ Գևորգ Բաղդասարյանի, Արդարադատության ակադեմիայի դասախոս, ՀՀ քննչական կոմիտեի ՀԿԳ քննության գլխավոր վարչության սեփականության դեմ ուղղված հանցագործությունների քննության վարչության պետ Պետրոս Պետրոսյանի համահեղինակած «Սեփականության դեմ ուղղված հանցագործություններն ըստ ՀՀ քրեական նոր օրենսգրքի» գիտագործնական մեկնաբանություններ աշխատության շնորհանդեսը:

Ողջույնի խոսքով հանդես եկան ՀՀ - ում ԱՄՆ դեսպան Քրիստինա Քվինը, ՀՀ Ներքին գործերի նախարար Արփինե Սարգսյանը, ՀՀ Արդարադատության նախարար Սրբուհի Գալյանը, «Քրեական արդարադատության բարեփոխումներ» ծրագրի ղեկավար Քրիստինա Աֆոյանը:

«Երջանիկ եմ, որ երբեմնի իմ ուսանողների, իսկ այժմ արդեն գործընկերների հետ կարողացել եմ ստեղծել այն արդյունքը, որի կապակցությամբ այսօր բոլորս հավաքվել ենք: Համոզված եմ՝ աշխատությունը կունենա կարևոր նշանակություն հատկապես պրակտիկայի զարգացման համար», - ողջույնի խոսքում նշեց Արդարադատության ակադեմիայի ռեկտոր Սերգեյ Առաքելյանը:

Նախաձեռնությունը կյանքի է կոչվել ԱՄՆ դեսպանատան աջակցությամբ՝ իրավունքի բարեփոխումների ծրագրի շրջանակում:

Սույն թվականի դեկտեմբերի 9-ից՝ եռօրյա այցով, Արդարադատության ակադեմիայի Համագործակցության և հանրային կապերի բաժնի ղեկավար Իզաբելլա Գալստյանը Ռիգայում էր՝ ԵԽ «Գործընկերություն հանուն լավ կառավարման» նախագծի «Քրեական արդարադատության բարեփոխումները Միջազգային քրեական դատարանի կանոնադրության վավերացումից հետո» ծրագրի շրջանակում:

Պատվիրակության կազմում էին ԵԽ փորձագետներ, արդարադատության ոլորտի ներկայացուցիչներ:
Աշխատանքային այցի ընթացքում տեղի են ունեցել հանդիպումներ Լատվիայի Գլխավոր դատախազության, Արդարադատության ինչպես նաև Արտաքին գործերի նախարարությունների ներկայացուցիչների հետ:

Հայաստանյան պատվիրակությունը այցելել է նաև Լատվիայի դատական ուսուցման կենտրոն, Ռիգայի առաջին ատյանի քաղաքային դատարան, Լատվիայի դատարանների ադմինիստրացիա:

Հանդիպումների ընթացքում կողմերն իրականացրել են փորձի փոխանակում, քննարկել համագործակցությանն առնչվող հարցեր:

Դեկտեմբերի 6-ին Արդարադատության ակադեմիայի պրոռեկտոր Մարգարիտ Ամյանը դիպլոմներ հանձնեց ապօրինի ծագում ունեցող գույքի բռնագանձմանն ուղղված գործառույթներ իրականացնող դատախազների թեկնածությունների 2024 թվականի ցուցակում ընդգրկված անձանց:

Պրոռեկտորը շնորհավորեց թեկնածուներին ուսումնառությունը հաջող ավարտելու կապակցությամբ և մաղթեց արդյունավետ աշխատանք:
 

 Ակադեմիայի պաշտոնական կայքէջում հասանելի է ՀՀ Սահմանադրական դատարանի դատավորներ Երվանդ Խունդկարյանի, Արթուր Վաղարշյանի, իրավաբանական գիտությունների դոկտոր, պրոֆեսոր Գևորգ Դանիելյանի համահեղինակած «Դատական իշխանության անկախությունը» վերնագրով ձեռնարկը՝ ներբեռնման հնարավորությամբ: 
 

  Նոյեմբերի 27-ին Արդարադատության ակադեմիայի պրոռեկտոր Մարգարիտ Ամյանն ընդունեց Ռաուլ Վալլենբերգի անվան մարդու իրավունքների և մարդասիրական իրավունքի ինստիտուտի «Արդարադատության մատչելիության» ծրագրի ղեկավար Ջոշ Աունսթեդին:  

 
 Պրոռեկտորը ողջունեց հյուրին, ամփոփվեցին 2024թ. համագործակցության արդյունքները, նախանշվեցին հետագա քայլերը:

 Ակադեմիայի Հեռաուսուցման և ՏՏ դեպարտամենտի ղեկավար Արտաշես Խուրշուդյանը ներկայացրեց Ակադեմիայի կողմից կազմակերպվող հեռաուսուցման դասընթացների առանձնահատկությունները:
 

Նոյեմբերի 19-ից 22-ը Արդարադատության ակադեմիայի պրոռեկտոր Մարգարիտ Ամյանը Տիրանայում մասնակցեց ԵՄ և ԵԽ համատեղ «Գործընկերություն հանուն լավ կառավարման» նախագծի «Կանանց արդարադատության մատչելիություն՝ ԵԽ գենդերային հավասարության և կանանց նկատմամբ բռնության չափանիշների կիրառում» ծրագրի շրջանակում կազմակերպված Կանանց արդարադատության մատչելիության մենթորային ծրագրի հաշվետու հանդիպմանը և Արևելյան գործընկերության երկրների ու Արևմտյան Բալկանյան շրջանների փորձի փոխանակման աշխատաժողովին:

Այցի շրջանակում տեղի ունեցավ նաև Արևելյան գործընկերության երկրների դատական վերապատրաստման հաստատությունների տարածաշրջանային ցանցի երրորդ հանդիպումը, որի ընթացքում քննարկվեցին առաջիկա ամիսներին իրականացվելիք համատեղ միջոցառումները:    

Հայաստանյան պատվիրակության կազմում էին տարբեր մասնագիտացմամբ դատավորներ և իրավունքի ոլորտի մասնագետներ:
 

Նոյեմբերի 20-ին Արդարադատության ակադեմիայում անցկացվեց սեմինար՝ «Դատավորի անկախությունը» թեմայով: Սեմինարը կազմակերպել էր Ակադեմիան՝ Միջազգային իրավական համագործակցության գերմանական հիմնադրամի (IRZ) հետ համատեղ:

 
Միջոցառումը, որը նախատեսված էր վարչական մասնագիտացմամբ դատավորների և դատավորի թեկնածուների համար, վարում էր Սաքսոնիա-Անհալթ երկրամասի սահմանադրական դատարանի պաշտոնաթող նախագահ Վինֆրիդ Շուբերտը:

Սեմինարի շրջանակներում քննարկվեցին դատավորի անկախությանն առնչվող հիմնահարցեր:
 

Նոյեմբերի 19-ին Արդարադատության ակադեմիայում տեղի ունեցավ ՀՀ Սահմանադրական դատարանի դատավորներ Երվանդ Խունդկարյանի, Արթուր Վաղարշյանի, իրավաբանական գիտությունների դոկտոր, պրոֆեսոր Գևորգ Դանիելյանի համահեղինակած «Դատական իշխանության անկախությունը» ձեռնարկի շնորհանդես-քննարկումը:

Ձեռնարկը մշակվել և հրատարակվել է Արդարադատության ակադեմիայի, «Կոնրադ Ադենաուեր հիմնադրամի» և   Միջազգային իրավական համագործակցության գերմանական հիմնադրամի (IRZ) համագործակցությամբ: 

Ողջույնի խոսքով հանդես եկան Արդարադատության նախարար Սրբուհի Գալյանը, Ակադեմիայի ռեկտոր Սերգեյ Առաքելյանը, «Քաղաքական երկխոսություն Հարավային Կովկաս» տարածաշրջանային ծրագրի գրասենյակի գիտաշխատող Ֆլորիան Բինդերը, IRZ-ի՝ Հայաստանում ծրագրերի համակարգող Նելլի Թումասյանը։

«Լիահույս եմ, որ ուսումնական ձեռնարկն օգտակար կլինի ինչպես Ակադեմիայի ունկնդիրներին, այնպես էլ հանրային ծառայություն իրականացնող անձանց՝ դրանում քննարկվող խնդիրներն առավել խորությամբ ընկալելու, իմաստավորելու, դրանց լուծման կոնկրետ ուղղություններ նախանշելու և իրականացնելու համար»,-բացման խոսքում նշեց ռեկտոր Սերգեյ Առաքելյանը:

Զեկույցներով հանդես եկան ձեռնարկի համահեղինակները, որին հաջորդեց քննարկում մասնակիցների միջև:

Ձեռնարկը և համանուն դասընթացը ներառվել են դատավորների և դատավորների թեկնածուների վերապատրաստման 2025թ. ուսումնական ծրագրում:
 

Նոյեմբերի 8-ին և 18-ին Արդարադատության ակադեմիան Եվրոպայի խորհրդի գործընկերների հետ համատեղ՝ ԵԽ «Աջակցություն Հայաստանում Մարդու իրավունքների եվրոպական դատարանի վճիռների արդյունավետ կատարմանը» ծրագրի շրջանակում անցկացրեց վերապատրաստման դասընթաց՝ նվիրված հավաքների ազատության ապահովման գործնական խնդիրներին:

 Վերապատրաստման դասընթացին մասնակցել են վարչական մասնագիտացմամբ 24 դատավորներ և դատավորի թեկնածուներ:

Դասընթացը վարում էր ԵԽ փորձագետ, վարչական դատարանի դատավոր Կարեն Զարիկյանը:
 

Նոյեմբերի 6-ին Արդարադատության ակադեմիայի ռեկտոր Սերգեյ Առաքելյանն ընդունեց ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության (ԹՊԻՀ) գրասենյակի նորանշանակ տնօրեն Զաքարի Բարթերին և ԹՊԻՀ «Քրեական արդարադատության բարեփոխումներ» ծրագրի ղեկավար Քրիստինա Աֆոյանին:

Ակադեմիայի ռեկտոր Սերգեյ Առաքելյանը ողջունեց հյուրերին, ներկայացրեց Ակադեմիայի գործունեության հիմնական ուղղությունները՝ մեծապես կարևորելով ԹՊԻՀ-ի հետ համագործակցության դրական փորձը: Կողմերը քննարկեցին համատեղ իրականացված և իրականացվող ծրագրերը՝ հույս հայտնելով, որ հետագա համագործակցությունը ևս կլինի արգասաբեր:

Հյուրերը ծանոթացան նաև Ակադեմիայի շենքային պայմաններին, հնարավորություն ունեցան շրջելու «Հայ-ամերիկյան բարեկամության նախասրահ»-ում, որն ամբողջությամբ նորոգվել, կահավորվել և տեխնիկապես վերազինվել է ՀՀ-ում ԱՄՆ դեսպանության աջակցությամբ: