Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Դեկտեմբերի 13-ին ՀՀ քննչական կոմիտեում մեծ հանդիսավորությամբ դիպլոմներ և միաժամանակ աշխատանքի նշանակման հրամաններ հանձնվեցին Արդարադատության ակադեմիայի շրջանավարտներին՝ 2017 թվականի երկրորդ խմբի քննիչի թեկնածուներին: Դիպլոմներ ստացան քննիչի թեկնածությունների ցուցակում ընդգրկված 27 անձ, որոնցից 25-ը՝ նաև նշանակման հրամաններ ՀՀ քննչական կոմիտեի տարածքային ստորաբաժանումներում:

Հանդիսությանը ներկա էին ՀՀ քննչական կոմիտեի նախագահ Աղվան Հովսեփյանը, Արդարադատության ակադեմիայի ռեկտոր Սերգեյ Առաքելյանը, ՀՀ ՔԿ կոլեգիայի անդամներ, ստորաբաժանումների ղեկավարներ, հյուրեր:

Աղվան Հովսեփյանի խոսքով՝ դիպլոմների հետ միաժամանակ աշխատանքի նշանակման հրամաններ հանձնելն արդեն իսկ ձևավորված ավանդույթ է Քննչական կոմիտեում:

Ավելին՝ տարիներ շարունակ ոլորտում աշխատանքի նշանակելու, պաշտոններ տալու, կոչումներ ստանալու և նման այլ գործընթացներում մշտապես դիտարկվել են կոռուպցիոն երևույթներ, իսկ այսօր նշանակումը կախված է բնակության վայրից, ընտանեկան կարգավիճակից, ցուցաբերած առաջադիմությունից, գիտելիքից: Ավելին՝ նշանակման վայրը պայմանավորված է այն հանգամանքով, թե որ ստորաբաժանումում սկսնակ քննիչը կարող է դառնալ փորձառու: «Շնորհակալություն եմ հայտնում Ձեզ, պարոն Առաքելյան, անձնակազմին, դասախոսական կազմին, բոլոր նրանց, ովքեր օժանդակել են հերթական սերնդի քննիչներին ուսուցանելու գործում»,-նշեց Աղվան Հովսեփյանը:

Ռեկտոր Սերգեյ Առաքելյանը շնորհավորեց ներկաներին Ակադեմիայի շրջանավարտների հերթական սերնդին դիպլոմներ և աշխատանքի նշանակման հրամաններ հանձնելու կապակցությամբ և բարի երթ մաղթեց քննիչի չափազանց պատասխանատու, բայց և պատվաբեր ճանապարհին:

«Վստահեցնում եմ՝ բարդություններն ավելի շատ են լինելու, քան ուսումնառության ընթացքում էին, բայց նաև լիահույս եմ, որ ձեռքբերած գիտելիքները, հմտությունները, ունակությունները ծառայեցնելով ի նպաստ ձեր մասնագիտական գործառույթների իրականացման՝ մոտ ապագայում կարձանագրեք հաջողություններ: Կցանկանայի, որ ձեր քննած գործերից հաճույք ստանաք, քննության որակի տեսանկյունից արդյունքը ձեզ գոհացներ և միշտ գիտակցեիք, որ մարդկանց ճակատագրերը լուծելով, արդար լուծումներ տալով ոչ միայն ներքին բավարարվածություն ունեք, այլև կարևոր գործ եք արել մեր հասարակության, պետության համար»,-նշեց Ս. Առաքելյանը և արդյունավետ համագործակցության համար շնորհակալություն հայտնեց Քննչական կոմիտեի ղեկավարությանը, դասընթացավարներին, քննական և բողոքարկման հանձնաժողովների անդամներին:

Նշենք, որ քննիչի թեկնածուների ուսումնառությունը տևել է 7 և կես ամիս՝ 2017 թվականի ապրիլի 3-ից նոյեմբերի 28-ը (ներառյալ՝ փորձաշրջանը):

Դեկտեմբերի 6-ից 9-ը Հայաստանում էր Ղազախստանի Հանրապետության գլխավոր դատախազությանն առընթեր իրավապահ մարմինների ակադեմիայի պատվիրակությունը՝ ռեկտորի ժ.պ. Նաիլ Ախմետզակիրովի գլխավորությամբ: Պատվիրակության կազմում ընդգրկված էին Ակադեմիայի առաջին պրոռեկտոր Շակիր Շայախմետովը, Միջազգային համագործակցության վարչության դատախազ Արդակ Սանսիզբաևը: Պատվիրակությունն աշխատանքային այցով ժամանել էր Երևան՝ Արդարադատության ակադեմիայի ռեկտոր Սերգեյ Առաքելյանի հրավերով:

Այցի օրակարգը չափազանց հագեցած էր՝ փոխըմբռնման հուշագրի ստորագրումից մինչև Ակադեմիայում վերապատրաստում անցնող դատախազների համար դասախոսություն, ռեկտորների առանձնազրույց, աշխատանքային հանդիպում Ակադեմիայի կառավարման խորհրդի անդամների հետ, քննարկումներ համագործակցությանն ուղղված հետագա քայլերի մասին և այլն:

Այցի շրջանակում տեղի ունեցած գլխավոր միջոցառումը հուշագրի ստորագրումն էր, որի հանդիսավոր արարողությունը դեկտեմբերի 8-ին էր: Հանդիսությանը ներկա էին Ակադեմիայի կառավարման խորհրդի անդամները՝ Խորհրդի նախագահ, ՀՀ գլխավոր դատախազի տեղակալ Արմեն Հարությունյանի գլխավորությամբ, Ակադեմիայի դասընթացավարներ, ունկնդիրներ, հյուրեր:

Ռեկտոր Սերգեյ Առաքելյանը ողջունեց ներկաներին և ներկայացրեց գործընկերների հետ համագործակցության նախաձեռնությունը՝ միաժամանակ նշելով, որ արդեն իսկ իրականացվել են համատեղ քայլեր, որոնք լավ նախասկիզբ են հուշագրի ստորագրման և հետագա համագործակցության համար:

Արմեն Հարությունյանը ողջունեց համագործակցությանն ուղղված քայլը և համոզմունք հայտնեց, որ նախաձեռնությունն օգտակար է և իր արդյունավետությունը կարճ ժամանակում կապացուցի: Նրա խոսքով՝ փորձի փոխանակման արդյունքում առաջիկայում կուրվագծվեն զարգացման առավել նպաստավոր ուղղություններ:

Ղազախստանի Հանրապետության գլխավոր դատախազության և Ակադեմիայի անունից ներկաներին ողջունեց և Սերգեյ Առաքելյանին երախտագիտություն հայտնեց Նաիլ Ախմետզակիրովը: «Վստահ եմ, որ կրթության և գիտության ոլորտում համագործակցության ուղղությունները բազմաթիվ են՝ փորձի փոխանակման, ուսուցման ձևաչափերի, հեռաուսուցման մեթոդների և այլնի առումով»,-նշեց Ն. Ախմետզակիրովը:

Նրա խոսքով՝ Ակադեմիայի հիմքի վրա Աստանայում ստեղծվել է Համաշխարհային սպառնալիքներին հակազդելու տարածաշրջանային կենտրոն: Այն միավորում է լավագույն փորձը և այնպիսի գիտնականների, որոնք աշխատում են հետապնդելով մեկ նպատակ՝ ապահովել Կենտրոնական Ասիայի ամբողջ տարածաշրջանի անվտանգությունը: Միայն վերջին տարվա ընթացքում Կենտրոնական Ասիայի իրավապահ մարմիններից այնտեղ վերապատրաստվել է 250 աշխատակից, անցկացվել են համատեղ գիտական հետազոտություններ: «Այդ առումով ուրախ կլինենք համագործակցել նաև Հայաստանի Արդարադատության ակադեմիայի հետ: Կարծում եմ՝ 2018 թվականը մեր երկրների համար կլինի կրթության, գիտության զարգացման և անվտանգության համակարգերի արդիականացման տարի»,-իր ելույթում նշեց Ն. Ախմետզակիրովը:

Արդարադատության ակադեմիայի ռեկտոր Սերգեյ Առաքելյանը և Ղազախստանի Հանրապետության գլխավոր դատախազությանն առընթեր իրավապահ մարմինների ակադեմիայի ռեկտորի ժ.պ. Նաիլ Ախմետզակիրովը ստորագրեցին հուշագիրը՝ իրավական հիմքերի վրա դնելով երկկողմ համագործակցությունը:

Նաիլ Ախմետզակիրովը Ակադեմիայի ունկնդիրների՝ դատախազների համար հանդես եկավ նաև դասախոսությամբ: Սերգեյ Առաքելյանը ներկայացրեց հյուրին՝ նշելով, որ նա Ղազախստանում ոլորտի լավագույն մասնագետներից է: Դասախոսությունը նվիրված էր ինչպես իր գլխավորած ակադեմիայի աշխատանքի հիմնական ուղղություններին, այնպես էլ Ղազախստանի Հանրապետության դատախազության համակարգի գործունեության առանձնահատկություններին: Ղազախստանում շուրջ 5000 դատախազ կա, որոնց վերապատրաստումն իրականացնում է Ղազախստանի Հանրապետության գլխավոր դատախազությանն առընթեր իրավապահ մարմինների ակադեմիան: Այն գործում է երկու և կես տարի, ունի մասնաճյուղեր երկրի տարբեր շրջաններում: Երկրում թվայնացման հնարավորությունների ակտիվ ընդլայնմամբ պայմանավորված՝ դատախազության համակարգի աշխատանքն առավելապես թվայնացված է:

Այցի շրջանակում պատվիրակության անդամները նաև հնարավորություն ունեցան այցելել Ծիծեռնակաբերդի հուշահամալիր՝ հարգանքի տուրք մատուցելու Հայոց ցեղասպանության զոհերի հիշատակին, նաև լինել Մատենադարանում և ծանոթանալ մշակութային բացառիկ ժառանգությանը:

Արդարադատության ակադեմիայի 2017 թվականի ունկնդիր-շրջանավարտներից երեքը, ՀՀ Նախագահի 2017թ. նոյեմբերի 30-ի հրամանագրով, նշանակվել են դատավորի պաշտոնում.

Վահե ՄԻՍԱԿՅԱՆ – ՀՀ Շիրակի մարզի ընդհանուր իրավասության առաջին ատյանի դատարանի դատավոր

Ալֆրեդ ՎԱՐԴԱՆՅԱՆ - ՀՀ Լոռու մարզի ընդհանուր իրավասության առաջին ատյանի դատարանի դատավոր

Գոռ ՇԱՀԲԱԶՅԱՆ- ՀՀ Կոտայքի մարզի ընդհանուր իրավասության առաջին ատյանի դատարանի դատավոր:

ՀՀ Նախագահի հրամանագիրը դատավորներ նշանակելու մասին.
www.president.am

Նոյեմբերի 29-ին Արդարադատության ակադեմիա այցելեցին ՄԱԿ Փախստականների հարցերով գերագույն հանձնակատարի (ՓԳՀ) հայաստանյան գրասենյակի ներկայացուցիչները:

Ակադեմիայի հեռաուսուցման և տեղեկատվական տեխնոլոգիաների դեպարտամենտի ղեկավար Արտաշես Խուրշուդյանը հյուրերին ներկայացրեց համագործակցության շրջանակներում իրականացված աշխատանքն ու առաջիկա անելիքները: Մասնավորապես՝ հաջողությամբ ավարտվում է «Փախստականների իրավունք» հեռաուսուցման դասընթացի շրջանակում նախատեսված 2017 թվականի վերապատրաստումը, որին մասնակցում է 38 ունկնդիր՝ 32 դատավոր և 6 դատախազ:

Արտաշես Խուրշուդյանը նշեց, որ վերապատրաստման դասընթացի ավարտին կամփոփվեն արդյունքները և կներկայացվեն գործընկեր կառույցին՝ ՄԱԿ ՓԳՀ հայաստանյան գրասենյակին, որի հետ համագործակցության արդյունքում է ստեղծվել հիշյալ դասընթացը: Ավելին՝ նախատեսվում է նաև կազմակերպել հանդիպում, որին կմասնակցեն վերապատրաստում անցած ունկնդիրները և դասընթացը մշակած փորձագետներն ու դասախոսները՝ քննարկելու թեմային առնչվող հարցեր:

Հանդիպման ընթացքում քննարկվեցին նաև հարցեր մշակման փուլում գտնվող հեռաուսուցման ևս մի նոր դասընթացի վերաբերյալ, այն է՝ «Փախստականների իրավունք քրեական մասնագիտացմամբ դատավորների և դատախազների համար»: Այն առաջիկայում պատրաստ կլինի և կներդրվի 2018 թվականի սեպտեմբերին: Արտաշես Խուրշուդյանն իր խոսքում հատուկ շեշտեց՝ որ Ակադեմիան մեծապես հետաքրքրված է, որ մշակվող յուրաքանչյուր դասընթաց մաքսիմալ հետաքրքիր և արդյունավետ լինի վերապատրաստվողների համար:

ՄԱԿ ՓԳՀ հայաստանյան գրասենյակի ներկայացուցիչները նշեցին, որ իրենք հետևողական են իրականացվող ծրագրի ընթացքին, արդյունքներին և պատրաստ են աջակցել դրա լավագույն ու արդյունավետ իրագործմանը:

Արդարադատության ակադեմիայի ռեկտոր Սերգեյ Առաքելյանի հրավերով նոյեմբերի 25-ից 29-ը աշխատանքային այցով Երևանում էր Ղազախստանի Հանրապետության գերագույն դատարանին կից Արդարադատության ակադեմիայի պատվիրակությունը՝ ռեկտոր Տոլեշ Կաուդիրովի գլխավորությամբ: Պատվիրակության կազմում էր Ակադեմիայի դատաիրավական և նորարարական նախագծերի գիտահետազոտական ինստիտուտի տնօրեն Ժումաբեկ Բուսուրմանովը:

Այցի նպատակը երկու երկրների Արդարադատության ակադեմիաների միջև համագործակցությունն իրավական հիմքերի վրա դնելն էր և հետագա համատեղ ծրագրերի իրականացմանն առնչվող հարցերի քննարկումը: Այցի օրակարգը չափազանց հագեցած էր՝ համագործակցության վերաբերյալ հուշագրի ստորագրում, պրոֆեսոր Տոլեշ Կաուդիրովի դասախոսությունը Ակադեմիայում վերապատրաստում անցնող ունկնդիրների համար, համագործակցության հեռանկարների և ձևաչափերի քննարկման նպատակով ռեկտորների առանձնազրույց, աշխատանքային հանդիպումների անցկացում Ակադեմիայի տարբեր ստորաբաժանումների ներկայացուցիչների հետ, նաև քննարկումներ համատեղ միջոցառումների իրականացման, փոխադարձ այցերի կազմակերպման, փորձի փոխանակման վերաբերյալ և այլն:

Այցի շրջանակում նոյեմբերի 27-ին Արդարադատության ակադեմիայում մեծ հանդիսավորությամբ տեղի ունեցավ համագործակցության վերաբերյալ հուշագրի ստորագրման արարողությունը:

Ներկա էին Ակադեմիայի կառավարման խորհրդի անդամները, դատական համակարգի ներկայացուցիչներ, Ակադեմիայում վերապատրաստում անցնող ունկնդիրներ, աշխատակազմի ներկայացուցիչներ, հյուրեր: Ռեկտորներ Սերգեյ Առաքելյանը և Տոլեշ Կաուդիրովը ստորագրեցին հուշագիրը՝ նպատակ ունենալով ձևավորել և ամրապնդել դատական համակարգի համար կադրերի պատրաստման և վերապատրաստման գործում երկկողմ կապերը:

Ռեկտոր Սերգեյ Առաքելյանը ողջունեց ներկաներին և շնորհակալություն հայտնեց նրանց՝ համագործակցող երկու կառույցների համար նշանակալի օրվան մասնակից դառնալու համար:

«Կարծում եմ՝ մեր կառույցների համագործակցությունը՝ գիտական համատեղ հետազոտություններ անցկացնելու, ուսումնական ծրագրեր կազմելու, փոխադարձ այցեր կազմակերպելու միջոցով բավական բարենպաստ պայմաններ կստեղծեն համապատասխան գործընթացների արդյունավետությունը բարձրացնելու առումով»,- նշեց Սերգեյ Առաքելյանը:

Իր հերթին Տոլեշ Կաուդիրովը երախտագիտություն հայտնեց Սերգեյ Առաքելյանին և ասաց, որ գոհունակությամբ է ընդունել հրավերը: Նրա խոսքով՝ Ղազախստանի Հանրապետության գերագույն դատարանին կից Արդարադատության ակադեմիան երիտասարդ կառույց է և որպես առանձին հաստատություն՝ գործում է մեկ և կես տարի: Ավելին՝ Տոլեշ Կաուդիրովը Ակադեմիան ղեկավարում է 2017 թվականից և ռեկտորի պաշտոնում՝ առաջին արտասահմանյան այցն է:

«Ուրախ եմ, որ այդ այցը դեպի իրավական մեծ ավանդույթներ ունեցող երկիր Հայաստանն է: Մենք մեր բուհերում ուսումնասիրում ենք հայկական իրավունքի պատմությունը, մասնավորապես դեռևս ուսանողական տարիներից հիշում եմ Մխիթար Գոշի «Դատաստանագիրքը»: Ռեկտորը հույս հայտնեց, որ համաձայնագրի ստորագրումը նոր քայլ կլինի երկկողմ հարաբերությունների զարգացման ուղղությամբ, և երկու երկրների փորձը փոխադարձաբար օգտակար կլինի:

Այցի շրջանակում հյուրերը ծանոթացան Արդարադատության ակադեմիայի գործունեությանը, ռեկտոր Սերգեյ Առաքելյանի հետ քննարկեցին երկկողմ հետաքրքրություն ներկայացնող հարցերի լայն շրջանակ և հետագա համագործակցության ուղղությամբ քայլեր իրականացնելու վերաբերյալ պայմանավորվածություններ ձեռքբերեցին:

Նշենք նաև, որ Ղազախստանից ժամանած պատվիրակության անդամները Հայաստանում էին առաջին անգամ, ուստի նրանց համար հնարավորություն էր ստեղծվել մշակութային ու ճանաչողական այցերի միջոցով փորձել բացահայտել բազմադարյա պատմություն ու մշակույթ ունեցող երկիրն ու ժողովուրդը:

Նոյեմբերի 28-ին համագործակցության նոր հեռանկարներին առնչվող հարցեր քննարկելու նպատակով Արդարադատության ակադեմիա այցելեցին Եվրոպայի Խորհրդի ներկայացուցիչները՝ Մարդու իրավունքների ազգային իրականացման վարչության Արևելյան գործընկերության բաժնի ղեկավար Տիգրան Կարապետյանը (Ստրասբուրգ), Մարդու իրավունքների ազգային իրականացման վարչության ծրագրի համակարգող Մարիա Օրեշկինան (Ստրասբուրգ), հայաստանյան ծրագրի ղեկավար Գայանե Հովհաննիսյանը (Երևանյան գրասենյակ): Հյուրերին ընդունեց Արդարադատության ակադեմիայի ռեկտոր Սերգեյ Առաքելյանը: Հանդիպմանը ներկա էին Ակադեմիայի ուսումնական աշխատանքի գծով պրոռեկտոր Ռուզաննա Ղևոնդյանը, Գիտական աշխատանքի գծով պրոռեկտոր Անահիտ Մանասյանը, Հեռաուսուցման և տեղեկատվական տեխնոլոգիաների դեպարտամենտի ղեկավար Արտաշես Խուրշուդյանը:

Հանդիպման ընթացքում կողմերը քննարկեցին համատեղ մշակված և Ակադեմիայի ուսուցման ծրագրում ներդրված ու հաջողությամբ իրականացվող չորս դասընթացները, որի արդյունքում վերապատրաստվել է 646 քննիչ:

Սերգեյ Առաքելյանը գործընկերներին ներկայացրեց նոր առաջարկներ, մասնավորապես՝ նոր մոդուլի մշակում, հատուկ մեթոդական ձեռնարկների կազմում, դասընթացավարների աշխատանքի արդյունավետության բարձրացման նպատակով մեթոդաբանության վերաբերյալ վերապատրաստումների կազմակերպում, առաջատար կառույցների համապատասխան մասնագետների հրավիրում և այլն: Ռեկտորն իր խոսքում հատուկ շեշտեց, որ արդյունավետ կլինի այնպիսի ձեռնարկների կազմումը, որոնցում համադրված կլինեն և՛ տեսական, և՛ պրակտիկ նյութեր: Հյուրերի համար հետաքրքրական էր նաև հեռաուսուցման նոր փաթեթների մշակման առաջարկը՝ հաշվի առնելով այդ առումով Ակադեմիայի արդեն իսկ ունեցած փորձը, մեթոդաբանությունը, նորարարական մոտեցումները:

Հյուրերը ողջունեցին հնչեցված առաջարկները և վստահեցրին, որ դրանք կքննարկվեն ու կներառվեն հաջորդ տարիների գործողությունների ծրագրում՝ համատեղ իրականացման նպատակով:

Նոյեմբերի 23-ին Արդարադատության ակադեմիայում անցկացվեց «Քաղաքացիական դատավարության հիմնախնդիրները Հայաստանի Հանրապետության և Արցախի Հանրապետության դատական պրակտիկայում և դրանց հաղթահարման ուղիները» թեմայով քննարկում, որին մասնակցում էին Ակադեմիայում այս շաբաթ վերապատրաստում անցնող դատավորները: Քննարկումը վարում էր Արցախի Հանրապետության (ԱՀ) դատավորների միության նախագահ Հասմիկ Խաչատրյանը:

Քննարկման մասնակիցներին ողջունեց Արդարադատության ակադեմիայի գիտական աշխատանքի գծով պրոռեկտոր Անահիտ Մանասյանը և շնորհակալություն հայտնեց ԱՀ դատավորների միությանն արդյունավետ համագործակցության համար: «Ինչպես ՀՀ-ում գործող ցանկացած հանրային գործառույթներ իրականացնող ինստիտուտի, այնպես էլ Ակադեմիայի համար Արցախի հետ մեր համագործակցությունն ամենաառանցքայիններից է: Այս առումով մեր իրավական համակարգերում առաջ են գալիս մի շարք հիմնախնդրային հարցեր, որոնք համատեղ լուծումներ են պահանջում և այդ լուծումներն ունեն կարևոր նշանակություն»,-նշեց պրոռեկտորը՝ հավելելով, որ քննարկումը նվիրված է ընդդատության, դատական ակտերի կատարմանն առնչվող տարատեսակ հարցերին, որոնք չափազանց կարևոր են մեր երկու հանրապետությունների համար:

Հասմիկ Խաչատրյանն իր խոսքի հենց սկզբում նշեց, որ քննարկվող հարցերը քաղաքական բնույթ չունեն, թեպետ անկախ ամեն ինչից առնչությունն ակնհայտ է: «Քանի որ հանգամանքների բերումով ունենք հայկական երկու հանրապետություն, որոնք գործում են համանման օրենսդրական դաշտում, աշխատում են համանման օրենքներով, կարգավորումները ևս համանման են, հետևաբար հայցում ենք ձեր աջակցությունը, որ հաճախակի ծագող խնդիրները կարողանանք ինչ-որ կերպ լուծել, ընդ որում՝ իրավական առումով»,-ասաց Հ. Խաչատրյանն և մանրամասն ներկայացրեց այն խնդիրները, որոնց առաջ կանգնում են դատարանները արդարադատություն իրականացնելիս:

Ակտիվ քննարկում ծավալվեց, միջազգայնորեն չճանաչված պետությունների համանման փորձն ուսումնասիրելու և համապատասխան մեխանիզմներ կիրառելու, ինչպես նաև աշխատանքային խումբ ձևավորելու և առկա խնդիրներն արդյունավետ քննարկելու հարց բարձրացվեց:

Նոյեմբերի 4-ին Արդարադատության ակադեմիայում տեղի ունեցավ հանդիսավոր միջոցառում՝ նվիրված Ակադեմիայի 2017 թվականի ունկնդիրների՝ դատախազի թեկնածությունների ցուցակում ընդգրկված անձանց մասնագիտական պատրաստման դասընթացի ավարտին:

Հանդիսությանը ներկա էին Արդարադատության ակադեմիայի կառավարման խորհրդի նախագահ, ՀՀ գլխավոր դատախազի տեղակալ Արմեն Հարությունյանը, Խորհրդի անդամներ ՀՀ գլխավոր դատախազության մեղադրանքի պաշտպանության և դատական ակտերի բողոքարկման վարչության պետ Գևորգ Բաղդասարյանը և Երևան քաղաքի դատախազ Րաֆֆի Ասլանյանը: Ակադեմիայի ռեկտոր Սերգեյ Առաքելյանը շնորհավորեց և դիպլոմներ հանձնեց Ակադեմիայի հերթական սերնդի շրջանավարտներին:

Այս տարի Արդարադատության ակադեմիայում շուրջ յոթ և կես ամսվա մասնագիտական պատրաստում է անցել դատախազների թեկնածությունների ցուցակում ընդգրկված 21 անձ, որոնցից 1-ը՝ Արցախի Հանրապետությունից:

«Լիահույս եմ՝ պրակտիկայում լավագույնս կարողանալու եք իրականացնել ձեր գործառույթները՝ ձեռք բերած գիտելիքի հիման վրա: Կարծում եմ՝ դատախազության համակարգն այս նոր շրջանավարտներով ձեռք է բերում պատրաստված, բանիմաց, կարող կադրեր»,-իր ելույթում նշեց Ս. Առաքելյանը և մաղթեց շրջանավարտներին, որ ոչ մի անհաղթահարելի խոչընդոտ չունենան թե՛ մասնագիտական ոլորտում, թե՛ անձնական կյանքում:

ՀՀ գլխավոր դատախազի, Արդարադատության ակադեմիայի կառավարման խորհրդի անունից ունկնդիր-շրջանավարտներին շնորհավորեց և հաջողություններ մաղթեց ՀՀ գլխավոր դատախազի տեղակալ Արմեն Հարությունյանը: Նրա խոսքով՝ դատախազի թեկնածուների ուսումնառության ամբողջ շրջանը ՀՀ գլխավոր դատախազության աչքի առաջ էր՝ ունկնդիրների առաջընթացը, ակտիվությունը, միավորները, գիտելիքների մակարդակը, փորձաշրջանի ընթացքում ձեռք բերած հմտությունները, հետևաբար դրանք հաշվի առնելով առաջիկայում նշանակումներ կկատարվեն:

Նշենք, որ Արդարադատության ակադեմիայի ունկնդիրների՝ դատախազի թեկնածուների ուսուցումն իրականացվել է 2017թ. փետրվարի 27-ից հոկտեմբերի 13-ը՝ (ներառյալ 4 ամիս տևողությամբ փորձաշրջանը): Ուսումնառության ընդհանուր ժամաքանակը 1070 ակադեմիական ժամ է:

Նոյեմբերի 3-ին ՀՀ քննչական կոմիտեում տեղի ունեցավ հանդիսավոր միջոցառում՝ նվիրված Արդարադատության ակադեմիայի 2017 թվականի քննիչների թեկնածությունների ցուցակում ընդգրկված անձանց 1-ին խմբի ունկնդիր-շրջանավարտների դիպլոմների հանձնմանը:

Արդեն ավանդույթ է դարձել, որ քննիչի թեկնածուներն ավարտական դիպլմների հետ միասին ստանում են նաև աշխատանքի նշանակման հրամանները. այսօրը ևս բացառություն չէր: Արդարադատության ակադեմիան ավարտեց 24 քննիչի թեկնածու, որոնք մասնագիտական պատրաստում են ստացել 7 և կես ամիս (ներառյալ փորձաշրջանը)՝ 2017 թվականի փետրվարի 20-ից հոկտեմբերի 17-ը:

ՀՀ քննչական կոմիտեի նախագահ Աղվան Հովսեփյանը շնորհավորեց շրջանավարտներին և հաջողություններ մաղթեց քննչական աշխատանքում: Դիմելով քննիչի թեկնածուներին՝ Ա. Հովսեփյանն ասաց. «Քննչական կոմիտեի հիմնական գործառույթները դուք եք կատարում, ուստի ուզում եմ՝ ամեն օր ձեր աշխատանքում աչքի ընկնենք գիտելիքով, կազմակերպական ունակություններով»:

Արդարադատության ակադեմիայի ռեկտոր Սերգեյ Առաքելյանը շնորհավորեց բոլոր ներկաներին՝ քննիչի թեկնածուների հերթական սերնդի ուսուցման ավարտի կապակցությամբ: «Այսօրվա պայմաններում միայն համարձակ մարդն է ընդունակ ընտրել քննիչի մասնագիտությունը, որովհետև քաջ գիտակցում է՝ ինչ պատասխանատվություն է կրելու իր ուսերին:

Տարբեր առիթներով, տարբեր լսարաններում միշտ ասում եմ՝ քրեական արդարադատության հիմքում հենց քննիչի գործառույթների իրականացումն է, դրանք որակով իրականացնելուց է հաճախ կախված արդարադատության հաղթանակը»,-նշեց Սերգեյ Առաքելյանը: Ռեկտորը շրջանավարտներին մաղթեց բարի երթ և անփորձանք ծառայություն:

Հանդիսավոր միջոցառման ընթացքում ՀՀ քննչական կոմիտեի նախագահի հրամանով պարգևատրվեցին Արդարադատության ակադեմիայի մի խումբ դասախոսներ: Վահե Ենգիբարյանը, Սերգեյ Մարաբյանը, Դավիթ Թումասյանը պարգևատրվեցին «Համագործակցության համար» մեդալներով, իսկ Տիգրան Հովհաննիսյանը՝ «Անբասիր ծառայության համար» չորրորդ աստիճանի մեդալով:

ՀՀ քննչական կոմիտեի նախագահի կողմից շնորհակալագրեր ստացան Ակադեմիայում քննությունների արդյունքների գնահատման և բողոքարկման հանձնաժողովի անդամներ Տիգրան Պողոսյանը և Գոհար Հակոբյանը՝ Քննչական կոմիտեի ծառայողների թեկնածությունների ցուցակը համալրած անձանց մասնագիտական պատրաստմանն ուղղված աշխատանքներին ակտիվ և արդյունավետ մասնակցություն ունենալու համար:

Նոյեմբերի 1-ին Արդարադատության ակադեմիայում մեկնարկել է եռօրյա վերապատրաստում քննիչների համար՝ նվիրված բաց աղբյուրների կիրառմանը: Մասնակցում են ՀՀ ազգային անվտանգության ծառայության, ՀՀ հատուկ քննչական ծառայության, ՀՀ քննչական կոմիտեի քննիչները, նաև ներկայացուցիչներ ՀՀ արդարադատության նախարարությունից:

Վերապատրաստումն իրականացվում է Ակադեմիայի և ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության (ԹՊԻՀ) գրասենյակի հետ համատեղ, իսկ դասախոսում են Միացյալ Նահանգների մասնագետները՝ Հետաքննությունների դաշնային բյուրոյից ժամանած փորձագետ, գործառնությունների մասնագետ Ամիրա Լաուրերը, ինչպես նաև ԹՊԻՀ գրասենյակի իրավապահ հարցերով ավագ խորհրդատու Ադի Հոլովեյը:

Ակադեմիայի գիտական աշխատանքի գծով պրոռեկտոր Անահիտ Մանասյանը ողջունեց մասնակիցներին և շնորհակալություն հայտնեց ՀՀ-ում ԱՄՆ դեսպանության գործընկերներին արդյունավետ համագործակցության համար՝ հիշեցնելով, որ վերջին մի քանի ամիսներին համատեղ ջանքերի շնորհիվ բազմաթիվ ձեռնարկներ են կյանքի կոչվել:

Խոսելով միջոցառման բովանդակային հարցերի մասին՝ պրոռեկտորը նշեց. «Գաղտնիք չէ, որ կյանքի զարգացման արդի փուլում սոցիալական ցանցերը, էլեկտրոնային տարատեսակ աղբյուրները քրեական գործերի քննության համար ունեն կարևոր նշանակություն, հետևաբար հիշյալ թեմատիկայով նման վերապատրաստումները, քննարկումները, սեմինարները չափազանց կարևոր են»:

ԱՄՆ դեսպանության ներկայացուցիչ Ադի Հոլովեյն իր խոսքում շեշտեց, որ երեք օրերի ընթացքում մանրամասն կներկայացվի ԱՄՆ-ում քննիչների կողմից բաց աղբյուրների կիրառման փորձառությունը, տեղեկատվության հայթայթման և օգտագործման մեթոդները, առանձնահատկությունները: Ավելին՝ նրա խոսքով Հայաստանը և ԱՄՆ-ն կարող են ավելի շատ համագործակցել այս ոլորտում: