Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Հոկտեմբերի 21-ին Արդարադատության ակադեմիայի ռեկտոր Սերգեյ Առաքելյանը դիպլոմներ հանձնեց ՀՀ քննչական կոմիտեի ինքնավար պաշտոն զբաղեցնող անձանց (քննիչների) թեկնածությունների 2022 թվականի ցուցակում ընդգրկված երրրորդ խմբի ունկնդիրներին: Դիպլոմ ստացավ 29 շրջանավարտ:

Ռեկտորը շնորհավորեց ունկնդիրներին և հույս հայտնեց, որ նրանք, ընտրելով քննիչի մասնագիտությունը, պատրաստ են հաղթահարել սպասվելիք բոլոր բարդություններն ու խոչընդոտները: «Ձեր կատարած աշխատանքի որակից է կախված, թե որքանով հասարակությունը կվստահի պետությանը քրեական արդարադատության իրականացման գործում»,- նշեց ռեկտորը և բարի երթ ու անփորձ ծառայություն մաղթեց շրջանավարտներին:

 Հոկտեմբերի 13-ին Արդարադատության ակադեմիայում անցկացվեց «Քովիդ-19-ի ազդեցությունը մարդու իրավունքների վրա» ուղեցույցի շնորհանդես և կլոր սեղան-քննարկում: Ուղեցույցը մշակվել և հրատարակվել է Ակադեմիայի և Կոնրադ Ադենաուեր հիմնադրամի համագործակցությամբ: 

«Այսօրվա միջոցառումը Ակադեմիայի և Հիմնադրամի արդյունավետ համագործակցության հերթական դրսևորումներից է»,-բացման խոսքում նշեց ռեկտոր Սերգեյ Առաքելյանը՝ հավելելով, որ նույնիսկ կարող է կարծիք կազմվել, թե քննարկումը և ձեռնարկը ժամանակավրեպ են, բայց համավարակը շարունակում է սպառնալիք հանդիսանալ մարդկանց կյանքի և առողջության համար: Ռեկտորի խոսքով՝ ուղեցույցը մշակելիս հաշվի են առնվել հարցեր, որոնք վերաբերում են արտակարգ իրավիճակներում մարդու իրավունքների սահմանափակման համաչափության հիմնախնդիրներին և դրանց հնարավոր լուծումներին:

Միջոցառմանը ելույթ ունեցավ Կոնրադ Ադենաուեր հիմնադրամի «Քաղաքական երկխոսություն Հարավային Կովկաս» տարածաշրջանային ծրագրի ղեկավար Շտեֆան Մալերիուսը և իր հերթին ընդգծեց ուղեցույցում արծարծվող թեմաների կարևորությունը ժողովրդավարական հասարակություններում իրավունքի գերակայության պահպանման գործում:

Զեկույցներով հանդես եկան Հիմնադրամի Հարավարևելյան Եվրոպայի «Իրավական պետություն» ծրագրի ղեկավար Պավել Ուսվատովը (հեռավար), ազգային փորձագետներ և Ակադեմիայի դասընթացավարներ Նինա Փիրումյանը և Աննա Մարգարյանը, Միջազգային իրավական հարցերով ներկայացուցչի գրասենյակի հետազոտությունների և զարգացման վարչության պետ Անահիտ Հարությունյանը: 

Քովիդ-19 համավարակի պայմաններում մարդու իրավունքների եվրոպական կոնվենցիայի իրականացման վերաբերյալ ուղեցույցի շնորհանդես և կլոր սեղան-քննարկմանը մասնակցում էին նաև Ակադեմիայի աշխատակազմի ներկայացուցիչներ և ունկնդիրներ՝ դատավորներ, դատավորների թեկնածուների հավակնորդներ, դատախազներ: 

Հոկտեմբերի 3-ից՝ մեկշաբաթյա այցով, Արդարադատության ակադեմիայի ներկայացուցիչները Ստոկհոլմում էին՝ Շվեդիայի կառավարության կողմից ֆինանսավորվող «Հայաստանի դատավորների կարողությունների զարգացում` դատական համակարգի նկատմամբ նոր ակնկալիքներին համապատասխանելու և հանրային վստահությունն ամրապնդելու նպատակով» երկարամյա ծրագրի շրջանակում: 

Պատվիրակության կազմում էին Ակադեմիայի ռեկտոր Սերգեյ Առաքելյանը, պրոռեկտոր Մարգարիտ Ամյանը, Գիտահետազոտական և ծրագրամեթոդական աշխատանքների կազմակերպման բաժնի ղեկավար Անահիտ Գալստյանը,  Հեռաուսուցման և ՏՏ դեպարտամենտի ղեկավար Արտաշես Խուրշուդյանը, ՀՀ բարձրագույն դատական խորհրդի անդամներ, դատավորներ, ինչպես նաև դատական դեպարտամենտի աշխատակիցներ: 

Աշխատանքային այցի ընթացքում տեղի են ունեցել հանդիպումներ Շվեդիայի ազգային դատարանների ադմինիստրացիայի նախագահի, աշխատակցիների և փորձագետների, Աթթունդայի շրջանային դատարանի նախագահի, դատավորների, ինչպես նաև Շվեդիայի դատական վերապատրաստումների ակադեմիայի ղեկավարության հետ, և քննարկվել են ուսումնական գործընթացի կազմակերպմանն առնչվող մի շարք հարցեր: 

Հայաստանյան պատվիրակությունը մասնակցել է նաև Աթթունդայի շրջանային դատարանում կայացած դատական նիստի, ծանոթացել դատավորների կարողությունների զարգացման շվեդական փորձին, մեդիայի հետ հաղորդակցության ռազմավարությանը:

Հանդիպումների ընթացքում կողմերը միմյանց հետ կիսվել են երկու երկրների ունեցած լավագույն փորձով, քննարկել համագործակցության շրջանակում իրականացվելիք ծրագրերը:

Ակադեմիայի և Շվեդիայի ազգային դատարանների ադմինիստրացիայի միջև համագործակցությունն ամրապնդված է հուշագրով, որի համաձայն՝ իրականացվում է դատական իշխանության նկատմամբ հանրային վստահության բարձրացմանը, դատավորների շրջանում էթիկայի, հակակոռուպցիոն և բարեվարքությանն առնչվող հարցերի շուրջ գիտելիքների ամրապնդմանը, լրատվամիջոցների հետ ակտիվորեն հաղորդակցվելու կարողությունների զարգացմանը և ՀՀ-ում արդարադատության մատչելիության և արդյունավետության ամրապնդմանը ուղղված ծրագիր:

Արդարադատության ակադեմիայի գիտական խորհրդի երաշխավորությամբ լույս է տեսել  իրավաբանական գիտությունների թեկնածու, Արդարադատության ակադեմիայի դասընթացավար, ԵՊՀ իրավագիտության ֆակուլտետի դասախոս, Սնանկության գործով կառավարիչների որակավորման և ՀՀ մրցակցության պաշտպանության հանձնաժողովների անդամ Տիգրան Մարկոսյանի ընդհանուր խմբագրությամբ և համահեղինակությամբ «Սնանկության վարույթը Հայաստանի Հանրապետությունում» վերտառությամբ գիտագործնական ձեռնարկը:

Ձեռնարկը մշակվել է Վերակառուցման և զարգացման եվրոպական բանկի կողմից իրականացվող «Սնանկության մասին Հայաստանի Հանրապետության օրենքի և ֆինանսական առողջացման ոլորտի ամրապնդման շրջանակային ծրագրի» շրջանակներում: 

Հրատարակությունը կարող է օգտակար լինել սնանկության գործով կառավարիչների, փաստաբանների, դատավորների, ինչպես նաև սնանկության հիմնախնդիրներով հետաքրքրվող այլ անձանց համար։ Աշխատությունը կարող է ծառայել նաև որպես ուսումնական նյութ:

Ձեռնարկը հասանելի է Ակադեմիայի պաշտոնական կայքում, հետևյալ հղմամբ՝ https://bit.ly/3By8gz7 

Սեպտեմբերի 20-ին Արդարադատության ակադեմիայում անցկացվեց միջազգային համաժողով՝ նվիրված «Քրեական վարույթն այն գործերով, որոնք ավարտվել են համաձայնեցման վարույթով» և «Արագացված դատաքննության կարգը և դատական որոշումների ընդունման հատուկ կարգը» թեմաներին: 

«Այս համաժողովի նպատակն է համատեղ աշխատանքներ իրականացնել՝ բարելավելու դատավորների ուսումնառության որակը, ինչպես նաև բարձրացնելու իրավակիրառման արդյունավետության մակարդակը մեր երկրներում»,- բացման խոսքում նշեց ռեկտոր Սերգեյ Առաքելյանը՝ շնորհակալություն հայտնելով օտարերկրյա գործընկերներին նախաձեռնության և միջոցառման կայացմանը նպաստելու համար: 

 «Համաժողովի թեման խիստ արդիական է ամբողջ աշխարհում, անհրաժեշտ և կարևոր: Ես ուրախ եմ, որ, չնայած դժվարին ժամանակներին, մենք հնարավորություն ունենք քննարկելու՝ ինչպես կարող ենք բարելավել իրավակիրառ գործունեությունը և պաշտպանել մեր քաղաքացիների իրավունքները»,- նշեց Ռուսաստանի արդարադատության պետական համալսարանի ներկայացուցիչ Օքսանա Կաչալովան: 

Բելառուսի պետական համալսարանի ներկայացուցիչ Եկատերինա Նովիկովան իր հերթին շնորհակալություն հայտնեց բոլոր այն անձանց, ովքեր ջանք չխնայեցին համաժողովի կայացման համար և հույս հայտնեց, որ համաձայնեցման վարույթով դատաքննության վերաբերյալ Բելառուսի փորձի ներկայացումը օգտակար կլինի: 

Զեկույցներով հանդես եկան Օքսանա Կաչալովան, Եկատերինա Նովիկովան, Ակադեմիայի դասընթացավար, Երևան քաղաքի առաջին ատյանի ընդհանուր իրավասության դատարանի դատավոր Ջոն Հայրապետյանը, Ակադեմիայի գիտահետազոտական և ծրագրամեթոդական աշխատանքների կազմակերպման բաժնի մասնագետ Արման Բայադյանը: 

Համաժողովի ընթացքում ներկաները՝ Ակադեմիայի ներկայացուցիչներ, դատավորներ, դատախազներ և քննիչներ, հնարավորություն ունեցան հարցեր ուղղել բանախոսներին և մասնակցել քննարկումներին: 

Տեսանյութ https://www.youtube.com/watch?v=8pIYYePB1z0

Սեպտեմբերի 19-ին Արդարադատության ակադեմիայում մեկնարկեց ՀՀ քննչական կոմիտեում ինքնավար պաշտոն զբաղեցնող անձանց (քննիչների) վերապատրաստումը: 

Նախատեսվում է վերապատրաստում անցկացնել 13 խմբի ունկնդիրների համար, այդ թվում՝ ղեկավար պաշտոն զբաղեցնող քննիչների: 

Վերապատրաստումն իրականացվում է ուսուցման ծրագրի համաձայն, որը մշակվել է ՀՀ քննչական կոմիտեի նախագահի համապատասխան հրամանի հիման վրա: Ուսուցման ծրագիրը ուղղված է քննիչների մասնագիտական գիտելիքների և հմտությունների շարունակական կատարելագործմանը:

Սեպտեմբերի 16-ին Արդարադատության ակադեմիա այցելեց «Տեխնիկական աջակցություն արդարադատության բարեփոխումներին և բյուջետային աջակցության իրականացմանը» ծրագրի պատվիրակությունը՝ Թոմաս Թոմսենի ղեկավարությամբ:

Ակադեմիայի պրոռեկտոր Մարգարիտ Ամյանը ողջունեց հյուրերին և շնորհակալություն հայտնեց համագործակցության շրջանակներում արդեն իսկ ձեռք բերված արդյունքների համար:

Կողմերը քննարկեցին նոր նախաձեռնությունների իրականացման ուղղությունները:

Սեպտեմբերի 13-ից 14-ը Արդարադատության ակադեմիայում անցկացվեց վերապատրաստման դասընթաց՝ նվիրված «Ուժեղ ցավի տարրը խոշտանգման հասկացությունում» ուղեցույցին: Դասընթացն իրականացվեց Ակադեմիայի և Ռաուլ Վալլենբերգի անվան մարդու իրավունքների և մարդասիրական իրավունքի ինստիտուտի եվրոպական գրասենյակի միջև ստորագրված համագործակցության հուշագրի շրջանակում: 

Արդարադատության ակադեմիայի ռեկտոր Սերգեյ Առաքելյանի առաջարկով ներկաները մեկ րոպե լռությամբ հարգեցին հայ-ադրբեջանական սահմանագծին հերոսաբար նահատակված հայորդիների հիշատակը: 

Ռեկտորը շնորհակալություն հայտնեց գործընկերներին արդյունավետ համագործակցության համար: «ՀՀ քրեական օրենսգիրքը ունի մի շարք հանցակազմեր, որոնք առնչվում են խոշտանգմանը և դրա տարբեր դրսևորումներին: Այդ իմաստով շատ եմ կարևորում մշակված ուղեցույցի ներմուծումը մեր ուսումնական գործընթաց»: 

Ռաուլ Վալլենբերգի անվան մարդու իրավունքների և մարդասիրական իրավունքի ինստիտուտի եվրոպական գրասենյակի տնօրեն Զուզանա Զալանովան իր հերթին շնորհակալություն հայտնեց պատշաճ ընդունելության և դասընթացի կազմակերպման համար և հույս հայտնեց, որ ուղեցույցը կարևոր ներդրում կլինի Ակադեմիայի համար: 

Վերապատրաստման դասընթացին մասնակցում էին դատախազներ, դատախազի թեկնածուներ, դատավորներ և դատավորի թեկնածուների հավակնորդներ: 

Դասընթացն անցկացրեցին Ակադեմիայի դասընթացավար, ՀՀ գլխավոր դատախազի տեղակալ Սրբուհի Գալյանը, Ակադեմիայի դասընթացավար, Կոտայքի մարզի առաջին ատյանի ընդհանուր իրավասության դատարանի դատավոր Դիանա Ղուկեյանը և դասախոս, բժիշկ Լաուրա Գասպարյանը (ՄԻՊ գրասենյակ):

Սեպտեմբերի 13-ին Արդարադատության ակադեմիայի ռեկտոր Սերգեյ Առաքելյանն ընդունեց Ռաուլ Վալլենբերգի անվան մարդու իրավունքների և մարդասիրական իրավունքի ինստիտուտի եվրոպական գրասենյակի տնօրեն Զուզանա Զալանովային և ավագ խորհրդատու, գիտահետազոտող Մորթեն Քոխ Անդերսենին:

Ռեկտորը ողջունեց հյուրերի՝ համագործակցության խորացմանն ուղղված ջանքերը՝ երկու կառույցների միջև ստորագրված հուշագրի շրջանակում:

Զուզանա Զալանովան շնորհակալություն հայտնեց սեպտեմբերի 13-14-ին Ակադեմիայի հետ համատեղ անցկացվող վերապատրաստումը պատշաճ կազմակերպելու համար: 

Հանդիպման ընթացքում կողմերը քննարկեցին առաջիկա համագործակցության ուղղությունները և դրանց իրականացման հնարավորությունները:
 

Սեպտեմբերի 12-ին Արդարադատության ակադեմիայում մեկնարկեց դատավորների վերապատրաստումը, որն իրականացվում է Ակադեմիայի կողմից մշակված ուսուցման ծրագրի համապատասխան՝ յուրաքանչյուր դատավորի համար 80 ակադեմիական ժամ ընդհանուր ժամաքանակով:

Նախատեսվում է վերապատրաստում անցկացնել 13 խմբի ունկնդիրների համար: