Քննարկում՝ «Բռնության ենթարկված կանանց հարցաքննության էթիկա» թեմայով
Դեկտեմբերի 2-ին Արդարադատության ակադեմիայում անցկացվեց քննարկում «Բռնության ենթարկված կանանց հարցաքննության էթիկա» թեմայով՝ «Գենդերային բռնության դեմ պայքարի 16-օրյա ակտիվության համաշխարհային արշավ»-ի շրջանակում: Միջոցառումը նախաձեռնել էր ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության (ԹՊԻՀ) գրասենյակը՝ Ակադեմիայի և ՀՀ քննչական կոմիտեի հետ համատեղ:
Ակադեմիայի պրոռեկտոր Մարգարիտ Ամյանը ողջունեց ներկաներին, ընդգծեց թեմայի կարևորությունը և շեշտեց, որ դատավորների, դատախազների և քննիչների վերապատրաստման ծրագրում ներառված են նաև գենդերային հավասարության, ընտանեկան և կանանց նկատմամբ բռնության դեմ պայքարի և կանխարգելման վերաբերյալ պարտադիր առարկաներ:
«Պայքարի արդյունավետության համար անհրաժեշտ է իրավապահ մարմինների և քաղաքացիական հասարակության համագործակցությունը, որպեսզի անտարբերության սառույցը կոտրվի»,-նշեց ՀՀ քննչական կոմիտեի նախագահի տեղակալ Արսեն Այվազյանը՝ անդրադառնալով Կոմիտեի կողմից ընտանեկան բռնության դեմ իրականացվող պայքարին և արձանագրված արդյունքներին:
ԹՊԻՀ հայաստանյան ծրագրի ղեկավար Ալեքսիս Հաֆթվանին իր խոսքում կարևորեց բոլոր կարող ուժերի միավորումը բռնության դեմ պայքարում:
Քննարկմանը մասնակցում էին քննիչներ, ՀԿ ներկայացուցիչներ, իրավապաշտպաններ:
