Արդարադատության Ակադեմիա - ԱՐԴԱՐԱԴԱՏՈւԹՅԱՆ ԱԿԱԴԵՄԻԱ

Ապրիլի 8-ին Արդարադատության ակադեմիայում անցկացվեց սեմինար «Բարեվարքությունը դատական գործերի և դատարանների կառավարման գործում» թեմայով: Սեմինարների այս շարքն իրականացնում է Ակադեմիան՝ Միջազգային իրավական համագործակցության գերմանական հիմնադրամի (IRZ) հետ համատեղ՝ «Հայաստանում արդարադատության համակարգի ամրապնդում» ծրագրի շրջանակում:

Սեմինարն անցկացնում էր Լատվիայի Վերաքննիչ դատարանի դատավոր Սվետլանա Բելյաևան: Մասնակցում էին ՀՀ տարբեր ատյանների դատարանների դատավորներ, դատարանների նախագահներ:

Մարտի 17-ից ապրիլի 7-ը Արդարադատության ակադեմիայում անցկացվեց սեմինարների շարք՝ նվիրված ՀՀ քրեական դատավարության նոր օրենսգրքի առանցքային հարցերին: Այն իրականություն դարձավ Ակադեմիայի և Եվրոպայի խորհրդի (ԵԽ) համագործակցության արդյունքում՝ ԵԽ «Աջակցություն քրեական արդարադատության բարեփոխումներին և եվրոպական չափանիշների կիրառման ներդաշնակեցումը Հայաստանում» ծրագրի շրջանակում, որը ֆինանսավորվում է Եվրոպական միության (ԵՄ) և ԵԽ «Գործընկերություն հանուն լավ կառավարման» ծրագրի կողմից։

Սեմինարները, որոնք նախատեսված էին դատավորների համար, վարում էին Ակադեմիայի դասընթացավարներ, ԵԽ ազգային փորձագետներ Հրայր Ղուկասյանը և Դավիթ Մելքոնյանը:

Ապրիլի 6-ին Արդարադատության ակադեմիայի ներկայացուցիչները մասնակցել են «Արդար դատաքննության իրավունքը՝ իրավական պետության զարգացման գրավական» թեմայով կլոր-սեղան քննարկմանը: Այն կազմակերպել էր Երևանի պետական համալսարանը՝ «Կոնրադ Ադենաուեր» հիմնադրամի հետ համատեղ՝ «Քաղաքական երկխոսություն Հարավային Կովկաս» տարածաշրջանային ծրագրի շրջանակում:

Մասնակցում էին դատավորներ, ներկայացուցիչներ ՀՀ գլխավոր դատախազությունից, ՀՀ փաստաբանների պալատից, ԵՊՀ իրավագիտության ֆակուլտետից, «Կոնրադ Ադենաուեր» հիմնադրամից:

Ապրիլի 4-ին Արդարադատության ակադեմիայում մեկնարկեց դատավորների թեկնածուների հավակնորդների ցուցակում ընդգրկված անձանց մասնագիտական պատրաստումը:

Խմբում ընդգրկված է քրեական և քաղաքացիական մասնագիտացումներով 21 ունկնդիր: Ուսումնառության տևողությունը 7 ամիս է՝ ներառյալ 4 ամիս տևողությամբ փորձաշրջանը: Յուրաքանչյուր մասնագիտացմամբ ունկնդիրների համար ուսումնառության ընդհանուր ժամաքանակը 1026 ակադեմիական ժամ է:

Ապրիլի 2-ից 3-ը Ծաղկաձորում անցակացվեց սեմինար՝ նվիրված առաջնորդությանը և կառավարմանը։ Մասնակցում էին ՀՀ տարբեր ատյանների դատարանների դատավորներ, դատարանների նախագահներ։

Սեմինարների այս շարքն իրականացնում է Ակադեմիան՝ Միջազգային իրավական համագործակցության գերմանական հիմնադրամի (IRZ) հետ համատեղ՝ «Հայաստանում արդարադատության համակարգի ամրապնդում» ծրագրի շրջանակում:

Երկօրյա սեմինարը վարում էին Լատվիայի վերաքննիչ դատարանի դատավոր, ծրագրի միջազգային փորձագետ Սվետլանա Բելյաևան և դատական համակարգում հաղորդակցության և առաջնորդության գծով միջազգային փորձագետ Իրմա Օկրոպիրիձեն:

Սեմինարի ընթացքում մասնակիցները քննարկեցին դատարանների արդյունավետ կառավարմանն առնչվող բազմաթիվ հարցեր, ինչպես նաև գործնական վարժությունների միջոցով փորձեցին զարգացնել առաջնորդության և կառավարման հմտություններ, դիտարկեցին առաջնորդի և կառավարչի գործունեության յուրահատկությունները։

Ապրիլի 1-ին Արդարադատության ակադեմիայի ռեկտոր Սերգեյ Առաքելյանը հանդիպեց Ակադեմիայի ունկնդիրներին՝ դատավորների թեկնածուների հավակնորդների ցուցակում ընդգրկված անձանց: Խմբում ընդգրկված է քրեական և քաղաքացիական մասնագիտացումներով 21 ունկնդիր: Մասնագիտական պատրաստումը մեկնարկելու է ապրիլի 4-ին:

Ռեկտորը ողջունեց ներկաներին և շնորհավորեց Ակադեմիայի ունկնդիր դառնալու կապակցությամբ՝ մաղթելով արդյունավետ ուսումնառություն: Ռեկտորը ներկայացրեց Ակադեմիայի կառավարման խորհրդի կողմից հաստատված ուսուցման ծրագիրը, ըստ որի անցկացվելու է ունկնդիրների մասնագիտական պատրաստումը: Քննարկվեցին նաև ուսումնական գործընթացին վերաբերող բովանդակային և կազմակերպական մի շարք հարցեր:

Արդարադատության ակադեմիայի ռեկտոր Սերգեյ Առաքելյանի 2022 թվականի մարտի 31-ի հրամանով Մարգարիտ Ամյանը նշանակվել է Ակադեմիայի պրոռեկտոր:

Ստորև ներկայացնում ենք Մարգարիտ Ամյանի կենսագրությունը.

Մարգարիտ Զավենի Ամյան
Ծննդյան տարեթիվ, ամսաթիվ, ծննդավայր
1986 թ., սեպտեմբերի 12, ք. Դիլիջան

Կրթություն
2002 – 2006 թթ. ԵՊՀ իրավագիտության ֆակուլտետի բակալավրիատ (ավարտել է գերազանցությամբ)
2006-2008 թթ. ԵՊՀ իրավագիտության ֆակուլտետի մագիստրատուրա
2010 թ. Բեռլինի Հերթի կառավարման դպրոցում վերապատրաստման դասընթացներ (Գերմանիա)
2020-2022 թթ. Հայաստանի Ամերիկյան համալսարանի իրավագիտության ֆակուլտետի մագիստրարտուրա

Աշխատանքային գործունեություն
2022 թ․ ապրիլի 1-ից Արդարադատության ակադեմիայի պրոռեկտոր
2021-2022 թթ. ՀՀ բարձրագույն դատական խորհրդի աշխատակազմի արտաքին կապերի և արարողակարգի վարչության պետ
2018-2021 թթ.- ՀՀ բարձրագույն դատական խորհրդի աշխատակազմի արտաքին կապերի և արարողակարգի վարչության գլխավոր մասնագետ
2017-2018 թթ. Դատական դեպարտամենտի միջազգային համագործակցության և ՄԻԵԴ ակտերի վարչության միջազգային համագործակցության բաժնի պետ
2015 - 2016 թթ. Դատական դեպարտամենտի միջազգային համագործակցության և ՄԻԵԴ ակտերի վարչության միջազգային համագործակցության բաժնի գլխավոր մասնագետ
2010 - 2015 թթ. Դատական դեպարտամենտի կազմակերպաիրավական վարչության գլխավոր մասնագետ
2009 - 2010 թթ. ՀՀ վճռաբեկ դատարանի իրավական փորձաքննությունների վարչության գլխավոր մասնագետ
2008 - 2009 թթ. ՀՀ վճռաբեկ դատարանի իրավական փորձաքննությունների վարչության մասնագետ
2008 փետրվար – 2008 հոկտեմբեր ՀՀ վճռաբեկ դատարանի իրավական փորձաքննությունների վարչության կրտսեր մասնագետ
2007 - 2008 փետրվար ՀՀ վճռաբեկ դատարանի դատական նիստերի քարտուղար

Օտար լեզուների իմացություն
Ռուսերեն, անգլերեն

Այլ տեղեկություններ
Մի շարք միջազգային համաժողովների մասնակից
Արդարադատության ակադեմիայի գիտական խորհրդի անդամ
«Բանբեր Արդարադատության ակադեմիայի» գիտագործնական եռալեզու հանդեսի գլխավոր խմբագրի տեղակալ

Պարգևներ
Ռուսաստանի դաշնության Գերագույն դատարանի հուշամեդալ
Դատական դեպարտամենտի աշխատակիցների միության արհեստակցական կազմակերպության շնորհակալագիր
Շնորհվել է դատական ծառայության երկրորդ դասի խորհրդականի դասային աստիճան:

Ընտանեկան դրություն
Ամուսնացած է, ունի մեկ որդի և մեկ դուստր:

Ապրիլի 1-ին Արդարադատության ակադեմիայում անցկացվեց սեմինար՝ նվիրված հուզական բանականությանը: Սեմինարների այս շարքն իրականացնում է Ակադեմիան՝ Միջազգային իրավական համագործակցության գերմանական հիմնադրամի (IRZ) հետ համատեղ՝ «Հայաստանում արդարադատության համակարգի ամրապնդում» ծրագրի շրջանակում:

Սեմինարը, որին մասնակցում էին դատավորներ և դատախազներ, վարում էր դատական համակարգում հաղորդակցության և առաջնորդության գծով միջազգային փորձագետ Իրմա Օկրոպիրիձեն:

Մարտի 29-ին Արդարադատության ակադեմիայում ռեկտոր Սերգեյ Առաքելյանը և Եվրասիական տնտեսական միության (ԵԱՏՄ) դատարանի նախագահ Էռնա Հայրիյանը ստորագրեցին համագործակցության հուշագիր:

Ռեկտորը ջերմորեն ողջունեց ԵԱՏՄ դատարանի պատվիրակությանը՝ դատավորներ Արմեն Թումանյանին (Հայաստանի Հանրապետություն), Կոնստանտին Չայկային (Ռուսաստանի Դաշնություն), Դենիս Կոլոսին (Բելառուս), Գալինա Սկրիպկինային (Ղրղզստան)՝ ներկայացնելով մի շարք դրական արդյունքներ, որոնք արձանագրվել են համագործակցության շրջանակում: «Այսօր նշանակալի օր է, քանի որ երկու կառույցների միջև առկա համագործակցությունը դրվում է իրավական հիմքերի վրա»,-նշեց ռեկտորը:

Էռնա Հայրիյանն իր հերթին երախտագիտություն հայտնեց ջերմ ընդունելության համար և հպարտությամբ նշեց, որ համագործակցությունն առավել մեծ արդյունավետությամբ շարունակվելու է նաև հետագայում:

Միջոցառումից հետո հյուրերը Ակադեմիայի ունկնդիրների և աշխատակազմի համար հանդես եկան «Ինտեգրացիոն գործընթացները իրավակիրառ գործունեության մեջ» թեմայով դասախոսությամբ:
Հյուրերը նաև շրջեցին Ակադեմիայում, ծանոթացան շենքային պայմաններին:

Մարտի 28-ին Արդարադատության ակադեմիա այցելեց ՀՀ-ում ԱՄՆ դեսպան Լին Թրեյսին: Դեսպանը, ռեկտոր Սերգեյ Առաքելյանի ուղեկցությամբ, այցելեց Հայ-ամերիկյան բարեկամության նախասրահ, ծանոթացավ դեսպանության ֆինանսավորմամբ նորոգված և տեխնիկապես հագեցած լսարանի պայմաններին: Այնուհետև դեսպանի մասնակցությամբ անցկացվեց հանդիսավոր միջոցառում, որին ավարտական վկայականներ ստացան այն դատավորները, դատախազներն ու քննիչները, որոնք հաջողությամբ ավարտել են դասընթացավարների վերապատրաստումը: Այն անցկացվել է Ակադեմիայի, Թմրամիջոցների դեմ պայքարի և իրավապահ համագործակցության (ԹՊԻՀ/INL) բյուրոյի և Արևելք-արևմուտք կառավարման ինստիտուտի հետ համագործակցությամբ՝ «Արդարադատության ակադեմիայի ուսումնական ծրագրերի մշակում Հայաստանում» ծրագրի շրջանակում:

Միջոցառմանը մասնակցում էին ԹՊԻՀ տնօրեն Ալեքսիս Հաֆթվանին, ԹՊԻՀ «Քրեական արդարադատության բարեփոխումների» ծրագրի ղեկավար Քրիստինա Աֆոյանը, Արևելք-արևմուտք կառավարման ինստիտուտի ղեկավարը, գործընկերներ ԵՊՀ-ի իրավագիտության ֆակուլտետից, ուրիշներ:

Ռեկտորն իր խոսքում մեծապես կարևորեց դեսպանատան հետ համագործակցությունը և արձանագրված դրական արդյունքները, որոնք հետագայի համար ևս լավ հիմք են: Նաև շնորհակալություն հայտնեց փոխադարձ վստահելիության ու պատրաստակամության մթնոլորտում իրականացվող փոխգործակցության համար:

Դեսպանը շնորհավորեց դասընթացավարներին վերապատրաստումը հաջողությամբ ավարտելու կապակցությամբ, նշելով, որ համատեղ մշակված թեմաներն ու դասընթացները չափազանց կարևոր են, քանի որ վերաբերում են մարդու իրավունքերի պաշտպանությանը և կոռուպցիայի դեմ պայքարին:

Ներկաները երախտագիտություն հայտնեցին արդյունավետ համագործակցության համար: