Արդարադատության ակադեմիայի ռեկտորը ճանաչողական այցով Շվեյցարիայում էր
Դեկտեմբերի 8-ից՝ քառօրյա այցով, Արդարադատության ակադեմիայի ռեկտոր Սերգեյ Առաքելյանը Ժնևում էր: Այցը կազմակերպվել էր Անվտանգության ոլորտի կառավարման Ժնևյան կենտրոնի (DCAF) կողմից՝ «Անվտանգության ոլորտի կառավարման և վերահսկողության խթանումը Հայաստանում» ծրագրի շրջանակում:
Պատվիրակության կազմում էին Հայաստանի Հանրապետության կառավարության և Ազգային ժողովի ներկայացուցիչներ:
Ծրագրի հիմնական նպատակներն են՝ միջազգային նորմերին, արժեքներին և լավագույն փորձին համահունչ՝ խորացնել փոխըմբռնումն ու համագործակցությունը անվտանգության և պաշտպանության կառավարման, ինչպես նաև ժողովրդավարական վերահսկողության ոլորտներում, մասնակիցներին հնարավորություն ընձեռել ծանոթանալու Շվեյցարիայի համապատասխան հաստատությունների գործունեությանը:
Միջոցառման շրջանակում ռեկտոր Սերգեյ Առաքելյանը նախագահեց նիստերից մեկը՝ «Անվտանգության ոլորտը և դատական հսկողությունը և վերահսկողությունը» խորագրով:
Հանդիպումների ընթացքում կողմերն իրականացրին փորձի փոխանակում, քննարկեցին համագործակցությանն առնչվող հարցեր:
