Արդարադատության ակադեմիայի պրոռեկտորը մասնակցել է Ստրասբուրգում կայացած միջազգային համաժողովին
2026 թվականի հոկտեմբեր ամսին Արդարադատության ակադեմիայի պրոռեկտոր Լիանա Սերոպյանը մասնակցել է Ստրասբուրգում (Ֆրանսիա) կայացած «Կանանց արդարադատության մատչելիությունը Արևմտյան Բալկաններում» (Women's access to justice in the Western Balkans) ծրագրի ամփոփիչ համաժողովին:
Եվրոպայի խորհրդի և Եվրոպական միության համատեղ նախաձեռնությամբ կազմակերպված երկօրյա համաժողովը մեկ հարթակում էր համախմբել դատաիրավական ոլորտի մասնագետների, դատավորների, դատախազների, ինչպես նաև դատական ուսուցման հաստատությունների և միջազգային կառույցների առաջատար փորձագետների ինչպես Արևմտյան Բալկանների, այնպես էլ Արևելյան գործընկերության երկրներից:
Մասնակիցներն անդրադարձել են կանանց արդարադատության հասանելիության ճանապարհին առկա խոչընդոտների հաղթահարմանը, քննարկել ոլորտում ձևավորված լավագույն փորձն ու արդյունքները: Հատուկ ուշադրության են արժանացել իրավաբանական համայնքի ներկայացուցիչների համար նախատեսված մենթորության և «հավասարը հավասարին» (peer-to-peer) ձևաչափով փոխուսուցման ծրագրերի արդյունավետությունն ու դերը՝ գենդերային զգայուն արդարադատության հարցերը մշտապես օրակարգի առաջնահերթություն պահելու գործում:
Համաժողովի շրջանակում Արդարադատության ակադեմիայի պրոռեկտորը մասնակցել է նաև գենդերային հավասարության ապահովմանը և դատական համակարգում ուսուցման արդի մեթոդների կատարելագործմանը միտված մասնագիտական քննարկումներին:
