Ռ. Վալլենբերգի անվան մարդու իրավունքների և մարդասիրական իրավունքի ինստիտուտի եվրոպական գրասենյակի ներկայացուցիչների այցը Ակադեմիա
Մարտի 6-ին Արդարադատության ակադեմիայի ռեկտոր Սերգեյ Առաքելյանն ընդունեց Ռաուլ Վալլենբերգի անվան մարդու իրավունքների և մարդասիրական իրավունքի ինստիտուտի եվրոպական գրասենյակի տնօրեն Զուզանա Զալանովային և գրասենյակի փորձագետ, «Արդարադատության մատչելիություն» ծրագրի թիմի ղեկավար Ջոշ Աունսթեդին:
Ռեկտորը ողջունեց գործընկերներին՝ նշելով, որ նման հանդիպումներն ու քննարկումները նպաստում են համագործակցության զարգացմանը, նախանշված քայլերի իրականացմանը: Հանդիպման ընթացքում մանրամասն քննարկվեց նոր մշակվող դասընթացը, որը վերաբերում է մինչդատական վարույթում մարդու իրավունքների պաշտպանությանը: Զուգահեռաբար մշակվում է նաև համապատասխան ուղեցույց:
Նախատեսվում է առաջիկայում կազմակերպել նաև աշխատաժողով, որին կմասնակցեն դատավորներ, դատախազներ, քննիչներ, ովքեր կարող են հետագայում դասավանդել այս դասընթացը:
Դասընթացի փորձնական անցկացման հաջողության դեպքում նախատեսվում է այն ընդգրկել ուսուցման պարտադիր առարկայացանկում:
